Mumbai Crime News: मुंबई एअरपोर्टवरच्या टॉयलेटमधील कचऱ्याच्या डब्यात सापडलं मृत अर्भक, विमानतळावर एकच खळबळ
Mumbai Crime News: दौंडनंतर मुंबईतील छत्रपती शिवाजी महाराज आंतराष्ट्रीय विमानतळातील शौचालयाच्या कचऱ्याच्या डब्यात मृत अर्भक सापडलं आहे.
मुंबई: एकीकडे पुण्यातील दौंड शहरामध्ये एका बरणीमध्ये अर्भक आणि शरिराचे अवयव कचाऱ्याच्या ढिगाऱ्यामध्ये आढळल्याने खळबळ उडाली या घटनेचा तपास पोलिस करत आहेत, अशातच मुंबईतील छत्रपती शिवाजी महाराज आंतराष्ट्रीय विमानतळावर असलेल्या एका शौचालयाच्या कचऱ्याच्या डब्यात मृत अर्भक सापडल्यामुळे खळबळ उडाली. काल (मंगळवारी ता, 25 मार्च) रात्री हा प्रकार समोर आला आहे. अर्भकाला कोणीतरी कचऱ्याच्या डब्यात फेकून गेले आहे.
बाळ रडत असताना लोकांच्या लक्षात आलं आणि पोलिसांना कळवण्यात आले होते. पोलिसांनी या बाळाला ताब्यात घेऊन रुग्णालयात दाखल केले आहे. हे एक दिवसीय बाळ मृत असल्याची माहितीही समोर आली आहे. सहार पोलिसांनी या प्रकरणी अज्ञात व्यक्तीविरोधात गुन्हा दाखल करून तपास करत आहेत. आजूबाजूला असलेल्या CCTV मार्फत पोलीस आरोपीच्या शोध घेत आहेत. हे 1 दिवसाचे मृत अर्भक आहे. या प्रकरणाचा तपास मुंबई पोलिसांनी सुरू केला असून, विमानतळ परिसरातील सीसीटीव्ही फुटेज तपासले जात आहे. पोलिसांच्या अंदाजानुसार कोणीतरी बाळाला तेथे टाकून निघून गेले असावे. त्याचा मागोवा घेण्यासाठी विविध ठिकाणी चौकशी सुरू आहे. बाळाच्या आई-वडिलांचा शोध घेण्यासाठी पोलिसांनी परिसरातील रुग्णालये, महिलांसाठी असलेली निवासस्थाने तसेच विमानतळावरून प्रवास करणाऱ्या लोकांची माहिती तपासण्यास सुरुवात केली आहे. त्यासोबतच मुंबईतील अनाथालये आणि सामाजिक संस्थांकडूनही माहिती घेतली जात आहे.
दौंडमध्ये कचराकुंडीत बरणीमध्ये अर्भक अन् अवयव
दौंड शहरातील कचराकुंडीमध्ये अर्भक आणि मानवी शरीराचे अवयव आढळल्याने परिसरामध्ये काल (मंगळवारी) मोठी खळबळ उडाली. बोरावके नगरमध्ये प्राइम टाऊन हॉटेलच्या मागे असणाऱ्या कचऱ्याच्या ढिगाऱ्यामध्ये एका बरणीमध्ये एक मृत अर्भक आणि अवयवांच्या बरण्या एका नागरिकाला आढळल्या. त्यांनी तातडीने पोलिसांना संबंधित माहिती दिली आहे. पोलिसांनी पंचनामा करत रुग्णालय प्रशासनाची चौकशी करून अज्ञातांवर गुन्हा दाखल केला आहे.
कचराकुंडीत बॉक्समध्ये एका बाटलीत एक पुरुष जातीचे अर्भक होते, तर अन्य 11 बरण्यांमध्ये मानवी शरीराचे अवशेष होते, अशी माहिती समोर आली आहे. सापडलेल्या बॉक्सवर भंगाळे हॉस्पिटलचा उल्लेख असल्याने पोलिसांनी डॉक्टरांकडे चौकशी केली. अकरा बरण्यांमध्ये ऑपरेशन झाल्यानंतरचे अवयव ठेवल्याचे डॉक्टरांनी सांगितले. त्या बरण्यांवर रुग्णांची नावेही होती. त्यानंतर उपजिल्हा रुग्णालयाचे अधीक्षक डॉ. संदीप गुजर यांनी संबंधित बरण्या आणि त्यातील अवयवांची तपासणी केली. त्यात पुरुष जातीचे अर्भक असल्याचे पुढे आले. तसेच, रुग्णालयातील डॉक्टरांनी इतर अकरा बरण्यांवर असलेल्या रुग्णांच्या नावांच्या कागदपत्रांची फाइल पोलिसांना सादर केली आहे.
महत्त्वाच्या बातम्या
