मुंबई : राधेश्याम मोपलवार यांना पदच्युत केल्यानंतर भूषण गगराणी यांच्याकडे एमएसआरडीसीच्या उपाध्यक्ष आणि व्यवस्थापकीय संचालकपदाचा अतिरिक्त कार्यभार सोपवण्यात आला आहे. गगराणी हे सिडकोचे व्यवस्थापकीय संचालक आहेत. मोपलवार यांच्यावर झालेल्या भ्रष्टाचाराच्या आरोपांच्या पार्श्ववभूमीवर अत्यंत प्रामाणिक आणि कर्तव्यदक्ष अधिकारी अशी प्रतिमा असलेल्या भूषण गगराणी यांची निवड करण्यात आली आहे. सिडकोच्या व्यवस्थापकीय संचालकपदी राहून नवी मुंबई विमानतळाचं काम मार्गी लावण्यात त्यांचा मोठा वाटा आहे. विमानतळासाठी जमीन हस्तांतरणाची प्रक्रिया गगराणी उत्तमप्रकारे जाणतात. त्यामुळे मुंबई-नागपूर समृद्धी महामार्गाची जबाबदारी त्यांच्या पदरात पडल्याची शक्यता आहे.

राधेश्याम मोपलवार ईडी आणि सीबीआयच्या रडारवर

काय आहे प्रकरण? 'एबीपी माझा'च्या बातमीनंतर वरिष्ठ सनदी अधिकारी आणि समृद्धी महामार्ग प्रकल्पाचे प्रमुख अधिकारी राधेश्याम मोपलवार यांना चौकशीपर्यंत पदच्युत करण्यात आलं आहे. आता ते विविध तपास यंत्रणांच्या चौकशीच्या फेऱ्यात अडकणार असल्याची माहिती आहे. मोपलवारांवर सेटलमेंटचा आरोप होत आहे. मोपलवारांची वादग्रस्त ऑडिओ क्लीप खरी असल्याचा दावा मध्यस्थी सतीश मांगलेनी केला आहे. त्यामुळे मोपलवारांच्या अडचणीत आणखी वाढ होणार आहे. समृद्धी महामार्ग प्रकल्पाचे प्रमुख अधिकारी राधेश्याम मोपलवार यांचे वादग्रस्त फोन संभाषण समृद्धी महामार्गाला विरोध करणाऱ्या शेतकऱ्यांच्या व्हॉट्सअप ग्रुपवर व्हायरल झाले आहेत. या ऑडिओ क्लीपची सत्यता एबीपी माझाने तपासलेली नाही. ज्या समृद्धी महामार्गावरून सरकार आणि शेतकऱ्यांमध्ये रण सुरु आहे, त्याच महामार्गाची जबाबदारी असलेल्या एमएसआरडीसीचे उपाध्यक्ष आणि संस्थापकीय संचालक मोपलवार यांच्यावर एक गंभीर आरोप झाला आहे. धक्कादायक म्हणजे हा आरोप सेटलमेंटचा आहे. शेतकऱ्यांच्या मते या ऑडिओ क्लिपमध्ये मोपलवार आणि एक मध्यस्थ यांच्यात एका इमारतीच्या बांधकामावरून सेटलमेंट सुरु आहे. संबंधित बातम्या : ‘मोपलवारांसोबतची ‘ती’ ऑडिओ क्लीप खरी, तो आवाज माझाच’ एबीपी माझाचा गौप्यस्फोट, महामार्गात दलालांची ‘समृद्धी’?