माटुंग्यात फाईव्ह गार्डनजवळ मॅनहोलचं झाकण चोरीला गेल्याचा प्रकार काल उघडकीस आला, तर दुसरीकडे आज हिंदमाता ते सायन दरम्यान असलेल्या रस्त्यावरचे मॅनहोल रात्रीपासून उघडेच आहे. यामुळे दोन वाहनांचा अपघात झाल्याची माहिती आहे.
वॉर्ड अधिकारी या प्रकरणी पोलिसात तक्रार करणार आहेत. या मॅनहोलचं झाकण चोरीला गेल्याचं पालिकेचं म्हणणं आहे.
या परिसरात पावसात मोठ्या प्रमाणात पाणी साचतं. याच भागापासून काही अंतरावर गेल्या वर्षी डॉ. दीपक अमरापूरकर यांचा मॅनहोलमध्ये पडून वाहून गेल्याने मृत्यू झाला होता.
मॅनहोलचं झाकण उघडणाऱ्यांवर आता कारवाई
किमान दोन व्यक्तींनी विशिष्ट प्रकारचा 'आकडा' हा ठराविक पद्धतीने वापरल्यानंतर हे झाकण उघडता येतं. तसेच कामाच्या आवश्यकतेनुसार केवळ महापालिका कर्मचारीच हे झाकण उघडू शकतात. त्यामुळे काही समाजविघातक प्रवृत्ती मुद्दाम मॅनहोलचे झाकण उघडत असल्याचा पालिका अधिकाऱ्यांना संशय आहे.
हे झाकण उघडताना त्याच्या जवळ इशारा देणारा फलक वा झेंडा लावणे, तसेच महापालिकेचे कर्मचारी काम होईस्तोवर तेथे उभे असणे बंधनकारक आहे.