मुंबई : मुंबई विद्यापीठाच्या (Mumbai University) कालिना संकुलाला कंपाऊंड वॉल नसल्याने, कोणतीही योजना प्रस्तावित नसलेल्या ओसाड जागेवरील अतिक्रमणाचा प्रश्न नेहमी ऐरणीवर राहिला आहे. विद्यापीठाच्या कालिना कॅम्पसमधील अडीच एकर जागेवर ambit रियालटी डेव्हलपर्सने आपला बोर्ड लावला असून एसआरएच्या या प्रकल्पाचे अतिक्रमण या जागेवर झाले आहे. प्रकल्पाची जाहिरात आल्यानंतर विद्यापीठाला या अतिक्रमणासंदर्भात जाग आली आहे. विद्यापीठ प्रशासनाकडून या एसआरए प्रकल्पाला लीगल नोटीस जारी करण्यात आली असल्याची माहिती विद्यापीठाने दिली आहे.
दरम्यान विद्यापीठ प्रशासन या प्रकल्पाला एसआरएची मंजूरी मिळेपर्यंत आणि जाहिरात आल्यानंतर सुद्धा विद्यपीठ प्रशासन झोपले होते का? असा सवाल युवासेना सिनेट सदस्यांनी उपस्थित केला.
कुलगुरूंच्या बंगल्यामागील आणि विद्यापीठाच्या 300 चौरस मीटर क्षेत्रफळावर काही झोपडपट्ट्या मागील काही वर्षांत उभ्या राहिल्या आहेत. दरम्यान जून 2021 मध्ये एसआरए प्राधिकरणाकडे हा पूर्ण परिसर एसआरए प्रकल्प घोषित करण्यासाठी अर्ज करण्यात आला. दरम्यान ही जाहिरात प्रसिद्ध झाल्यापासून 30 दिवसांच्या आत हरकत घेण्यास मुदत ही जाहिरातीमध्ये नमूद करण्यात आली होती. त्याच काळात विद्यापीठ प्रशासनाकडून त्यावर हरकत नोंदविली गेली. मात्र, त्यावर कोणत्याही प्रकारची कारवाई करण्यात आली नाही.
त्यामुळे विद्यापीठाकडून सदर प्रकल्पाला लीगल नोटीस जारी करण्यात आली असल्याची माहिती कुलसचिव बळीराम गायकवाड यांनी दिली. सिनेट सदस्य प्रदीप सावंत यांनी सदर प्रकरण गुरुवारी झालेल्या मुंबई विद्यापीठाच्या सिनेट बैठकीत उघडकीस आणले. मुंबई विद्यापीठाच्या जागेचा परिसर अशाप्रकारे अतिक्रमणाच्या विळख्यात येत असताना शासनाकडून होणाऱ्या शासकीय संगीत महाविद्यालयासाठी मात्र मुंबई विद्यापीठाकडे जागा नाही यावर सावंत आणि इतर युवासेना सिनेट सदस्यांनी हरकत घेऊन प्रश्न उपस्थित केला.
मुंबई विद्यापीठाच्या हिवाळी सत्राच्या परीक्षेच्या तारखा जाहीर
मुंबई विद्यापीठाने 2021 च्या हिवाळी सत्र परीक्षेच्या तारखा जाहीर केल्या आहेत. अद्याप कॉलेज सुरू करण्याबाबत कोणताही निर्णय न झाल्याने या सत्रातील परीक्षा सुद्धा ऑनलाईन घेतल्या जाणार आहेत. ऑनलाईन परीक्षा घेतल्या जात असताना बहुपर्यायी प्रश्नपत्रिका मागील वर्षी प्रमाणे विद्यार्थ्यांना सोडवावी लागणार आहे.