Devendra Fadnavis: 'लोकप्रतिनिधीने मारहाण करणं योग्य नाही, सभापती निर्णय घेतील'; फडणवीसांनी संजय गायकवाडांच्या कँटिनमधील मारहाण प्रकरणावर दिली प्रतिक्रिया
Devendra Fadnavis: तिथून माहिती आली की भाजीला वास येत होता. परंतु मारहाण करणे योग्य नाही. लोकप्रतिनिधींने मारहाण करणे योग्य नाही, अशी प्रतिक्रिया मुख्यमंत्र्यांनी दिली आहे.
मुंबई : शिवसेना शिंदे गटाचे बुलढाण्याचे आमदार संजय गायकवाड यांनी आमदार निवास येथील कँटिनमध्ये मारहाण केल्याचा प्रकार काल रात्री (मंगळवारी, ता-8) समोर आला. निकृष्ट जेवण दिल्यानंतर आमदार संजय गायकवाड यांनी कँटीनमधील कर्मचाऱ्याला बेदम मारहाण केली. या घटनेनंतर त्यांनी मारहाण आणि एकंदरीत घडलेल्या घटनेवरती प्रतिक्रिया दिली आहे. दिलेलं जेवळ निकृष्ट नाही, तर सडलेलं जेवण होतं, त्यानंतरच माझी तेथील कर्मचाऱ्यांवर झालेली ती माझी प्रतिक्रिया होती, असं आमदार गायकवाड यांनी म्हटलं आहे. या प्रकरणावर विरोधकांनी संजय गायकवाड यांच्यावरती हल्लाबोल केला. दरम्यान राज्याचे मुख्यमंत्री देवेंद्र फडणवीस यांनी प्रतिक्रिया दिली आहे. मी या प्रकरणाची माहिती घेतली आहे. असं वर्तन योग्य नाही. तिथून माहिती आली की भाजीला वास येत होता. परंतु मारहाण करणे योग्य नाही. लोकप्रतिनिधींने मारहाण करणे योग्य नाही, अशी प्रतिक्रिया मुख्यमंत्र्यांनी दिली आहे.
फडणवीस नेमकं काय म्हणाले?
मी या प्रकरणाची माहिती घेतली आहे. असं वर्तन योग्य नाही. तिथून माहिती आली की भाजीला वास येत होता. परंतु मारहाण करणे योग्य नाही. लोकप्रतिनिधींने मारहाण करणे योग्य नाही. अशा मारहाणीमुळे लोकांमध्ये चुकीचा संदेश जातो. त्यामुळे सभापती यांनी याबाबत काय कारवाई करता येईल याचा निर्णय घ्यावा, अशी प्रतिक्रिया फडणवीसांनी दिली आहे.
घटनेवर जितेंद्र आव्हाडांची प्रतिक्रिया
कँटिनच्या कर्मचाऱ्याला मारहाण केलं हे योग्य नाही. आमदार म्हणून आमच्या माना खाली गेल्या. जेवण निकृष्ट दर्जाचे असते,
तरी त्यांच्यावर हात उचलणं योग्य नाही. कायद्याच्या कक्षेत हे नाही, आणि ते आमदार परमपूज्य प्रार्थनिय आहेत. काय बोलणार त्यांच्यावर, आमदार निवासातील जेवण तरी चांगलं ठेवा हे सांगून ठेवलं आहे. ही सरकारची जबाबदारी आहे. फाईव्हस्टारसारखं जेवण मिळतं असं नाही, खानावळ सारखं तरी किमान जेवण द्या अशी प्रतिक्रिया राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड यांनी दिली आहे.
अनिल परबांची घटनेवर तीव्र प्रतिक्रिया
एक आमदार बनियन आणि टॉवेलवर येतो आणि बॉक्सिंग करत असल्यागत एका सध्या माणसाला मारतो. अरे हिंमत असेल तर त्या खात्याच्या मंत्र्याला मारा.मुख्यमंत्री देवेंद्र फडणवीस यांची प्रतिमा क्लीन आहे आणि तुम्ही अशा आमदारचा पाठिंबा घेणार का? आपल्या विधिमंडळ कक्षात सदर विभाग येतो त्यामुळे तुम्ही त्याला निलंबित करा, अशा तीव्र शब्दात शिवसेना ठाकरे गटाचे आमदार अनिल परब यांनी प्रतिक्रिया दिली आहे.
महत्त्वाच्या बातम्या
