यवतमाळ जिल्ह्याच्या बाभूळगाव तालुक्यातील नांदुरा, पालोती, टाकलागव मांगूळ, पाणास विरखेड, वाटखेड (बु), वाटखेड (खु) गोंधळी, कीन्ही, मुबारपूर, राऊत सावंगी, हस्तपूर, गवंडी, खर्डा, येरणगाव, किन्ही, मांगसावंगी असा गावातील अंदाजे 4 हजार हेक्टरवरील शेतीचे नुकसान झाले आहे. यात शेतकऱ्याच्या शेतातील कापूस, सोयाबीन, तूर पीक डोळ्यात समोर उध्वस्त झाले असून शेती साहित्यही वाहून गेलंय. यात जमीन सुद्धा खरडून गेल्याने या भागाचे तत्काळ पंचनामे करून मदत द्यावी, अशी मागणी शेतकऱ्यांनी केली आहे.
Yavatmal Rain News : दोन दिवसाच्या पावसाने 24 हजार शेतकऱ्यांना फटका; 26 हजार हेक्टरवरील पिके बाधित
यवतमाळ जिल्ह्यात 29 आणि 30 जुलैला पडलेल्या मुसळधार पावसामुळे जिल्ह्यातील शेतीचे मोठे नुकसान झाले. 16 तालुक्यातील 447 गावातील 24 हजार शेतकऱ्यांच्या 26 हजार 88 हेक्टर शेतपिकांचे नुकसान झाल्याचा प्राथमिक अंदाज कृषी विभागाने व्यक्त केला असून नुकसानीचा आकडा हा पुन्हा वाढण्याची शक्यता आहे. सुरवातीला पावसाने खंड दिला. मात्र 29 आणि 30 जुलैला संततधार पाऊस पडल्याने नदी-नाल्या काठावरील पावसामुळे पूर येऊन आणि शेतात पाणी साचल्याने कापूस, सोयाबीन, तूर, उडीद, मूग तसेच इतर खरीप पिकांचे नुकसान झाले. अनेक ठिकाणी नाल्यांना पूर आल्याने शेतीमध्ये गाळ साचला असून काही भागात पिके पूर्णपणे पाण्याखाली वाहून गेली. महसूल व कृषी विभागाकडून पंचनामे सुरू करण्यात आले असून नुकसानग्रस्त शेतकऱ्यांना तातडीची आर्थिक मदत देण्याची मागणी होत आहे.
कापूस -14 हजार 923 हेक्टर नुकसान
सोयाबीन- 8 हजार 15 हेक्टर नुकसान
तूर- 2 हजार 790 हेक्टर नुकसान
बाधित शेतकरी- 24 हजार
एकूण नुकसान- 26 हजार 88 हेक्टर
बाधित गावे- 447