मुंबई : महाराष्ट्र विधान परिषदेच्या 9 जागांसाठी निवडणूक जाहीर (Maharashtra Vidhan Parishad Election 2026) करण्यात आली आहे. विधान परिषदेच्या 9 जागांसाठी नियमित निवडणूक तर एका जागेची पोटनिवडणूक पार पडणार आहे. भारत निवडणूक आयोगाकडून महाराष्ट्रातील विधान परिषद निवडणुकीचा कार्यक्रम जाहीर केला आहे. विधान परिषदेच्या 10 जागांसाठी 12 मे रोजी मतदान होणार आहे. या पार्श्वभूमीवर प्रत्येक पक्षात इच्छुकांची मोठी गर्दी दिसत आहे. इच्छुकांनी गाठीभेटी सुरु केल्याचं पाहायला मिळत आहे. अशातच आज राज्याचे माजी उपमुख्यमंत्री विजयसिंह मोहिते पाटील हे मुख्यमंत्री देवेंद्र फडणवीस यांची भेट घेण्यासाठी मंत्रालयात दाखल झाले होते. विजयसिंह मोहिते पाटील हे त्यांचे पुत्र रणजितसिंह मोहिते यांची पुन्हा विधान परिषदेवर वर्णी लागावी, यासाठी मुख्यमंत्र्यांच्या भेटीला आल्याची चर्चा सुरु आहे. यावेळी मंत्री राधाकृष्ण विखे पाटील हे विजयसिंह मोहिते पाटील यांच्या पाया पडल्याचं पाहायला मिळालं. 

आज राज्याचे माजी उपमुख्यमंत्री विजयसिंह मोहिते पाटील हे मुख्यमंत्री देवेंद्र फडणवीस यांची भेट घेण्यासाठी मंत्रालयात दाखल झाले होते. यावेळी त्यांच्यासोबत त्यांचे पुत्र रणजितसिंह मोहिते पाटील देखील होते. यावेळी मंत्री राधाकृष्ण विखे पाटील हे विजयसिंह मोहिते पाटील यांच्या पाया पडल्याचं पाहायला मिळालं. विजयसिंह मोहिते पाटील हे मुख्यमंत्र्यांच्या भेटीला आले होते. यावेळी, विखे पाटील मंत्रालयात दाखल असताना दोघांचीही भेट झाली. विजयसिंह मोहिते पाटील हे रणजीतसिंह मोहिते यांना पुन्हा विधान परिषदेवर वर्णी लागावी यासाठी मुख्यमंत्र्यांच्या भेटीला आल्याची चर्चा आहे. रणजितसिंह मोहिते पाटील यांची टर्म येत्या 13 मे रोजी संपत आहे.

विधान परिषदेतील 9 आमदारांचा कार्यकाळ संपणार

1. उद्धव ठाकरे (शिवसेना - उबाठा)

2. नीलम गोऱ्हे (शिवसेना)

3. शशिकांत शिंदे (राष्ट्रवादी - शरद पवार गट)

4. अमोल मिटकरी (राष्ट्रवादी - अजित पवार गट)

5. गोपीचंद पडळकर (भाजप)

6. रणजितसिंह मोहिते-पाटील (भाजप)

7. राजेश राठोड (काँग्रेस)

8. प्रवीण दटके (भाजप)

9. रमेश कराड (भाजप)

28 मतांचा कोटा आवश्यक

दरम्यान, विधान परिषदेचा एक आमदार निवडून येण्यासाठी 28 मतांचा कोटा आवश्यक आहे. महायुतीत भाजप (131 आमदार), एकनाथ शिंदे यांची शिवसेना (57 आमदार) आणि अजित पवार यांची राष्ट्रवादी (40 आमदार) असे बलाबल पाहता महायुतीचे 8 उमेदवार सहज निवडून येऊ शकतात. तर महाविकास आघाडीचे एकूण संख्याबळ 46 आहे. त्यामुळे त्यांचा केवळ एकच उमेदवार सहज निवडून येऊ शकतो. दुसऱ्या जागेसाठी त्यांना 10 मतांची जुळवाजुळव करावी लागेल, जे सध्याच्या स्थितीत कठीण दिसत आहे.

विधान परिषदेच्या निवडणुकीचा संपूर्ण कार्यक्रम- (Maharashtra Vidhan Parishad Election 2026)

निवडणुकीची अधिसूचना जारी करणे : 23 एप्रिल, 2026 

उमेदवारी अर्ज भरण्याचा शेवटचा दिवस: 30 एप्रिल 2026

उमेदवारी अर्जांची छाननी: 2 मे 2026 

उमेदवारी अर्ज मागे घेण्याची अंतिम तारीख: 4 मे 2026

मतदानाची तारीख: 12 मे 2026

मतदानाची वेळ: सकाळी 9 वाजेपासून ते संध्याकाळी 4 वाजेपर्यंत आहे.

मतमोजणी: 12 मे 2026 संध्याकाळी 5 वाजता

निवडणूक प्रक्रिया पूर्ण करण्याची अंतिम तारीख: 13 मे 2026