Tukaram Mundhe : मोठी बातमी! धडाडीचे IAS तुकाराम मुंढेंची बदली, 'या' महत्त्वाच्या खात्याच्या सचिवपदाची जबाबदारी, 20 वर्षात 23 बदल्यांचा विक्रम

Maharashtra IAS Transfer : गेल्या 20 वर्षांच्या कार्यकाळात तुकाराम मुंढे यांची ही 23 वी बदली आहे. त्यांच्या बदलीमुळे दिव्यांग कल्याण विभागातील खाबुगिरीला आळा बसेल अशी अपेक्षा व्यक्त केली जात आहे.

Tukaram Mundhe Transfer

Source : ABP Majha Digital

मुंबई : राज्यातील धडाडीचे आयएएस अधिकारी अशी ओळख असलेल्या तुकाराम मुंढेंच्या बदलीचे आदेश जारी करण्यात आले आहेत. तुकाराम मुंढे यांची असंघटीत कामगार विभागाच्या आयुक्तपदावरून बदली करण्यात आली असून ते आता राज्याच्या दिव्यांग कल्याण विभागाचे सचिव असतील. तुकाराम मुंढे यांच्यासोबत इतर चार अधिकाऱ्यांच्याही बदल्या करण्यात आल्या आहेत. 

तुकाराम मुंढे कोणत्याच सत्ताधाऱ्यांना झेपेनात? 20 वर्षात 23 वी बदली

प्रशासनात काम करताना नियमांवर बोट ठेवून काम करणारे तुकाराम मुंढे हे कोणत्याही सत्ताधाऱ्यांना पंसत नसल्याचं दिसून येतंय. राजकीय नेतृत्वाला, मंत्र्यांना आपल्या मनाप्रमाणे नियमबाह्य गोष्टी करण्यामध्ये तुकाराम मुंढे यांच्यासारखे अधिकारी अडथळे ठरतात. त्यामुळे नियमानुसार सर्वसाधारणपणे तीन वर्षात बदली होणे अपेक्षित असताना तुकाराम मुंढे मात्र सरासरी एक वर्षेच काम करताना दिसून येतात.

तुकाराम मुंढे हे 2005 बॅचचे अधिकारी असून गेल्या 20 वर्षांच्या कालावधीत त्यांची ही 23 वी बदली ठरली आहे. प्रशासनात काम करताना हा एक वेगळ्या प्रकारे विक्रमच असल्याचं दिसून येतंय.

Tukaram Mundhe Transfer : प्रशासनातील मुजोरी आणि खाबूगिरी संपवण्याचा प्रयत्न

तुकाराम मुंढे ज्या ठिकाणी जातात त्या ठिकाणच्या प्रशासनाला, कर्मचाऱ्यांना शिस्त लावण्याचा प्रयत्न करतात. सरकारी कार्यालयात उशीरा येणाऱ्या कर्मचाऱ्यांना त्याचा फटका बसतो. तसेच कार्यालयातील लाल फितीचा कारभार संपवण्यावर मुंढे यांचा भर असतो. महत्त्वाचं म्हणजे कोणत्याही राजकीय हस्तक्षेपाशिवाय ते काम करतात.

तुकाराम मुंढेंच्या कारभाराचा सर्वसामान्य जनतेला त्याचा फायदा होत असला तरी राज्यकर्ते आणि प्रशासनातील मुजोर कर्मचाऱ्यांना मात्र ते नकोसे असतात. त्यामुळेच मुंढे यांची काही दिवसांतही बदली झाल्याचं या आधी दिसून आलं.

लालफितीच्या कारभारातून मुक्तता

दिव्यांग कल्याण विभाग तसा दुर्लक्षित विभाग. मात्र तुकाराम मुंडे हे या खात्याचे सचिव म्हणून काम करणार आहेत. त्यामुळे आपल्या साध्यासुध्या कामासाठी मंत्रालयाच्या फेऱ्या मारणाऱ्या दिव्यांग बांधवांची प्रशासनाच्या लालफितीच्या कारभारातून सुटका होईल अशी अपेक्षा व्यक्त केली जात आहे.

Maharashtra IAS Transfer List : कोणत्या अधिकाऱ्याची बदली कुठे?

1. तुकाराम मुंढे (आयएएस: आरआर: 2005) विकास आयुक्त (असंघटित कामगार), मुंबई यांना सचिव, दिव्यांग कल्याण विभाग, मंत्रालय, मुंबई म्हणून नियुक्त करण्यात आले आहे.

2. नितीन काशीनाथ पाटील (आयएएस: एससीएस: 2007) व्यवस्थापकीय संचालक, महाराष्ट्र राज्य कापूस उत्पादक विपणन महासंघ, मुंबई यांना विशेष आयुक्त, राज्य कर, महाराष्ट्र, मुंबई म्हणून नियुक्त करण्यात आले आहे.

3. अभय महाजन (आयएएस: नॉन-एससीएस: 2007) विशेष आयुक्त, राज्य कर, महाराष्ट्र, मुंबई यांना व्यवस्थापकीय संचालक, महाराष्ट्र राज्य कापूस उत्पादक विपणन महासंघ, मुंबई म्हणून नियुक्त करण्यात आले आहे.

4. ओंकार पवार (आयएएस: आरआर: 2022) सहाय्यक जिल्हाधिकारी, इगतपुरी उपविभाग, नाशिक यांना मुख्य कार्यकारी अधिकारी, जिल्हा परिषद, नाशिक म्हणून नियुक्त करण्यात आले आहे.

5. आशा अफजल खान पठाण - सहसचिव, मुख्यमंत्री सचिवालय, नागपूर यांना महासंचालक, वनमती, नागपूर म्हणून नियुक्त करण्यात आले आहे आणि त्यांना सहसचिव, मुख्यमंत्री सचिवालय, नागपूरचा अतिरिक्त कार्यभार देण्यात आला आहे.