अजितदादांना खराब विमान चुकून दिलं की मुद्दाम? ठाण्यात VSR विमानाच्या प्रतिकृतीच दहन करत होळी साजरी, पोस्टर्सनं वेधलं लक्ष

ठाण्यात आज होळी दहनच्या माध्यमातून अजित पवार यांच्या विमान अपघाताबाबत शंका निर्माण करत अनेक प्रश्न उपस्थित करण्यात आले आहेत.

Thane News Ajit Pawar plane crash Holi

Source : Getty Images

Thane :  राज्याचे दिवंगत उपमुख्यमंत्री अजित पवार यांच्या विमान अपघातावर अनेक प्रश्नचिन्ह उपस्थित होत आहेत. अशातच ठाण्यात आज होळी दहनच्या माध्यमातून देखील विमान अपघाताबाबत शंका निर्माण करत अनेक प्रश्न उपस्थित करण्यात आले आहेत. ठाण्यातील चंदनवाडी परिसरात होळी दहनच्या माध्यमातून सामाजिक कार्यकर्ते महेश कदम यांच्या वतीने अजितदादा पवार यांना भावपुर्ण श्रद्धांजली म्हणून अजित पवार यांच्या VSR या अपघाती विमानाच्या प्रतिकृतीच दहन करण्यात येणार आहे. 

अजितदादांना खराब विमान चुकून दिलं की मुद्दाम?

या होळी दहनच्या माध्यमातून अजितदादांना खराब विमान चुकून दिलं की मुद्दाम, अजित पवारांचा अपघात धुक्याने झाला की धोक्याने झाला? असे प्रश्न उपस्थित करत रोहित पवार यांनी केलेल्या आरोपांच समर्थन करण्यात आले आहे. तसेच मनसे अध्यक्ष राज ठाकरे, खासदार संजय राऊत, जय पवार, रोहित पवार यांनी केलेल्या आरोपांचे आणि उपमुख्यमंत्री एकनाथ शिंदे यांनी अजित पवारांच्या अपघातानंतर व्हीएसआर कंपनीच्या विमानात कोणीच बसणार नाही या निर्णयाचे पोस्टर्स देखील लावण्यात आले आहेत. 

VSR चा मालक रोहित सिंहवर कारवाई करण्याची मागणी

राज्याचे दिवंगत उमुख्यमंत्री अजित पवारांच्या विमानाला 28 जानेवारीला अपघात (Ajit Pawar Plane Crash) झाला. या घटनेच्या 1 महिन्यानंतर विमान अपघाताचा प्राथमिक अहवाल समोर आला आहे. यामध्ये सुरुवातीला विमान झाडावर आदळलं. त्यानंतर जमिनीवर कोसळल्याचं सांगण्यात आलं आहे. दरम्यान, या अहवालानंतर अजित पवार यांचे पुत्र जय पवार यांनी एक धक्कादायक व्हिडीओ सोशल मीडियावर शेअर केला आहे. यामध्ये VSR चे मालक रोहित सिंह मुख्य पायलटच्या सीटवर उड्डाणादरम्यान झोपलेले असल्याचा दावा जय पवार यांनी केला आहे. 

माझ्या वडिलांना आपण गमावले. ही वेदना आयुष्यभर साथ देणार आहे. या व्हिडीओमध्ये VSR चे मालक रोहित सिंह मुख्य पायलटच्या सीटवर उड्डाणादरम्यान झोपलेले दिसत आहेत. आकाशात असताना असा निष्काळजीपणा असू शकत नाही. हे अत्यंत गंभीर आणि धक्कादायक आहे, असं जय पवार म्हणाले. मी DGCA ला ठामपणे मागणी करतो की, या प्रकरणात तात्काळ कठोर कारवाई व्हावी. संपूर्ण चौकशी होईपर्यंत VSR ची सर्व विमाने तात्काळ ग्राउंड करण्यात यावीत आणि रोहित सिंह यांना त्वरित अटक करून कठोर कायदेशीर कारवाई करण्यात यावी…ही एका मुलाची आर्तहाक आहे. माझ्या वडिलांसाठी आणि प्रत्येक प्रवाशाच्या सुरक्षिततेसाठी...असं जय पवार यांनी सोशल मीडियावर पोस्ट करत सांगितले. (Jay Pawar On Ajit Pawar Plane Crash)