Sunetra Pawar : सुनेत्रा पवारांकडे असलेल्या खात्याची उत्तरं त्या देणार नाहीत, तिन्ही खात्यांची जबाबदारी राष्ट्रवादीतील 'या' दिग्गज मंत्र्यांकडे
Sunetra Pawar : सुनेत्रा पवार यांच्याकडे क्रीडा युवा कल्याण, अल्पसंख्यांक आणि राज्य उत्पादन शुल्क अशी तीन खाती आहेत. त्यावर उत्तर देण्याची जबाबदारी राष्ट्रवादीतील इतर दोन नेत्यांवर सोपवण्यात आली आहे.
मुंबई : राज्याच्या अर्थसंकल्पीय अधिवेशनाच्या दरम्यान एक मोठी माहिती समोर आली आहे. उपमुख्यमंत्री सुनेत्रा पवार यांच्याकडे असलेल्या तीनपैकी एकाही खात्याची उत्तरं या अधिवेशनात त्या स्वतः देणार नाहीत. त्यांच्या खात्यांशी संबंधित प्रश्नांची उत्तरं देण्याची जबाबदारी इतर मंत्र्यांवर सोपवण्यात आल्याची माहिती आहे. क्रीडा आणि अल्पसंख्याक खात्याची उत्तरं देण्याची जबाबदारी मंत्री दत्तात्रय भरणे यांच्यावर देण्यात आली आहे. तर राज्य उत्पादन शुल्क खात्याशी संबंधित प्रश्नांची उत्तरं देण्याची जबाबदारी ही मंत्री हसन मुश्रीफ यांच्यावर सोपवण्यात आली आहे.
अजित पवार यांच्या अकाली निधनानंतर सुनेत्रा पवार यांनी उपमुख्यमंत्रीपदाची शपथ घेतली. उपमुख्यमंत्री सुनेत्रा पवार यांचं हे पहिलच अधिवेशन आहे. त्यामुळे सभागृहात त्या काय बोलणार याकडे सगळ्यांचं लक्ष होतं. मात्र त्यांच्या खात्याची जबाबदारी आता इतर मंत्र्यांकडे देण्यात आल्याने सुनेत्रा पवार सभागृहात बोलण्याची शक्यता कमी आहे.
अजित पवारांच्या निधनानंतर त्यांच्याकडे असलेली क्रिडा आणि युवा कल्याण, अल्पसंख्यांक खातं तसेच राज्य उत्पादन शुल्क खातं हे त्यांच्या पत्नी सुनेत्रा पवार यांच्याकडे देण्यात आलं. तर अर्थखातं हे स्वतः मुख्यमंत्री देवेंद्र फडणवीसांकडे गेलं.
पार्थ पवार राज्यसभेत जाणार
अजित पवारांचं 28 जानेवारी रोजी विमान अपघातात निधन झालं. त्यानंतर राज्यसभेत खासदार असलेल्या त्यांच्या पत्नी सुनेत्रा पवार यांनी 31 जानेवारी रोजी उपमुख्यमंत्रिपदाची शपथ घेतली. सुनेत्रा पवार यांची राष्ट्रवादीच्या अध्यक्षपदीही निवड करण्यात आली आहे. तर त्यांच्या जागेवर राज्यसभेत पार्थ पवार यांना पाठवण्यात येणार आहे.
मुंढवा घोटाळ्यात पार्थ पवारांना क्लीन चिट?
पुण्यातील मुंढवा जमीन गैरव्यवहार प्रकरणात मोठी अपडेट समोर आली आहे. या संबंधि नेमण्यात आलेल्या खारगे समितीचा अहवाल याच अधिवेशनात सादर केला जाणार असल्याची माहिती सूत्रांनी दिली. त्यामध्ये या प्रकरणात आतापर्यंत केलेल्या कारवाईचा अहवाल सादर होणार आहे. खारगे समितीचा अहवाल यापूर्वीच महसूलमंत्री चंद्रशेखर बावनकुळेंपुढे सादर करण्यात आला आहे. दरम्यान, मुंढवा जमीन घोटाळा प्रकरणात पार्थ पवार यांना क्लीन चिट मिळाल्याची माहिती सूत्रांनी दिली आहे.
दरम्यान अजित पवारांच्या अपघातानंतर व्हीएसआर विमान कंपनी चांगलीच वादात सापडल्याचं दिसतंय. डीजीसीएनं व्हीएसआरच्या 4 लिअरजेट विमानांना बंदी घातल्यानंतर उपमुख्यमंत्री एकनाथ शिंदेंनीही व्हीएसआर विमान न वापरण्याचा निर्णय घेतला. यासाठी शिवसेनेच्या नेत्यांनी शिंदेंना गळ घातल्याची माहिती आहे. त्यामुळे अधिवेशनादरम्यान संजय शिरसाट आणि रोहित पवार आमनेसामने आल्यानंतर रोहित पवारांनी शिरसाटांच्या निर्णयाचं स्वागत केलं. व्हीएसआरची विमानं अतिशय निकृष्ट दर्जाची असल्याचा आरोप रोहित पवारांनी केला आहे.
ही बातमी वाचा:
महत्त्वाच्या बातम्या
