बीड : घराजवळ राहणाऱ्या ओळखीच्या मुलाकडून होणाऱ्या त्रासाला कंटाळून 17 वर्षीय अल्पवयीन मुलीने आत्महत्या केल्याची धक्कादायक घटना परळीत घडली आहे. याप्रकरणी त्रास देणाऱ्या आरोपीला पोलिसांनी अटक केली आहे. दरम्यान, या घटनेमुळे परिसरात संताप व्यक्त केला जात आहे.
सविस्तर वृत्ते असे, की घराजवळ राहणारा तरूण अल्पवयीन मुलीचा सतत पाठलाग करून तिला त्रास देत होता. हा त्रास असह्य झाल्याने त्या मुलीने गळफास घेऊन आत्महत्या केली. ही घटना परळी शहरातील सावतामाळी नगर येथे उघडकीस आली. याप्रकरणी त्या रोडरोमिओवर विनयभंग आणि आत्महत्येस प्रवृत्त केल्याचा गुन्हा नोंदविण्यात आला.
29 वर्षाच्या मंगेश भास्करराव कोपनबैने हा तरूण तिला मागील वर्षभरापासून सतत त्रास देत होता. मंगेश नेहमी तिचा पाठलाग करून बोलण्यासाठी आग्रह धरत असे आणि मोबाईल नंबर मागून तिची छेड काढत होता. हा सततचा त्रास असह्य झाल्याने पीडितेने राहत्या घरी पंख्याला गळफास घेऊन आत्महत्या केली असे तिच्या वडिलांनी दिलेल्या फिर्यादीत नमूद केले आहे.
फिर्यादीवरून मंगेश कोपनबैने याच्यावर संभाजीनगर पोलीस ठाण्यात कलम 306, 354(ड) यासह पोक्सो कायद्यान्वये गुन्हा दाखल करण्यात असून त्याला अटक करण्यात आली आहे. मंगेश परळी मध्ये या मुलीच्या घराशेजारी राहतात त्यामुळे स्वाभाविकपणे त्या मुलीचे मुलीच्या कुटुंबीयांची आणि मंगेश चांगली ओळख होते. मात्र मंगेश त्या मुलीला त्रास द्यायचा यापूर्वीसुद्धा पीडित मुली आपल्या वडिलांना याची माहिती दिली होती, त्यानंतर समज देऊन सुद्धा मंगेश काही केल्या ऐकत नव्हता. अखेर महेशच्या त्रासाला कंटाळून मुलीने आपले जीवन संपवले असं तिच्या वडिलांनी तक्रारीत म्हटले आहे.