Sindhudurg Accident : सिंधुदुर्ग (Sindhudurg) जिल्ह्यात एक धक्कादायक घटना घडली आहे. खास मुंबईहून लग्नाची पत्रिका देण्यासाठी गावी आलेल्या युवतीचा अपघातात दुर्दैवी मृत्यू झाला आहे. तळवडे आंब्रड मार्गावर हा अपघात झाला आहे. फोंडाघाट गांगोवाडी येथील निकीता दिलीप सावंत हिचा मृत्यू झाला आहे. तर तिचा भाऊ वैभव सावंत किरकोळ जखमी झाला आहे.
दुचाकी घेऊन वैभव आणि निकीता भाऊ बहीण हे आंब्रडहून फोंडाघाटकडे येत होते. कसवण तळवडे येथील तीव्र उतारावर समोरून येणाऱ्या एस.टी. बसला बाजू देताना दुचाकी रस्त्यालगतच्या खडीवर घसरली. त्यात दोघेही खाली पडले. निकीताच्या डोक्याला गंभीर मार लागल्याने ती जखमी झाली, तर वैभव सावंत हा किरकोळ जखमी झाला.
अपघातानंतर एस.टी. बस चालक, वाहक आणि प्रवाशांनी तत्परता दाखवत दोघांनाही आंब्रड येथील डॉ. खटावकर यांच्या रुग्णालयात दाखल केले. प्राथमिक उपचारानंतर त्यांना कणकवली उपजिल्हा रुग्णालयात हलवण्यात आले. मात्र तेथे वैद्यकीय अधिकाऱ्यांनी निकीताला मृत घोषित केले. फोंडाघाट गांगोवाडी येथील दिलीप सावंत यांची कन्या निकीता सावंत ही काही दिवसांपूर्वीच मुंबईहून आपल्या लग्नाची पत्रिका देण्यासाठी गावी आली होती.
3 फेब्रुवारीला होणार होते लग्न
आपल्या सख्या भावासह मामाकडे पत्रिका देऊन परत येत असताना हा अपघात झाला. तिचे लग्न येत्या 3 फेब्रुवारीला होणार होते. पत्रिका छापून वाटप सुरू असतानाच काळाने हा निर्दयी घाव घातल्याने सावंत कुटुंबावर दुःखाचा डोंगर कोसळला आहे. या अपघातप्रकरणी एस.टी. बस चालक कृष्णा नेरकर यांनी कणकवली पोलीस ठाण्यात तक्रार दाखल केली असून, दुचाकीस्वारावर हयगयीने वाहन चालवून मृत्यूस का ठरल्याप्रकरणी गुन्हा नोंद करण्यात आला आहे.
वाशिममध्ये दुचाकीला अज्ञात वाहनाची धडक, एकाचा मृत्यू
वाशिममध्ये दुचाकीला अज्ञात वाहनाने धडक दिल्याची घटना घडली आहे. या धडकेत दुचाकी वरील एकजण ठार झाला आहे. तर एकजण गंभीर जखमी झाला आहे. वाशिम ते पुसद मार्गावर एका दुचाकीला अज्ञात वाहनाने धडक देत अपघात केल्याची घटना घडली आहे. या अपघातात दुचाकी वरील एक जन जागीच ठार झाला तर एक गंभीर जखमी झाला असून, जखमीला तात्काळ वाशीमच्या जिल्हा सामान्य रुग्णालयात दाखल करण्यात आले आहे. दुचाकीला ट्रॅक्टरने धडक दिल्याची चर्चा असून, दुचाकीला धडक देताच धडक देणारे वाहन अपघात स्थळावरून पसार झाले होते.
महत्वाच्या बातम्या: