Sanjay Raut: बोलबच्चन प्रेरणा आम्ही मोदींकडून घेतली, ते समस्त जगातील बोलबच्चन महामंडळाचे अध्यक्ष आहेत; संजय राऊतांचा फडणवीसांच्या वक्तव्यावर पलटवार
Sanjay Raut: संजय राऊत म्हणाले की, फडणवीस स्वत: ज्युनिअर बोलबच्चन आहेत. त्यांना अजून ते जमत नाही ते उघडे पडतात. मात्र मोदी दररोज उघडे पडत आहेत. लोक त्यांच्यावर विश्वास ठेवायला तयार नाहीत
शिवसेना पक्षप्रमुख उद्धव ठाकरे यांनी नुकत्याच पार पडलेल्या शिवसेनेच्या वर्धापन दिनामध्ये बोलताना भाजपला जाहीर आव्हान दिले होते. त्यांनी किल मी म्हणत भाजपला अंगावर येण्याचं ओपन चॅलेंज देत सोबत येताना ॲम्बुलन्स घेऊन या असा सुद्धा आव्हान दिलं होतं. यानंतर मुख्यमंत्री देवेंद्र फडणवीस यांनी पलटवार करतानाच बोलबच्चनगिरी करणाऱ्यांना उत्तर देत नसल्याचे म्हटलं होतं. यानंतर आता शिवसेना खासदार संजय राऊत यांनी फडणवीस यांच्या बोलबच्चन वक्तव्यावर खोचक टोला लगावला आहे.
आम्हाला ते बोलबच्चन म्हणत असतील, तर ती मोदींकडून प्रेरणा घेतली
संजय राऊत म्हणाले की, आम्हाला ते (फडणवीस) बोलबच्चन म्हणत असतील, तर ती मोदींकडून प्रेरणा घेतली आहे. ते समस्त जगातील बोलबच्चन महामंडळाचे अध्यक्ष आहेत. जगाच्या बोलबच्चन करणाऱ्यांच्या ज्या काही संघटना आहेत त्यांचे ते अध्यक्ष आहेत. पूर्वी आमचे त्यांच्याशी संबंध होते, त्यामुळे काही गुण आले असतील, असे म्हणत संजय राऊत यांनी पलटवार केला. मोदी बोलबच्चन असले तरी ट्रम्प यांनी भारत पाक युद्धबंदी आम्ही केली असे 18व्यांदा म्हणूनही त्यांच्या वक्तव्यांवर अजूनही मोदींची दातखिळी बसली असल्याची टीका सुद्धा संजय राऊत यांनी केली.
फडणवीस स्वत: ज्युनिअर बोलबच्चन
संजय राऊत म्हणाले की, फडणवीस स्वत: ज्युनिअर बोलबच्चन आहेत. त्यांना अजून ते जमत नाही ते उघडे पडतात. मात्र मोदी दररोज उघडे पडत आहेत. लोक त्यांच्यावर विश्वास ठेवायला तयार नाहीत, असा हल्लाबोलही त्यांनी केला.
एकनाथ शिंदे हे लिंबू मिरची उपमुख्यमंत्री आहेत
संजय राऊत पुढे म्हणाले की, मराठी अस्मितेच्या खपली काढण्यासाठी अमित शाह येथे येतात आणि बोलतात. मराठी एकजुटीचा आणि मराठी माणसाचा अपमान अमित शाह यांनी केला. एकनाथ शिंदे हे लिंबू मिरची उपमुख्यमंत्री आहेत. त्यांच्या गटाने स्पष्ट केलाय की आम्ही अमित शाहांचे बूट चाटे आहोत. एकनाथ शिंदे यांचा परिचय अमित शाह यांच्यापेक्षा आम्हाला जास्त माहिती असल्याचा टोलाही राऊत यांनी लगावला.
इतर महत्वाच्या बातम्या
महत्त्वाच्या बातम्या
