Sanjay Gaikwad : आमदार निवासातील कॅन्टीनच्या चालकाचा परवाना निलंबित, अन्न व औषध प्रशासनाकडून कारवाई
Sanjay Gaikwad Controversy : संजय गायकवाड मारहाण प्रकरणानंतर अन्न व औषध प्रशासनाने आकाशवाणी आमदार उपाहारगृहावर कारवाई केली आहे.
मुंबई : आमदार संजय गायकवाड मारहाण प्रकरणी मोठी अपडेट समोर आली आहे. आकाशवाणी आमदार निवासातील कॅन्टीनमधे निकृष्ट जेवण दिल्याप्रकरणी अजंता केटरर्सचा परवाना निलंबित करण्यात आला आहे. अन्न आणि औषध प्रशासनाने ही कारवाई केली. निकृष्ट जेवण मिळाल्याप्रकरणी आमदार संजय गायकवाडांनी कॅन्टीनमधील कर्मचाऱ्याला मारहाण केली होती. त्यानंतर या कॅन्टीनमधील पदार्थाची एफडीएने तपासणी केली. त्यानंतर हा परवाना निलंबित करण्यात आला.
आमदार संजय गायकवाड यांनी ज्या आमदार निवासच्या कॅन्टीनमध्ये मारहाण केली होती, तिथे अन्न आणि औषध प्रशासन अर्थात एफडीएचं पथक दाखल झालं. एफडीएच्या अधिकाऱ्यांकडून आकाशवाणी आमदार निवासाच्या कँटीनमधील संपूर्ण स्टोअर रूमची तपासणी करण्यात आली. यावेळी त्यांनी खाद्यपदार्थ आणि तेलाच्या बाटल्यांचे सॅम्पल गोळा केले. हे सगळे नमुने सील करून फॉरेन्सिक लॅबला पाठवण्यात आले. तपासणी दरम्यान स्टोअर रूमचं ऑडिटही करण्यात आलं. संपूर्ण अहवाल लवकरच सादर केला जाणार आहे.
आमदार गायकडांची कर्मचाऱ्याला मारहाण
नेहमी वादाच्या भोवऱ्यात असणारे शिंदेंच्या शिवसेनेचे आमदार संजय गायकवाड यांनी गुंडगिरीचा नमुना दाखवला, तोही थेट लोकप्रतिनिधींचं वास्तव्य असलेल्या आमदार निवासात. आकाशवाणी आमदार निवासातल्या कॅन्टीनमध्ये गायकवाडांना निकृष्ट जेवण मिळालं. त्यामुळे संतापलेल्या गायकवाडांनी थेट कॅन्टीन कर्मचाऱ्याला बेदम मारहाण केली. त्यांच्या राड्याचा व्हिडीओ समोर आल्यानंतर विरोधकांनी टीकेची झोड उडवली.
मारहाणीवेळी संजय गायकवाड हे चक्क बनियन आणि टॉवेलवर होते, यावरही विरोधकांनी आक्षेप घेतला. हा सत्तेचा माज असल्याचा आरोप विरोधकांनी केला. ठाकरेंचे आमदार अनिल परब यांनी विधान परिषदेत हा मुद्दा उपस्थित करत गायकवाडांच्या निलंबनाची मागणी केली. ही गंभीर बाब असल्याचं सांगत मुख्यमंत्री देवेंद्र फडणवीस यांनी त्यांच्यावर अध्यक्षांनी योग्य ती कारवाई करण्याचा निर्णय घ्यावा, असं मत व्यक्त केलं.
पण इतकं सगळं होऊनही संजय गायकवाडांचा उद्दामपणा कायम असल्याचं दिसून आलं. झालेल्या कृत्याचा पश्चाताप नसल्याचं स्पष्ट करत ही आपली शिवसेना स्टाईल आहे असं गायकडवाडांनी सांगितलं. त्यानंतर गायकवाड यांनी विधानसभेचे अध्यक्ष राहुल नार्वेकरांची भेट घेतली आणि कॅन्टीनच्या निकृष्ट दर्जाच्या जेवणाची तक्रार केली.
दरम्यान, संजय गायकवाडांची ही कृती योग्य नसून त्यांना समज दिली आहे असं उपमुख्यमंत्री एकनाथ शिंदे म्हणाले. तर दुसरीकडे संजय गायकवाड प्रकणावरून उद्धव ठाकरे यांनी वेगळीच शंका व्यक्त केली. हा मुख्यमंत्र्यांना बदनाम करण्याचा प्रकार आहे, त्यांनी सावध राहिलं पाहिजे, असा सल्ला ठाकरेंनी दिला.
ही बातमी वाचा:
महत्त्वाच्या बातम्या
