अहमदनगर : यशस्विनी महिला ब्रिगेडचे अध्यक्ष रेखा जरे यांच्या हत्याकांडमधील प्रमुख सूत्रधार असलेला आरोपी बाळ बोठे याला अहमदनगरच्या पोलिसांनी जेरबंद करण्यात आलं. बाळ बोठे यांना हैदराबाद येथून अटक करण्यात आली आहे. बाळे बोठे ज्या रूममध्ये थांबला होता त्या रुमला बाहेरून कुलूप लावण्यात आले होते, अशी माहिती अहमदनगरचे पोलीस अधीक्षक यांनी पत्रकार परिषदेत ही माहिती दिली. तसेच बाळ बोठे यांच्या खिशात सुसाईड नोट सापडली होती. त्या सुसाईड नोटमध्ये आत्महत्या करणार असल्याचा उल्लेख होता. तसेच त्यांचा नैसर्गिक किंवा अपघाती मृत्यू झाल्यास कोणाला संपर्क करावा, यासंदर्भातील माहिती सुसाईड नोटमध्ये देण्यात आली होती, असंही अहमदनगरच्या पोलीस अधीक्षकांनी पत्रकार परिषदेत बोलताना सांगितलं.
रेखा जरे यांची 30 नोव्हेंबर रोजी हत्या करण्यात आली होती. हत्या झाल्यानंतर सुपा पोलीस ठाण्यामध्ये गुन्हा दाखल करण्यात आला. त्यानंतर पोलिसांनी तातडीने तपास करत मारेकऱ्यासह पाच आरोपींना अटक केली. या आरोपींकडे चौकशी केल्यानंतर मुख्य सूत्रधार असलेल्या बाळ बोठे यांनी सुपारी देऊन ही हत्या केल्याची माहिती पुढे आली. बाळ बोठेला अटक करण्यासाठी पोलिसांनी पाच पथके तैनात करू विविध जिल्ह्यांमध्ये छापे देखील टाकले. मात्र बाळ बोठे यांना अटक करण्यात पोलिसांना अपयश आले.
बाळ बोठेला जेरबंद करण्यासाठी 5 दिवसांचं विशेष ऑपरेशन
अखेर हैदराबाद येथे बाळ बोठे असल्याची खात्रीशीर माहिती पोलिसांना मिळाली आणि त्यानंतर पोलिसांनी बाळ बोठे यांना हैदराबाद येथील एका हॉटेलमधून अटक केली. इतकेच नाही तर बाळ बोठे यांना मदत करणाऱ्या इतर पाच जणांना देखील पोलिसांनी जेरबंद केले. विशेष म्हणजे ज्या रूम मध्ये बाळ बोठे होते त्या रुमाल बाहेरून कुलूप लावण्यात आले होते. मात्र तरी देखील पोलिसांनी बाळ बोठे यांना जेरबंद केलं आहे. या अटकेसाठी पोलिसांनी 5 दिवस विशेष ऑपरेशन केले. या प्रकरणात पोलिसांनी आत्तापर्यंत एकूण 11 आरोपींना अटक केली आहे. तब्बल 102 दिवसानंतर पोलिसांनी बाळ बोठेला अटक केलीय.
रेखा जरे हत्याकांड घटनाक्रम
- 30 नोव्हेंबर रोजी अहमदनगर-पुणे महामार्गावर जातेगाव फाटाजवळ रेखा जरे यांची निर्घृण हत्या करण्यात आली. त्यानंतर सुपा पोलिस ठाण्यात गुन्हा दाखल करण्यात आला.
- अवघ्या 18 तासात फिरोज शेख, ज्ञानेश्वर शिंदे आणि आदित्य चोळके यांना पोलिसांनी अटक केली. त्यानंतर 24 तासात सर्व 5 आरोपींना अटक केले.
- बाळ बोठे यांना सुपारी दिल्याची कबुली आरोपींनी पोलिसांसमोर दिली.
- बाळ बोठे यांना अटक करण्यासाठी 5 पोलिसांची पथके तैनात करण्यात आली.
- नाशिक, पुणे, सोलापूर अशा विविध जिल्ह्यात पोलीसांनी छापे टाकले. मात्र बाळ बोठे यांना पकडण्यात अपयश आलं.
- 8 डिसेंबर रोजी बाळ बोठे यांच्या जामिनासाठी अहमदनगर जिल्हा सत्र न्यायालयात जामिनासाठी अर्ज दाखल.
- 16 डिसेंबर रोजी बाळ बोठे यांचा अहमदनगर जिल्हा सत्र न्यायालयात जमीन अर्ज फेटाळला.
- त्यांनतर औरंगाबाद उच्च न्यायालयाने देखील जमीन अर्ज फेटाळला.
- 26 फेब्रुवारी रोजी 5 आरोपींविरोधात दोषारोपपत्र पारनेर न्यायालयात दाखल करण्यात आले.
- 5 मार्च रोजी रेखा जरे याच्या मुलाचे पोलिस अधीक्षक कार्यासमोर 1 दिवसीय उपोषण केलं.
- अखेर 102 दिवसांनंतर बाळ बोठे यांना एका हॉटेलमधून घेतले ताब्यात. त्यासोबत त्याला मदत करणाऱ्या 5 जणांना देखील अटक झाली.
- रेखा जरे हत्याकांड प्रकरणात मुख्य सूत्रधार बाळ बोठे यांच्यासह 11 आरोपी अटकेत आहेत.
महत्त्वाच्या इतर बातम्या :