नाशिक जिल्ह्यात अतिवृष्टीचा इशारा देत हवामान विभागाने रेड अलर्ट जारी केल्यानंतर जिल्हा प्रशासन सतर्क झाले आहे. त्यानुसार जिल्हा आपत्ती व्यवस्थापन प्राधिकरणाचे मुख्य कार्यकारी अधिकारी रोहित कुमार राजपूत यांनी आज मालेगाव, नांदगाव, बागलाण, इगतपुरी, कळवण, त्र्यंबकेश्वर, पेठ आणि सुरगाणा तालुक्यातील सर्व शाळा, महाविद्यालये आणि अंगणवाड्यांना सुट्टी जाहीर करण्याचे आदेश दिले आहेत. तसेच नागरिकांच्या सुरक्षिततेच्या दृष्टीने या तालुक्यांमध्ये उद्या भरणारे आठवडी बाजार, जत्रा, मेळावे आणि गर्दीचे सर्व कार्यक्रमही स्थगित करण्याचे निर्देश देण्यात आले आहेत. प्रशासनाने नागरिकांनी अत्यावश्यक कामाशिवाय घराबाहेर पडू नये आणि अधिकृत सूचनांचे पालन करावे, असे आवाहन केले आहे.
Nashik Rain : मोसम नदीला पूर, मुल्हेर येथील पूल पाण्याखाली, अनेक गावांचा संपर्क तुटला
नाशिक जिल्ह्यातील सटाणा तालुक्यात मुसळधार पावसाने जनजीवन विस्कळीत झाले आहे. काल मध्यरात्रीपासून हरणबारी धरण परिसरात सुरू असलेल्या जोरदार पावसामुळे मोसम नदीला पूर आला असून मुल्हेर येथील मोसम नदीवरील पूल पूर्णपणे पाण्याखाली गेला आहे. त्यामुळे मांगीतुंगी, माळीवाडे, शेवरे, देवठाण, जैतापूरसह अनेक गावांचा संपर्क तुटला आहे. तसेच गुजरातला जोडणाऱ्या मुल्हेर–हरणबारी मार्गावरील नाल्यावर पाणी आल्याने वाहतुकीलाही अडथळा निर्माण झाला आहे. प्रशासनाने नागरिकांना आणि पर्यटकांना नदी-नाल्यांपासून दूर राहण्याचे आवाहन केले आहे.
नाशिक जिल्ह्यात दोन दिवसांपासून सुरू असलेल्या मुसळधार पावसामुळे निसर्गाचे भरभरून दान लाभलेल्या नाशिकच्या चांदवड तालुक्यातील राजदेरवाडी व इंद्राईवाडी डोंगर रांगावरील सर्व धबधबे प्रवाहित झाले.. तर नदी व नाले दुथडी वाहताहेत..छोट्या मोठ्या धरणावरून पाणी ओसंडून वाहू लागले असून डोंगरांनी हिरवा शालू परिधान केल्याने निसर्ग सौंदर्य अधिकच खुलून गेले आहे. ढग अक्षरक्ष : डोंगरावर उतरून येत असल्याने आल्हाददायक वातावरण निर्माण झाले आहे.