Pune News : पुण्यातील कॉंग्रेसचे कसबा पेठचे आमदार रविंद्र धंगेकर (Ravindra Dhangekar) हे मतदारांना दिवाळी फराळाचे वाटप करुन प्रलोभीत करत आहेत असा आरोप भाजप कार्यकर्त्यांनी केला आहे. रविंद्र धंगेकरांकडून वाटप करण्यासाठी निघालेला दिवाळी फराळाचा (Diwali snacks) टेम्पो भाजपच्या (BJP) कार्यकर्त्यांनी अडवली आहे. त्यानंतर पुण्यातील समर्थ पोलीस ठाण्यात हा फराळाचा टेम्पो नेण्यात आला आहे. याप्रकरणी भाजपकडून धंगेकरांच्या विरोधात गुन्हा दाखल करण्यात आला आहे.
धंगेकर यांच्यावर गुन्हा दाखल
भाजपने तक्रार केल्यानंतर आमदार रविंद्र धंगेकरांच्या विरोधात गुन्हा दाखल करण्याची प्रक्रिया सुरु झाली आहे. रविंद्र धंगेकरांच्या विरोधात गुन्हा दाखल करुन कारवाई करण्यात येईल असं पोलीस उपायुक्त संदीप गील यांनी स्पष्ट केलं होतं. त्यानंतर आता धंगेकर यांच्यावर गुन्हा दाखल झाला आहे. रविंद्र धंगेकर यांच्या हिंदमाता प्रतिष्ठानच्या वतीनं दिवाळी फराळाचे वाटप करण्यात येत होते. यानंतर भाजपने ही बाब निवडणूक आयोगाच्या लक्षात आणून दिल्याची माहिती पुण्याचे भाजप प्रवक्ते पुष्कर तुळजापुरकर यांनी दिली.आचारसंहितेचा भंग होत असल्याचे विद्यमान आमदारांना समजत नाही का? असा सवालही तुळजापुरकर यांनी केला आहे. बिनदास्त तुम्ही दिवाळी फराळ वाटत आहेत. तुम्ही पडणार आहेत, म्हणून तुम्ही हे सगळं करताय का? असा सवालही तुळजापुरकर यांनी केला आहे. रविंद्र धंगेकर हे कसबा पेठ विधानसभा मतदारसंघाचे आमदार आहेत. मार्च 2023 ला झालेल्या पोटनिवडणुकीत त्यांनी ही जागा जिंकली होती. जी भाजपच्या विद्यमान आमदार मुक्ता टिळक यांच्या निधनामुळे रिक्त झाली होती.
सर्वच राजकीय पक्षांकडून प्रचाराला सुरुवात
दरम्यान, विधानसभा निवडणुकीसाठी राज्यात आचारसंहिता लागू झाली आहे. त्यामुळं सर्वच राजकीय पक्षांनी प्रचाराला सुरुवात केली आहे. मतदारांना आपल्या वाजूनं वळवण्यासाठी राजकीय नेते प्रयत्न करताना दिसत आहेत. अशातच भाजपनं आज आपल्या 99 उमेदवारांच्या नावांची घोषणा केली आहे. दरम्यान, काँग्रेस, राष्ट्रवादी काँग्रेस शरद पवार गट, राश्ट्रवादी काँग्रेस अजित पवार गट, शिवसेना ठाकरे गट ाणि शिवसेना शिंदे गट यांनी अद्याप उमेदवारांच्या नावांची घोषणा केली नाही. उद्या उमेदवारांच्या नावांची घोषणा होण्याची शक्यता वर्तवली जात आहे. मिळालेल्या माहितीनुसार, उद्या महाविका आघाडीची संयुक्त पत्रकार परिषद होणार आहे. यामध्ये जागावाटप झालेला निर्णय जाहीर करण्याची शक्यता आहे.
महत्वाच्या बातम्या: