बीड : मेगा भरतीमध्ये मराठा आरक्षणाचा फायदा उमेदवारांना होणार असे आश्वासन सरकारने दिले होते. मात्र नुकत्याच जाहिर झालेल्या 342 जागांसाठीच्या भरतीत एसईबीसीसाठी पर्यायच नसल्याने मराठा समाजातील विद्यार्थ्यांना आरक्षणाचा फायदा मिळणार कसा? असा प्रश्न उपस्थित झाला होता. यामुळे मराठा समाजातील विद्यार्थ्यांना आरक्षणाचा लाभ घेता येत नसल्याचे वृत्त एबीपी माझाने समोर आणल्यानंतर एमपीएससीला जाग आली आहे. आज महाराष्ट्र लोकसेवा आयोगाने परिपत्रक जाहीर करून तशी तरतूद एमपीएससीच्या अधिकृत पोर्टलवर केली आहे. आता मराठा विद्यार्थ्यांना 'एसईबीसी' पर्याय खुला झाला असला तरी अद्याप आठ टक्के जागांचा प्रश्न मात्र कायम आहे.

342 जागांसाठीच्या भरतीच्या जाहिरातीतील विविध पदांसाठी आरक्षणाचा लाभ घेण्यासाठी जी माहिती अपलोड करायची आहे, ती माहिती भरली जात नसल्याने मराठा समाजातील विद्यार्थी बुचकळ्यात पडले होते.

मोठ्या प्रतिक्षेनंतर एमपीएससीने 342 जागांसाठी जाहिरात काढली. ही जाहिरात प्रकाशित होऊन सहा दिवस झाले आहेत. मात्र मराठा समाजातील विद्यार्थ्यांना आरक्षणाच्या कोट्यातून फॉर्म भरण्याची व्यवस्थाच नव्हती. एमपीएससीच्या साईटवर अद्याप सामाजिक व शैक्षणिक मागास प्रवर्गासाठीची माहिती भरता येत नव्हती. यात आता एमपीएससीने सुधारणा केल्या आहेत.

16 टक्के आरक्षण असतानाही आठ टक्केच फायदा?
नोकरी भरतीच्या जाहिरातीनंतर अनेक विद्यार्थी आता फॉर्म भरण्यासाठी गर्दी करत आहेत. या भरतीचा फॉर्म भरण्यासाठी इतर समाजातील मुलांसाठी त्यांच्या वेगळ्या प्रवर्गाची सोय या साईटवर करण्यात आली होती. मात्र मराठा समाजातील मुलांना साईटवर आपला प्रवर्ग बदलता येत नव्हता. याची माहिती घेण्यासाठी अनेक विद्यार्थ्यांनी आयोगाकडे तक्रारी केल्या होत्या. त्यांना ई-मेलही केले होते. यात आता एमपीएससीने सुधारणा केल्या आहेत. मात्र मराठा समाजाला 16 टक्के आरक्षण असतानाही या जाहिरातीवर नजर टाकल्यावर आठ टक्के इतकाच फायदा मराठा समाजातील मुलांना होणार आहे असे दिसते.

एमपीएससी भरतीत मराठा समाजासाठी राखीव जागा

पद                                               एकूण जागा                  एसईबीसी

उपजिल्हाधिकारी                                    40                         04
पोलीस उप अधीक्षक                             34                         03
सहायक पोलीस आयुक्त
सहायक संचालक                                   16                         01
(वित्त व लेखा सेवा)
तहसीलदार                                            77                         06
उप शिक्षणाधिकारी                                25                         02
(राज्य शिक्षण सेवा)
कक्ष अधिकारी                                      16                         01
सहायक गट विकास अधिकारी              11                         01
नायब तहसीलदार                                 113                       08