Maharashtra Voter List : मतदारवाढीवरून विरोधकांनी रान उठवलेले असतानाच राज्यात 14 लाख नव्या मतदारांची भर, 4 लाख नावे वगळली, जाणून घ्या A टू Z माहिती

अभिषेक मुठाळ | 19 Sep 2025 09:23 AM (IST)

Maharashtra Voter List : महाराष्ट्रात सात महिन्यांत 14.71 लाख नव्या मतदारांची भर पडली आहे. आता राज्यातील मतदारसंख्या 8.84 कोटींवर पोहोचली आहे.

Maharashtra Voter List

Maharashtra Voter List : लोकसभा (Lok Sabha Election) आणि विधानसभा निवडणुकांदरम्यान (Vidhan Sabha Election) अवघ्या सहा महिन्यांत 40.81 लाख मतदारांची वाढ झाल्याबाबत विरोधकांकडून अनेक प्रश्नचिन्ह उपस्थित केले जात आहेत. आता विधानसभा निवडणुकीनंतर अवघ्या सात महिन्यांत राज्यात आणखी 14.71 लाख नव्या मतदारांची भर पडली आहे. विशेष म्हणजे, ही वाढ आगामी स्थानिक स्वराज्य संस्थांच्या निवडणुकांवर थेट परिणाम करणारी ठरणार आहे.

मतदार यादीत मोठी वाढ

27 नोव्हेंबर 2024 ते 30 जून 2025 या कालावधीत राज्यातील मतदारांची संख्या 9,70,25,119 वरून 9,84,96,626 इतकी झाली आहे. म्हणजेच एकूण 18,80,553 नव्या मतदारांनी नोंदणी केली आहे. याचदरम्यान, 4,09,046 जुन्या मतदारांची नावे वगळण्यात आली असून, अंतिमतः एकूण 14,71,507 मतदारांची वाढ झालेली आहे. गेल्या निवडणुकांदरम्यान मतदार यादीतील आकडेवारीवर आक्षेप घेणाऱ्या विरोधकांनी मात्र या नवीन वाढीव मतदारांविषयी अद्याप कोणतीही अधिकृत तक्रार निवडणूक आयोगाकडे नोंदवलेली नाही.

1 जुलैपर्यंतची यादीच स्थानिक निवडणुकांसाठी अंतिम

"पूर्वी स्थानिक स्वराज्य संस्थांच्या निवडणुकांसाठी विधानसभा निवडणुकीतील मतदार यादी वापरण्याचा विचार होता. मात्र, आता 1 जुलै 2025 पर्यंत अद्ययावत केलेली यादीच अंतिम मानण्यात येणार आहे. कारण मतदार नोंदणी ही एक सतत सुरू असणारी प्रक्रिया आहे," अशी माहिती राज्य निवडणूक आयोगाच्या अधिकाऱ्यांनी दिली आहे.

घरबदलामुळेही मोठ्या प्रमाणावर नोंदणी

या नव्या मतदारांपैकी 1.96 लाख मतदार हे घरबदलामुळे म्हणजेच एका मतदारसंघातून दुसऱ्या मतदारसंघात स्थलांतर झाल्यामुळे नव्याने नोंदले गेले आहेत. यामध्ये सर्वाधिक वाढ पुणे (32,031), ठाणे (27,386), आणि मुंबई उपनगर (25,831) या जिल्ह्यांमध्ये झाली आहे.