Maharashtra Breaking LIVE: देश-विदेशातील महत्त्वाच्या बातम्यांचा आढावा फक्त एका क्लिकवर...

15/07/2026 09:37:02

पुण्यात निलेश घायवळची टोळी पुन्हा एकदा सक्रिय?

पुण्यात निलेश घायवळची टोळी पुन्हा एकदा सक्रिय झालीय का हा प्रश्न उपस्थित होतोय. कारण काल कोथरुड मधे ज्या अमित शिंदे वर कोयत्याने वार करण्यात आला तो निलेश घायवळच्या विरोधात दाखल करण्यात आलेल्या एका गुन्ह्यातील फिर्यादी आहे. बनावट कागदपत्रांच्या आधारे निलेश घायवळने अमित शिंदे यांच्या कोथरुड मधील मोबाईल दुकानातून सीम कार्ड घेतले होते. पोलिस तपासात ही बाब लक्षात आल्यानंतर अमित शिंदेच्या विरोधात गुन्हा दाखल करण्यात आला होता. त्याच अमित शिंदेवर काल कोयत्याने हल्ला करण्यात आला. हा हल्ला वैयक्तिक कारणातून झाल्याचं पोलीसांच म्हणणं आहे. मात्र या हल्ल्याला निलेश घायवळच्या विरोधात दिलेल्या तक्रारीची पार्श्वभूमी आहे. निलेश घायवळ हा सप्टेंबर महिन्यात परदेशात पळून गेला असून परदेशातुन तो टोळी चालवतो आहे का असा प्रश्न उपस्थित केला जातोय.

15/07/2026 09:25:28

रेल्वेच्या तिकीट आरक्षणात आता बदल होणार…

रेल्वेच्या तिकिटाचे आरक्षण करताना अनावश्यक पॉपअप्स, कॅप्चा आणि लांबणाऱ्या प्रक्रियेमुळे प्रवाशांना मोठ्या त्रासाला सामोरे जावे लागते. आा मात्र हा त्रास कमी करण्यासाठी रेल्वेकडून आयआरटीसीच्या तिकिट बुकिंग सुविधेत महत्त्वाचे बदल करण्यात येणार आहेत. तिकीट बुकिंग अधिक सोपे आणि सुरक्षित व्हावे म्हणून आयआरटीसीच्या संकेतस्थळाचे सुधारित बीटा व्हर्जन तयार करण्यात आले आहे. हे नवे संकेतस्थळ लवकरच प्रवाशांसाठी उपलब्ध होणार असल्याची माहिती रेल्वे प्रशासनाकडून निवेदनाद्वारे देण्यात आली आहे. नुकतीच जयपूर येथील मालविय नॅशनल इन्स्टिट्यूट ऑफ टेक्नॉलॉजी येथील विद्यार्थ्यांनी आयआरटीच्या संकेतस्थाळावरील त्रुटी निदर्शनास आणून दिल्या होत्या. त्यानंतर रेल्वेकडून संकेतस्थळ सुधारासाठी पाऊले उचलण्यात आली. रेल्वेने 15 जुलैपर्यंत आयआरटीसीचे संकेतस्थळ सुधारण्याचे आश्वासन दिले होते. त्यासाठी जयपूर येथे आयआरटीसी आणि रेल्वे सूचना प्रणाली केंद्राच्या (सीआयआरएस) अधिकाऱ्यांनी मालविय नॅशनल इन्स्टिट्यूट ऑफ टेक्नॉलॉजीच्या विद्यार्थ्यांसमोर आयआरटीसीच्या संकेतस्थळाचे नवीन बीटा आवृत्ती सादर करून त्यांचा अभिप्राय मागवला.

15/07/2026 09:20:00

पर्यटकांवर हल्ला करणाऱ्या आरोपीना आज न्यायालयात हजर केले जाणार

पर्यटकांवर हल्ला करणाऱ्या आरोपीना आज न्यायालयात हजर केले जाणार

इगतपुरी तालुक्यातील भावली धरण परिसरात पर्यटनसाठी गेलेल्या पर्यटकांवर गावगुंडानी पाठलाग करून हल्ला केला

याप्रकरणी 9 संशयित आरोपीना ग्रामीण पोलिसांनी अटक केली आहे

या सर्व आरोपीना आज इगतपुरी न्यायालयात हजर केले जाणार

15/07/2026 09:07:03

शिंदे शिवसेनेच्या आंदोलनानंतर गोसेखुर्दच्या कालव्यातून पाणी सोडलं

समाधानकारक पाऊस नं पडल्यानं यावर्षी भंडारा जिल्ह्यातील भात उत्पादक शेतकरी अडचणीत सापडला आहे. एल निनोचा प्रभाव असल्यानं गोसेखुर्द धरणातून केवळ पिण्यासाठी पाणी सोडण्याचे निर्देश भंडारा जिल्हाधिकाऱ्यांनी दिलेले आहेत. मात्र, पावसाअभावी भंडारा जिल्ह्यातील पवनी तालुक्यासह लाखांदूर तालुक्यातील भात उत्पादक शेतकरी अडचणीत सापडल्यानं गोसेखुर्द धरणाच्या उजव्या कालव्यावरील पंप हाऊसवर शिंदे शिवसेनेचे पवनी तालुका प्रमुख जितेंद्र इखार आणि उप जिल्हा प्रमुख किशोर पंचभाई यांच्या नेतृत्वात दोन दिवसांपूर्वी शेतकऱ्यांनी अधिकाऱ्यांना घेराव घालून ठिय्या आंदोलन करण्यात आलं होतं. शेतकऱ्यांची मागणी लक्षात घेऊन अखेर गोसेखुर्द धरण प्रशासनानं डाव्या आणि उजव्या कालव्यातून पाणी सोडायला सुरुवात केली आहे. या पाण्यामुळे पवनी तालुक्यातील भात उत्पादक शेतकऱ्यांना मोठा दिलासा मिळाला आहे.

15/07/2026 09:06:42

छत्रपती संभाजीनगर शहरात विद्यार्थ्यांच्या सुरक्षेचा प्रश्न पुन्हा एकदा ऐरणीवर

छत्रपती संभाजीनगर शहरात विद्यार्थ्यांच्या सुरक्षेचा प्रश्न पुन्हा एकदा ऐरणीवर आला आहे. शाळकरी विद्यार्थ्यांची वाहतूक करणारा रिक्षाचालक मद्यधुंद अवस्थेत असल्याचा कथित व्हिडिओ सोशल मीडियावर व्हायरल झाला आहे. हा व्हिडिओ शहरातील शहागंज परिसरातील एका पेट्रोल पंपावरील असल्याचे सांगितले जात आहे. व्हिडिओ व्हायरल झाल्यानंतर संबंधित रिक्षाचालकावर तातडीने कारवाई करून अटक करण्याची मागणी नागरिकांकडून होत आहे.

15/07/2026 08:09:38

पुणे मुंबई रेल्वे रद्द झाल्याने ई शिवाई बसच्या फेऱ्या एसटी महामंडळाकडून वाढवल्या

पुणे मुंबई दरम्यान दररोज 130 ई शिवाई बस फेऱ्या सुरू करण्यात आल्या आहेत

लोणावळा कर्जत जवळ दरड कोसळल्याने रेल्वे सेवावर परिणाम होऊन अनेक गाड्या रद्द झाल्या आहेत

एसटीने प्रवास करणाऱ्या प्रवाशांची संख्या वाढल्याने दररोज 80 ते 90 फेऱ्या असणारी ई शिवाई बस 130 फेऱ्या होणार आहेत

15/07/2026 08:08:22

मुंबई गोवा राष्ट्रीय महामार्गावर रात्री कोसळली दरड

मुंबई गोवा राष्ट्रीय महामार्गावर रात्री कोसळली दरड .....

पोलादपूर जवळील कशेडी घाटात धामणदिवी गावाजवळ दरड कोसळल्याची घटना

सद्यःस्थितीत मातीचा कोसळलेला भाग हटविण्यात न आल्याने मुंबईकडून गोवा कडे जाणाऱ्या लेन वरूनच दुहेरी वाहतूक सुरू

दरड कोसळल्याने वाहतूक धिम्या गतीने

15/07/2026 08:08:03

आठवडाभरात पाऊस बरसला नाही तर दुबार पेरणीचे संकट

बुलढाणा जिल्ह्यात जवळपास सहा लाख 50 हजार हेक्टर वर पेरणीचे उद्दिष्ट होतं त्यापैकी 70 टक्के पेरण्या आटोपल्या असून पिके ही उगवली आहेत.जिल्ह्यात वार्षिक सरासरी 761.5 मिमी पाऊस बरसतो मात्र यंदा आतापर्यंत फक्त 187.7 मिमी पाऊस बरसला आहे. सरासरीच्या तुलनेत जिल्ह्यात फक्त 24% पाऊस आतापर्यंत बरसला आहे. जिल्हाभरात पेरणीनंतर गेल्या दहा दिवसांपासून पावसाने दांडी मारल्यामुळे उगवलेली पिके आता सुकू लागली आहेत त्यामुळे संपूर्ण पेरणीच धोक्यात आली आहे . अनेक भागात तर अद्यापही पेरणी पूरक पाऊस न झाल्याने पेरण्याही खोळंबल्या आहेत. जुलै चा अर्धा महिना संपला तरीही जिल्ह्यातील अनेक भागात अद्यापही पेरण्या न झाल्यामुळे शेतकरी पुन्हा अडचणीत सापडला आहे. त्यामुळे शेतकऱ्यांचे डोळे पुन्हा एकदा आभाळाकडे लागले आहेत. विशेष म्हणजे गेल्या आठ जुलैपासून जिल्हाभरात पावसाचा एक थेंबही पडला नाही. ज्या शेतकऱ्यांकडे सिंचनाची व्यवस्था आहे त्यांनी पेरणी केलेल्या शेताला कृत्रिमरीत्या पाणी देण्याचं सुरू केलेल आहे. आगामी चार ते पाच दिवसात पाऊस बरसला नाही तर जिल्हाभरात शेतकऱ्यांवर दुबार पेरणीचे संकट ओढवण्याची शक्यता आहे.

15/07/2026 07:56:48

Worli News: वरळी NSCI Dome मृत्यू प्रकरणात मोठा खुलासा; मृत्यू झालेल्या 28 वर्षीय विधी पदवीधराच्या फॉरेन्सिक अहवालात ड्रग्ज आणि अल्कोहोलचं सेवन झाल्याची पुष्टी

Worli News: वरळी NSCI Dome मृत्यू प्रकरणात मोठा खुलासा, वरळीतील NSCI Dome येथे जून महिन्यात झालेल्या टेक्नो म्युझिक इव्हेंटनंतर मृत्यू झालेल्या 28 वर्षीय विधी पदवीधराच्या फॉरेन्सिक अहवालात MDMA (ड्रग) आणि अल्कोहोलचे सेवन झाल्याची पुष्टी झाली आहे.

फॉरेन्सिक अहवालानंतर ताडदेव पोलिसांनी तपासाचा वेग वाढवत ड्रग्सचा पुरवठा करणाऱ्या रॅकेटचा शोध सुरू केला आहे.

मृताच्या मित्रांना पुन्हा चौकशीसाठी बोलावण्यात येणार असून, त्यांचे कॉल रेकॉर्ड, मोबाईल डेटा आणि WhatsApp चॅट्सचीही तपासणी केली जात आहे.

प्राथमिक तपासानुसार, मृताने कार्यक्रमस्थळी प्रवेश करण्यापूर्वीच MDMAचे सेवन केले असावे, असा पोलिसांचा संशय आहे.

या प्रकरणात इव्हेंट मॅनेजमेंट कंपनीच्या CEO आणि वरिष्ठ व्यवस्थापकाविरोधात निष्काळजीपणामुळे मृत्यूचा गुन्हा दाखल करण्यात आला असून, त्यांची चौकशी करून नोटीसवर सोडण्यात आले आहे.

दरम्यान, या घटनेनंतर मुंबईतील मोठ्या म्युझिक इव्हेंट्सच्या परवानगी प्रक्रियेवर आणि सुरक्षा व्यवस्थेवर पुन्हा प्रश्नचिन्ह उपस्थित झाले आहे.

या प्रकरणी ताडदेव पोलिस अधिक तपास करत आहेत.

15/07/2026 07:55:18

Mira-Bhayandar News: मीरा रोडमध्ये एन. एल. डालमिया शाळेच्या इमारतीच्या टॉप फ्लोअरला आग

Mira-Bhayandar News: मीरा रोड येथील हरे कृष्णा मंदिराजवळ असलेल्या एन. एल. डालमिया शाळेच्या इमारतीच्या टॉप फ्लोअरला आज सकाळी साडेसहा वाजण्याच्या सुमारास अचानक आग लागली. आग लागलेल्या मजल्यावर थिएटर, विज्ञान प्रयोगशाळेतील साहित्य तसेच बॅटऱ्या ठेवण्यात आल्या होत्या. त्यामुळे काही क्षणांतच आगीने रौद्र रूप धारण केले आणि परिसरात धुराचे मोठे लोट पसरले.

आगीची माहिती मिळताच मीरा-भाईंदर महापालिकेच्या अग्निशमन दलाच्या अनेक गाड्या घटनास्थळी दाखल झाल्या. अग्निशमन जवानांनी तत्काळ कारवाई करत आगीवर नियंत्रण मिळवले असून, सध्या कूलिंगचे काम सुरू आहे. प्राथमिक माहितीनुसार, शॉर्ट सर्किटमुळे आग लागल्याचा संशय व्यक्त केला जात आहे. मात्र, आगीचे नेमके कारण तपासानंतरच स्पष्ट होणार आहे.

15/07/2026 07:44:40

Bhandara News: ऑर्डरन्स फॅक्टरी परिसरात दहशत माजविणाऱ्या वाघाला मध्यरात्री केलं जेरबंद

Bhandara News: भंडाऱ्याच्या जवाहरनगर ऑर्डनन्स फॅक्टरी परिसरात मागील सहा महिन्यांपासून वाघानं चांगलीचं दहशत माजवली होती. ऑडनस फॅक्टरी परिसरातील साहुली, पेवठा, लोहारा, राजेदहेगाव, कवडशी, कोंढी या गावांच्या परिसरात हा वाघ अनेकांना बघायला मिळत असल्यानं परिसरातील नागरिकांमध्येही चांगलीचं भीती निर्माण झाली होती. सध्या खरीप हंगामात सुरू असल्यानं शेतशिवारात जाण्यापासून नागरिक भीत होते. त्यामुळं या वाघाचा बंदोबस्त करण्याची मागणी जोर धरली होती. मागील आठवडाभरापासून वन विभागाच्या पथकानं या परिसरात मोठा बंदोबस्त तैनात करून वाघावर नजर ठेवली होती. मध्यरात्री वाघ शॉर्प शुटरच्या निशाणासमोर आला आणि त्याला डॉट मारून बेशुद्ध करण्यात आलं. अखेर सहा महिन्यांपासून दहशत पसरविणाऱ्या वाघाला वन विभागांना जेरबंद केल्यानं परिसरातील नागरिकांनी सुटकेचा नि:स्वास सोडला आहे.

15/07/2026 07:43:49

Mumbai-Goa Highway Accident: मुंबई गोवा महामार्गावर अपघात, अपघातात तीन जण जागीच ठार

Mumbai-Goa Highway Accident: मुंबई गोवा महामार्गावर अपघात, अपघातात तीन जण जागीच ठार

लांजा येथे झाला अपघात

मुंबईच्या दिशेने जाणारा क्रेटा कारची डंपरला मागून धडक

15/07/2026 07:27:30

Sangli Crime: तासगाव तालुक्यातील मणेराजुरीतील सराफ दुकान फोडणाऱ्या चोरट्याला एलसीबीकडून अटक; सात लाखांचा मुद्देमाल जप्त

Sangli Crime: तासगाव तालुक्यातील मणेराजुरीतील सराफ दुकान फोडून 2 किलो 734 ग्रॅम वजनाचे चांदीचे दागिने लंपास करणाऱ्या चोरट्याला सांगली स्थानिक गुन्हे अन्वेषणच्या पथकाने अटक केली. आरोपीकडून 6 लाख 92 हजार 80 रुपयांचा ऐवज हस्तगत करण्यात आला. मणेराजुरी येथील राहुल विलास कदम यांचे सराफ दुकान 8 रोजी मध्यरात्रीच्या सुमारास चोरट्याने फोडून आतील चांदीचे दागिने लंपास केले होते. या प्रकरणी तासगाव पोलिस ठाण्यात फिर्याद नोंदविण्यात आली होती. पथकातील पोलिस अंमलदार सागर टिंगरे, दरिबा बंडगर आणि सुनील जाधव यांना मदनभाऊ पाटील बालोद्यानाजवळ एकजण चोरीचे दागिने घेऊन विक्रीसाठी येणार असल्याची माहिती मिळाली. दुचाकीवरून जमदाडे हा बालोद्यान परिसरा थांबला. कर्मचाऱ्यांनी त्यास ताब्यात घेतले. त्याच्या सॅकमध्ये 6 लाख 32 हजार 30 रुपयांचे चांदीचे दागिने मिळून आले. पोलिस चौकशीत संशयिताने मणेराजुरी येथील महालक्ष्मी ज्वेलर्सच्या दुकानात दागिने चोरल्याची कबुली दिली

15/07/2026 07:26:24

Aashadhi Ekadashi 2026: चंद्रभागा सफाईसाठी आता इंजीनियरिंग कॉलेजचे विद्यार्थी वाळवंटात

Aashadhi Ekadashi 2026: ढरपूरला येणारा वारकरी हा पहिल्यांदा चंद्रभागेत स्नान करतो आणि मगच देवाच्या दर्शनाला जात असतो. प्रशासनाकडून यात्रेपूर्वी चंद्रभागा सफाईसाठी विशेष मोहीम राबवली जात असून आता प्रशासनाच्या मदतीला स्वेरी इंजीनियरिंग कॉलेजची मुले आणि मुली मदतीला धावली आहेत. वास्तविक चंद्रभागा पात्रामध्ये खूप मोठ्या प्रमाणात घाण असून वारकऱ्यांकडून जुने कपडे आणि इतर घाण पात्रामध्ये टाकली जाते. प्रशासनाकडूनही अजून जास्तीचे कचराकुंडी लावणे आवश्यक असल्याचे अपेक्षा सफाईला आलेल्या मुलांनी बोलून दाखवली असून पवित्र चंद्रभागा आणि वाळवंटाला देखील आपले घर समजावे आणि तसेच स्वच्छता इथे ठेवावी असे आवाहनही या मुलांनी वारकऱ्यांना केले आहे. आज सकाळपासून नदीपात्रातून खूप मोठ्या प्रमाणात कचरा या इंजिनिअरिंगच्या मुलांनी गोळा केला असून यात्रेपूर्वी यात्रेदरम्यान आणि यात्रेनंतर आम्ही सातत्याने चंद्रभागा आणि वाळवंट सफाईला येणार असल्याचे त्यांनी सांगितले आहे. आज या स्वेरी इंजीनियरिंग कॉलेजच्या जवळपास दीडशे मुला मुलींनी या सफाई अभियानात सहभाग घेतला आहे.

15/07/2026 07:25:22

Nagpur Crime: लग्नाला कुटुंबीयांनी विरोध केल्यानं निराशा, प्रेमीयुगुलाचा विष प्राशन करत आत्महत्येचा प्रयत्न, 21 वर्षीय तरुणाचा मृत्यू, तरुणीची प्रकृती गंभीर

Nagpur Crime: नागपूरच्या वानाडोंगरी परिसरात प्रेमसंबंधाचा अत्यंत दुर्दैवी शेवट समोर आला आहे. लग्नाला दोन्ही कुटुंबीयांनी विरोध केल्याने निराश झालेल्या प्रेमीयुगुलाने विष प्राशन करून आत्महत्येचा प्रयत्न केला. उपचारादरम्यान 21 वर्षीय तरुणाचा मृत्यू झाला असून तरुणीची प्रकृती गंभीर आहे. तिच्यावर रुग्णालयात उपचार सुरू आहे.

* मृत तरुणाचे नावे 21 वर्षीय विशाल जावडे असे आहे. विशाल हा मंडप डेकोरेशनचे काम करत होता तसेच ऑटो रिक्षाही चालवत होता.
* गेल्या चार वर्षांपासून त्याचे त्याच परिसरात राहणाऱ्या 20 वर्षीय तरुणीसोबत प्रेमसंबंध होते. दोघांनाही विवाह करायचा होता आणि त्यांनी आपल्या कुटुंबीयांसमोर ही इच्छा व्यक्त केली होती.
* मात्र, दोन्ही कुटुंबीयांनी या विवाहाला विरोध केल्याचे सांगितले जात आहे.
* रविवारी या मुद्द्यावरून दोन्ही कुटुंबांमध्ये वाद झाला. त्यानंतर सोमवारी दुपारी दोघेही वानाडोंगरी ते संगम गाव मार्गावरील एका मोकळ्या मैदानात गेले आणि सोबत आणलेले विषारी द्रव्य प्राशन केले.
* विषाचे प्रमाण जास्त असल्याने विशालची प्रकृती घटनास्थळीच गंभीर झाली. रस्त्याने जाणाऱ्या नागरिकांनी दोघांना तातडीने शालिनीताई मेघे रुग्णालयात दाखल केले.
* मात्र, रात्री सुमारे 11 वाजण्याच्या सुमारास उपचारादरम्यान विशालचा मृत्यू झाला. तरुणीची प्रकृती अद्याप गंभीर असून तिच्यावर उपचार सुरू आहेत.
* या प्रकरणाचा पुढील तपास एमआयडीसी पोलीस करत आहेत.

15/07/2026 07:23:47

Nagpur Rain Updates: जुलै महिन्याच्या मध्यावधीत पोहोचून देखील समाधानकारक पाऊस न झाल्यानं नागपूरकर उकाड्याने हैराण

Nagpur Rain Updates: जुलै महिन्याच्या मध्यावधीत पोहोचून देखील समाधानकारक पाऊस न झाल्याने नागपूरकर उकाड्याने हैराण आहेत...

- गेल्या 24 तासात नागपूरात 35.8 अंश तापमानाची नोंद झाली आहे..

- जुलै महिना सर्वाधिक पावसाचा मानला जातो.. त्यामुळे तापमान कमी असतो.. यंदा मात्र अल निनो चा मोठा फटका बसला आहे..

- पुढचे 3 - 4 दिवस विदर्भाला पावसाची प्रतीक्षा करावी लागणार आहे..

- पावसाच्या उसंतीमुळे शेतकरी मात्र हवालदिल झाले आहे.. त्यांच्यावर दुबार पेरणीचे संकट निर्माण झाले आहे..

15/07/2026 07:23:04

Maharashtra Rains: मराठवाड्यात पावसाची पुन्हा एकदा दडी; बळीराजावर दुबार पेरणीचं संकट

Maharashtra Rains: मराठवाड्यात पावसाने पुन्हा एकदा दडी मारल्याचा फटका आता थेट खरीप हंगामाला बसताना दिसत आहे. जुलैचा अर्धा महिना उलटून गेला तरी मराठवाड्यात केवळ 64 टक्के पेरणी झाली आहे. गेल्या वर्षी याच काळात 91 टक्के पेरणी पूर्ण झाली होती. त्यामुळे दुबार पेरणीचं संकट आणि धूळपेरणी वाया जाण्याची भीती शेतकऱ्यांसमोर उभी ठाकली आहे.

मराठवाड्यातील जिल्हानिहाय पेरणी

छत्रपती संभाजीनगर एकूण क्षेत्र : 6.42 लाख हे. पेरणी : 4.76 लाख हे.

जालना एकूण क्षेत्र : 6.52 लाख हे. पेरणी : 4.55 लाख हे.

बीड एकूण क्षेत्र : 8.00 लाख हे. पेरणी : 4.11 लाख हे.

नांदेड एकूण क्षेत्र : 7.62 लाख हे. पेरणी : 4.30 लाख हे.

परभणी एकूण क्षेत्र : 5.48 लाख हे. पेरणी : 3.60 लाख हे.

हिंगोली एकूण क्षेत्र : 4.90 लाख हे. पेरणी : 3.20 लाख हे.

धाराशिव एकूण क्षेत्र : 5.46 लाख हे. पेरणी : 2.64 लाख हे.

लातूर एकूण क्षेत्र : 5.68 लाख हे. पेरणी : 2.52 लाख हे.

15/07/2026 07:19:51

Nagpur News: नागपुरात पोलीस बंदोबस्तातून दुचाकीस्वाराचा पळण्याचा प्रयत्न, तरुण जखमी

Nagpur News: नागपुरातील प्रताप नगर चौकावरील काल रात्रीची घटना. प्रताप नगर चौकावर वाहनांची तपासणी करण्यासाठी पोलिसांचा बंदोबस्त लागला असताना दुचाकीवरील एक तरुण पोलिसांपासून पळण्याचा प्रयत्न करत होता. पोलिसांनी त्याला नाकाबंदी दरम्यान थांबवण्याचा प्रयत्न केला असता तो बळजबरीने पुढे निघून जाण्याचा प्रयत्न करत असताना पोलिसांनी आधी त्याला काठ्यांचा प्रसाद दिला. त्यानंतर ही तो चुकीच्या दिशेने दुचाकी पळवून नेण्याच्या प्रयत्नात स्वतः कारवर धडकला आणि जखमी झाला.

Maharashtra Breaking LIVE Updates: राज्यासह देश-विदेशातील महत्त्वाच्या बातम्यांचा आढावा फक्त एका क्लिकवर...

Maharashtra Breaking LIVE: राज्यासह देश-विदेशातील महत्त्वाच्या बातम्यांचा आढावा फक्त एका क्लिकवर...

पार्श्वभूमी

मराठवाड्यातील जिल्हानिहाय पेरणी