एक्स्प्लोर

माढ्यात शिंदेंचं कमबॅक! शिंदे सावंत साठे युतीचा आमदार अभिजीत पाटलांना दणका, कोणत्या पक्षाला किती जागा?

माढा तालुक्यात देखील भाजपचं कमळ फुललं आहे. माढा तालुक्यात जिल्हा परिषदेचे सात गट आणि तालुका पंचायत समितीचे 14 गण आहे. यातील भाजपला जिल्हा परिषदेच्या चार जागांवर विजय मिळाला आहे.

By : गणेश लटके | Updated at : 10 Feb 2026 12:52 AM (IST)

Madha Zilla Parishad election Result 2026

Madha Zilla Parishad election Result 2026 : राज्यभरातील 12 जिल्हा परिषदा आणि 125 पंचायत समित्यांचे निकाल हाती आले आहे. यामध्ये भाजपला सर्वाधिक जागा मिळाल्या आहेत. माढा तालुक्यात देखील भाजपचं कमळ फुललं आहे. माढा तालुक्यात जिल्हा परिषदेचे सात गट आणि तालुका पंचायत समितीचे 14 गण आहे. यातील भाजपला जिल्हा परिषदेच्या चार जागांवर विजय मिळाला आहे. तर दोन जागा राष्ट्रवादी अजित पवार गटाला तर एक जागा शिवसेना शिंदे गटाला मिळाली आहे. दरम्यान, या निवडणुकीत राष्ट्रवादी काँग्रेस शरद पवार गटाचे माढ्याचे आमदार अभिजीत पाटील यांना मोठा धक्का बसला आहे. जिल्हा परिषदेची एकही जागा त्यांना जिंकला आली नाही. दुसरीकडे विजयामुळं भाजप नेते रणजित शिंदे यांची ताकद वाढली आहे.

जिल्हा परिषद आणि पंचायत समितीच्या निवडणुकीच्या निमित्ताने माढा तालुक्यातील राजकीय वातावरण चांगलेच तापल्याचे पाहायला मिळाले होते. शरद पवार गटाचे आमदार अभिजीत पाटील आणि भाजप नेते रणजित शिंदे यांच्यात जोरदार खडाजंगी झाल्याचे पाहायला मिळालं होतं. दोघांनी देखील ऐकमेकांवर आरोप प्रत्यारोप केले होते. त्यामुळं या निवडणुकीची जोरदार चर्चा झाली होती. माढ्यात भाजप विरुद्ध राष्ट्रवादी सा सामना झाला होता. मात्र, अखेर भाजपने माढा तालुक्यात मोठा विजय मिळवला आहे. माढ्यात भाजपला जिल्हा परिषदेच्या चार जागा मिळाल्या आहेत. या जागांवर भाजपचे नेतृत्व रणजित शिंदे यांनी केले होते. तर राष्ट्रवादीला ज्या दोन जागा मिळाल्या आहेत, त्याचे नेतृत्व माजी आमदार संजयमामा शिंदे यांनी केले होते. त्यामुळं सात जागांपैकी सहा जागांवर शिंदेंचं वर्चस्व पाहायला मिळत आहे.

शिंदेंचे पुन्हा कमबॅक

माढा तालुक्याचे माजी आमदार बबनदादा शिंदे आणि संजयमामा शिंदे यांनी माझा तालुक्यात पुन्हा कमबॅक केलं आहे. लोकसभा निवडणुकीत रणजितसिंह निंबाळकर यांना पराभवाचा धक्का सहन करावा लागला होता. शिंदे बंधुंनी निंबाळकरांना पाठिंबा दिला होता. या निवडणुकीत शरद पवार गटाचे धैर्यशील मोहिते पाटील हे विजयी झाले होते. त्यानंतर झालेल्या विधानसभा निवडणुकीत माढ्यातून माजी आमदार बबनदादा शिंदे यांचे पुत्र रणजित शिंदे निवडणुकीला उभे राहिले होते. मात्र, शरद पवार गटाचे उमेदवार अभिजीत पाटील यांनी त्यांचा परभव केला होता. त्यामुळं अभिजीत पाटील यांची ताकद वाढल्याचं बोललं जात होते. जिल्हा परिषद आणि पंचायत समितीच्या निवडणुकीत देखील शिंदेंना पराभव स्वीकारावा लागणार असल्याचा विश्वास अभिजीत पाटील यांनी व्यक्त केला होता. मात्र, माढ्यात वारं फिरलं असून पुन्हा एकदा जिल्हा परिषद आणि पंचायत समित्यांच्या चाव्या शिंदे कुटुंबाच्या हाहात दिल्या आहेत. शऱद पवार गटाचा सुफडा साफ झाला आहे. हा अभिजीत पाटील यांना मोठा धक्का मानला जात आहे.

माढ्यात एस फॅक्टरची जोरदार चर्चा

या निवडणुकीच्या निमित्ताने माढ्यात एस फॅक्टर पाहायला मिळाला. रणजितं शिंदे, दादासाहेब साठे आणि शिवाजीराव सावंत हे तिन्ही नेते एकत्र आले. त्यामुळं माढ्यात शिंदे सावंत साठे असा एस फॅक्टर तयार झाला. त्यामुळं भाजपची ताकद वाढली. तिन्ही नेते एकत्र झाल्यामुळं मतांचं विभाजन झालं नाही. याचा फायदा भाजपच्या उमेदवारांना झाला आहे. मानेगवा जिल्हा परिषद गटातून शिवाजीराव सावंत यांचे पुत्र पृथ्वीराज सावंत हे विजयी झाले आहेत. मागील जिल्हा परिषदेच्या निवडणुकीत याच गटातून त्यांचा पराभव झाला होता. यावेळी मात्र त्यांना मोठ्या फरकाने विजय मिळवला आहे.

ऊस दराच्या मुद्यावरुन आरोप प्रत्यारोप

ऊस दराच्या मुद्यावरुन देखील माढ्यात राजकीय वातावरण चागलेच तापल्याचे चित्र पाहायला मिळाले होते. आणदार अभिजीत पाटील यांनी मागील वर्षी ऊसाला 3 हजार 500 रुपयांचा दर देतो असं जाहीर केलं होतं. मात्र, अद्याप त्यांनी तो दर दिला नाही. 3000 दर दिला होता. त्यानंतर निवडणुकीच्या आधी 100 रुपये देणार असे जाहीर केले आहे. म्हणजे एकूण 3100 रुपये दर दिला आहे. म्हणजे आणखी 400 रुपये त्यांच्याकडे बाकी आहेत. याच मुद्यावरुन रणजित शिंदे यांच्या निवडणुकीच्या काळात टीका केली होती. तुम्ही जे बोललाय ते करा, जाहीर केलेला दर द्या असं वक्तव्य त्यांनी केलं होतं. तसेच कारखान्यासाठी घेतलेले 350 कोटी रुपये काय केले? असे सवाल देखील केले होते. त्यांच्या या टीकेला अभिजीत पाटील यांनी देखील प्रत्युत्तर दिले होते. तुमचे वडील (बबनदादा शिंदे) यांनी दिलेला शब्ध पाळा आणि माझ्यापेक्षा एक रुपया दर जास्त देऊन दाखवा असे आव्हान अभिजीत पाटील यांनी दिले होते. तसेच दूध संघाच्या जमिनीच्या मुद्यासह भ्रष्टाचाराचे आरोप देखील पाटील यांनी केले होते. त्यामुळं राजकीय वातावरण चांगलच तापलं होतं.

माढा तालुका जिल्हा परिषद विजयी उमेदवारांची यादी

मानेगाव - पृथ्वीराज सावंत (भाजप)
मोडनिंब - वंदना कांबळे (भाजप)
टेंभूर्णी - अमृता वाघ (भाजप)
उपळाई बु - माधुरी मोरे (भाजप)
कूर्डू - संभाजी ढाणे (राष्ट्रवादी अजित पवार गट),
भोसरे - अश्विनी दळवी ( राष्ट्रवादी अजित पवार गट)
बेंबळे - सविता कोकाटे (शिवसेना शिंदे गट)