हर्षवर्धन सपकाळांनी महाराष्ट्राची आणि शिवप्रेमींची जाहीर माफी मागावी, मनसे आक्रमक, सपकाळांच्या वक्तव्याचा तीव्र निषेध
टिपू सुलतान याची छत्रपती शिवाजी महाराजांसोबत तुलना करणारे वक्तव्य केल्याप्रकरणी हर्षवर्धन सपकाळ यांच्यासमोरील अडचणी वाढण्याची शक्यता आहे. सर्वच स्तरातून सपकाळांना विरोध होत आहे.
मुंबई : टिपू सुलतान याची छत्रपती शिवाजी महाराजांसोबत तुलना करणारे वक्तव्य केल्याप्रकरणी काँग्रेस प्रदेशाध्यक्ष हर्षवर्धन सपकाळ (Harshwardhan Sapkal) यांच्यासमोरील अडचणी अधिक वाढण्याची शक्यता आहे. सर्वच स्तरातून सपकाळ यांना विरोध होताना दिसत आहे. अशातच महाराष्ट्र नवनिर्माण सेनेनं देखील आपली भूमिका जाहीर केली आहे. काँग्रेस प्रदेशाध्यक्ष हर्षवर्धन सपकाळ यांनी केलेल्या वक्तव्यावर महाराष्ट्र नवनिर्माण सेनेनं तीव्र निषेध नोंदवला आहे. तसेच सपकाळांनी महाराष्ट्राची आणि शिवप्रेमींची माफी मागावी असे मनसेनं म्हटलं आहे.
हर्षवर्धन सपकाळ यांच्या वक्तव्यावर मनसेची टीका
महाराष्ट्राचं आराध्य दैवत छत्रपती शिवाजी महाराज यांची तुलना, महाराष्ट्र प्रदेश काँग्रेस अध्यक्ष हर्षवर्धन सपकाळ यांनी टिपू सुलतानाशी केली आहे. ही अत्यंत निंदनीय बाब आहे. महाराष्ट्र नवनिर्माण सेना याचा तीव्र निषेध नोंदवत आहे. हर्षवर्धन सपकाळ यांनी महाराष्ट्राची आणि शिवप्रेमींची जाहीर माफी मागावी असे ट्वीट महाराष्ट्र नवनिर्माण सेनेकडून करण्यात आलं आहे.
नेमकं प्रकरण काय?
मालेगाव महापालिकेतील उपमहापौरांच्या दालनात टिपू सुलतानचा फोटो लावण्यात आला होता. त्यावर हिंदुत्ववादी संघटनांनी आक्षेप घेतल्यानंतर अखेर हटवण्यात आला. मात्र, याच वादानंतर काँग्रेस प्रदेशाध्यक्ष हर्षवर्धन सपकाळ यांनी त्यासंदर्भात एक वक्तव्य केलं. 'टिपू सुलतानला छत्रपती शिवरायांच्य़ा समकक्ष बघितलं पाहिजे, असं सपकाळ यांनी म्हटलं. ज्याप्रमाणे छत्रपती शिवाजी महाराजांनी शौर्य आणि स्वराज्य असा विचार दिला, अगदी त्याचप्रमाणे टिपू सुलतान यांनी त्याच समकक्ष काम केलं, असं सपकाळ म्हणाले. सपकाळ यांच्या या वक्तव्यानं नव्या वादाला तोंड फुटलं. भाजप आणि शिवसेनेने सपकाळ यांच्या वक्तव्याचा चांगलाच समाचार घेतला.
महाराष्ट्राचं आराध्य दैवत छत्रपती शिवाजी महाराज यांची तुलना, महाराष्ट्र प्रदेश काँग्रेस अध्यक्ष श्री. हर्षवर्धन सपकाळ यांनी टिपू सुलतानाशी केली.
— MNS Adhikrut - मनसे अधिकृत (@mnsadhikrut) February 15, 2026
ही अत्यंत निंदनीय बाब आहे. महाराष्ट्र नवनिर्माण सेना याचा तीव्र निषेध नोंदवत आहे. हर्षवर्धन सपकाळ यांनी महाराष्ट्राची आणि शिवप्रेमींची… pic.twitter.com/wUaRHJIAGR
काँग्रेसचे प्रदेशाध्यक्ष हर्षवर्धन सपकाळ यांच्याविरोधात पुण्यातील पर्वती पोलिस ठाण्यात गुन्हा दाखल
छत्रपती शिवाजी महाराज यांची तुलना टिपू सुलतान यांच्यासोबत केल्याच्या वक्तव्यावरून राजकीय वर्तुळात मोठा वाद निर्माण झाला आहे. काँग्रेसचे प्रदेशाध्यक्ष हर्षवर्धन सपकाळ यांच्याविरोधात पुण्यातील पर्वती पोलिस ठाण्यात गुन्हा दाखल करण्यात आला आहे.
आपल्या वक्तव्याची मोडतोड केली : हर्षवर्धन सपकाळ
टिपू सुलतानाच्या वक्तव्यासंदर्भात काँग्रेसचे प्रदेशाध्यक्ष हर्षवर्धन सपकाळ यांनी अखेर मौन सोडलं आहे. माझ्या वक्तव्याची मोडतोड करून "ध" चा "मा" करुन मुख्यमंत्री देवेंद्र फडणवीस यांना राज्यात दंगली घडवायच्या आहेत, असा आरोप हर्षवर्धन सपकाळ यांनी एक्सवर शेअर केलेल्या पोस्टमध्ये केला. तसेच पुण्याच्या महापौर मंजुषा नागपुरेंवर गुन्हा दाखल करावा अशी मागणीही त्यांनी केली.
महत्त्वाच्या बातम्या
