Ganesh Chaturthi 2025 Live Blog Updates : गणपती बाप्पा मोरया! मुंबई-पुण्यात गणपती बाप्पांचं आगमन; लालबागचा राजा विराजमान

Ganesh Chaturthi 2025 Live Blog Updates : घरोघरी तसेच सार्वजनिक ठिकाणी गणराया विराजमान झाले आहेत. जाणून घ्या सर्व बातम्या एका क्लिकवर....

पार्श्वभूमी

Ganesh Chaturthi 2025 Live Blog Updates : आजपासून राज्यासह देशभरात गणेशोत्सवाला सुरुवात झाली आहे. सगळीकडे अगदी आनंदात आणि जल्लोषात बाप्पाचं आगमन झालं आहे. घरोघरी तसेच सार्वजनिक ठिकाणी गणराया विराजमान झाले आहेत. त्यानुसार, गणपतीच्या प्राणप्रतिष्ठापनेचा शुभ मुहूर्त आणि पूजा सध्या सगळीकडे सुरु आहे. या निमित्ताने राज्यातील आणि देश-विदेशातील ताज्या घडामोडी आणि लाईव्ह घटनांचे अपडेटस् मिळवण्यासाठी क्लिक करा. जाणून घ्या सर्व बातम्या एका क्लिकवर....

27/08/2025 12:16:38

Ganesh Chaturthi Updates : वर्ध्यात गणेश उत्सवाची धामधूम, मातीच्या मूर्ती उपलब्ध करून देण्यावर भर

Ganesh Chaturthi Updates : वर्ध्यात गणेश उत्सवाची धामधूम पाहायला मिळतेय. गणेश भक्तांसाठी आवश्यक असणाऱ्या गणेश मूर्ती वर्ध्याच्या मगण संग्रहालय परिसरात उपलब्ध झाल्या असून यावर्षी गणेश मूर्तीच्या किंमती देखील वाढल्या आहेत. मातीच्याच मूर्तीची स्थापना करा असा आग्रह कुंभार बांधवांकडून होत असताना मूर्ती विक्रीच्या स्टॉलवर देखील तसे फलक लावण्यात आले आहेत. जिल्ह्यात सुमारे 13 हजार 22 घरगुती तर 262 ठिकाणी सार्वजनिक गणेश मूर्तीची स्थापना होणार आहे. तर 89 गावात एक गाव एक गणपतीची स्थापना केली जाणार आहे. मातीच्या मूर्ती उपलब्ध करून देण्यावर भर दिला जात आहे. विविध सामाजिक संदेश आणि सामाजिक देखावे सार्वजनिक गणेश मंडळाकडून साकारले जात आहेत. 

27/08/2025 12:02:40

Ganesh Chaturthi 2025 : दगडूशेठ गणपती उत्सव मंडपाच्या दिशेने बाप्पा मार्गस्थ; अवघा परिसर दुमदुमला

Ganesh Chaturthi 2025 : दगडूशेठ गणपती बाप्पाच्या आगमन मिरवणुकीला सुरुवात झाली असून गणपती उत्सव मंडपाच्या दिशेने बाप्पा मार्गस्थ झाले आहेत.  मोरया मोरयाच्या गजरात अवघा मंदिर परिसर दुमदुमला आहे. आकर्षक फुलांच्या रथातून दगडूशेठ गणपतीची आगमन मिरवणूक निघाली. मंडळाकडून यंदा केरळच्या पद्नाभ मंदिराची प्रतिकृती साकारण्यात आली आहे. मुख्य मंदिरातून उत्सव मंडपात मूर्ती विराजमान होणार आहे. मूर्ती उत्सव मंडपात विराजमान झाल्यावर प्राणप्रतिष्ठा होणार आहे. 

27/08/2025 10:18:32

Ganeshotsav 2025 : नागपूरच्या संती गणपतीची विधिवत पूजा; जगन्नाथ पुरीमधील जगन्नाथ मंदिराचा हुबेहूब देखावा

Ganeshotsav 2025 : नागपूरच्या संती गणपतीची सकाळी विधिवत पूजा करून स्थापना करण्यात आली. संती गणेशोत्सव मंडळ नागपुरातील दारोडकर चौक परिसरात गेले 68 वर्ष गणेशोत्सव साजरा करत असून भारतातील प्रसिद्ध तीर्थक्षेत्रांचे हुबेहूब देखावे (प्रतिकृती) तयार करण्यासाठी हे मंडळ ओळखले जाते. शिवाय दहा दिवस गणरायाचे परंपरेनुसार पूजन ही केले जाते. त्यामुळे लाखो गणेशभक्त दहा दिवसांच्या गणेशोत्सवाच्या काळात संती गणेशाचे दर्शन घेतात. यंदा मंडळाने जगन्नाथ पुरीमधील जगन्नाथ मंदिराचा हुबेहूब देखावा तर तयार केलाच आहे. शिवाय जगन्नाथ पुरीमध्ये भगवान जगन्नाथाच्या पूजनासाठी जी परंपरा पाळली जाते, तीच परंपरा नागपुरातही पाळण्यासाठी खास पुजारी जगन्नाथ पुरी मधून बोलवण्यात आले आहे.

27/08/2025 10:05:44

Ganesh Chaturthi 2025 Live Updates : मनमाड शहरात यंदा 50 फुटांपर्यंत मोठ्या मूर्तीची प्रतिष्ठापणा; भक्तांचा उत्साह शिगेला

Ganesh Chaturthi 2025 Live Updates : आजपासून गणेशोत्सवाला सुरुवात झाली आहे. गणपती बाप्पाच्या स्वागतासाठी मालेगाव, मनमाडसह नाशिकच्या ग्रामीण भागांत गणेशभक्त सज्ज झाले असून शहरात बाप्पाच्या मूर्तीचे वाजतगाजत जल्लोषात आगमन होण्यास सुरुवात झाली आहे. मनमाड शहरात यंदा 50 फुटांपर्यंत मोठ्या मूर्तीची प्रतिष्ठापणा करण्यात येतेय. दरवर्षीप्रमाणे यंदाही गणेश भक्ताचा उत्साह शिगेला पोहोचला असून त्यांनी डीजेच्या तालावर वाजत गाजत बाप्पाची मिरवणूक काढली.

27/08/2025 09:36:57

Ganesh Chaturthi 2025 : चिंचपोकळीच्या चिंतामणीची विधिवत प्राणप्रतिष्ठापना संपन्न

Ganesh Chaturthi 2025 : चिंचपोकळीच्या चिंतामणीची विधिवत प्राणप्रतिष्ठापना संपन्न झाली असून बाप्पाच्या दर्शनाला सुरुवात झाली आहे. चिंचपोकळी सार्वजनिक उत्सव मंडळाचं यंदाचं 106 वं वर्ष असून यंदा मंडळाने छत्रपती संभाजी महाराजांच्या राज्याभिषेकाचा देखावा साकारला आहे. 

27/08/2025 09:24:11

Ganesh Chaturthi : बुलढाण्यात लाडक्या बाप्पाला आपल्या घरी घेऊन जाण्यासाठी सकाळपासूनच भविकांची गर्दी

Ganesh Chaturthi : देशभरात आजपासून गणेशोत्वाची धूम पाहायला मिळतेय. बुलढाण्यातही आज अगदी सकाळपासूनच आपल्या लाडक्या बाप्पाला घरी घेऊन जाण्यासाठी बाजारपेठेत मोठी गर्दी पाहायला मिळतेय. हजारो गणेशभक्त गणपती बाप्पाची मूर्ती घेऊन जाण्यासाठी सकाळीच बाजारपेठेत दाखल झाले. 

27/08/2025 09:13:12

Sindhudurg Ganeshotsav 2025 : कोकणातील चाकरमान्यांना रेल्वेचा फटका; रेल्वेगाड्या दीड ते दोन तास उशिराने

Sindhudurg Ganeshotsav 2025 : कोकणातील सर्वात मोठा सण म्हणजे गणेशोत्सव. या गणेशोत्सवासाठी कोकण रेल्वेने येणाऱ्या चाकरमान्यांना कोळमडलेल्या वेळापत्रकाचा सामना करावा लागतोय. कोकण रेल्वे मार्गावर धावणाऱ्या गाड्या दीड ते दोन तास उशिराने धावत असल्याने चाकरमान्यांना याचा फटका बसतोय.  कोकणकन्या एक्सप्रेस आणि तुतारी गाड्यांचं गणेशोत्सवाच्या काळात तिकीट भेटणं म्हणजे कोकणवासीयांचं स्वप्न आहे. मात्र, तिकिटांत काळाबाजार होत असल्याने मिळत नसल्याची खंत गणेशभक्तांनी व्यक्त केलीय.

27/08/2025 09:08:52

Ganesh Chaturthi 2025 Updates : कोल्हापुरात गणपती बाप्पांच्या आगमनाला सुरुवात; घरोघरी बाप्पांचं जल्लोषात आगमन

Ganesh Chaturthi 2025 Updates : कोल्हापुरात गणपती बाप्पांच्या आगमनाला सुरुवात झाली आहे. कोल्हापुरातील शाहूपुरी कुंभार गल्ली परिसरात गणेशभक्त दाखल व्हायला सुरुवात झाली आहे. गणपती बाप्पा मोरयाच्या गजरात घरगुती गणेश मूर्ती घरी घेऊन जाताना भाविक पाहायला मिळतायत. शाहूपुरी कुंभार गल्लीत भक्तीपूर्ण वातावरण निर्माण झालं आहे.

27/08/2025 08:51:15

Ganesh Chaturthi 2025 : तळकोकणात लाडक्या बाप्पाचं घरोघरी आगमन; गणेशभक्तांकडून बाप्पांची मनोभावे सेवा

Ganesh Chaturthi 2025 : तळकोकणात लाडक्या बाप्पाचं घरोघरी आज आगमन होत आहे. कुणी डोक्यावर बाप्पाला घेऊन घरी आले आहेत, तर कुणी पालखीतून लाडक्या बाप्पाला घरी घेऊन जातानाचं दृश्य पाहायला मिळतंय. सिंधुदुर्ग जिल्ह्यात लाखो मुंबई स्थित गणेशभक्त आपापल्या घरी दाखल झाले असून जिल्ह्यात चैतन्यमय वातावरण आहे. जिल्ह्यात 72 हजार 755 घरगुती गणपती आज विराजमान होणार आहेत. तर जिल्ह्यात 32 ठिकाणी सार्वजनिक गणेशोत्सव साजरा केला जातो. सकाळपासून लाडक्या बाप्पाला घरी आणून कोकणातील गणेश भक्त बाप्पाची मनोभावे सेवा करत आहेत.

27/08/2025 08:47:18

Ganeshotsav 2025 : सणासुदीच्या काळात चांदीचे भाव गगनाला; चांदीच्या गणेशमूर्तींची मागणी 40 टक्क्यांनी घसरली

Ganeshotsav 2025 : आजपासून गणेशोत्सवाची सुरुवात झाली आहे. बुलढाणा जिल्ह्यातील खामगाव येथील देशभरातील प्रसिद्ध चांदीच्या बाजारपेठेतून दरवर्षी देशभरातून चांदीच्या गणेश मूर्तींची मोठी मागणी असते. खामगाव येथील सुंदर आणि सुबक अशा चांदीच्या मूर्ती देशभरात प्रसिद्ध आहेत आणि त्यामुळे दरवर्षी खामगाव येथील चांदीच्या बाजारपेठेत गणेश मूर्ती खरेदी करण्यासाठी देशभरातून ग्राहक येतात. मात्र, यावर्षी ऐन सणासुदीच्या दिवसांत चांदीचे भाव गगनाला भिडल्याने यावर्षी चांदीच्या गणेश मूर्तींची मागणी 40 टक्क्यांनी कमी झाल्याचे समोर आलं आहे चांदीचे भाव गेल्या 52 दिवसात 80 हजार रुपये प्रति किलो वरून एक लाख वीस हजार पाचशे रुपये प्रति किलो वर गेले आहेत. चांदीचे भाव प्रचंड वाढल्याने ही मागणी कमी झाल्याचं सराफा व्यापारी सांगतात आणि यामुळे गणेश मूर्तींच्या मागणीत घट झाली सोबतच चांदीची विक्रीही सरासरीच्या 20 टक्क्यांनी कमी झाल्याचं समोर आलं आहे. 

27/08/2025 08:37:57

Ganesh Chaturthi 2025 : गणेश गल्लीच्या राजाचा यंदा रामेश्वर मंदिराचा देखावा; बाप्पाचं देखणं रूप पाहण्यासारखं

Ganesh Chaturthi 2025 : गणेश गल्लीचा राजा सार्वजनिक गणेशोत्सव मंडळाने यंदा तामिळनाडूतील आकर्षक रामेश्वर मंदिराचा देखावा बनवला आहे. चारधाम पैकी एक आणि 12 ज्योतिर्लिंगांपैकी एक हे मंदिर आहे. सर्वसामान्य नागरिकांना आर्थिक अडचणींमुळे अनेक वेळा महाराष्ट्राबाहेर दर्शनासाठी जाता येत नाही. त्यांच्यासाठी हा देखावा खासकरून तयार करण्यात आला आहे. मागील वर्षी महाकालेश्वर मंदिर आणि यावर्षी मंडळाने रामेश्वर मंदिर केल्याचं कार्यकर्त्यांनी सांगितलं.

27/08/2025 08:14:41

Ganeshotsav 2025 : गणेश चतुर्थीनिमित्त पुणे शहरात मोठा उत्साह; घरोघरी, सार्वजनिक गणेश मंडळात बाप्पाचं आगमन

Ganeshotsav 2025 : गणेश चतुर्थीनिमित्त पुणे शहरात मोठा उत्साह सुरु आहे. घरोघरी तसेच सार्वजनिक गणेश मंडळात बाप्पाचं धूमधडाक्यात स्वागत झालं आहे. 

पुणे शहरात गणेश मंडळांच्या ठिकठिकाणी आगमन मिरवणुका या निमित्ताने पाहायला मिळाल्या. मानाचे गणपतीसह श्रीमंत दगडूशेठ गणपतीची आगमन मिरवणूक आयोजित करण्यात आली आहे. मानाचा पहिला गणपती कसबा गणपती आणि श्रीमंत दगडूशेठ गणपती बाप्पाच्या आगमन मिरवणुकीला सकाळी 8 वाजता सुरुवात झाली आहे. ढोल ताशा पथके आणि पारंपारिक वाद्यामध्ये मिरवणुका सुरु झाल्या आहेत. 

27/08/2025 08:08:28

Ganesh Chaturthi 2025 Live Updates : गणेश गल्लीच्या राजाची विधिवत पूजा सुरु; रामेश्वरमधील रामनाथ स्वामी मंदिराची प्रतिकृती साकारली

Ganesh Chaturthi 2025 Live Updates : गणेश गल्लीच्या राजाची विधिवत पूजा सुरु आहे. यंदा या मंडळाच्या गणेशोत्सवाचे 98 वे वर्ष आहे. गणेश गल्ली सार्वजनिक उत्सव मंडळाने यंदा सजावटीसाठी रामेश्वरमधील रामनाथ स्वामी मंदिराची प्रतिकृती उभारली आहे.

27/08/2025 08:06:17

Ganesh Chaturthi 2025 : लालबागच्या राजाची प्राणप्रतिष्ठा पूर्ण; पहाटेपासून राजाचे दर्शन भाविकांसाठी सुरू

Ganesh Chaturthi 2025 : आज गणेश चतुर्थीचा दिवस आहे. लालबागच्या राजाची आज गणेश चतुर्थीला पहाटे पाच वाजता पारंपारिक विधीवत प्राणप्रतिष्ठा पूजा झाली आहे. त्यानंतर सकाळी सहा वाजल्यापासून लालबाग राजाचे दर्शन भाविकांसाठी सुरु करण्यात आले आहे. लालगबागच्या राजाचं यंदाचं हे 92 वं वर्ष आहे.