Anand Paranjpe : मराठी भाषा खूप समृद्ध, आमच्याकडे पण खूप मोठा शब्दकोश, पण....; एकनाथ शिंदेंवरील टीकेवरून आनंद परांजपेंचा महायुतीतील मित्रपक्षांना सल्लावजा सूचक इशारा

हा ओलावा, भविष्यात काय होईल सांगता येत नाही, उद्धव ठाकरे आणि मुख्यमंत्री एकाच व्यासपीठावर येताच संजय राऊतांचं मोठं वक्तव्य

इशान देशमुख — Fri, 30 Oct 2026 19:41:29 +0530

Sanjay Raut : महाराष्ट्राच्या हास्यरेषा या प्रशांत कुलकर्णी संपादीत पुस्तकाचा प्रकाशन सोहळा काल मुंबईत पार पडला. या सोहळ्यात राज्याचे मुख्यमंत्री देवेंद्र फडणवीस आणि माजी मुख्यमंत्री उद्धव ठाकरे, मनसे प्रमुख राज ठाकरे एकत्र आले होते. याची जोरदार चर्चा राजकीय वर्तुळात रंगल्याचं पाहायला मिळालं. यावर शिवसेना ठाकरे गटाचे खासदार संजय राऊत यांनी प्रतिक्रिया दिली आहे. काल उद्धव ठाकरे आणि मुख्यमंत्री देवेंद्र फडणवीस एकत्र होते ना, हा ओलावा असतो. भविष्यात काय होईल सांगता येत नाही, असं मोठं वक्तव्य संजय राऊत यांनी केलं. लोकांचे मन चंचल आहे. लोकशाही म्हणजे बदल आणि परिवर्तन आहे. सत्तेवर कायम कुणी राहू शकत नाही असेही संजय राऊत म्हणाले.

भाजपमध्ये ज्यांच्या मांडला मांडी लावून बसावे असे आशिष शेलार आहेत

मी आणि शेलार दोघे बाजूला बसलेलो आहोत आणि प्रेमाने बोलत आहोत. भाजपमध्ये ज्यांच्या मांडला मांडी लावून बसावे असे आशिष शेलार आहेत असं वक्तव्य देखील राऊतांनी केलं. मुळीक यांच्यासोबत मी 40 वर्ष काम केले आहे. हे पुस्तक मला त्यांनी अर्पण केले आहे. आपली भूमिका मांडण्याचा अधिकार प्रत्येकाला आहे. 28 वर्ष ते सामनात होते तेव्हा कधी त्यांच्या डोक्यात सूड असे शब्द नव्हते. माझे पण 66 वर्ष आहे. काही गोष्टी मनात ठेवायच्या असतात. सूड शब्द हा महाभारतातून आला. गेल्या काही काळातले आम्ही राजकारण पाहतो. कोणताही नेता हा स्वतःच्या स्वार्थासाठी पक्ष सोडतो असे राऊत म्हणाले. ज्या पक्षात तुम्हाला वर्षानुवर्षे पदे आणि प्रतिष्ठा दिली जातात तो पक्ष सोडतात. या देशाला आणि राज्याला सुडाच्या राजकारणाची कधी भावना नव्हती असेही राऊत म्हणाले.

कुणावरही सुडाने कारवाई होऊ नये असे सागणारे बाळासाहेब आणि अटलबिहारी वाजपेयी होते

कुणावरही सुडाने कारवाई होऊ नये असे सागणारे बाळासाहेब ठाकरे आणि अटलबिहारी वाजपेयी होते. मी स्वतः अनेक वर्ष राजकारणात आहे. वसई- विरारचा कालखंड मी जवळून पाहिला आहे. मला जेव्हा सत्य समजले तेव्हा पासून मी आप्पाच्या पाठीशी उभा राहिलो असे संजय राऊत म्हणाले.

मुख्यमंत्र्यांनी लगावला होता ठाकरे बंधूंना टोला

काल महाराष्ट्राच्या हास्यरेषा या प्रशांत कुलकर्णी संपादीत पुस्तकाचा प्रकाशन सोहळा मुंबईत पार पडला. या सोहळ्यात राज्याचे मुख्यमंत्री देवेंद्र फडणवीस आणि माजी मुख्यमंत्री उद्धव ठाकरे, मनसे प्रमुख राज ठाकरे एकत्र आले होते. याची जोरदार चर्चा राजकीय वर्तुळात रंगल्याचं पाहायला मिळालं. यावेळी बोलताना मुख्यमंत्री देवेंद्र फडणवीस यांनी राज ठाकरे चांगले व्यंगचित्रकार आहेत, उद्धव ठाकरे चांगले छायाचित्रकार आहे. मी चांगला राकारणी आहे, मला राजकारणातलच समजतं, त्यामुळं मी राजकारण करणार, त्यामुळं मला या दोघांनी राजकारणात चांगल काम करुन द्यावं असा टोला मुख्यमंत्र्यांनी ठाकरे बंधूंना लगावला होता.

एप्रिल मे मध्ये उद्धव ठाकरे किंवा आदित्य ठाकरे जेलमध्ये जाणार, मंत्री नितेश राणेंचा दावा, म्हणाले, मुख्यमंत्री फडणवीसच राहणार, आम्ही राज ठाकरेंना नाराज करणार नाही

सदाशिव लाड, एबीपी माझा — Fri, 30 Oct 2026 19:06:15 +0530

Nitesh Rane : राज्याच्या हितासाठी एकनाथ शिंदे आणि उद्धव ठाकरे एकत्र येऊ शकतात असं वक्तव्य शिवसेना (शिंदे गट) नेते रवींद्र धंगेकर यांनी केलं होतं. त्यांच्या या वक्तव्यानंतर राजकीय वर्तुळात विविध चर्चांना उधाण आले आहे. याबाबत मंत्री नितेश राणे यांनी प्रतिक्रिया दिली आहे. आमच्या वरिष्ठांनी नोंद घेतली असून, ते निर्णय घेणार आहेत, आम्ही त्याची वाट पाहू असे मत त्यांन व्यक्त केले. एप्रिल, मे मध्ये उद्धव ठाकरे किंवा आदित्य ठाकरे हे जेलमध्ये असतील असा दावा नितेश राणे यांनी केला.

संजय राऊत यांची आतापर्यंत कुठली भाकित खरी ठरलेली नाहीत

आमचं नरेंद्र मोदींचं सरकार अजून भक्कम होणार आहे. कारण, 2029 ला मोठ्या मतांनी आणि मोठ्या ताकदीने निवडून येईल. महाराष्ट्रात मुख्यमंत्री देवेंद्र फडणवीस यांच्या नेतृत्वाखाली मजबूत होत चाललं आहे. संजय राऊत यांची आतापर्यंत कुठली भाकित खरी ठरलेली नाहीत. कदाचित स्वतःच्या मालकाची तारीख एप्रिल महिन्यात ठरवली असेल असा टोला देखील नितेश राणेंनी राऊतांना लगावला. मुंबईच्या समुद्रकिनारी असली होल्डिंगमध्ये चार स्पॉट असणार आहेत 20 नाही. 20 ठिकाणी समुद्रात सगळीकडे होल्डिंग दिसणार असा अपप्रचार केला जात आहे. मुंबईला पर्यटनाच्या आणि विकासाच्या दृष्टिकोनातून आमचं सरकार सज्ज आहे. मी पण मुंबईकर असल्यामुळे माझ्या मुंबईला मी कुठे गालबोट लावायला देणार नाही. आमचं सरकार कुठेही पर्यावरणाला हानी पोहोचवणार नाही असे राणे म्हणाले.

उद्धव ठाकरे फोटोग्राफी करत राहिले असते तर खूप गोष्टी टाळल्या असत्या

उद्धव ठाकरे फोटोग्राफी करत राहिले असते तर खूप गोष्टी टाळल्या असत्या, हिंदूहृदयसम्राट बाळासाहेब ठाकरे यांच्या पक्षाला गालबोट लागून नसतं, असा टोला देखील नितेश राणेंनी लगावला. मुख्यमंत्र्यांनी दिलेला सल्ला दोन्ही ठाकरे बंधूंनी ऐकावा. जेणेकरून त्यांचे भविष्य उज्वल होईल असेही राणे म्हणाले. दरम्यान, राज ठाकरेंना आम्ही कधीच नाराज केलेलं नाही, पुढेही नाराज करणार नाही. 2029 पर्यंत देवेंद्र फडणवीसंच मुख्यमंत्री राहतील. देवेंद्र फडणवीस महाराष्ट्राचा अभिमान आणि स्वाभिमान आहेत असे नितेश राणे म्हणाले.

मुख्यमंत्र्यांनी लगावला ठाकरे बंधूंना टोला

महायुतीमध्ये सतत वाद! कृषीमंत्री भरणे म्हणाले, हे वाद खाली, वरती मुख्यमंत्री आणि दोन्हीही उपमुख्यमंत्री भक्कम

जयदीप भगत, बारामती — Fri, 30 Oct 2026 18:23:50 +0530

Dattatray Bharane : महायुतीमध्ये सतत वाद होत आहेत याबाबत कृषीमंत्री दत्तात्रय भरणे यांनी प्रतिक्रिया दिली. हे वाद खाली आहेत. आमच्या लोकांमध्ये वरती मुख्यमंत्री आणि दोन्हीही उपमुख्यमंत्री भक्कम आहेत. कर्जत प्रकल्पासंदर्भात दोन्ही ठाकरे बंधू मोर्चा काढणार आहेत. याबाबत बोलताना भरणे म्हणाले की, यामध्ये आपल्या राज्याचे मुख्यमंत्री देवेंद्र फडणीस साहेब निर्णय घेतील. चांगला निर्णय कोर्टाने दिलेला आहे. 22 जिल्हा परिषदांना अध्यक्ष व पदाधिकारी मिळतील. त्या निर्णयाचे स्वागत असल्याचे ते म्हणाले. मुख्यमंत्री व दोन्ही ठाकरे बंधू एकाच मंचावर आले होते, याबाबत बोलताना भरणे म्हणाले की, हा प्रश्न तुम्ही देवेंद्र बाबूंना विचारला तर बरं होईल असे ते म्हणाले.

उजनी धरणावर होणाऱ्या AI डेटा सेंटर शेतकऱ्यांचा विरोध, भरणे म्हणाले...

उजनी धरणावर होणाऱ्या AI डेटा सेंटर प्रकल्पाला शेतकऱ्यांचा प्रचंड विरोध आहे. याबाबत राज्याचे कृषीमंत्री दत्तात्रय भरणे यांना विचारण्यात आले. यावेळी त्यांनी सांगितले की, शासनाच्या वतीने आमच्या अधिकाऱ्यांनी शेतकऱ्यांकडे जावं. प्रकल्पासंदर्भात त्यांच्याशी चर्चा करावी. त्यांच्या सूचना ऐकव्यात त्यांचे समज गैरसमज दूर करावेत. जोपर्यंत शेतकरी तयार होत नाहीत तोपर्यंत अधिकाऱ्यांनी या गोष्टी करु नयेत असी माहिती भरणे यांनी दिली. याबाबतीमध्ये शेतकऱ्यांशी चर्चा करुनच पुढचा निर्णय घेतला जाईल असंही ते म्हणाले.

शेतकऱ्यांसाठी आंदोलनकर्त्यांसोबत कृषिमंत्री भरणे आंदोलनात उतरणार का? असा सवाल देखील करण्यात आला. त्यावेळी भरणे म्हणाले की, आम्ही शासन आहोत, आम्ही शेतकऱ्यांसोबत आहोत असे ते म्हणाले. उजनी धरणावर होणाऱ्या AI डेटा सेंटर प्रकल्पाला शेतकऱ्यांचा प्रचंड विरोध आहे. गावोगावचे शेतकरी एकत्र होऊन बैठका घेत आहेत. या प्रकल्पाला मोठ्या प्रमाणात विरोध करताना दिसत आहेत. दरम्यान,या प्रकल्पाच्या विरोधात उद्या म्हणजे 31 ऑक्टोबर रोजी मोठं आंदोलन करण्यात येणार आहे. राष्ट्रवादी काँग्रेस शरदचंद्र पवार पक्षाचे आमदार रोहित पवार, खासदार धैर्यशील मोहिते पाटील, माजी आमदार संजयमामा शिंदे यांच्या नेतृत्वात हे आंदोलन होणार आहे.

शेतकऱ्यांना वसुलीचा तगदा लावू नका, बँकांना सूचना

बँकांना आपण सूचना दिलेल्या आहेत की शेतकऱ्यांना वसुलीचा तगदा लावू नका. हे दिवस शेतकऱ्यांच्या दृष्टीने खूप अडचणीचे संकटाचे आहेत. याबाबतीत राज्याचे मुख्यमंत्री आरबीआयशी बोलणार आहेत की फायनान्स कंपनींना सक्त सूचना देण्यात याव्यात. फायनान्स कंपन्यांनी शेतकऱ्यांकडे तगादा लावू नये. एवढे सांगूनही जर कंपन्या ऐकत नसतील तर त्यांच्यावर कठोर कारवाई केली जाईल असे भरणे म्हणाले. आम्ही शेतकऱ्यांच्या बाजूनेच राहणार आहोत. शंभर टक्के कायदा करू परंतु त्या अगोदर त्यांनी कायदा काय केलेला आहे याची माहिती घेणार आहोत. अडचणीच्या काळामध्ये सर्वांनी शेतकऱ्यांच्या पाठीशी उभे राहिले पाहिजे असे ते म्हणाले.

फायनान्स कंपनीला बोलवून आम्ही याबाबतीत कारवाई करु

अकोल्यातील विषयाबाबत मी स्वतः कलेक्टरशी बोललेलो आहोत. फायनान्स कंपनीला बोलवून आम्ही याबाबतीत कारवाई करु असे ते म्हणाले. पदवीधर आणि शिक्षक मतदारसंघ निवडणूक निकालाबाबत देखी भरणे यांनी प्रतिक्रिया दिली. विजय हा विजय असतो. शेवटी परभवातून शिकलं पाहिजे. पराभव मान्य करुन विजयी उमेदवारांचं मी अभिनंदन करतो असे भरणे म्हणाले.

सर्वांनीच महायुतीचा प्रामाणिकपणे प्रचार केला

पुणे पदवीधर निवडणुकीत राष्ट्रवादीचे कार्यकर्ते दिसले नाहीत याबाबत बोलताना भरणे म्हणाले की, हा तुमचा आरोप अत्यंत चुकीचा आहे. जिल्ह्यामध्ये राष्ट्रवादी काँग्रेस पक्ष पूर्णपणे सक्रिय होते. आमच्या प्रमुख सुनेत्रा वहिनी पवार यांनी आम्हाला आदेश दिले होते. सर्वांनीच महायुतीचा प्रामाणिकपणे प्रचार केलेला आहे. कोण काय म्हणता याकडे लक्ष देण्याची गरज नाही असे भरणे म्हणाले.

दुष्काळाच्या काळामध्ये वायफळ खर्च टाळावा आणि कमीत कमी खर्चामध्ये कार्यक्रम करावेत

संजय गायकवाड यांनी केलेल्या वादग्रस्त वक्तव्याबाबत भरणे म्हणाले की, कोणीच असं विधान करु नये. कारण शेतकरी अडचणीमध्ये आहे. अशी विधान कोणीच करु नयेत, हे मी आपल्या माध्यमातून सांगतो असे भरणे म्हणाले. या दुष्काळाच्या काळामध्ये वायफळ खर्च टाळावा आणि कमीत कमी खर्चामध्ये कार्यक्रम करावेत. एकनाथ शिंदे साहेब हे त्यांच्या पक्षाचे प्रमुख आहेत ते निर्णय घेतील असे भरणे म्हणाले.

ABP Majha Top Headlines : ABP माझा टॉप 10 हेडलाईन्स | 30 ऑक्टोबर 2026 | शुक्रवार

एबीपी माझा ब्युरो — Fri, 30 Oct 2026 18:10:56 +0530

ABP माझा टॉप 10 हेडलाईन्स | 30 ऑक्टोबर 2026 | शुक्रवार

1. विधानपरिषदेच्या निकालानंतर महायुतीतील वाद वाढवू नका, उपमुख्यमंत्री एकनाथ शिंदेंचे शिवसेना नेत्यांना आदेश, चुका आणि त्रुटींचा सविस्तर अहवाल स्थानिक पदाधिकाऱ्यांकडून मागवला, निकालांचे महायुती म्हणून आत्मपरीक्षण करा, चुकांची पुनरावृत्ती टाळा, शिंदेंच्या सूचना. https://tinyurl.com/4u87s8he मराठी भाषा खूप समृद्ध, आमच्याकडे पण खूप मोठा शब्दकोश, पण आम्ही तो वापरत नाही, एकनाथ शिंदेंवरील टीकेवरून आनंद परांजपेंचा महायुतीतील मित्रपक्षांना सल्लावजा सूचक इशारा https://tinyurl.com/5chaphba

2. कोल्हापूरमध्ये ऊसदर बैठकीत मोठा गोंधळ, पोलिसांना हस्तक्षेप करण्याची वेळ, शेतकरी संघटना भूमिका मांडत असताना पालकमंत्री प्रकाश आबिटकरांसमोरच राडा https://www.youtube.com/watch?v=iU5qB2FSC8I शेतकऱ्यांबाबत केलेलं वक्तव्य शिवसेना आमदार संजय गायकवाडांना भोवणार, संजय गायकवाड यांच्यावर पक्षांतर्गत कारवाईचे शिवसेनेचे संकेत, कारवाईच्या इशाऱ्यानंतर संजय गाय़कवाडांकडून दिलगिरी व्यक्त https://tinyurl.com/ynpf8zpd

3. गोकुळ दूध संघाच्या अध्यक्षपदाच्या निवडणुकीवेळी अनुपस्थित राहिलेल्या महायुतीच्या 12 संचालकांना हायकोर्टाची नोटीस, सोमवारी सुनावणीवेळी कोर्टात उपस्थित राहण्याच्या सूचना, अध्यक्षपदाच्या निवडणुकीच्या कोरमसाठी 14 संचालकांच्या उपस्थितीची गरज, पण महायुतीच्या संचालक अनुपस्थित राहिल्याने निवडीचा पेच https://tinyurl.com/4ensrvtr

4. वाढवण बंदरासह पालघर जिल्ह्यातल्या प्रकल्पांविरोधात स्थानिकांचा एल्गार, महाविकास आघाडीसह 56 संघटनांचा महामोर्चा, विनाशकारी प्रकल्प रद्द करण्याची मागणी https://www.youtube.com/watch?v=qVKglYkBl0E समृद्धी महामार्गावर ठाकरेंच्या शिवसेनेचं दुष्काळग्रस्तांसाठी जोरदार आंदोलन, हेक्टरी १ लाख रूपये मदत देण्याची मागणी, आमदार नितीन देशमुखांना ताब्यात घेताना पोलिसांशी धक्काबुक्की https://tinyurl.com/nzkccfc2

5. नाशिकमध्ये धर्मध्वजारोहण कार्यक्रमाआधी शोभायात्रेचं आयोजन, तपोवन परिसरापासून रामकुंडपर्यंत शोभायात्रा, नाशिककर मोठ्या संख्येने यात्रेत सहभागी https://www.youtube.com/watch?v=idn9UBgqjac

6. पोलिसांनी सूर्यफूल तेल लावून लघवीच्या जागेवर मारलं, अंतर्वस्त्र डोक्यात घातली, आदित्य ठाकरेंच्या ठाण्यातील आंदोलनात भाग घेतलेल्या तरुणांना ठरवून टार्गेट केल्याचा राम पूर्णेकरांचा दावा https://tinyurl.com/3bkvz583 प्रदीप पूर्णेकर प्रकरणात आरोप होत असलेल्या शिवसेनेच्या नगरसेविका मीनाक्षी शिंदेंच्या विरोधात पक्षांतर्गत खदखद, सहकारी नगरसेवक चार हात लांब https://tinyurl.com/bdv249vu

7. पुण्यात महिला पोलीस अधिकाऱ्याने दारु पिऊन गाडी चालवली, गाडी थेट फुटपाथवर चढवली, व्हिडीओ व्हायरल होताच निलंबनाची कारवाई https://tinyurl.com/4evcaf5y महामार्गाच्या कामादरम्यान मातीचा ढिगारा अचानक खाली कोसळला; दोघं अडकले, गावकरी बचावासाठी गेले पण एकाचा अंत, एक जखमी, इंदापुरातील घटना https://tinyurl.com/mfv44htf

8. पुण्यातील सारसबागेसमोर तीन दिवसांपासून उभ्या असलेल्या कारमधून दुर्गंधी, नागरिकांना संशय, पोलिसांनी दार उघडताच कुजून फुगलेला मृतदेह समोर https://tinyurl.com/3h82wra9 मित्राची कार घेऊन घरातून बाहेर पडला आणि फोन बंद झाला, बेपत्ता झाल्याच्या तक्रारीनंतर दुसऱ्या दिवशी बॉडी सापडली, सारसबागेसमोर बंद कारमध्ये आढलेल्या मृतदेहाचं गुढ उकललं https://tinyurl.com/ycy5dej6

9. उत्तराखंडमधील बद्रीनाथ येथून डेहराडूनच्या सहस्रधाराकडे उड्डाण केलेले हेलिकॉप्टर जोशीमठजवळ कोसळले, वैमानिकासह सहाजणांचा अपघात, शोधमोहीम सुरू https://tinyurl.com/mtz4muey

10. चौथ्या टी 20 सामन्यामध्ये न्यूझीलंडकडून भारताचा दारून पराभव, न्यूझीलंडने 259 धावा कुटल्या, तुलनेत टीम इंडियाचा डाव 172 धावांवरच आटोपला https://tinyurl.com/yc247km2

एबीपी माझा Whatsapp Channel - https://whatsapp.com/channel/0029Va9dq2u6buMTUrb4GM0w

अन्न व्यवसायिकांनो सावधान! दिवाळीत कालबाह्य अन्न देऊ नका, अन्यथा... तुकाराम मुंढेंचा इशारा, भेसळयुक्त तेलाविरोधात मोहीम सुरु राहणार असल्याचा उल्लेख

वेदांत नेब — Fri, 30 Oct 2026 17:21:12 +0530

Tukaram Mundhe : दिवाळी आली आहे त्यामध्ये खाद्य संस्कृती आपली आहे. खाद्य तयार करताना योग्य तेलाचा वापर करणं गरजेच आहे. भेसळयुक्त तेलावर आमची मोहीम सुरु आहे आणि ती सुरु राहणार असल्याचा इशारा अन्न व औषध प्रशासन विभागाचे आयुक्त तुकाराम मुंढे (FDA CommissionerTukaram Mundhe) यांनी दिला आहे. खाद्यतेलाच्या आतापर्यत 1089 तपासणी केल्या आहेत, यामध्ये 80 लायसन रद्द केल्या आहेत. तर 28753 क्विंटल माल जप्त केल्याची माहिती तुकाराम मुंढे यांनी दिली. जे अन्न व्यवसायिक आहेत त्यांनी खबरदारी घ्यायची आहे. फक्त विक्रेताची ही जबाबदारी नाही. कालबाह्य अन्नाची एकही पिशवी बाहेर येणार नाही यांची दक्षता घ्यावी कंपनी छोटी असो किंवा मोठी असे मुंढे म्हणाले.

खराब झालेले अन्न पुन्हा वापरात आणले जाते, आता ते नष्ठ केल्याचा पुरावा द्यावा लागेल

कारवाया आमचे गोल नाही आम्ही फक्त कंटिन्यू काम करत आहोत. आपण सगळ्यात मोठं काय केलं तर कम्पल्यान्स ऑर्डर आणल्या आहेत. हॉटेल, मिल्क आणि मिल्क प्रॉडक्ट, तेल, स्कुल फूड असेल किंवा इतर बाबीमध्ये काय नियम असावेत हे आपण ऑर्डर काढले आहेत असे मुंढे म्हणाले. आतापर्यंत 22 रेग्युलशन आले आहेत. फीड बिजनेस आणि लायसन्स होल्डर आणि अधिकाऱ्यांची जबाबदारी काय आहे ते सांगतो असेही मुंढे यावेळी म्हणाले. आजची ऑर्डर आहे एक्स्पायर रिटर्न अँड डॅमेज फूड. कोणत्याही राज्यात अशी ऑर्डर नाही कालबाह्य खराब झालेले अन्नाबाबत ही ऑर्डर आहे. कालबाह्य झालेले खराब झालेले अन्न पुन्हा वापरात आणले जाते. अन्न पूर्ण नष्ट झाल्याचा पुरावा कंपनीला द्यावा लागेल असेही मुंढे म्हणाले.

अन्न नष्ट न करता विल्हेवाट प्रमाणपत्र दाखवले जाते

ऑर्डर काढण्याचं कारण काय? तर खराब झालेलं अन्न नष्ट न करता विल्हेवाट प्रमाणपत्र दाखवले जाते आणि एजंटद्वारे पुन्हा चैनमध्ये आणले जाते. तारखेत फेरफार केली जाते हे आमच्या निदर्शनास आले आहे. गेल्या 15 दिवसात आम्ही मोठी कारवाई केली आहे. भिवंडीमध्ये 80 हजार रुपयाचा साठा जप्त केला आहे. नंतर 26 लाख रुपयांचा साठा जप्त केला. वडपे येथे सुद्धा दोन ठिकाणी साठा जप्त करून परवाना निलंबित केल्याची माहिती मुंढेंनी दिली.

5 कोटीचा साठा जप्त केला

5 कोटीचा साठा जप्त केला आहे. 10 कारवायानंतर 2 गुन्हे दाखल केले आहेत. आपण यात मालकाची नाव सुद्धा टाकली आहेत. 32 आरोपी यामध्ये आहेत. कालबाह्य झालेला माल वेगळ्या ठिकाणी ठेवणं गरजेचं आहे ते आढळून आलेला नाही. महाराष्ट्र प्रदूषण नियंत्रण मंडळाकडे ज्या विल्हेवाट लावणाऱ्या कंपन्या आहेत, त्यांच्याकडून अन्नची विल्हेवाट लावल्याचे प्रमाणपत्र आढळल्याची माहिती मुंढेंनी दिली. ही एक दिवसाची कारवाई नाहीतर 2 महिन्यापासून हे काम करत आहोत.

Maharashtra MLC Election : शांत राहा, महायुतीतील वाद वाढवू नका; विधानपरिषद निकालांनंतर एकनाथ शिंदेंचे शिवसेना नेत्यांना आदेश

एबीपी माझा ब्युरो — Fri, 30 Oct 2026 17:04:05 +0530

मुंबई : विधान परिषद निवडणुकीच्या निकालांनंतर महायुतीतील घटक पक्षांमध्ये आरोप-प्रत्यारोपांच्या फैरी झाडल्या जात असून वाद पेटला आहे. या वाढत्या राजकीय वादाची गंभीर दखल घेत उपमुख्यमंत्री एकनाथ शिंदे यांनी शिवसेना नेते, प्रवक्ते आणि पदाधिकाऱ्यांना सूचना दिल्या आहेत. विधान परिषद निवडणुकीच्या निकालानंतर महायुतीत निर्माण झालेला विसंवाद अजिबात वाढवू नका, असे स्पष्ट निर्देश एकनाथ शिंदे यांनी गुरुवारी रात्री पार पडलेल्या पक्षाच्या महत्त्वाच्या बैठकीत दिले आहेत.

या निवडणुकीतील निकालांचे महायुती म्हणून सर्वांनी मिळून आत्मपरीक्षण करणे गरजेचे असून झालेल्या चुकांची पुनरावृत्ती टाळावी, असे सांगत महायुतीत वितुष्ट निर्माण होणार नाही आणि अंतर्गत वादाचा फायदा विरोधकांना मिळणार नाही, याची खबरदारी घेण्याचे आदेश त्यांनी दिले आहेत.

Maharashtra Vidhan Parishad Result : स्थानिक पदाधिकाऱ्यांकडून मागवला अहवाल

एकनाथ शिंदे यांनी महायुती म्हणून काम करताना नक्की कुठे चुका आणि त्रुटी राहिल्या, याचा सविस्तर अहवाल स्थानिक पदाधिकाऱ्यांकडून मागवला आहे. लवकरच होणाऱ्या महायुती समन्वय समिती आणि सर्व वरिष्ठ नेत्यांच्या बैठकीत या अहवालावर आणि सर्व मुद्द्यांवर सविस्तर चर्चा केली जाणार आहे.

तसेच, तूर्तास शिवसेनेच्या कोणत्याही प्रवक्त्याने किंवा पदाधिकाऱ्याने माध्यमांसमोर जाऊन मित्रपक्षांवर कोणतीही जाहीर टीका करू नये, अशा कडक सूचना देऊन विसंवाद टाळून एकजुटीने पुन्हा कामाला लागण्याचे निर्देश त्यांनी दिले आहेत.

Pune Graduate Constituency Defeat : पुणे पदवीधर मतदारसंघातील पराभवामुळे तणाव

राज्यात विधानपरिषद निवडणुकीतील सर्वाधिक गाजलेली आणि प्रतिष्ठेची मानली जाणारी जागा म्हणजे पुणे पदवीधर मतदारसंघ! या जागेवर शरद पवार यांच्या राष्ट्रवादी काँग्रेस पक्षाच्या उमेदवार आणि माजी सनदी अधिकारी प्रभाकर देशमुख यांच्या कन्या हर्षदा यांनी दणदणीत विजय मिळवला. त्यांनी भाजपच्या उमेदवार स्मिता जाधव यांचा 9,928 मतांनी पराभव केला.

भाजपने सलग तीन वेळा ही जागा जिंकली होती. विद्यमान आमदार महायुतीत असतानाही भाजपचा येथे पराभव झाल्याने भाजप नेत्यांनी थेट शिवसेनेला लक्ष्य करण्यास सुरुवात केली. दोन्ही पक्षांच्या स्थानिक नेत्यांकडून एकमेकांवर सुरू झालेल्या चिखलफेकीमुळे महायुतीत कमालीचा तणाव निर्माण झाला आहे. त्यावर आता एकनाथ शिंदेंनी मध्यस्थी करत पूर्णविराम देण्याचा प्रयत्न केला आहे.

ही बातमी वाचा:

मग माझ्या मुलाच्या नावाचं पाकीट देण्याचा प्रश्न आलाच कुठं? सतेज पाटील अन् हसन मुश्रीफांमध्ये वाद रंगला! आता मुश्रीफांनी डोंगळेंनी राजीनाम्याला टाळाटाळ करताच काय घडलं ते सांगितलं, तिघांची नावं घेतली

Supreme Court: 'ब्रेकअपनंतर परस्पर संमतीने झालेले संबंध म्हणजे बलात्कार नव्हे' प्रत्येक तुटलेल्या नात्याला बलात्काराचे प्रकरण करणं चुकीचा, सर्वोच्च न्यायालयाचा महत्त्वपूर्ण निर्वाळा

परशराम पाटील, एबीपी माझा — Fri, 30 Oct 2026 16:55:14 +0530

Supreme Court on Rape: नातेसंबंध तुटल्यानंतर प्रौढ पुरुष आणि स्त्री यांच्यातील परस्पर संमतीने झालेले शारीरिक संबंध बलात्कार मानले जाऊ शकत नाहीत, असा महत्त्वपूर्ण निर्वाळा सर्वोच्च न्यायालयाने दिला. लग्नाचे वचन देऊन संबंध ठेवल्याचा आरोप असलेल्या एका व्यक्तीची न्यायालयाने निर्दोष मुक्तता केली. न्यायमूर्ती बी. व्ही. नागरत्ना आणि आर. महादेवन यांच्या खंडपीठाने म्हटले आहे की, प्रेम आणि परस्पर संमतीने निर्माण झालेले नातेसंबंध नाते तुटल्यानंतर गुन्हेगारी ठरवता येणार नाहीत. प्रत्येक तुटलेल्या नात्याला बलात्काराचे प्रकरण मानणे चुकीचे आहे. तथापि, जर सुरुवातीपासूनच लग्नाची खोटी आश्वासने देऊन किंवा फसवणूक करून संमती मिळवली गेली असेल, तर प्रकरण वेगळे असेल. अशा प्रकरणांमध्ये, संमती खरोखरच फसवणुकीवर आधारित होती की नाही हे तपासणे महत्त्वाचे आहे.

सर्वोच्च न्यायालयाची 5 प्रमुख निरीक्षणे...

बलात्काराचा आरोप लावण्याची धमकी देणे चुकीचे

एखाद्या पुरुषाने केवळ नातेसंबंध संपवण्याचा निर्णय घेतला आहे म्हणून त्याच्यावर फौजदारी गुन्हा दाखल करणे योग्य नाही. बलात्काराचा आरोप लावण्याची धमकी देऊन कोणालाही नातेसंबंधात राहण्यास भाग पाडले जाऊ शकत नाही.

बलात्कार कायद्यांचा गैरवापर करू नये

बलात्कार कायद्यांचा गैरवापर छळ करण्यासाठी किंवा सूड घेण्यासाठी करू नये. परस्पर संमतीने निर्माण झालेली नाती ही सुरुवातीपासूनच फसवणूक किंवा जबरदस्तीवर आधारित असलेल्या नात्यांपेक्षा वेगळी असतात.

बलात्काराच्या प्रकरणांमध्ये कठोर शिक्षा झाली पाहिजे

कोणत्याही परिस्थितीत, आरोपांची सत्यता आणि उपलब्ध पुराव्यांची तपासणी केल्यानंतरच योग्य कायदेशीर निर्णय घेतले पाहिजेत. लैंगिक हिंसाचार, जबरदस्ती किंवा फसवणुकीचा पुरावा आढळल्यास, गुन्हेगारांवर कठोर कायदेशीर कारवाई केली पाहिजे.

महिलांच्या समस्या समजून घ्या

कुटुंबाची प्रतिष्ठा आणि सामाजिक कलंकाच्या भीतीमुळे अनेक महिला लैंगिक हिंसाचाराची तक्रार करू शकत नाहीत. त्यांच्या समस्या समजून घेणे महत्त्वाचे आहे.

इतर महत्वाच्या बातम्या

Bhutan Glacial Lake Burst: भूतानमध्येही 'नेपाळी' थरकाप! हिमनदीचे सरोवर फुटताच प्रचंड विध्वंस, महामार्ग आणि रस्ते उखडले, प्रसिद्ध गरम पाण्याचा झरा सुद्धा वाहून गेला, भारतात बंगाल आणि आसाममध्ये पुराचा इशारा

BLOG : महायुतीच्या पोखरलेल्या भिंती पराभवाचं कारण

विनय महाजन — Fri, 30 Oct 2026 16:28:54 +0530

BLOG : महाराष्ट्रात विधान परिषदेच्या पाच जागांसाठी निवडणुका पार पडल्या. यात महाविकास आघाडीला तीन ठिकाणी तर महायुतीला दोन जागांवर विजय संपादन करता आला. म्हणजे एकप्रकारे महायुतीचा हा पराभवच म्हणावा लागेल. यात दोन्ही शिक्षक मतदारसंघ महायुतीला जिंकता आले. पण पदवीधरमध्ये महायुतीची विशेषतः भाजपची मोठी पिछेहाट झाली.

भाजपसाठी आत्मचिंतनाचा विषय

भाजपनं पाच पैकी तीन जागा लढवल्या त्यापैकी फक्त एक जागा त्यांना जिंकता आली. पण तीन पदवीधर जागांपैकी एकही जागा जिंकता न येणं हा खरा आत्मचिंतनाचा विषय आहे. कारण या निवडणुकांमध्ये दरवेळी नव्यानं मतदार नोंदणी केली जाते. यात नव्या पदवीधरांची म्हणजे तरुण वर्गाची भर असणारच आहे. मग हा वर्ग भाजपपासून दूर जातोय का? याचा विचार भाजपला करणं गरजेचं आहे.

दुसरा महत्त्वाचा मुद्दा विरोधकांकडून जे मुद्दे उपस्थित केले जातायत ते एसआयआर, पेपरफुटीसारखे सगळे मुद्दे फेक नरेटिव्ह म्हणून भाजप दुर्लक्षित करत असलं तरी मुद्दे मतदारांना विशेतः तरुणांना अपील होतायत का? याचा विचार भाजपला नक्की करावा लागेल. विरोधकांचे हे मुद्दे फोडून काढण्यासाठी भाजपची पुढची रणनीती काय असेल? २०२४ ला महिला मतदारांना आकर्षित करण्यासाठी आणलेली लाडकी बहीण योजना महायुतीसाठी मास्टर स्ट्रोक ठरली होती. २०२९ साठी भाजपकडे कुठला असा मास्टर प्लान आहे का?

महायुती धर्म

भाजपनं पाच पैकी तीन जागा लढवल्या होत्या, तर दोन जागा आपल्या मित्र पक्षांना दिल्या होत्या. मात्र दरवेळी भाजप सांगेल ती पूर्व दिशा म्हणणाऱ्या मित्र पक्षांच्या नाराजीचा फटका भाजपला नक्कीच बसला. पुणे पदवीधरमध्ये शिवसेनेच्या मंगेश चिवटेंनी आपला अर्ज दाखल करत पक्की दावेदारी सांगितली होती. तसंच राष्ट्रवादीच्या भैया मानेंनीही आपला अर्ज दाखल केला होता. मात्र सरतेशेवटी या बंडखोरांची समजून सांगण्यात महायुतीच्या नेत्यांना यश आलं खरं पण बंडखोरांनी मनाने किती प्रमाणात महायुतीच्या उमेदवाराचं काम केलं? हा भाजपसाठी आत्मचिंतनाचा विषय.

त्याचसोबत निष्ठावंतांना डावलून आयारामांना संधी देणं, ही भाजपची सवय येत्या काळात भाजपला महागात पडू शकते. एकेकाळी पदवीधरचे सातही मतदारसंघ भाजपचे बालेकिल्ले होते. पण आता केवळ एकेठिकाणी भाजपचा आमदार आहे. यामागचं कारण म्हणजे, भाजपला अपेक्षित असलेली नोंदणी न होणं.

यासोबत महायुतीला पुढे जड जाणारी बाब म्हणजे समन्वयाचा अभाव. जी चूक विधानसभेला महाविकास आघाडीनं केली तीच चूक आता महायुती करतेय. भाजपनं डोळे मोठे केले की ऐकणारे मित्र पक्ष आता स्वतःची भूमिका मांडू लागले आहे. पुणे शिक्षक मतदारसंघात भाजपचे कौस्तुभ गावडे जरी जिंकले असले, तरी त्यांच्या विरोधी उमेदवार खुद्द एकनाथ शिंदेंनी दिलेला पाठिंबा हा भाजपला बसलेला मोठा धक्काच मानवा लागेल. त्यासोबतच औरंगाबाद मतदारसंघात राष्ट्रवादीच्या सतीश चव्हाणांविरोधात अब्दुल सत्तारांनी केलेलं काम महायुतीच्या भिंती पोखरत चालल्या आहेत का? असा प्रश्न निर्माण करतात.

भाजप समोरचं मोठं आव्हान

ऐकेकाळी भाजपचं आयटीसेल निवडणुका जिंकवून देणारं ब्रह्मास्त्र आहे, असं बोललं जायचं. पण सोशल मीडियावर भाजपविरोधात सीजेपीनं तयार केलेली लाट, बाहेर आलेल्या ऑडिओ क्लिप, आयटी सेलच्या कामावर प्रश्न निर्माण करतात. या निवडणुकीतही सोशल मीडियातूनवर आलेल्या नितेश कराले मास्तरांनी नागपूर पदवीधर मतदारसंघात २४ हजार मतं घेतली. तर रविराज साबळेंनी औरंगाबाद पदवीधरमध्ये २० हजारांहून अधिक मतं घेतली. या दोघांच्याही मागे ना कार्यकर्त्यांची फौज होती, ना कुठलं कॅडर. त्यामुळे या दोघांनी घेतलेली मतं सोशल मीडियाची ताकद दाखवून देतात. त्यामुळे भाजपला २०२९ सालची निवडणूक अवघड जाणार आहे हे निश्चित.

Thane Crime news: पोलिसांनी सूर्यफूल तेल लावून लघवीच्या जागेवर मारलं,अंतर्वस्त्र डोक्यात घातली, राम पूर्णेकरांचा गंभीर आरोप, आदित्य ठाकरेंच्या आंदोलनातील तरुणांना ठरवून टार्गेट केल्याचा दावा

हितेश पांचाळ — Fri, 30 Oct 2026 15:12:35 +0530

Ram Purnekar Thane Police Crime news: ठाकरे गटाचे विभागप्रमुख प्रदीप पूर्णेकर यांच्या हत्याप्रकरणावरुन राजकीय वातावरण प्रचंड तापले असताना राम पूर्णेकर यांनी शुक्रवारी ठाणे पोलिसांवर गंभीर आरोप केले. आदित्य ठाकरे (Aaditya Thackeray) हे गुरुवारी ठाण्यात पूर्णेकर कुटुंबाच्या भेटीला गेले होते. यानंतर त्यांनी ठाणे पोलीस (Thane Police) आयुक्तांची भेट घेतली होती. यावेळी त्यांच्यासोबत असणाऱ्या दोन तरुणांना कापुरबावडी पोलिसांनी शोधून पोलीस ठाण्यात आणले आणि त्यांना बेदम मारहाण केल्याचा आरोप राम पूर्णेकर (Ram Purnekar) यांनी केला. या तरुणांना नग्न करण्यात आले. त्यांची अंतर्वस्त्रही काढण्यात आली होती, पोलिसांनी त्यांची अंतर्वस्त्र काढून एकमेकांच्या डोक्यावर घातल्याचा दावा पूर्णेकर यांनी केला. राम पूर्णेकर या तरुणांना घेऊन तक्रार दाखल करण्यासाठी कापुरबावडी पोलीस ठाण्यात गेले होते. (Thane Crime news)

काल दुपारी आदित्य ठाकरे आणि संजय राऊत यांनी पूर्णेकर कुटुंबीयांची भेट घेतली होती होती. या भेटीनंतर पूर्णेकर समर्थकांना पोलिसांनी ताब्यात घेतले होते. त्यांच्यावर पोलिसांनी कापुरबावडी पोलीस ठाण्यात अमानुष अत्याचार केल्याचा आरोप पूर्णेकर कुटुंबीयांकडून करण्यात आला. राम पूर्णेकर शुक्रवारी आपल्या वकिलासह या तरुणांना घेऊन कापुरबावडी पोलीस ठाण्यात आले होते. यावेळी राम पूर्णेकर यांनी प्रसारमाध्यमांशी संवाद साधताना म्हटले की, पोलिसांनी अर्जुन पुंदरे या तरुणाला काल ताब्यात घेतले होते. त्याच्यासोबत आणखी काही तरुण होते. कापुरबावडी पोलीस ठाण्यात नेल्यानंतर त्यांचे कपडे काढण्यात आली. त्यांच्या अंगावर अंतर्वस्त्रही ठेवण्यात आली नव्हती. पोलिसांनी या सगळ्यांची अंतर्वस्त्र काढून एकमेकांच्या डोक्यावर घातल्याचा आरोप अर्जुन पुंदरे याने केला. तसेच पोलिसांनी सूर्यफुल तेल लावून या तरुणांच्या शरीराच्या नाजूक भागावर, लघवीच्या ठिकाणी मारहाण केल्याचा खळबळजनक आरोप राम पूर्णेकर यांनी केला.

आम्हाला कापूरबावडी पोलीस ठाण्यात पकडून आणले. फक्त सांगण्यात आले होते, एका व्यक्तीचा फोटो दाखवला जाईल, त्याला ओळखता का याची तपासणी करायची आहे. त्यानंतर कापूरबावडी पोलीस ठाण्यात आम्हाला आणले. अश्लील प्रकारे आम्हाला टॉर्चर केले कपडे काढून साध्या कपड्यांवरील व्यक्ती आम्हाला यायचे आणि मारहाण करायचे बेदम मारहाण केली पट्ट्यांनी मारहाण केली, असा आरोप तरुणांनी केला. राम पूर्णेकर यांनी सांगितले की, एका तरुणाच्या शरीराच्या चुकीच्या जागी पोलिसांनी बोट घातले. लघवीच्या जागेवर सूर्यफुल तेल लावण्यात आले. एका पोलिसाच्या पार्श्वभागात पोलिसांनी बोट घातले. आमच्या वकिलांनी पोलिसांना पत्र दिले आहे. संबंधितांवर कठोर कारवाई करण्याचे आश्वासन वरिष्ठ पोलीस अधिकाऱ्यांनी दिले आहे.

राम पूर्णेकर या तरुणांना घेऊन पोलीस ठाण्यात आले तेव्हा तिथे वरिष्ठ अधिकारी उपस्थित होते. कथित पोलीस अत्याचाराच्या आरोपांमुळे पूर्णेकर समर्थक आक्रमक झाले आहेत. या प्रकरणाची चौकशी करुन संबंधित पोलिसांवर कारवाई करण्याची मागणी पूर्णेकर यांच्याकडून करण्यात आली आहे. या सगळ्यावर आता ठाणे पोलिसांकडून स्पष्टीकरण देण्यात येणार का, हे बघावे लागेल.

आणखी वाचा

Meenakshi Shinde and Pradeep Purnekar: मिनाक्षी शिंदेंना दुहेरी धक्का, आधी राजीनामा द्यावा लागला, नंतर शिवसेनेच्या नगरसेवकांनी साथही सोडली, टेंभी नाक्यावर कोणीच फिरकलं नाही

Anand Paranjpe : मराठी भाषा खूप समृद्ध, आमच्याकडे पण खूप मोठा शब्दकोश, पण....; एकनाथ शिंदेंवरील टीकेवरून आनंद परांजपेंचा महायुतीतील मित्रपक्षांना सल्लावजा सूचक इशारा

हितेश पांचाळ — Fri, 30 Oct 2026 14:38:40 +0530

Anand Paranjpe : ज्या प्रकारचे शब्द भाजप प्रवक्त्यांनी वापरले ते महायुतीमध्ये योग्य नाही. मराठी भाषा खूप समृद्ध आहे, आमच्याकडे पण मराठी शब्दांचा खूप मोठा शब्दकोश आहे. आम्ही देखील ते वापरू शकतो. पण दोस्तीत कुस्ती करायची नसते आणि म्हणून महायुतीमध्ये कुठल्याही पक्षावर शिवसेनेच्या प्रवक्त्यांकडून किंवा शिवसेनेच्या नेत्यांकडून कुठल्याही प्रकारची टीका होणार नाही, हीच अपेक्षा आम्ही भारतीय जनता पार्टी (BJP)आणि राष्ट्रवादी काँग्रेस पक्षाकडून (NCP) ठेवतो. युती टिकावी हे मला महत्वाचं वाटतं. त्यामुळे प्रवीण दरेकर यांना असलेल्या आपल्या मर्यादा ओलांडून टीका करू नये, असा सल्लावजा सूचक इशारा शिवसेनेचे प्रवक्ते आनंद परांजपे (Anand Paranjpe) यांनी महायुतीतील मित्र पक्षांना दिला आहे.

जिथे-जिथे नैसर्गिक संकट येते तिथे एकनाथ शिंदे धावून जातात. महाराष्ट्राच नाही तर केरळ, जम्मू, नेपाळ अशा अनेक ठिकाणी धावून ते गेलेत. दसरा मेळावा देखील समर्पित केला. बळीराजाच्या मुलींचे विवाह करून त्यांना आधार देणार आहेत. अनेक गावात आमचा शोध सुरु असल्याचीही माहिती त्यांनी दिली.

Anand Paranjpe on Mahayuti: दोस्तीमधे कुस्ती कुणी करू नये, तीच अपेक्षा आम्ही मित्रपक्षाकडून करतोय

दरम्यान, संजय गायकवाड यांचा शेतकऱ्यांवरील वक्तव्यावर बोलताना संजय गायकवाड म्हणाले की, कोणत्याही कार्यत्यांनी असे वक्त्यव्य करू नये, असे आदेश एकनाथ शिंदे यांनी दिले आहे. भविष्यातही असे कोणी बोलू नये, असे आदेश त्यांनी दिले आहेत. कालच एकनाथ शिंदे यांनी स्पष्ट केले, की चार ठिकाणी युतीधर्म पाळला. आम्ही युतीधर्म पाळत आलोय. कोणत्याही प्रकाराची टीका कुणी करू नये. दोस्तीमधे कुस्ती कुणी करू नये, तीच अपेक्षा आम्ही मित्रपक्षाकडून करतोय. आज देखील जी भाषा वापरली ती मित्र पक्षाने पाळायला हवी होती. शिवसेनेचे मुख्य नेते उपमुख्यमंत्री एकनाथरावजी शिंदे असतील, राष्ट्रवादीच्या नेत्या व उपमुख्यमंत्री सुनेत्राताई पवार असतील त्यावेळेला नक्कीच महायुतीच्या अधिक समन्वयावर चर्चा होईल. पण मित्रपक्षांनी देखील शिवसेनेवर कुठल्याही प्रकारचे आरोप करणं त्यांच्या प्रवक्त्यांनी किंवा नेत्यांनी टाळलं पाहिजे. असेही शिवसेना प्रवक्ते आनंद परांजपे म्हणाले.

शिवसेनेच्या कुठल्याही प्रवक्ता, पदाधिकारी किंवा नेत्यांनी मित्र पक्षातील पक्षावर कुठल्याही प्रकारची टीका करू नये, भविष्यामध्ये अधिक प्रकारचं तिन्ही पक्षांमध्ये समन्वय तसा राहील याची वरिष्ठ पातळीवर चर्चा होईल. हीच अपेक्षा आम्ही आमच्या दोन मित्र पक्षांकडून पण ठेवतो. असेही ते म्हणाले.

Anand Paranjpe: कृतीतून एक, पुस्तकातनं एक, आणि सकाळच्या पत्रकार परिषदमध्ये टीका, अशी विसंगती

अनेक वेळेला खासदार संजय राऊत यांनी देशाचे लोकप्रिय पंतप्रधान नरेंद्र मोदी साहेबांची स्तुती केलेली आहे. अनेक वेळेला शिवसेना उभाठाने देखील लोकसभेमध्ये राष्ट्रहिताच्या विषयांवर एनडीए सरकारच्या बाजूने मतदान देखील केलेला आहे. म्हणून कृतीतून एक, पुस्तकातनं एक सकाळच्या पत्रकार परिषदमध्ये टीका अशी विसंगती कायमच खासदार संजय राऊत यांच्या बद्दल दिसते. असेही आनंद परांजपे म्हणाले.

Sanjay Gaikwad: शेतकऱ्यांबाबतचं वादग्रस्त वक्तव्य; टीकेची झोड उठताच एकनाथ शिंदेंकडून 'करेक्ट कार्यक्रम? आता संजय गायकवाडांचा यू-टर्न, म्हणाले....