मुंबई : मंत्री नरहरी झिरवळ (Narhari Zirwal) यांच्या कार्यालयातील लाच प्रकरणी (FDA Ministry Bribe Case) मोठी अपडेट समोर आली आहे. लाच घेतलेल्या राजू ढेरेंगेला अखेर अन्न आणि औषध प्रशासन विभागातून निलंबित करण्यात आलं आहे. अधिवेशनाच्या पहिल्याच दिवशी राजू ढेरेंगेला विभागातून निलंबित करण्यात आलं आहे. अन्न आणि नागरी पुरवठा विभागातून राजू ढेरेंगे हा मंत्री आस्थापनेवर कार्यरत होता. या लाचखोरी प्रकरणात मुख्यमंत्री देवेंद्र फडणवीस यांनी मंत्री नरहरी झिरवाळ यांना क्लीन चिट दिली आहे.
नरहरी झिरवाळ यांचे खाजगी सचिव रामदास गाडे यांना या आधीच कार्यमुक्त करण्यात आलं आहे. त्यानंतर आता राजू ढेरेंगे याच्यावर विभागाने मोठी कारवाई करत त्याला निलंबित करण्यात आलं आहे. दरम्यान 35 हजारांची लाच घेण्याप्रकरणी अटक करण्यात आलेल्या लिपिक राजेंद्र ढेरिंगेला जामीन मिळाला आहे. मुंबई सत्र न्यायालयातील एसीबीच्या विशेष न्यायालयाने ढेरिंगेला जामीन मंजूर केला.
मुख्यमंत्र्यांकडून क्लीन चिट
दरम्यान, लाचखोरी प्रकरणात मुख्यमंत्री देवेंद्र फडणवीसांनी मंत्री नरहरी झिरवाळ यांना क्लीन चिट दिली आहे. एसीबी कारवाई करण्यासाठी मुक्त आहे, परंतु मंत्र्यांच्या विरोधात कोणतेही पुरावे सापडले नाहीत. त्यामुळे मंत्री झिरवाळ यांचा यामध्ये कोणताही सहभाग नसल्याचं स्पष्ट होत आहे असं मुख्यमंत्र्यांनी सांगितलं.
अधिवेशनात मुद्दा गाजण्याची शक्यता
अर्थसंकल्पीय अधिवेशनाच्या तोंडावर औषध आणि प्रशासन मंत्री नरहरी झिरवळ यांच्या विभागातील लाचखोरीचे प्रकरण बाहेर आलं आहे. त्यांची आता चौकशी देखील सुरू आहे. सोमवारपासून सुरू होणाऱ्या अर्थसंकल्पीय अधिवेशनात यावर गदारोळ होण्याची शक्यता आहे. मात्र आपल्या विभागातील अधिकाऱ्यांची होत असलेल्या चौकशीत सर्व काही निष्पण होईल, आपण सर्वांना उत्तर देण्यास तयार आहे असं मंत्री नरहरी झिरवाळ यांनी स्पष्ट केलं आहे.
झिरवाळांच्या खासगी सचिवावर कारवाई
अन्न आणि औषध प्रशासन विभागातील लाचखोरी प्रकरणात मंत्री नरहरी झिरवाळ यांचे खासगी सचिव रामदास गाडे यांच्यावर कारवाई करण्यात आली आहे. झिरवाळ यांच्या खासगी सचिव रामदास गाडेंना अन्न आणि औषध प्रशासन विभागातून कार्यमुक्त करण्यात आलं आहे. वादग्रस्त अधिकारी रामदास गाडे यांना त्यांच्या मूळ आस्थापनेत म्हणजेच पशुवैद्यकीय विभागात पाठवण्याचे आदेश नरहरी झिरवळांनी दिले आहेत.
ही बातमी वाचा: