Mumbai Crime News : बनावट आय ए एस (IAS) निलेश राठोडला (Nilesh Rathod) 14 ऑक्टोबरपर्यंत पोलिस कोठडी सुनावण्यात आली आहे. किल्ला कोर्टाने राठोडची रवानगी पोलीस कोठडीत केली आहे. सरकारी नोकरीचे आमिष दाखवून 36 इच्छुकांची फसवणुक केल्याचा आरोप निलेश राठोडवर ठेवण्यात आला आहे. जवळपास 2.88 कोटी रुपयांच्या फसवणूक केल्या प्रकरणी 35 वर्षीय बनावट आयएएस अधिकाऱ्याला आर्थिक गुन्हे शाखेने अटक केली आहे.
सरकारी नोकरीचे आमिष दाखवून 36 इच्छुकांची फसवणूक
सरकारी नोकरीचे आमिष दाखवून 36 इच्छुकांची फसवणूक केल्याप्रकरणी मुंबई पोलिसांच्या आर्थिक गुन्हे शाखेने सोलापूर जिल्ह्यातील बार्शी येथील निलेश राठोड (35) याला अटक केली आहे. भारतीय प्रशासकीय सेवा (आयएएस) अधिकारी असल्याचे भासवून सरकारी नोकऱ्यांचे खोटे आश्वासन देऊन 36 नोकरी इच्छुकांना फसवल्याप्रकरणी अटक केली आहे. स्टाफ सिलेक्शन कमिशन (एसएससी) मध्ये उपसचिव असल्याचा दावा राठोडने केला होता. पुढील चौकशीत आणखीन लोकांची फसवणूक समोर येण्याची शक्यता आहे. पोलिस या प्रकरणी कसून चौकशी करत आहेत.
सहार पोलिस ठाण्यात विविध कलमान्वये गुन्हा दाखल
मुंबई पोलिसांच्या तपासात असे दिसून आले आहे की, आरोपींनी आयकर विभागात निरीक्षक आणि सहाय्यक यासारख्या पदांसाठी बनावट भरतीचे आश्वासन देऊन लाखो रुपयांची फसवणूक केली. आरोपीविरुद्ध सहार पोलिस ठाण्यात भादंविच्या कलम 318, 319, 336, 338 आणि 340 अंतर्गत गुन्हा दाखल करण्यात आला आहे. नवी मुंबईतील रहिवासी संतोष खरपुडे यांनी तक्रार दाखल केल्यानंतर हे प्रकरण उघडकीस आले आहे. त्यांनी सांगितले की, आरोपींनी त्यांच्यासह इतर अनेक उमेदवारांना मोठ्या प्रमाणात फसवले. सहाय्यक पदासाठी 4 लाख रुपये आणि निरीक्षक पदासाठी 6 लाख रुपये मागितले गेले. मे 2023 मध्ये, निलेश राठोडने अंधेरी पूर्वेतील एका हॉटेलमध्ये बनावट मुलाखती घेतल्या आणि प्रत्येक उमेदवाराकडून अंदाजे 10 लाख रुपये उकळले. आरोपींनी बनावट नियुक्ती पत्रे देखील दिली, सरकारी रुग्णालयांमध्ये बनावट वैद्यकीय चाचण्या घेतल्या आणि संपूर्ण प्रक्रिया खरी असल्याचे दाखवण्यासाठी बनावट पोलिस पडताळणी कागदपत्रे देखील दिली. जेव्हा पीडितांना अनेक महिने त्यांची नियुक्ती पत्रे मिळाली नाहीत, तेव्हा त्यांनी आयकर विभागाशी संपर्क साधला आणि त्यांना कळले की अशी कोणतीही भरती प्रक्रिया सुरू नाही. त्यानंतर हा सर्व प्रकार उघडकीस आला आहे.
महत्वाच्या बातम्या: