कमी बोला जास्त काम करा! एकनाथ शिंदेंच्या आमदारांना कानपिचक्या, म्हणाले, केलेल्या कामांची ब्रेकिंग न्यूज व्हावी

तुमचा चुकीचा शब्द पक्षाला अडचणीत आणतो. आपण एवढं मोठं यश मिळवलं ते चुकीचं बोलून घालवू नका, अशा कानपिचक्या राज्याचे उपमुख्यमंत्री एकनाथ शिंदे (Eknath Shinde) यांनी शिवसेनेच्या आमदारांना दिल्या आहेत.

Eknath Shinde  shivsena mla news

Source : Getty Images

Eknath Shinde :  तुमचा चुकीचा शब्द पक्षाला अडचणीत आणतो. आपण एवढं मोठं यश मिळवलं ते चुकीचं बोलून घालवू नका, अशा कानपिचक्या राज्याचे उपमुख्यमंत्री एकनाथ शिंदे (Eknath Shinde) यांनी शिवसेनेच्या आमदारांना दिल्या आहेत. कमी बोलू आणि जास्त काम करु तेवढं चांगलं असल्याचे एकनाथ शिंदे म्हणाले. विरोधकांना एक्स्पोज करताना स्वतः एस्पोज होऊ नका. शिस्तीला तडा जाईल असं काही करु नका. केलेल्या कामांची ब्रेकिंग न्यूज व्हायला पाहिजे असंही एकनाथ शिंदे यावेळी म्हणाले. 

घर तिथे शिवसैनिक आणि गाव तिथे शाखा झालीच पाहिजे

शाखेचं जाळं बाळासाहेब ठाकरे आणि आनंद दिघेसाहेबांनी घट्ट केलं आहे. शाखा हा लोकांना आधार वाटतो. कंटेनर शाखेचा कॉन्सेप्ट ठिकठिकाणी राबवा असेही शिंदे म्हणाले. 
'घर तिथे शिवसैनिक आणि गाव तिथे शाखा' ही झालीच पाहिजे. निवडणुकांसाठी सज्ज व्हा, एकदिलाने काम करायचंय, निवडून येण्याची क्षमता असलेला उमेदवार हवा असे ते म्हणाले. 
उमेदवार चुकला की संपलं. जास्तीत जास्त सदस्य नोंदणी करा. नोंदणी करताना प्रत्येक पदाधिकाऱ्यांनी उद्दिष्ट ठरवून नोंदणी करा. मराठी भाषेबाब तडजोड सहन करणार नाही.  गळचेपी सहन करणार नाही. मराठी माणसाच्या उध्दारासाठी जे काही करायचं ते आपण करणार, दिलेला शब्द आपण पाळतो त्यामुळे मराठी माणूस आपल्यासोबत असल्याचे एकनाथ शिंदे म्हणाले. 

शाखाप्रमुखापासून तर मुख्य नेत्यापर्यंत सर्वांनाच निवडणूकीला सामोरे जावे लागणार

एकटा माणूस मोठा होऊन पक्ष मोठा होत नाही. कार्यकर्त्याला मोठं केलं की पक्षही आपोआप मोठा होतो असे एकनाथ शिंदे म्हणाले. आपल्यात शिवसैनिक हे पद सर्वात मोठं आहे हे लक्षात ठेवा. कार्यकर्ता हा नेता तयार करतो. पक्ष घडवतो, त्यामुळं कार्यकर्त्याला जपले पाहिजे असे एकनाथ शिंदे म्हणाले.नेता आमदार मंत्री झाला ही हवा डोक्यात जाऊ देऊ नका, कायम कार्यकर्ता म्हणूनच काम करा. शाखाप्रमुखापासून तर मुख्य नेत्यापर्यंत सर्वांनाच निवडणूकीला सामोरे जावे लागणार असल्याचे एकनाथ शिंदे म्हणाले.

मुख्यनेता असलो तरी निवडणुकीला रीतसर सामोरं जाणार

पक्षाच्या सक्रीय सदस्य हेच मतदार असतील. डीजीटल म्हणजे ऑनलाईन पद्धतीने आणि प्रत्यक्ष मतदान पद्धतीने अशा 7 टप्प्यात ही निवडणूक होणार आहे. कुठेही लपवाछपवी नाही किंवा कुणाचे नेतृत्व लादण्याचा प्रयत्न होणार नाही. ही निवडणूक ऐतिहासिक होणार आहे. संपूर्ण पारदर्शक पद्धतीने, निःपक्षपाती पद्धतीने निवडणूका होतील. मुख्यनेता असलो तरी आज निवडणुकीला रीतसर सामोरं जाणार असल्याचे एकनाथ शिंदे म्हणाले. शाखाप्रमुख असो किंवा मुख्य नेता लोकशाहीत सगळेच समान आहेत असे एकनाथ शिंदे म्हणाले. 

महत्वाच्या बातम्या: