विधानभवन प्रवेशासाठी आवश्यक असलेली प्रवेश पत्रिका नसल्याची सबब देत पीडित कुटुंबाची भेट नाकारण्यात आली. खुलताबादमध्ये 6 वर्षीय चिमुरडीवर वस्तीतल्याच एका इसमाने 28 जूनला अत्याचार केला. मात्र सुस्तावलेल्या पोलिसांना तपासासाठी 2 महिने लागले.
धक्कादायक म्हणजे, तपासातील अक्षम्य हलगर्जीपणामुळे 20 दिवसातच आरोपीला जामीनही मिळाल्याचा आरोप पीडित कुटुंबाने केलाय. पीडित मुलीला अजूनही कोणत्याही प्रकारची मदत मिळालेली नाही. त्यामुळे संतापलेल्या कुटुंबीयांनी विधीमंडळाबाहेर ठिय्या मांडला.
दरम्यान विधीमंडळाच्या सुरक्षेसाठी तैनात पोलिसांनी पीडित कुटुंबियांना गृहविभागाच्या वरिष्ठ अधिकाऱ्यांसोबत भेटीचं आश्वासन दिलं. त्यामुळे महाराष्ट्राच्या सुरक्षेची जबाबदारी खांद्यावर असणाऱ्या मुख्यमंत्र्यांना पीडित कुटुंबाच्या भेटीसाठीही वेळ नाही का? असा प्रश्न या घटनेनंतर उपस्थित झाला आहे.