संभाजीनगरच्या राजभोग हॉटेलमध्ये अस्वच्छतेचा कळस! FDAच्या धडक कारवाईनंतर परवाना निलंबित, सुरक्षेच्या 88 पैकी फक्त 18 गुण!
अन्न सुरक्षेच्या निकषांनुसार हॉटेलला 88 पैकी अवघे 18 गुण मिळाले असून, अन्नसुरक्षेवर गंभीर प्रश्नचिन्ह उपस्थित होत आहेत.

Chhatrapati Sambhajinagar: गेल्या अनेक दिवसांपासून अन्न व औषध प्रशासनाने अन्नसुरक्षेच्या नियमांचं उल्लंघन करणाऱ्या हॉटेल्स कॅफे व टपऱ्या व दुकानांवर कारवायांचा धडाका लावला आहे. छत्रपती संभाजीनगर शहरातील वडगाव कोल्हाटी परिसरातील महाराणा प्रताप चौक येथील ‘मे. राजभोग हॉटेल’वर अन्न व औषध प्रशासनाने (FDA) मोठी कारवाई केली आहे. हॉटेलमध्ये अन्न सुरक्षा नियमांचे गंभीर उल्लंघन आणि अस्वच्छता आढळून आल्याने प्रशासनाने 8 ऑक्टोबर 2026 रोजी हॉटेलचा अन्न परवाना तात्काळ प्रभावाने निलंबित केला. अन्न सुरक्षेच्या निकषांनुसार हॉटेलला 88 पैकी अवघे 18 गुण मिळाले असून, अन्नसुरक्षेवर गंभीर प्रश्नचिन्ह उपस्थित होत आहेत.
तपासणीत स्वयंपाकघरातील अस्वच्छता उघड
राज्यात राबवण्यात येत असलेल्या ‘Safe Food Safe Maharashtra’ मोहिमेअंतर्गत अन्न सुरक्षा अधिकारी पी. एस. कुचेकर यांनी 7 ऑक्टोबर 2026 रोजी राजभोग हॉटेलवर अन्न व औषध प्रशासनाने धडक कारवाई केली. या तपासणीत राजभोग हॉटेलचे स्वयंपाकघर अत्यंत अस्वच्छ असल्याचे आढळले. स्वयंपाकघरातील फरशी खराब होती, तसेच खिडक्या आणि दरवाज्यांमधून कीटकांचा प्रवेश रोखण्यासाठी आवश्यक व्यवस्था करण्यात आली नव्हती.
अन्न तयार करण्यासाठी वापरल्या जाणाऱ्या पाण्याचा तपासणी अहवालही उपलब्ध नव्हता. कच्चे आणि शिजवलेले अन्न तसेच शाकाहारी आणि मांसाहारी पदार्थ यांची योग्य विलगीकरणाशिवाय साठवणूक केली जात असल्याचे तपासणीत समोर आले.
रेफ्रिजरेशन, स्वच्छता आणि कीटक नियंत्रणात त्रुटी
हॉटेलमध्ये रेफ्रिजरेशन आणि योग्य व्यवस्थेचा अभाव आढळला. याशिवाय कचरा व्यवस्थापन, नियमित स्वच्छता आणि कीटक नियंत्रणासंबंधीच्या नियमांचेही पालन केले जात नसल्याचे प्रशासनाच्या तपासणीत निदर्शनास आले. या त्रुटींमुळे अन्न दूषित होऊन ग्राहकांच्या आरोग्याला धोका निर्माण होण्याची शक्यता असल्याचे प्रशासनाने नमूद केले आहे.
हॉटेलचा परवाना निलंबित
गंभीर त्रुटींची दखल घेत सक्षम प्राधिकारी तथा सहायक आयुक्त (अन्न) द. वि. पाटील यांनी अन्न सुरक्षा व मानके विनियम, २०११ मधील तरतुदींनुसार हॉटेलचा अन्न परवाना निलंबित करण्याचे आदेश दिले.
या आदेशानुसार हॉटेलमधील अन्न उत्पादन, प्रक्रिया, साठवणूक आणि ग्राहकांना अन्नसेवा देण्याचे काम तातडीने बंद करण्यात आले आहे. तपासणीत आढळलेल्या सर्व त्रुटी दूर केल्यानंतर प्रशासनाकडून पुनर्तपासणी केली जाईल. तसेच परवाना निलंबन उठविण्याचा स्वतंत्र लेखी आदेश मिळेपर्यंत हॉटेल पुन्हा सुरू करता येणार नाही. नागरिकांच्या आरोग्याशी खेळणाऱ्या अन्न व्यावसायिकांविरोधात यापुढेही कठोर कारवाई सुरू राहील, असा इशारा अन्न व औषध प्रशासनाचे सह आयुक्त श्रीकांत करकळे यांनी दिला आहे.
महत्त्वाच्या बातम्या























