सांगली/बेळगाव : सांगलीतील बोगस डॉक्टर बाबासो खिद्रापुरेला अटक करण्यात अखेर पोलिसांना यश आलं आहे. सोमवारी रात्री उशिरा सांगली पोलिसांनी खिद्रापुरेला बेळगावात बेड्या ठोकल्या. म्हैसाळमध्ये अवैध गर्भपात करणाऱ्या नराधमाच्या मुसक्या आवळल्यामुळे अनेक प्रकरणांचा खुलासा होण्याची शक्यता आहे. खिद्रापुरेला अटक करण्यासाठी सांगली पोलिसांची 5 पथकं रवाना झाली होती. त्यानंतर बेळगावमध्ये रात्री उशिरा सांगली पोलिसानी खिद्रापुरेवर कारवाई केली. काय आहे प्रकरण? सांगलीत गर्भपातादरम्यान स्वाती जमदाडे नावाच्या महिलेचा मृत्यू झाल्यानं खळबळ उडाली होती. या प्रकरणाच्या तपासादरम्यान म्हैसाळ गावातील डॉक्टर बाबासो खिद्रापुरेच्या भारती हॉस्पिटलमध्ये अवैधरित्या गर्भपात करण्यात येत असल्याचं उघड झालं.

सांगलीत स्त्री भ्रूण हत्या करणारा नराधम डॉ. खिद्रापुरेचा शोध सुरु

स्वाती जमदाडेचा मृत्यू देखील म्हैसाळमधील याच भारती हॉस्पिटलमध्ये झाला होता. हॉस्पिटलजवळच्या परिसरात पोलिसांनी तपास केला असता त्यांना 19 मृत अर्भकं सापडली. बाबासो खिद्रापुरे बीएचएमएस असून मूळचा शिरोळ मधील नरवाडचा रहिवासी आहे. मागील 10 वर्षांपासून त्याचं म्हैसाळमध्ये हॉस्पिटल आहे. अनेक वर्षांपासून तो नियमबाह्य पद्धतीनं गर्भपात करत असल्याचा आरोप आहे. या व्यवसायात त्याची पत्नी देखील सहभागी असल्याची शक्यता आहे.