Beed Shiv Bhojan Center : राज्यातील गरीब आणि गरजू लोकांना सवलतीच्या दरात अन्न पुरवण्यासाठी राज्य सरकारने 2020 साली शिवभोजन योजना अस्तित्वात आणली आहे. आजतागायत ही योजना सुरुच आहे. बीडमध्ये मात्र या योजनेच्या पुरता बोजवारा उडाल्याचं चित्र दिसत आहे. बीडच्या जिल्हाधिकारी कार्यालयासमोर असणाऱ्या एका शिवभोजन केंद्रावरील एक व्हिडिओ सध्या सोशल मीडियावर चांगलाच व्हायरल झाला आहे. ज्या व्हिडिओमध्ये लाभार्थ्यासमोर एकच ताट ठेवून अनेकांचे फोटो अपलोड केला जात आहे.
लाभार्थ्यांना दोन चपात्या, एक वाटी भाजी, एक वाटी डाळ आणि एक वाटी भात असे जेवण
या योजनेंतर्गत, लाभार्थ्यांना दोन चपात्या, एक वाटी भाजी, एक वाटी डाळ आणि एक वाटी भात असे जेवण 10 रुपये सवलतीच्या दराने दिले जाते. शहरी भागासाठी प्रति प्लेट शिवभोजनाची किंमत 50 रुपये आणि ग्रामीण भागासाठी 35 रुपये आहे. गरीब आणि गरजू व्यक्ती फक्त 10 रुपये देतील आणि उर्वरित रक्कम सरकार उचलते. मात्र या ठिकाणी ज्या योजनेचा पुरता बोजवारा उडाल्याच दिसत आहे.
शिवभोजन थाळी योजना काय होती?
गरिबांना, गरजूंना सहज व अत्यल्प दरात भोजन उपलब्ध करण्यासाठी राज्यातील जिल्ह्याच्या ठिकाणी, तालुक्याच्या ठिकाणी केंद्र सुरू करण्यात आले होते. शिवभोजन थाळी केंद्र स्वयंसेवी संस्था, महिला बचतगट, हॉटेल चालक आदींना चालवण्यासाठी देण्यात आली आहेत. शिवभोजन थाळी केंद्र चालकांना राज्य सरकारकडून अनुदान देण्यात येते. शिवभोजन थाळीत एक वाटी भाजी, दोन चपात्या, भात व वरणाचा समावेश आहे.महाविकास आघाडी सरकारच्या काळात मुख्यमंत्री उद्धव ठाकरे यांच्या पुढाकाराने ही शिवभोजन थाळी सुरू करण्यात आली होती. राज्यात एक लाख 88 हजार 463 एवढ्या थाळ्यांची विक्री होते. शिवभोजन थाळीसाठी विविध ठिकाणी केंद्र सुरू करण्यात आली आहेत. ही केंद्र चालवणाऱ्यांना राज्य सरकारकडून विविध मदत दिली जाते. दरम्यान, राज्यात सत्तांतर झाल्यानंतर शिवसेनेचे बंडखोर नेते एकनाथ शिंदे आणि भाजपचे नेते देवेंद्र फडणवीस यांच्या नेतृत्वातील सरकारने कारभार हाती घेतल्यानंतर महाविकास आघाडी सरकारच्या कार्यकाळात घेतलेल्या अनेक निर्णयांना स्थगिती दिली आहे. मात्र, शिवभोजन थाळी बंद करण्याचा निर्णय या सरकारनं घेतला नव्हता. अद्यापही अनेक भागात ही योजना सुरु असल्याचे चित्र दिसत आहे. मात्र, काही भागात या योजनेचा पुरता बोजवारा उडाल्याचं चित्र देखील पाहायला मिळत आहे.
महत्वाच्या बातम्या: