बहिणीचा प्लॉट केला पत्नीच्या नावे, माजलगावमध्ये भावानेच केली सख्ख्या बहिणीची फसवणूक, पाच जणांवर गुन्हा दाखल

बीड जिल्ह्यातील माजलगावमधून (Beed Majalgaon) विश्वासाला तडा देणारी एक धक्कादायक घटना समोर आली आहे. माजलगावच्या माजी नगराध्यक्षांनी सख्ख्या बहिणीची फसवणूक केली आहे.

Beed crime news

Source : Getty Images

बीड : बीड जिल्ह्यातील माजलगावमधून (Beed Majalgaon) विश्वासाला तडा देणारी एक धक्कादायक घटना समोर आली आहे. माजलगावच्या माजी नगराध्यक्षांनी सख्ख्या बहिणीची फसवणूक केली आहे. बहिणीचा प्लॉट पत्नीच्या नावे केल्याचा प्रकार घडला आहे. अशोक होके असं फसवणूक करणाऱ्या माजलगावच्या माजी नगराध्यक्षांचे नाव आहे. याप्रकरणी अशोक होके यांच्यासह पाच जणांवर गुन्हा दाखल झाला आहे. 

सख्ख्या बहिणीच्या नावे असलेला प्लॉट नगरपालिकेच्या कर्मचाऱ्यांशी संगनमत करत माजी नगराध्यक्ष अशोक होके यांनी थेट आपल्या पत्नीच्या नावावर करुन घेतला आहे. विशेष म्हणजे 100 रुपयांच्या बॉण्ड पेपरवर खोट्या सह्या करून बनावट हक्क सोडपत्र तयार करण्यात आलं आहे. हे प्रकरण उघडकीस आल्यानंतर बहिणीनं थेट पोलिसांत धाव घेतली. तिच्या फिर्यादीवरुन अशोक होके, त्यांची पत्नी उज्ज्वला होके आणि नगरपालिकेचे तीन तत्कालीन कर्मचारी अशा पाच जणांविरोधात फसवणुकीचा गुन्हा दाखल करण्यात आला आहे. माजलगाव शहर पोलीस सध्या या प्रकरणाचा अधिकचा तपास करत आहेत.

कर्ज फेडण्यासाठी सहाय्यक पोलीस उपनिरीक्षकच बनला चोर

बीडमध्ये पोलीस कर्मचारीच चोर बनल्याचा प्रकार समोर आलाय. ड्रीम 11, रमी ॲप मध्ये पैसे बुडाले.. त्यामुळे लोकांकडून घेतलेले कर्ज फेडण्यासाठी पोलीस कर्मचाऱ्याने चोरी केली. यापूर्वी देखील या पोलिसाने थेट पोलीस अधीक्षक कार्यालयातूनच 58 बॅटऱ्यांची चोरी केली होती. अमित मधुकर सुतार बीडच्या पोलीस दलात सहाय्यक पोलीस उपनिरीक्षक म्हणून कार्यरत होते. 2024 मध्ये इन्वर्टरसाठी लागणाऱ्या दहा बॅटऱ्या चोरल्याप्रकरणी त्याच्या विरोधात बीड शहर पोलीस ठाण्यात गुन्हा दाखल झाला. या घटनेला वर्ष उलटत नाही. तोच सुतार याने आणखी एक कारनामा करत दोन साथीदारांसह सात दुचाकींची चोरी केली. याप्रकरणी पोलीस ठाण्यात गुन्हा दाखल असून या चोरट्या पोलिसाला जेरबंद करण्यात आले आहे. 

पोलीस अधीक्षक कार्यालयातून बॅटरींची चोरी केल्यानंतर पोलीस अधीक्षक नवनीत कॉवत यांनी अमित सुतार याचे निलंबन केले होते. तो सध्या जामिनावर बाहेर होता. परंतु अमित सुतारला ऑनलाइन जुगार, दारु, गेम खेळण्याचा छंद होता. यात त्याने हजारो रुपये गुंतवले होते. काही लोकांकडून कर्जही घेतले हे पैसे परत करण्यासाठी अखेर चोरीचा मार्ग अवलंबवा लागला. दरम्यान पोलीसच चोर बनल्याने या प्रकाराची जिल्हाभरात चर्चा होते आहे.

महत्वाच्या बातम्या: