MHADA Lottery : म्हाडा कोकण मंडळाच्या २,२६४ घरांच्या अर्जासाठी मुदतवाढ, २४ डिसेंबरपर्यंत अर्ज सादर करता येणार
MHADA Kokan Mandal Lottery : कोकण मंडळाच्या २,२६४ सदनिकांच्या विक्रीसाठी अर्ज करण्यास अर्जदारांना संधी मिळावी यासाठी ही मुदतवाढ देण्यात आल्याचं म्हाडाकडून स्पष्ट करण्यात आलं आहे.
मुंबई : म्हाडाच्या कोकण गृहनिर्माण आणि क्षेत्रविकास मंडळातर्फे २,२६४ सदनिकांच्या विक्रीकरिता जाहीर सोडतीकरिता अर्ज सादर करण्यासाठी मुदतवाढ देण्यात आली असून २४ डिसेंबर २०२४ रोजी रात्री ११.५९ वाजेपर्यंत अर्जदारांना अर्ज सादर करता येणार आहे अशी माहिती मंडळाच्या मुख्य अधिकारी रेवती गायकर यांनी दिली.
कोकण मंडळ सोडतीसाठी अर्ज भरणा प्रक्रियेला ११ ऑक्टोबर, २०२४ रोजी प्रारंभ करण्यात आला. मंडळाने जाहीर केलेल्या सदनिका विक्री सोडतीत अर्जदार २४ डिसेंबर, २०२४ रोजी रात्री ११.५९ वाजेपर्यंत सहभाग घेऊ शकतात. त्यानंतर सोडतीत सहभाग घेण्याची लिंक या प्रणालीवरून निष्क्रिय करण्यात येणार आहे. 26 डिसेंबर, २०२४ रात्री ११.५९ पर्यंत अर्जदार अनामत रकमेचा भरणा ऑनलाईन करू शकतील, तसेच दिनांक २६ डिसेंबर, २०२४ रोजी संबंधित बँकेच्या कार्यालयीन वेळेपर्यंत RTGS/NEFTद्वारे अनामत रकमेचा भरणा अर्जदारांना करता येईल.
सोडतीसाठी पात्र अर्जांची प्रारूप यादी ०८ जानेवारी, २०२५ रोजी सायंकाळी ६.०० वाजता म्हाडाच्या https://housing.mhada.gov.in या अधिकृत संकेतस्थळावर प्रसिद्ध केली जाणार आहे. त्यानंतर दिनांक १० जानेवारी, २०२५ रोजी सायंकाळी ५ .०० वाजेपर्यंत अर्जदारांना प्रारूप यादीवर आपल्या दावे व हरकती नोंदविता येणार आहेत. १६ जानेवारी २०२५ रोजी सायंकाळी ०६.०० वाजता सोडतीत सहभाग घेणार्‍या अर्जांची यादी म्हाडाच्या संकेतस्थळावर प्रसिद्ध केली जाणार आहे.
२१ जानेवारी, २०२५ रोजी सकाळी १० वाजता पात्र अर्जांची संगणकीय सोडत काढली जाणार आहे. अर्जदारांना सोडतीचा निकाल तात्काळ मोबाईलवर एसएमएस द्वारे , ई-मेल द्वारे तसेच ऍपवर प्राप्त होणार आहे.
या सोडतीत २० टक्के सर्वसमावेशक योजनेअंतर्गत ५९४ सदनिका, १५ टक्के एकात्मिक गृहनिर्माण योजनेअंतर्गत ८२५ सदनिका, कोकण मंडळाच्या गृहनिर्माण योजनेअंतर्गत विखुरलेल्या ७२८ सदनिका, रोहा-रायगड व ओरस सिंधुदुर्ग येथे ११७ भूखंड विक्रीसाठी उपलब्ध आहेत.
श्रीमती रेवती गायकर यांनी सांगितले की, राज्यात विधानसभा सार्वत्रिक निवडणुकीच्या पार्श्वभूमीवर लागू आचारसंहितेमुळे सोडतीविषयक प्रसार मोहीम राबविता आली नाही. त्यामुळे आचारसंहिता संपुष्टात आल्यानंतर मंडळातर्फे प्रथम येणाऱ्यास प्रथम प्राधान्य तत्वावर योजनेतील सदनिकांच्या विक्रीला प्रतिसाद वाढावा यासाठी विशेष मोहीम राबवण्यात येत आहे. या मोहिमेला नागरिकांचा उत्स्फूर्त प्रतिसाद मिळत असून मंडळाने ठिकठिकाणी उभारलेल्या स्टॉल्सला आतापर्यंत सुमारे ६००० लोकांनी भेट देऊन माहिती जाणून घेतली आहे. त्यापैकी ३०१ जणांनी सदनिका खरेदीसाठी विक्री किंमतही जमा केली असल्याचे श्रीमती गायकर यांनी सांगितले. २२६४ सदनिकांच्या विक्रीसाठी अर्ज करण्यास अर्जदारांना संधी मिळावी यासाठी ही मुदतवाढ देण्यात आली आहे. या संधीचा लाभ घेण्याचे आवाहन श्रीमती गायकर यांनी केले आहे.
ही बातमी वाचा:
महत्त्वाच्या बातम्या
ट्रेंडिंग न्यूज
