... म्हणून कॉकपीट संभाषण रिकव्हर करण्यात अडचण; अजित पवार विमान दुर्घटनेवर केंद्रीय मंत्रालयाची कबुली
Ajit Pawar plane crash News : दिवंगत उपमुख्यमंत्री अजित पवार यांच्या विमान अपघाताविषयी मोठी बातमी समोर आली आहे.
Ajit Pawar plane crash News : दिवंगत उपमुख्यमंत्री अजित पवार यांच्या विमान अपघाताविषयी मोठी बातमी समोर आली आहे. 27 फेब्रुवारी 2026 पूर्वी अजित पवारांच्या अपघाताविषयी प्राथमिक अहवाल देण्यात येणार आहे. एका महिन्याच्या आत प्राथमिक तपास पूर्ण केला जाणार आहे. विमान अपघात तपास यंत्रणेकडून याबाबतची माहिती देण्यात आली आहे. कॉकपिट व्हॉइस रेकॉर्डरचे मोठे नुकसान झालं आहे, त्यामुळे कॉकपिट संभाषण रिकव्हर करण्यात अडचणींचा सामना करावा लागत असल्याची कबुली विमान वाहतूक मंत्रालयाकडून देण्यात आली आहे.
अजित पवारांच्या विमान अपघाताविषयी नवे निवेदन
अजित पवारांच्या विमान अपघाताबाबत नागरी विमानवाहतूक मंत्रालयाकडून पुन्हा एकदा स्पष्टीकरण देण्यात आलं आहे. उच्च तापमानामुळे कॉकपिट व्हॉइस रेकॉर्डरचे मोठे नुकसान झाले आहे. हनीवेल कंपनी उत्पादक त्यामुळे संबंधित देशाकडून तंत्रज्ञानविषयक सहकार्य मागितले आहे. व्हीएसआर कंपनीचे विशेष ऑडिट नागरी विमान वाहतूक महासंचालनालयाकडून सुरु आहे. 4 फेब्रुवारी पासून व्हीएसआर कंपनीचे विशेष ऑडिट सुरु आहे, ते लवकरच पूर्ण होईल. तपासानंतर नियमानुसार कारवाई केली जाणार असल्याची माहिती केंद्र सरकारने दिली आहे. कोणत्याही तर्कवितर्कांना बळी न पडता कायदेशीर चौकशी प्रक्रिया पार पडू द्यावी, असे आवाहन केंद्रीय विमान वाहतूक मंत्रालयाचे संबंधितांना केलं आहे.
उच्च तापमानामुळे कॉकपीट व्हॉइस रेकॉर्डर (CVR) चे मोठे नुकसान
याआधी 17 फेब्रुवारी 2026 रोजी काढलेल्या पत्रकाला अनुसरून नागरी विमानवाहतूक मंत्रालयाने पुन्हा स्पष्टीकरण दिलं आहे. बारामती येथे 28 जानेवारी 2026 रोजी झालेल्या लिअरजेट 45 (VT-SSK) च्या अपघाताची चौकशी ‘विमान अपघात तपास संस्थे’ ( AAIB) मार्फत, विमान (अपघात व इतर दुर्घटनांसंबंधित तपास ) नियमावली , 2025 ला, तसेच ICAO परिशिष्ट 13 मधील प्रमाणित व शिफारस केलेल्या पद्धतींना (SARP) अनुसरून सुरु आहे. या विमानात 2 स्वतंत्र फ्लाईट रेकॉर्डर अस्तित्वात होते. L 3 कम्युनिकेशन्स या कंपनीने उत्पादन केलेल्या डिजिटल फ्लाईट डेटा रेकॉर्डर (DFDR) मधील माहिती AAIB च्या नवी दिल्लीतील कार्यालयात यशस्वीरीत्या डाउनलोड करण्यात आली आहे. उच्च तापमानामुळे कॉकपीट व्हॉइस रेकॉर्डर (CVR) चे मोठे नुकसान झाले आहे. त्याचे उत्पादन हनीवेल कंपनीने केले असल्याने ICAO परिशिष्ट 13 च्या जोडणी D व परिच्छेद 5.7 नुसार स्टेट ऑफ डिझाईन/मॅन्युफॅक्चर कडून तांत्रिक साहाय्याची मागणी केली गेली आहे.
विमान अपघात तपास संस्थेचा (AAIB) तपास हा तांत्रिक आणि पुराव्यांवर आधारित
विमान अपघात तपास संस्थेचा (AAIB) तपास हा तांत्रिक आणि पुराव्यांवर आधारित आहे. याअंतर्गत विमानाचे अवशेष, कार्यान्वयन आणि देखभाल दुरुस्तीच्या नोंदींची पद्धतशीर तपासणी, तसेच आवश्यकतेनुसार विमानांच्या घटकांच्या प्रयोगशाळेतील चाचण्यांचा अंतर्भाव असतो. आंतरराष्ट्रीय नागरी विमान वाहतूक संघटनेच्या (ICAO) मानकांनुसार, घटनेच्या 30 दिवसांच्या आत एक प्राथमिक अहवाल प्रसिद्ध केला जाईल आणि त्यानंतर योग्य वेळी अंतिम अहवाल सादर केला जाईल.
विमान सेवा देणार्या कंपनीसंबंधीचे (ऑपरेटर) नियामक पर्यवेक्षण
2025 या वर्षात, नागरी विमान वाहतूक महासंचालनालयाने (DGCA) बिगर सूचित (non-scheduled) विमान सेवा देणाऱ्या कंपन्यांची 51 नियामक लेखापरीक्षणे केली आहेत. याव्यतिरिक्त, मेसर्स व्हीएसआर व्हेंचर्स या कंपनीची अनेक वेळा उड्डाण सुरक्षा प्रणाली, उड्डाण कर्तव्य वेळेची मर्यादा, देखभाल नियमांचे पालन (CAR M आणि CAR 145), दस्तऐवजीकरण आणि विमानतळ सुविधा यांसारख्या विविध बाबींशी निगडीत संनिरीक्षणे करण्यात आली आहेत. संनिरीक्षणात आढळलेल्या सर्व बाबींची दखल घेण्यात आली आणि ते पूर्ण करण्यात आले.
अपघातानंतरचे विशेष ऑडिट
अपघातानंतर मंत्रालयाने डीजीसीएला, नियामक अनुपालन, ऑपरेशनल कंट्रोल सिस्टम, देखभाल पद्धती, कर्मचारी प्रशिक्षण मानके, सुरक्षा व्यवस्थापन प्रणाली तसेच सीव्हीआर/एफडीआर देखरेखीचा सर्वंकष आढावा घेण्यासाठी, मेसर्स व्हीएसआर व्हेंचर्सचे विशेष लेखापरीक्षण (ऑडिट) करण्याचे निर्देश दिले. हे परीक्षण 04 फेब्रुवारी 2026 रोजी सुरू झाले असून लवकरच पूर्ण होण्याची अपेक्षा आहे. निष्कर्षांचा आढावा घेऊन डीजीसीएच्या अंमलबजावणी धोरण आणि कार्यपद्धती मार्गदर्शक तत्त्वानुसार आवश्यक ती कारवाई केली जाईल. याशिवाय, मंत्रालयाने डीजीसीए’ला व्हीआयपी/व्हीव्हीआयपी सेवांमध्ये असलेल्या इतर प्रमुख नॉन-शेड्यूल्ड ऑपरेटर्स आणि विमानतळांचेही विशेष लेखापरीक्षण करण्यास सांगितले आहे. ही परिनिरीक्षणे टप्प्याटप्प्याने केली जात असून आवश्यकतेनुसार योग्य अंमलबजावणी कारवाई केली जाईल.
मंत्रालय आणि त्याच्या नियामक संस्था पारदर्शकता, सुरक्षा देखरेख आणि जबाबदारीसाठी पूर्णपणे वचनबद्ध आहेत. सर्व संबंधितांनी कोणत्याही प्रकारच्या तर्कवितर्कांना बळी न पडता वैधानिक चौकशी आणि नियामक प्रक्रिया स्थापित नियमानुसार पार पडू द्याव्यात, अशी विनंती करण्यात येत आहे.
महत्वाच्या बातम्या:
अजित पवार जेव्हा हयात होते, तेव्हा तुम्ही त्यांचेसोबत कसे वागला? रोहित पवारांच्या भूमिकेवर प्रश्न, विखे पाटलांचा थेट सवाल
महत्त्वाच्या बातम्या
