Latur Accident : अंगणात खेळणाऱ्या चार वर्षांच्या चिमुरडीला ट्रॅक्टरने चिरडले, लातूरमधील घटना, कुटुंबीयांचा मन हेलावणारा आक्रोश
Latur Accident : गावातील शिवारातून मातीची वाहतूक करणारे ट्रॅक्टर ये जा करत होते. त्याचवेळी लहान गल्ली असलेल्या रस्त्यावर एक भरधाव ट्रॅक्टर आला आणि त्याने चिमुरडीचा जीव घेतला.
लातूर: गावातून मातीची वाहतूक करणाऱ्या ट्रॅक्टरने अंगणात खेळणाऱ्या चार वर्षीय चिमुकलीला चिरडल्याची घटना घडली आहे. या घटनेत त्या चिमुकलीचा मृत्यू झाला आहे. उदगीर तालुक्यातील अवलकोंडा या गावात रविवारी ही घटना घडली. मुलीच्या मृत्यूनंतर कुटुंबीयांनी मन हेलावणारा आक्रोश केला. शिवकन्या खेळकर असं त्या मुलीचं नाव आहे. या घटनेतील ट्रॅक्टर चालक फरार झाला आहे असून पोलिस त्याचा शोध घेत आहेत.
लातूरच्या उदगीर तालुक्यातील अवलकोंडा या गावातील शिवकन्या खेळकर ही तिच्या अंगणात खेळत होती. दरम्यान गावाच्या शिवरावातून ट्रॅक्टरच्या सहाय्याने माती वाहतुकीचे काम सुरू होतं. गावातील लहान गल्ली असलेल्या रस्त्यांवरून मातीने भरलेले ट्रॅक्टर नेले जात आहेत. त्याच वेळी घराच्या बाहेर अंगणातील रस्त्यावर खेळणारी शिवकन्या मातीने भरलेल्या ट्रॅक्टरच्या चाकाखाली सापडली आणि तिचा जागीच मृत्यू झाला.
Latur Accident : ट्रॅक्टर चालक फरार
गावात वस्तीमध्ये ट्रॅक्टर चालकाने भरधाव वेगात ट्रॅक्टर चालवल्याने रस्त्यावर खेळणाऱ्या शिवकन्याचा चिरडून जागीच दुर्दैवी अंत झाला. या घटनेनंतर ट्रॅक्टर चालक गौस बागवान हा फरार झाला आहे. या प्रकरणी गुन्हा नोंद करण्यात आला असून फरार चालकाचा शोध घेतला जात आहे.
महाराष्ट्रात रस्ते अपघातांची संख्या वाढली
महाराष्ट्रात रस्ते अपघातांची संख्या दिवसेंदिवस वाढत आहे. 2024 मध्ये एकाच वर्षात अपघातात मृत्यू झालेल्यांची संख्या 15 हजारांहून अधिक आहे. याचाच अर्थ महाराष्ट्रात रोज 42 अपघाती मृत्यू होत असल्याची माहिती एका अहवालातून समोर आली होती.
मुंबई-पुणे एक्स्प्रेस-वेवरील अपघात 19 टक्क्यांनी वाढले आहेत, तर समृद्धी महामार्गावरील अपघातांची संख्या 4 टक्क्यांनी घटली आहे अशी माहिती महामार्ग पोलिसांच्या आकडेवारीतून समोर आली आहे. नऊ जिल्हे आणि शहरांमध्ये मृत्यूंमध्ये 10 टक्क्यांहून अधिक वाढ झाल्याची नोंद झाली आहे. धुळे जिल्ह्यात अपघाती मृत्यूंमध्ये सर्वाधिक 25 टक्के वाढ झाल्याची माहिती एका अहवालात देण्यात आली आहे.
ही बातमी वाचा:
महत्त्वाच्या बातम्या
