Maharashtra Drought: मोठी बातमी: राज्यात दुष्काळ जाहीर, देवेंद्र फडणवीसांचा मोठा निर्णय, कोणत्या जिल्ह्यातील शेतकऱ्यांना 10 मोठे लाभ मिळणार

Latur News: जीवे मारण्याची धमकी; अपहरण केलं, पैशाचे आमिष अन्...; उमेदवारी अर्ज मागे घेण्यासाठी भाजपच्या उमेदवारावर दबाव, लातूर जिल्हा बँक निवडणुकीत राजकीय वातावरण तापलं

निशांत भद्रेश्वर, एबीपी माझा — Fri, 30 Oct 2026 09:17:34 +0530

लातूर : लातूर जिल्हा मध्यवर्ती सहकारी बँकेच्या निवडणुकीत भाजप उमेदवाराचे अपहरण करून जीवे मारण्याची धमकी देत जबरदस्तीने उमेदवारी अर्ज मागे घ्यायला लावल्याचा गंभीर प्रकार समोर आला आहे. रेणापूर तालुक्यातील विविध कार्यकारी सेवा सहकारी सोसायटी मतदारसंघातील भाजप (Latur News) उमेदवार रवी जाधव यांनी याप्रकरणी काँग्रेसचे उमेदवार सर्जेराव मोरे (रा. पोहरेगाव), शरद कदम (रा. टाकळगाव) यांच्यासह सात ते आठ अनोळखी व्यक्तींविरोधात तक्रार दिली आहे. भाजपा उमेदवार रवी जाधव यांनी १६ ऑक्टोबर रोजी उमेदवारी (Latur News) अर्ज दाखल केला होता. त्यानंतर अर्ज मागे घेण्यासाठी त्यांच्यावर दबाव आणला जात असल्याचा आरोप आहे. २८ ऑक्टोबर रोजी सकाळी साडेदहा वाजता शरद कदम यांनी फोन करून जाधव यांना दयानंद महाविद्यालयाच्या प्रवेशद्वाराजवळ बोलावले. तेथून चारचाकी वाहनातून त्यांना हॉटेल अरोमा येथे नेण्यात आले.(Latur News)

या ठिकाणी सर्जेराव मोरे यांनी उमेदवारी अर्ज मागे घेण्यासाठी पैशाचे आमिष दाखवले. मात्र अर्ज मागे घेण्यास नकार दिल्यानंतर जाधव यांच्यासह त्यांच्या कुटुंबीयांना जिवंत ठेवणार नसल्याची धमकी देण्यात आल्याचा आरोप तक्रारीत करण्यात आला आहे. त्यानंतर जबरदस्तीने जिल्हाधिकारी कार्यालयात नेऊन निवडणूक निर्णय अधिकाऱ्यांच्या कक्षात अर्ज मागे घेण्याचा फॉर्म भरायला लावून त्यावर सही घेतल्याचे जाधव यांनी म्हटले आहे.यानंतर जाधव यांना काही वेळ औसा रोड परिसरात फिरवण्यात आले. दुपारी साडेतीनच्या सुमारास हॉटेल राजधानीतील खोली क्रमांक २०८ मध्ये डांबून ठेवण्यात आले. रात्री अकराच्या सुमारास तेथून बाहेर पडल्यानंतर त्यांनी सहकाऱ्यांना घडलेला प्रकार सांगितला.याप्रकरणी एमआयडीसी पोलीस ठाण्यात गुन्हा दाखल करण्यात आला असून पुढील तपास सुरू आहे.(Latur News)

Latur News: भाजप पदाधिकाऱ्यांचा जिल्हाधिकारी कार्यालयात ठिय्या

या घटनेचे पडसाद आता राजकीय वर्तुळात उमटू लागले आहेत. भाजप उमेदवाराला न्याय मिळावा आणि प्रशासनाने या प्रकरणात हस्तक्षेप करावा, या मागणीसाठी भाजप पदाधिकाऱ्यांनी जिल्हाधिकारी कार्यालयात ठिय्या आंदोलन केले. प्रतिस्पर्धी उमेदवाराचे अपहरण करून जबरदस्तीने अर्ज मागे घ्यायला लावणे हा लोकशाहीचा गळा घोटण्याचा प्रकार असल्याचा आरोप भाजपने केला आहे. विजय तुमचाच निश्चित होता, तर निवडणुकीला सामोरे जाण्याची हिंमत का दाखवली नाही? असा सवालही भाजप पदाधिकाऱ्यांनी उपस्थित केला. आरोप असलेले सर्जेराव मोरे हे काँग्रेसचे पदाधिकारी असून मागील अनेक वर्षांपासून देशमुखांच्या साखर कारखान्यात संचालक म्हणून कार्यरत आहेत. त्यामुळे या प्रकरणाला राजकीय महत्त्व प्राप्त झाले आहे. जिल्हा बँकेच्या निवडणुकीत उमेदवारी अर्ज मागे घेण्यावरून थेट अपहरण आणि जीवे मारण्याच्या धमकीचे आरोप झाल्याने लातूरच्या राजकीय वर्तुळात खळबळ उडाली आहे.

दुष्काळाने शेती करपली, रोजगारही हिरावला; कर्जाच्या ओझ्याने हतबल झाला अन् 29 वर्षीय तरुणाने जीव संपवला, चिठ्ठीत कर्जवसुलीच्या तगाद्याचा उल्लेख

निशांत भद्रेश्वर, एबीपी माझा — Tue, 27 Oct 2026 15:05:56 +0530

Latur News: लातूर जिल्ह्यातील शिरूर अनंतपाळ तालुक्यातील राणी अंकुलगा येथे कर्जाच्या ओझ्याखाली दबलेल्या 29 वर्षीय तरुणाने आत्महत्या केल्याची घटना समोर आली आहे. दुष्काळामुळे वाट्याने केलेल्या शेतीतून उत्पन्न मिळेनासे झाले, तर पाणीटंचाईमुळे गवंडी कामही ठप्प झाले. अशा परिस्थितीत वाढते कर्ज आणि कर्जवसुलीच्या तगाद्यामुळे आर्थिक अडचणीत सापडलेल्या दत्तात्रय सूर्यकांत कुंभार या तरुणाने राहत्या घरी गळफास घेऊन आत्महत्या केली. आत्महत्येपूर्वी लिहिलेल्या चिठ्ठीत कर्जवसुलीच्या तगाद्याचा उल्लेख केल्याची माहिती समोर आली आहे. या घटनेमुळे वृद्ध आई, पत्नी आणि दोन चिमुकल्यांचा आधार हरपला आहे.

शेती गेली, हातचा रोजगारही हिरावला!

दत्तात्रय कुंभार यांच्याकडे स्वतःच्या मालकीची शेती नव्हती. तो दुसऱ्याची शेती वाट्याने करून कुटुंबाचा उदरनिर्वाह करत होता. त्यासोबतच गवंडी काम करून चार पैसे मिळवत होता. मात्र, यंदाच्या दुष्काळामुळे शेतीचे मोठे नुकसान झाले. दुसरीकडे, पाणीटंचाईमुळे बांधकामाची कामेही ठप्प झाली. त्यामुळे उत्पन्नाचे दोन्ही मार्ग बंद झाल्याने कुटुंबाचा उदरनिर्वाह आणि कर्जाचे हप्ते फेडायचे कसे, असा प्रश्न त्याच्यासमोर निर्माण झाला होता.

आत्महत्येपूर्वीच्या चिठ्ठीत कर्जवसुलीच्या तगाद्याचा उल्लेख

घटनास्थळी पोलिसांना एक चिठ्ठी सापडली आहे. या चिठ्ठीत दुष्काळामुळे निर्माण झालेल्या आर्थिक अडचणी, वाढते कर्ज आणि कर्जवसुलीसाठी संबंधित कर्मचाऱ्यांकडून मानसिक व आर्थिक तगादा लावला जात असल्याचा उल्लेख असल्याची माहिती आहे. विविध राष्ट्रीयीकृत बँका आणि फायनान्स कंपन्यांकडून घेतलेल्या कर्जाचा तपशीलही चिठ्ठीत नमूद असल्याचे समोर आले आहे. तसेच, कुटुंबाला मदत करण्याची विनंतीही त्याने चिठ्ठीत केली आहे. सध्या मायक्रो फायनान्सच्या चक्रव्यूहात अडकेल्या शेतमजूर, शेतकऱ्यांचे प्रश्न समोर येत असताना ही घटना समोर आल्याने मोठी खळबळ उडाली आहे.

दोन चिमुकल्यांचे पितृछत्र हरपले

अवघ्या 29 व्या वर्षी दत्तात्रय कुंभार याच्या आत्महत्येमुळे कुटुंबाचा आधार हरपला आहे. त्याच्या पश्चात वृद्ध आई, पत्नी आणि दोन लहान मुले असा परिवार आहे. कुटुंबाचा उदरनिर्वाह करणारी व्यक्तीच गेल्याने या कुटुंबासमोर आता मोठे संकट उभे राहिले आहे. दुष्काळामुळे शेतीत उत्पन्न नाही, पाणीटंचाईमुळे हाताला काम नाही आणि दुसरीकडे कर्जाचा वाढता भार, अशा दुहेरी संकटाचा सामना ग्रामीण भागातील कुटुंबांना करावा लागत आहे. दत्तात्रयच्या चिठ्ठीतील कर्जवसुलीच्या आरोपांची चौकशी करून प्रशासन काय भूमिका घेणार, याकडे आता लक्ष लागले आहे.

लातूरमध्ये दुष्काळाचं भीषण चित्र! मांजरा-तावरजा नदीपात्रात मृत माशांचा खच; दहा वर्षांत पहिल्यांदाच बंधारा कोरडा

abp majha web team — Sun, 25 Oct 2026 12:18:31 +0530

Latur: लातूर जिल्ह्यात दुष्काळाची तीव्रता वाढत असताना आता त्याचे भीषण परिणाम नदीपात्रातही दिसू लागले आहेत. कधीकाळी शेतशिवार हिरवीगार करणाऱ्या मांजरा-तावरजा नदीपात्रात पाण्याअभावी माशांचा मृत्यू होत असून, नदीकाठावर मृत माशांचा खच साचला आहे. दुसरीकडे, गेल्या दहा वर्षांत पहिल्यांदाच बंधारा कोरडा पडल्याचं चित्र समोर आलं आहे. त्यामुळे परिसरातील पाणीटंचाईचं संकट अधिक गंभीर झालं आहे. (Latur Drought)

पाण्याअभावी माशांचा मृत्यू; नदीपात्राची दयनीय अवस्था

लातूर जिल्ह्यात पावसाने ओढ दिल्याने नदी, नाले आणि तलावांमधील पाणीसाठा कमी होत आहे. वाढत्या उन्हामुळे पाण्याचे स्रोत आटत असून, त्याचा फटका जलचरांनाही बसत आहे. मांजरा-तावरजा नदीपात्रातील मृत माशांचं दृश्य दुष्काळाच्या भीषणतेची जाणीव करून देत आहे.

एकीकडे नागरिकांना पिण्याच्या पाण्यासाठी संघर्ष करावा लागत आहे, तर दुसरीकडे शेती आणि जनावरांच्या पाण्याचा प्रश्नही गंभीर बनला आहे. पाण्याअभावी जलचरांचा मृत्यू होत असल्याने पर्यावरणीय संकटाची चिंताही वाढली आहे.

दहा वर्षांनंतर पहिल्यांदाच बंधारा कोरडा

लोकनेते विलासराव देशमुख यांच्या संकल्पनेतून परिसरातील पाणीपातळी वाढवण्यासाठी नदीवर बंधारे उभारण्यात आले होते. या बंधाऱ्यांमुळे शेतीला पाण्याचा आधार मिळाला आणि परिसरातील शेतीला चालना मिळाली. मात्र, यंदाच्या दुष्काळामुळे बंधाऱ्यातील पाणीसाठा संपुष्टात आला आहे. दहा वर्षांत पहिल्यांदाच बंधारा कोरडा पडल्याचं ग्रामस्थ सांगतात.

नदीपात्रातील पाणी आटणं आणि मृत माशांचा खच दिसणं ही केवळ पाणीटंचाईची समस्या राहिलेली नाही, तर निसर्गातील बदलांचाही गंभीर संकेत आहे. दुष्काळाचा सामना करणाऱ्या लातूर जिल्ह्यात आता माणसांसोबत मुक्या जीवांचं अस्तित्वही संकटात सापडलं आहे.

जुन्या बसस्थानकासमोर तरुणाला धारधार कोयत्याने भोसकले; हल्ला होताच आरोपी स्वतःहून पोलीस ठाण्यात हजर; लातूरमध्ये खळबळ

निशांत भद्रेश्वर, एबीपी माझा — Wed, 21 Oct 2026 12:17:48 +0530

Latur Crime: लातूर जिल्ह्यातील औसा शहरात भर वर्दळीच्या ठिकाणी एका युवकावर धारदार कोयत्याने हल्ला करण्यात आल्याची धक्कादायक घटना समोर आली आहे. शहरातील जुन्या बसस्थानकासमोर ही घटना घडली. या हल्ल्यात युवक गंभीर जखमी झाल्याने त्याला पुढील उपचारांसाठी लातूर येथील विलासराव देशमुख शासकीय वैद्यकीय महाविद्यालय आणि रुग्णालयात हलवण्यात आले आहे.

नेमकं घडलं काय?

मिळालेल्या माहितीनुसार, लातूरच्या औसा शहरातील जुन्या बसस्थानकासमोर एका तरुणावर कोयताने हल्ला करण्यात आला. वर्दळीच्या ठिकाणी अचानक घडलेल्या या घटनेमुळे परिसरात एकच खळबळ उडाली. हल्ल्यात जखमी झालेल्या युवकाला तातडीने उपचारासाठी रुग्णालयात दाखल करण्यात आले. त्याची प्रकृती आणि हल्ल्यामागील नेमके कारण याबाबत अधिक माहिती समोर येणे बाकी आहे.

दरम्यान, हल्ला केल्यानंतर आरोपी स्वतःहून पोलीस ठाण्यात हजर झाल्याची माहिती आहे. त्यामुळे या प्रकरणाच्या तपासाला महत्त्व प्राप्त झाले आहे. हा हल्ला नेमका कोणत्या कारणातून करण्यात आला, याचा शोध पोलिसांकडून घेतला जात आहे. शहरातील जुन्या बसस्थानकासारख्या वर्दळीच्या ठिकाणी युवकावर कोयत्याने हल्ला झाल्याने नागरिकांमध्ये चिंता व्यक्त केली जात आहे. या घटनेमुळे औसा शहरात खळबळ उडाली असून, पोलीस तपासानंतर हल्ल्यामागील कारण आणि घटनेचा सविस्तर तपशील स्पष्ट होणार आहे.

दांडिया खेळताना किरकोळ वादातून तरुणाची हत्या

छत्रपती संभाजीनगरच्या मुकुंदवाडी परिसरातील संघर्षनगरमध्ये दांडिया खेळताना झालेल्या किरकोळ वादातून एका तरुणाची निर्घृण हत्या (Chhatrapati Sambhajinagar Crime News) करण्यात आली. आठ वर्षांपासून जिवलग मित्र असलेल्या दोघांमधील मैत्रीचा शेवट रक्तरंजित झाला. नशेत धुंद असलेल्या मित्रानेच लोखंडी रॉडने डोके, चेहरा आणि मानेवर वार करत दुसऱ्या मित्राचा जीव घेतला. पुष्कर सतीष गाडे (वय 20) असे मृत तरुणाचे नाव असून, महेश पवार उर्फ भोऱ्या असे आरोपीचे नाव आहे. रविवारी रात्री ही घटना घडली.

संतापजनक! तरुणाला नग्न करून अमानुष मारहाण; पट्ट्याने आणि लाथाबुक्क्यांनी तुडवलं, पार्श्वभागात पेट्रोल टाकून..; लातूर हादरलं

निशांत भद्रेश्वर, एबीपी माझा — Mon, 19 Oct 2026 15:14:59 +0530

Latur Crime: लातूरमध्ये माणुसकीला काळिमा फासणारा धक्कादायक प्रकार समोर आला आहे. एका तरुणाला नग्न करून पट्ट्याने आणि लाथाबुक्क्यांनी बेदम मारहाण करण्यात आली. इतकंच नाही, तर तरुणाच्या पार्श्वभागात पेट्रोल टाकल्याचाही प्रकार घडल्याची माहिती समोर आली आहे. या अमानुष मारहाणीचा व्हिडिओ मोबाईलमध्ये चित्रित करून सोशल मीडियावरील काही ग्रुपमध्ये व्हायरल करण्यात आल्याचं सांगितलं जात आहे. या प्रकरणी पोलिसांनी एका संशयिताला ताब्यात घेतलं असून, अन्य तीन ते चार जण फरार आहेत. या घटनेमुळे लातूरमध्ये खळबळ उडाली आहे.

तरुणाला नग्न करून मारहाण, व्हिडिओही केला व्हायरल

मिळालेल्या माहितीनुसार, काही जणांनी मिळून एका तरुणाला नग्न केलं. त्यानंतर त्याला पट्ट्याने आणि लाथाबुक्क्यांनी मारहाण करण्यात आली. याचदरम्यान, त्याच्या पार्श्वभागात पेट्रोल टाकल्याचाही धक्कादायक प्रकार घडल्याचं समोर आलं आहे. या संपूर्ण प्रकाराचा व्हिडिओ मोबाईलमध्ये चित्रित करण्यात आला. विशेष म्हणजे, मारहाण करणाऱ्या टोळक्यानेच हा व्हिडिओ सोशल मीडियावरील काही ग्रुपमध्ये व्हायरल केल्याची माहिती आहे. या व्हिडिओच्या माध्यमातून हा प्रकार समोर आल्यानंतर पोलिसांनी तपासाला सुरुवात करण्यात आली.

एक जण ताब्यात, तीन ते चार आरोपींचा शोध सुरू

या घटनेची माहिती पोलिसांना मिळताच स्थानिक गुन्हे शाखा आणि एमआयडीसी पोलीस ठाण्याची पथकं आरोपींच्या शोधासाठी रवाना झाली. या प्रकरणात एका संशयिताला ताब्यात घेण्यात आलं असून, अन्य तीन ते चार जण फरार असल्याची माहिती आहे. फरार आरोपींचा शोध घेण्यासाठी पोलिसांकडून प्रयत्न सुरू आहेत. दरम्यान, ही मारहाणीची घटना काही महिन्यांपूर्वी घडल्याची माहिती समोर येत आहे. मात्र,आरोपींची ओळख पटली असून, मारहाणीमागील नेमकं कारण काय? घटना कधी घडली? आणि व्हिडिओ व्हायरल करण्यामागचा उद्देश काय? याचा पोलीस तपास करत आहेत. दरम्यान, या संतापजनक प्रकारामुळे लातूरमध्ये खळबळ उडाली आहे. या प्रकरणातील सर्व आरोपींची भूमिका आणि घटनेमागील नेमकं कारण पोलीस तपासातून स्पष्ट होणार आहे. लातूरमधील या अमानुष मारहाणीच्या प्रकारामुळे परिसरात संताप व्यक्त केला जात आहे.

Latur: लातूर जिल्ह्यावर जलसंकटाचं सावट! संपूर्ण जिल्हा पाणीटंचाई क्षेत्र म्हणून घोषित; बोअरवेल खोदण्यावर निर्बंध

abp majha web team — Sun, 18 Oct 2026 11:38:20 +0530

Latur: पावसाने ओढ दिल्याने लातूर जिल्ह्यातील भूजल पातळी खालावली असून, आगामी काळात पिण्याच्या पाण्याचा प्रश्न गंभीर होण्याची शक्यता आहे. संभाव्य पाणीटंचाई लक्षात घेऊन प्रशासनाने महत्त्वाचा निर्णय घेतला आहे. संपूर्ण लातूर जिल्हा पाणीटंचाई क्षेत्र म्हणून घोषित करण्यात आला असून, भूजलाचा अनिर्बंध उपसा रोखण्यासाठी बोअरवेल खोदण्यासह पाण्याच्या व्यावसायिक वापरावर निर्बंध घालण्यात आले आहेत.

भूजल पातळी खालावली

जिल्ह्यात यंदा अपेक्षित पाऊस न झाल्याने भूजल पातळीत सुमारे 4.58 मीटरने घट झाल्याची माहिती देण्यात आली आहे. त्यामुळे ग्रामीण आणि शहरी भागात पिण्याच्या पाण्याची उपलब्धता टिकवून ठेवण्याचं आव्हान प्रशासनासमोर आहे. या पार्श्वभूमीवर भूजलाचा काटकसरीने वापर व्हावा आणि उपलब्ध पाणीसाठ्याचं नियोजन करता यावं, यासाठी हे प्रतिबंधात्मक आदेश जारी करण्यात आले आहेत.

जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष डॉ. भारत बास्टेवाड यांनी महाराष्ट्र भूजल (विकास व व्यवस्थापन) अधिनियम, 2009 मधील तरतुदींनुसार हे आदेश लागू केले आहेत. जिल्ह्यातील ग्रामीण आणि नागरी भागांचा यात समावेश करण्यात आला आहे.

बोअरवेल खोदण्यावर निर्बंध

पाणीटंचाईच्या पार्श्वभूमीवर 60 मीटरपेक्षा अधिक खोलीपर्यंत बोअरवेल खोदण्यास बंदी घालण्यात आली आहे. भूजलाचा अतिरिक्त उपसा टाळणं आणि पिण्याच्या पाण्याचे स्रोत सुरक्षित ठेवणं हा या निर्णयामागचा उद्देश आहे.

पाण्याच्या व्यावसायिक उपशावरही नियंत्रण

सार्वजनिक पिण्याच्या पाण्याच्या स्रोतांपासून एक किलोमीटरच्या परिघातील किंवा संबंधित प्रभाव क्षेत्रातील खासगी विहिरी आणि बोअरवेलमधून व्यावसायिक वापरासाठी किंवा सिंचनासाठी अनिर्बंध पाणी उपसा करण्यावरही निर्बंध घालण्यात आले आहेत. पुनर्भरणाची व्यवस्था न करता भूजलाची व्यावसायिक विक्री किंवा टँकरद्वारे वाहतूक करण्यावरही बंदी लागू करण्यात आली आहे.

नियम मोडल्यास कारवाई

या आदेशांची अंमलबजावणी करण्याची जबाबदारी उपविभागीय अधिकारी, तहसीलदार, गटविकास अधिकारी आणि पोलीस प्रशासनावर सोपवण्यात आली आहे. अनधिकृत पाणीउपसा आणि नियमभंगाच्या प्रकरणांत तपासणी करून संबंधित साधने जप्त करणे आणि दोषींवर दंडात्मक कारवाई करण्याचे अधिकारही देण्यात आले आहेत.

एकीकडे भूजल पातळीतील घट आणि दुसरीकडे वाढती पाण्याची गरज, अशा परिस्थितीत लातूर जिल्ह्यातील जलस्रोतांचं संरक्षण करण्यासाठी प्रशासनाने हे पाऊल उचललं आहे. आता या निर्बंधांची अंमलबजावणी किती प्रभावीपणे होते आणि आगामी काळात पाणीटंचाई रोखण्यात प्रशासनाला कितपत यश मिळतं, याकडे लक्ष लागलं आहे.

लातूर जिल्हा बँक निवडणूक! मंत्री बाबासाहेब पाटील आणि धीरज देशमुख एकाच गाडीत, राजकीय चर्चांना उधाण

निशांत भद्रेश्वर, एबीपी माझा — Fri, 16 Oct 2026 17:01:50 +0530

Latur District Central Cooperative Bank Election : लातूर जिल्हा मध्यवर्ती सहकारी बँकेच्या निवडणुकीत (Latur District Central Cooperative Bank Election) आता राजकीय घडामोडींना वेग आला आहे. काँग्रेसच्या विरोधात महायुती निवडणुकीच्या मैदानात उतरणार, अशी चर्चा सुरु असतानाच आज एक वेगळीच घडामोड पाहायला मिळाली. राज्याचे सहकारमंत्री बाबासाहेब पाटील आणि काँग्रेस नेते तथा माजी आमदार धीरज देशमुख हे दोघेही एकाच गाडीतून लातूरच्या जिल्हाधिकारी कार्यालयात दाखल झाले. यावेळी त्यांच्या उपस्थितीत बाबासाहेब पाटील यांचे चुलत बंधू अविनाश बाळासाहेब जाधव यांचा उमेदवारी अर्ज दाखल करण्यात आला.

राज्यात एकत्र असलेली महायुती जिल्हा बँकेच्या निवडणुकीतही एकत्र येईल का?

उमेदवारी अर्ज दाखल करण्याच्या शेवटच्या दिवशी घडलेल्या या प्रसंगामुळे राजकीय वर्तुळात चर्चांना उधाण आलं आहे. दरम्यान सहकार क्षेत्रातील निवडणुका पक्षाच्या चिन्हावर होत नसून, विकासाच्या मुद्द्यावर आम्ही यापूर्वीही एकत्र होतो आणि आताही एकत्र आहोत अशी भूमिका सहकारमंत्री बाबासाहेब पाटील यांनी मांडली. या निवडणुकीबाबत राष्ट्रवादी काँग्रेसचे प्रदेशाध्यक्ष खासदार सुनील तटकरे यांनीही काल लातूरमध्ये भूमिका मांडली होती. राज्यात एकत्र असलेली महायुती जिल्हा बँकेच्या निवडणुकीतही एकत्र येईल का? याबाबत चर्चा केली जाईल असं तटकरे यांनी म्हटलं होतं. आता जिल्हा बँकेच्या निवडणुकीत नेमकी कोणती राजकीय समीकरणं आकाराला येणार, याकडे सर्वांचं लक्ष लागलं आहे.

महायुतीत फूट पडलीय का? असा सवाल उपस्थित केला जातोय

लातूर जिल्हा मध्यवर्ती सहकारी बँकेच्या निवडणुकीवरून भाजपाचे माजी आमदार संभाजी पाटील निलंगेकर व राज्याचे सहकार मंत्री तथा जिल्ह्यातील राष्ट्रवादी काँग्रेस पक्षाचे नेते बाबासाहेब पाटील यांच्यात कलगितुरा रंगला होता. दुष्काळामुळे जिल्हा बँकेची निवडणूक पुढे ढकला, तोपर्यंत प्रशासक नेमा अशी मागणी करत बँकेतील काही सभासद न्यायालयात गेले होते. परंतू सहकार मंत्री बाबासाहेब पाटील यांच्या खात्यांतर्गत असलेल्या प्राधिकरणाने निवडणूक घेण्यास आमची यंत्रणा सज्ज असल्याचे सांगितले. त्यानंतर लगेच जिल्हा बँकेच्या निवडणुकीचा कार्यक्रम जाहीर झाला. दरम्यानच्या काळात संभाजी पाटील-निलंगेकर यांनी सहकार मंत्री बाबासाहेब पाटील हे काँग्रेसची साथ देत आहेत, त्यांना ते महायुतीचे मंत्री असल्याचा विसर पडला आहे. ते काँग्रेससोबत गेले तर आम्ही त्यांच्याविरोधात आक्रमकपणे लढू, असा इशारा निलंगेकर यांनी दिला होता. दरम्यान, यावरुन महायुतीत फूट पडलीय का? असा सवाल उपस्थित केला जात आहे.

लातूर जिल्हा बँकेच्या निवडणुकीत नवं समीकरण? सहकारमंत्री अन् धीरज देशमुख एकाच गाडीतून दाखल; चर्चेला उधाण

निशांत भद्रेश्वर, एबीपी माझा — Fri, 16 Oct 2026 15:49:40 +0530

Latur: लातूर जिल्हा मध्यवर्ती सहकारी बँकेच्या निवडणुकीच्या पार्श्वभूमीवर जिल्ह्यातील राजकीय घडामोडींना वेग आला आहे. सहकारमंत्री बाबासाहेब पाटील आणि काँग्रेसचे माजी आमदार धीरज देशमुख हे एकाच गाडीतून उमेदवारी अर्ज दाखल करण्यासाठी पोहोचल्याने राजकीय वर्तुळात चर्चांना उधाण आलं आहे. एकीकडे महायुती म्हणून निवडणुका लढवण्याची भूमिका मांडली जात असताना, दुसरीकडे सहकारमंत्री आणि काँग्रेस नेते एकत्र दिसल्याने जिल्हा बँकेच्या निवडणुकीत नेमकी कोणती राजकीय समीकरणं आकाराला येणार, याकडे सर्वांचं लक्ष लागलं आहे.

सहकारमंत्री बाबासाहेब पाटील अन् काँग्रेस माजी आमदार धीरज देशमुख एकच गाडीतून...

राष्ट्रवादी काँग्रेसचे प्रदेशाध्यक्ष सुनील तटकरे यांनी नुकतीच महायुती म्हणून निवडणुका लढवण्याची भूमिका मांडली होती. त्यानंतर दुसऱ्याच दिवशी सहकारमंत्री बाबासाहेब पाटील हे काँग्रेसचे माजी आमदार धीरज देशमुख यांच्यासोबत एकाच गाडीतून उमेदवारी अर्ज दाखल करण्यासाठी पोहोचल्याचं चित्र पाहायला मिळालं. या घडामोडीमुळे लातूर जिल्हा बँकेच्या निवडणुकीतील राजकीय समीकरणांबाबत विविध तर्कवितर्क लढवले जात आहेत.

सहकाराच्या मागे नवी राजकीय मोट?

सहकारी संस्थांच्या निवडणुकांमध्ये स्थानिक पातळीवरील राजकीय संबंध, नेत्यांमधील समन्वय आणि सत्तेची गणितं महत्त्वाची ठरतात. त्यामुळे राज्यपातळीवरील महायुतीच्या भूमिकेचा आणि स्थानिक पातळीवरील राजकीय घडामोडींचा मेळ कसा घातला जाणार, हा प्रश्न उपस्थित होत आहे. पक्षीय राजकारण बाजूला ठेवून सहकाराच्या माध्यमातून नवी राजकीय मोट बांधली जात आहे का, अशी चर्चाही सुरू झाली आहे.

मात्र, बाबासाहेब पाटील आणि धीरज देशमुख यांच्या एकत्र येण्यामागील नेमकी राजकीय भूमिका अद्याप स्पष्ट झालेली नाही. त्यामुळे या घडामोडींना अधिकृत युती किंवा राजकीय आघाडीचं स्वरूप प्राप्त झालं आहे का, हे स्पष्ट होणं महत्त्वाचं ठरणार आहे.

लातूर जिल्हा मध्यवर्ती सहकारी बँकेच्या निवडणुकीत उमेदवारांची मांडणी, स्थानिक नेत्यांची भूमिका आणि विविध गटांमधील संभाव्य समन्वय यावर निवडणुकीचं चित्र अवलंबून असणार आहे. त्यामुळे सहकारमंत्री बाबासाहेब पाटील आणि धीरज देशमुख यांच्या एकत्रित उपस्थितीनंतर लातूरच्या राजकीय वर्तुळात चर्चांना उधाण आलं असून, आगामी घडामोडींकडे संपूर्ण जिल्ह्याचं लक्ष लागलं आहे.

लातूरच्या आरोग्य विभागात मोठी खळबळ! उपसंचालक डॉ. रेखा गायकवाड निलंबित, उच्च न्यायालयाच्या निर्णयानंतर नेमकं काय घडलं?

निशांत भद्रेश्वर, एबीपी माझा — Wed, 14 Oct 2026 13:25:14 +0530

Latur: लातूरमधून एक महत्त्वाची अपडेट समोर आली आहे. लातूर आरोग्य परिमंडळाच्या उपसंचालक डॉ. रेखा गायकवाड (Dr Rekha Gaikwad) यांच्या निलंबनाचे आदेश आरोग्य विभागाने काढले आहेत. महाराष्ट्र लोकसेवा आयोगामार्फत (MPSC) झालेल्या त्यांच्या नियुक्तीवर आक्षेप घेण्यात आला होता. या प्रकरणात उच्च न्यायालयाच्या निर्णयानंतर यांच्या नियुक्ती बाबतची ही कारवाई करण्यात आल्याची माहिती समोर आली आहे.या निर्णयामुळे लातूरच्या आरोग्य विभागात खळबळ उडाली आहे. दरम्यान, डॉ रेखा गायकवाड यांच्या कार्यकाळात विविध पदांसाठी राबवण्यात आलेल्या भरती प्रक्रियेवरही यापूर्वी प्रश्न उपस्थित झाले होते.

रेखा गायकवाड यांच्या कार्यकाळातल्या विविध नियुक्त्या, बदल्या, पदोन्नती प्रक्रिया,रुग्णालयासाठी दिलेल्या मंजुऱ्या आणि औषध खरेदीतील तफावत यासंदर्भात चौकशी करण्यात आली. त्यानंतर आरोग्य विभागाने त्यांच्या निलंबनाचे अध्यक्ष काढले आहे. या घडामोडीनंतर लातूर आरोग्य परिमंडळाच्या उपसंचालक पदाचा अतिरिक्त कार्यभार बीडचे जिल्हा शल्यचिकित्सक डॉ साळुंखे यांच्याकडे सोपवण्यात आल्याची माहिती मिळत आहे.

नेमके प्रकरण काय ?

जवळपास वर्षभरापूर्वी लातूरच्या आरोग्यसेवा उपसंचालक पदावर रुजू झालेल्या डॉ. रेखा गायकवाड यांच्या कार्यकाळात 25 ऑगस्ट 2025 पासून ज्या कामकाजाची चौकशी करण्याचा आदेश सप्टेंबर 2026 मध्ये देण्यात आले होते. नियुक्त्या, बदल्या, पदोन्नती, वैद्यकीय अधिकाऱ्यांची गैरहजेरी, औषधे उपकरणांची खरेदी आणि आर्थिक व्यवहार अशा बाबींची तपासणी करण्याचे हे आदेश होते. या चौकशीसाठी आधी नऊ सदस्यांचे समिती नेमण्यात आली होती. मात्र उद्या 24 तासात ती बदलून सहा सदस्यांची नवी समिती नियुक्त करण्यात आली. समितीच्या रचनेवरून तसेच चौकशीच्या व्याप्तीवरून अनेक प्रश्न उपस्थित झाले होते. या संपूर्ण प्रकरणामागे आरोग्य विभागातील अधिकाऱ्यांमधील अंतर्गत राजकारण असल्याची चर्चा त्यावेळी रंगली होती. दरम्यान, या प्रकरणात उच्च न्यायालयाच्या आदेशानंतर डॉ रेखा गायकवाड यांची नियुक्ती रद्द करण्यात आल्याची माहिती आहे.

Maharashtra Drought: मोठी बातमी: राज्यात दुष्काळ जाहीर, देवेंद्र फडणवीसांचा मोठा निर्णय, कोणत्या जिल्ह्यातील शेतकऱ्यांना 10 मोठे लाभ मिळणार

अभिषेक मुठाळ — Sat, 26 Sep 2026 10:57:07 +0530

Maharashtra Drought Farmers: राज्यभरात लाडक्या गणपती बाप्पाला निरोप दिला असतानाच शेतकऱ्यांच्यादृष्टीने राज्य सरकारने एक महत्त्वाचा निर्णय घेतला आहे. राज्यात दुष्काळ जाहीर करण्यात आला आहे. मुख्यमंत्री देवेंद्र फडणवीस (Devendra Fadnavis) यांच्याकडून शनिवारी हा निर्णया जाहीर करण्यात आला. त्यानुसार राज्यातील 265 तालुक्यात (Maharashtra Taluka) दुष्काळ जाहीर करण्यात आला आहे. राज्यातील 358 पैकी 265 तालुक्यात दुष्काळ, याचा अर्थ 75 टक्के महाराष्ट्रात दुष्काळ जाहीर करण्यात आहे. या निर्णयामुळे दुष्काळाची दाहकता अनुभवत असलेल्या शेतकरी (Farmers) आणि नागरिकांना मोठा दिलासा मिळण्याची शक्यता आहे. गेल्या काही दिवसांपासून राज्यभरात पालकमंत्र्यांकडून (Gurdian Ministers) दुष्काळी परिस्थितीचा आढावा घेतला जात होता. मुख्यमंत्री देवेंद्र फडणवीस यांनीही एक दिवस दुष्काळी दौरा केला होता. तर दुसरीकडे विरोधकांनी दुष्काळ जाहीर करुन शेतकऱ्यांना भरीव मदत करण्याची मागणी लावून धरली होती. आदित्य ठाकरे हे नुकतेच दुष्काळग्रस्त भागाच्या दौऱ्यावर गेले होते. शरद पवारही लवकरच दुष्काळी भागाचा दौरा करणार होते. या पार्श्वभूमीवर राज्य सरकारने दुष्काळ जाहीर करण्याचा घेतलेला निर्णय महत्त्वाचा मानला जात आहे. महाराष्ट्रातील 75 टक्के भागात दुष्काळ जाहीर झाल्याने आता दुष्काळाच्या विविध उपाययोजना जाहीर होऊन त्यांची अंमलबजावणी केली जाईल. (Drought in Maharashtra)

Maharashtra Farmers: दुष्काळ जाहीर झाल्याने शेतकऱ्यांना काय फायदा मिळणार?

* जमीन महसुलात सूट
* पीक कर्जाचे पुनर्गठन
* शेतीशी निगडित कर्जाच्या वसुलीला स्थगिती
* कृषीपंपाच्या चालू वीजबिलात सूट
(7.5 हॉर्सपॉवर क्षमतेच्या वीजपंपांचे वीज बिल आधीच माफ, आता त्यावरील वीजपंपांनाही सूट)
* शालेय/महाविद्यालयीन विद्यार्थ्यांना परीक्षा शुल्कात माफी
* रोजगार हमी योजना अंतर्गत नियमात शिथिलता आणून अधिकाधिक कामे सुरु करणार
* आवश्यक त्या ठिकाणी पिण्याचे टँकर्स
* टंचाई जाहीर केलेल्या गावात शेतकर्‍यांच्या शेतीपंपाची वीजजोडणी खंडित होणार नाही
* शेतीवर आश्रित शेतकरी/शेतमजूर यांना अन्नधान्य पुरवणार
* जनावरांच्या चार्‍याची व्यवस्था करणार (Chara Chavni)
* जलसंधारणाची कामे मोठ्या प्रमाणात हाती घेणार
* पिण्याचे पाणी आणि जनावरांसाठी पाणी यासाठी आधीच्या आदेशाप्रमाणे नियोजन सुरुच ठेवणार
* पंचनाम्याची कार्यवाही तत्काळ पूर्ण करण्याचे सर्व जिल्हाधिकार्‍यांना आदेश
* पिकांची स्थिती दाखवणारे छायाचित्र, जीपीएस संकलित करण्याचे आदेश

आणखी वाचा

ना पाऊस, ना पाणी! दुष्काळी परिस्थितीमुळं लग्न जमेना, तरुण शेतकऱ्यानं मुख्यमंत्री फडणवीसांसमोर मांडली व्यथा

Sharad Pawar Drought: राज्यात दुष्काळाची दाहकता वाढली, आता शरद पवार मैदानात उतरणार, मोठी घोषणा