Gokul: गोकुळच्या 'किकवी' दूध पॅकेजिंग प्रकल्प व जमीन खरेदी व्यवहारात 13 कोटींचा हिशेब लागेना, ठाकरे गटाकडून ईडी चौकशी मागणी

Gokul: किकवी' दूध पॅकेजिंग प्रकल्प व जमीन खरेदी व्यवहारात मोठ्या प्रमाणावर आर्थिक व प्रशासकीय अनियमितता झाल्याचा ठपका चौकशी अधिकारी कृष्णा ठाकरे यांनी ठेवला आहे.

Discrepancy of13 crore found in Gokul Kikvi milk packaging project

Source : ABP Majha

Gokul: कोल्हापूर जिल्हा सहकारी दूध उत्पादक संघ अर्थात गोकुळच्या भोर (जि. पुणे) येथील 'किकवी' दूध पॅकेजिंग प्रकल्प व जमीन खरेदी व्यवहारात मोठ्या प्रमाणावर आर्थिक व प्रशासकीय अनियमितता झाल्याचा ठपका चौकशी अधिकारी कृष्णा ठाकरे यांनी ठेवला आहे. खरेदीच्या नोंदणी प्रक्रियेतील 13 कोटी रुपयांच्या खर्चाचा कोणताही विनियोग तपशील सापडलेला नाही. 

शिवसेना ठाकरे गटाकडून ईडी चौकशीची मागणी

शिवसेना (उद्धव बाळासाहेब ठाकरे) पक्षाचे उपनेते संजय पवार यांनी पत्रकार परिषदेत मुख्यमंत्री देवेंद्र फडणवीस आणि मंत्री चंद्रकांत पाटील यांच्याकडे या प्रकरणाची 'ईडी' (ED) मार्फत चौकशी करण्याची मागणी केली आहे. साडे पाच लाख दूध उत्पादक शेतकऱ्यांच्या घामाच्या पैशांवर दरोडा टाकला जात असल्याचा आरोप त्यांनी केला. दुसरीकडे, 'गोकुळ'चे व्यवस्थापकीय संचालक डॉ. योगेश गोडबोले यांनी सांगितले की, राज्य शासनाने किकवी प्रकल्पाबाबत जी माहिती मागवली होती ती सर्व दिली आहे आणि पुढील चौकशीसाठी प्रशासन पूर्ण सहकार्य करेल

चौकशी अहवालातील 6 प्रमुख ठपके

• निबंधकांची मंजुरी नाही: डेअरी प्रकल्प व जागा खरेदीसाठी सहकार निबंधकांची मंजुरी घेण्यात आली नाही.
• पारदर्शकतेचा अभाव: ई-निविदा पद्धत वापरली गेली नाही आणि निविदेसाठी केवळ ७ दिवसांचा कालावधी देण्यात आला.
• फेरनिविदा नाही: आलेल्या ३ निविदांपैकी २ अपात्र ठरल्यानंतरही फेरनिविदा मागवण्यात आल्या नाहीत.
• सदोष मूल्यमापन: दूध प्रकल्प व जमिनीच्या मूल्यमापनाची (Valuation) पद्धत त्रुटीपूर्ण होती.
• अनामित खर्च: नोंदणी व इतर अनुषंगिक १३ कोटी रुपयांच्या खर्चाचा तपशील उपलब्ध नाही.
• सर्च रिपोर्ट गहाळ: खरेदी-विक्री व्यवहाराचा अधिकृत तपशील व सर्च रिपोर्ट दिसून येत नाही.

मल्टीस्टेटसाठी मला 200 कोटींची ऑफर

दुसरीकडे, माजी दुग्धविकास मंत्री महादेव जानकर यांनी गोकुळचे मल्टिस्टेट करण्यासाठी मला तब्बल 200 कोटींची ऑफर देण्यात आली होती, असा राजकीय बॉम्ब टाकल्यानंतर गोकुळच्या भर निवडणुकीमध्ये पुन्हा एकदा मल्टिस्टेटचा मुद्दा तापला आहे. या मुद्द्यावरून आता राजकीय रणकंदन होण्याची चिन्हे आहेत. जानकर यांनी बोलताना म्हटलं आहे की, गोकुळ दूध उत्पादक शेतकऱ्यांच्या मालकीचा राहावा यासाठी कोट्यवधीच्या आमिषाला आपण ठोकर दिली. दरम्यान, सतेज पाटील यांनी म्हटलं की, गोकुळ मल्टिस्टेट झाला नसल्यामुळेच आज गोकुळची निवडणूक लागली आहे. गोकुळ जर मल्टिस्टेट झाला असता तर गोकुळची निवडणूक कधी झाली हेच दूध उत्पादकांना कळालं नसतं. मात्र आम्ही त्या विरोधामध्ये लढा दिला आहे. या दाव्यामध्ये तथ्य असेल तर महाराष्ट्राचे दुर्दैव असल्याचेही सतेज पाटील यांनी म्हटलं आहे.  

इतर महत्वाच्या बातम्या