Kolhapur Crime: कोल्हापुरात प्रियकरासह चौघांचा महाविद्यालयीन तरुणीवर 10 महिन्यांपासून वारंवार अत्याचार; नराधमांना चार दिवसांची पोलिस कोठडी

Kolhapur Crime: पीडित मुलीने दिलेल्या तक्रारीनुसार, मुरगूड येथील तलाव परिसर, गिरगाव, कात्यायनी, सीबीएस कोल्हापूर परिसरातील लॉजवर वेळोवेळी पीडितेवर अत्याचार करण्यात आले.

Kolhapur Crime

Source : ABP Majha

Kolhapur Crime: ओळखपत्र तयार करून देण्याच्या बहाण्याने ओळख झालेल्या महाविद्यालयीन तरुणीवर प्रियकरासह चौघांनी गेल्या 10 महिन्यांपासून विविध ठिकाणी धमकी देत अत्याचार केल्याचा भयावह प्रकार समोर आला आहे. या प्रकरणातील प्रमुख आरोपी आदित्य बाजीराव शेटके (वय 24, रा. खिंडी व्हरवडे, ता. राधानगरी), रणजित संभाजी मुधोळकर (वय 29, रा. सोळांकूर, ता. राधानगरी), प्रणवगिरी चंद्रशेखर पालकर (वय 24, रा. राधानगरी) आणि विक्रम रामचंद्र पाटील (वय 22, रा. बुजवडे, ता. राधानगरी) अशी आरोपींची नावे आहेत. चौघांना चार दिवसांची पोलिस कोठडी सुनावण्यात आली आहे. मुरगूड पोलिस ठाण्यात पीडितीने तक्रार दिल्यानंतर पोलिसांनी कारवाई केली. 

आरोपींकडून पैशांची मागणी 

पीडित मुलीने दिलेल्या तक्रारीनुसार, मुरगूड येथील तलाव परिसर, गिरगाव, कात्यायनी, सीबीएस कोल्हापूर परिसरातील लॉजवर वेळोवेळी पीडितेवर अत्याचार करण्यात आले. प्रकरण मिटवून देण्यासाठी आरोपींकडून पैशांची मागणी केली होती. भीतीने पीडितेने आदित्य शेटके, रणजित मुधोळकर, प्रणवगिरी पालकरला काही रक्कमही दिली. तरीही विक्रमने तू माझ्याशी लग्न केले तरच व्हिडीओ आणि फोटो डिलीट करतो, असे सांगत छळ केला. गेल्या सहा ते सात महिन्यांपासून हा प्रकार सुरू होता. त्रास असह्य झाल्यानंतर पीडितेने मुरगूड पोलिस ठाण्यात तक्रार दाखल केली. पोलिसांनी चौघा आरोपींना तत्काळ अटक केली. 

फोटो, व्हिडीओ व्हायरल करण्याची धमकी देत अत्याचार

मुख्य आरोपी आदित्यने 19 वर्षीय महाविद्यालयीन तरुणीला प्रेमाच्या जाळ्यात ओढत तिचे फोटो व व्हिडीओ व्हायरल करण्याची धमकी देत होता. पोलिसांनी दिलेल्या माहितीनुसार, पीडित तरुणीची मुख्य आरोपी आदित्यशी ओळख झाली होती. ओळखपत्र देण्याच्या बहाण्याने त्याने पीडित तरुणीला मुदाळतिट्टाला बोलावून घेतले. नंतर मुरगूडमधील तलाव परिसरातील झाडीमध्ये नेले. तिचे फोटो काढून ते एडिट करून सोशल मीडियावर व्हायरल करण्याची धमकी देत अत्याचार केला.

प्रियकराने इतर तरुणांशी ओळख करून दिली 

नराधम आदित्यने पीडित तरुणीची ओळख रणजितशी करून दिली. रणजितने फोटो व्हायरल करण्याची भीती दाखवून त्या तरुणीवर गिरगाव, कात्यायनी, कोल्हापूर तसेच पाचगाव परिसरातील विविध लॉजवर अत्याचार केला. तिचे अश्लील फोटो व व्हिडीओ काढत ते व्हायरल करण्याची धमकी तो वारंवार देत होता. चंद्रशेखरने त्या तरुणीला प्रणवगिरीशी बोलण्यास भाग पाडले. त्यानंतर त्याने भीती दाखवत त्या तरुणीला स्वतःच्या कारमधून घेऊन एका लॉजमध्ये अत्याचार केला.

आदित्य या प्रकरणातील मुख्य आरोपी असून त्याची फोटोग्राफीच्या माध्यमातून पहिल्यादा पीडित तरुणीशी ओळख झाली. आदित्यच्या मामाचा सोळांकुरात फोटोग्राफी व व्हिडिओ शूटिंगचा व्यवसाय आहे.मामाने हा व्यवसाय भाचा आदित्यकडे चालवण्यासाठी दिला होता. त्यानंतर विक्रमशी सुद्धा जबरदस्तीने ओळख करून दिली. ओळखीनंतर विक्रमने तुझे सर्व फोटो व व्हिडीओ डिलीट करून हे प्रकरण मिटवतो, असे सांगत पाचगाव येथील लॉजमध्ये नेऊन अत्याचार केला.

इतर महत्वाच्या बातम्या