मी पुरावे द्यायला तयार, काय ते एकनाथ शिंदेंनी उत्तर द्यावं; 500 कोटींच्या देवाण-घेवाणीवर जरांगे पाटलांचा पुनरुच्चार

Manoj Jarange Patil: देवेंद्र फडणवीसांना अंधारात ठेऊन प्लॅन आखला, एकनाथ शिंदेंचं करिअर उद्ध्वस्त करण्याचा डाव होता? मनोज जरांगेंचं स्फोटक वक्तव्य

रवी मुंडे, एबीपी माझा — Mon, 26 Oct 2026 12:25:15 +0530

Manoj Jarange Patil: ऑडिओ क्लीप प्रकरणात एआयला पुढे करुन भाजपला पळवाट शोधता येणार नाही. या माध्यमातून एकनाथ शिंदे यांची राजकीय कारकीर्द उद्ध्वस्त करण्याचा डाव होता का, अशी शंका येत आहे. या सगळ्या गोष्टी करताना मुख्यमंत्री देवेंद्र फडणवीस (Devendra Fadnavis) यांना अंधारात ठेवण्यात आले होते का, याचाही शोध घेतला पाहिजे. ऑडिओ क्लीपमध्ये बोलणाऱ्या लोकांच्या मागे देशातील कोणी बडा नेता असला पाहिजे. याचा शोध शिंदे साहेब, फडणवीस साहेब (Devendra Fadnavis) यांनी घ्यावा. या प्रकरणात शिंदे साहेबांसाठी (Eknath Shinde) जी किंमत मोजायची वेळ येईल ती मोजायला आम्ही तयार आहोत. तसेच या प्रकरणाच्या मुळाशी जाण्यासाठी आम्ही देवेंद्र फडणवीस यांनाही मदत करायला तयार आहोत, असे मनोज जरांगे पाटील यांनी म्हटले. ते सोमवारी जालना येथे प्रसारमाध्यमांशी बोलत होते. (Maharashtra Politics)

यावेळी मनोज जरांगे पाटील यांनी 500 कोटी रुपये आणि ऑडिओ क्लीपविषयी सविस्तर भाष्य केले. या प्रकरणानंतर आता एकनाथ शिंदे साहेब गप्प बसणार नाहीत. हा त्यांच्यावर वैयक्तिक घाव आहे. त्यांचे करिअर उद्ध्वस्त करण्याचा डाव होता का? मला कालची माहिती आहे की, यात फडणवीस साहेबांना माहिती न होता त्यांनी हे केलेले आहे. फडणवीस साहेब खोलात गेले तर त्यांच्या आणि एकनाथ शिंदे यांच्याविरोधात गेम होता हे लक्षात येईल. क्लिपमध्ये बोलणारे लोक कोणाचे, ही कोणाची यंत्रणा आहे. यांच्या पाठीवर कोणाचा हात आहे, असे अनेक प्रश्न उपस्थित होतात. ही बैठक आहे त्यामधून दिसून येते की, ते प्लॅनिंग करतात, नरेटिव्ह सेट करतात. यांच्या पाठीशी दिल्लीतून हात असला पाहिजे. भाजपपेक्षा मोठी संस्था यांच्या पाठिशी असावी. माझ्याविरोधात बोलणारे सगळ्यांना नोटा दिल्याचा आरोपही मनोज जरांगे पाटील यांनी केला.
या सगळ्याचा खोलात जाऊन शोध घेतला नाही तर या संपूर्ण प्रकरणात देवेंद्र फडणवीस यांचाच हात होता, असा संदेश जाईल. माझ्याकडे कोणतंही यंत्र नाही, मी एआय व्हिडीओ कसा तयार करणार, तुम्ही कशालाही AI म्हणणार का? या सगळ्यात भाजपचे लोक होते. मात्र, ही गोष्ट देवेंद्र फडणवीस यांना माहिती होती की नव्हती, हाच प्रश्न आहे, असे मनोज जरांगे पाटील यांनी म्हटले. मराठीमध्ये AI मध्ये करण्याइतके ते एवढे सक्षम नाही. आम्ही पण शोधात आहोत. मी गप्प बसणार नाही मी शोध घेणार. आता मी यांच्या मागे लागणार असल्याचेही मनोज जरांगे यांनी सांगितले.

खासदार संजय राऊत यांनी अमित शाह यांना काय पत्र दिले, हे मला माहिती नाही. यात सत्ताधारी असो किंवा विरोधक असोत, ईडी चौकशी तर करा किंवा वेगळ्या यंत्रणांमार्फत याची चौकशी करा. कोणताही दबाव येणार नाही, अशी तपास यंत्रणा नेमा, अशी मागणी मनोज जरांगे पाटील यांनी केली.

आणखी वाचा

Manoj Jarange Patil and Sanjay Raut: संजय राऊतांनी ऑडिओ क्लीपचा मुद्दा डायरेक्ट राष्ट्रीय पातळीवर नेला, अमित शाहांना पत्र, 500 कोटींची ईडी चौकशी करण्याची मागणी

हे खूप मोठं नेटवर्क, माझ्या घरावरती हल्ला करू शकतेत; 500 कोटींच्या ऑडिओ क्लिपनंतर जरांगे पाटलांनी व्यक्त केली भीती

रवी मुंडे, एबीपी माझा — Sat, 24 Oct 2026 14:20:01 +0530

जालना : मराठा आंदोलक मनोज जरांगे पाटील (Manoj jarange) यांनी 500 कोटींच्या ऑडिओ क्लिपचे जाहीरपणे प्रसारण केल्यानंतर राजकीय वर्तुळात खळबळ उडाली असून भाजप-शिवसेना (Shivsena) आमने सामने आले आहेत. त्यावरुन जरांगे पाटील यांनाही लक्ष्य केलं जात आहे. तर, दुसरीकडे हा खूप मोठा विषय आहे, त्यामुळे जीव धोक्यात घालून मी हे सगळं समोर आणल्याचं जरांगे पाटील यांच्याकडून सांगण्यात येत आहे. त्यातच, हे खूप मोठं नेटवर्क, माझ्या घरावरती हल्ला करू शकतेत, असे म्हणत जरांगे पाटलांनी भीती व्यक्त केलीय.

मी दिलेली ऑडिओ क्लिप माझ्या अगोदर व्हायरल झालेली आहे, रामदास कदम यांनीच ती क्लिप व्हायरल केली. त्यामुळे, रामदास कदम यांची चौकशी झाली पाहिजे, त्यांच्याजवळच सगळं आहे, असे म्हणत मनोज जरांगे पाटील यांनी पुन्हा एकदा रामदास कदमांना लक्ष्य केलं. मी क्लिप दिल्यावर त्या सोर्सची सगळी हमी आणि जबाबदारी मुख्यमंत्री फडणवीस आणि उपमुख्यमंत्री शिंदे यांनी घ्यावी. या प्रकरणापुरता फडणवीस आणि शिंदे यांच्यावर मला विश्वास आहे, असेही जरांगे पाटील म्हटले.

माझ्यावर हल्ल्याचं षडयंत्र

मुख्यमंत्री आणि उपमुख्यमंत्र्यांची लोकं माझ्यावर हल्ल्याच्या तयारीत आहेत, असा खळबळजनक दावा मनोज जरांगे यांनी केला आहे. माझ्या घरावर हल्ला होऊ शकतो, मला मारून टाकण्याचे षडयंत्र रचले जात असल्याचंही त्यांनी म्हटलं. सरकारने माझी स्कॉटिंग काढली, दसरा मेळाव्याला शेवटपर्यंत पोलिसांची स्कॉटिंग दिली नाही.

दरम्यान, ती क्लिप ओरिजनल सर्वांनाच त्याची खात्री आहे, असे म्हणत ती क्लिप एआय जनरेटेड असल्याचा आरोप करणाऱ्यांनाही जरांगे पाटलांनी फटकारलं आहे. तसेच, नवनाथ बन यांच्या आरोपावरही जरांगे पाटलांनी पलटवार केला, 100 का कोटी होईना होते का? असा सवाल त्यांनी विचारला.

श्रीकांत शिंदे गप्प कसे बसतील?

500 कोटींच्या क्लिपसंदर्भातील आरोपावर एकनाथ शिंदेंनी उत्तर दिलेले आहे, आता श्रीकांत शिंदेंना बोलायचे की नाही तो त्यांचा अधिकार आहे. मात्र, श्रीकांत शिंदे यांची चूक नाही तर ते गप्प कसे बसणार? असा सवालही जरांगे पाटील यांनी उपस्थित केला.

भाजपा-शिवसेनेत भांडण लावायचं षडयंत्र - लाड

शिवसेना आणि भाजपमध्ये भांडण लावायचं काम कोण करत आहे, याचीही चौकशी पोलिसांच्या एसआयटीने केली पाहिजे. संजय राऊत याच्यावर गुन्हा दाखल करुन आधी त्याला उचलले पाहिजे, अशा शब्दात भाजपा आमदार प्रसाद लाड यांनी खळबळजनक आरोप केला आहे. तसेच, ऑडिओ क्लीपमधील 500 कोटींबाबतच्या दाव्याचे आम्ही कधीच खंडन केलेले नाही. त्याची तपासणी केली जाईल. त्यासाठी या क्लीपची फॉरेन्सिक टेस्ट होईल. मात्र, संजय राऊत हाच या क्लीपचा निर्माता आहे. भाजपच्या विधानपरिषदेच्या आमदाराने ही ऑडिओ क्लीप मनोज जरांगे यांना दिली, असे त्यांनी म्हटले. पण, अशा आरोपांनी मला काहीच फरक पडत नाही. मला वाटतं, चौकशी होईपर्यंत धीर धरला पाहिजे. मात्र, संजय राऊत यांच्या बोलण्यामुळे भाजप आणि शिवसेनेत भांडण लावायचं षडयंत्र उघड झाले, असेही प्रसाद लाड यांनी म्हटले.

हेही वाचा

एकनाथ शिंदेंकडून रामदास कदमांना सूचना, जरांगे पाटलांविषयी बोलू नका, महायुतीतील तणावानंतर हालचाली

रेकॉर्डिंगमधून खूप शहाणा झालो! आता आंदोलन चार दिवस उशिरा, पण कट्टर मराठा सेवकांची फळी तयार करणार, जरांगे पाटलांचा मोठा निर्णय

रवी मुंडे, एबीपी माझा — Fri, 23 Oct 2026 22:21:18 +0530

Manoj Jarange Patil : राज्यातील प्रत्येक विभागात मराठा सेवकाची फळी तयार करावी लागणार आहे. मराठा सेवाकांना एक व्हाट्सअप नंबर दिला जाणार असल्याचे मराठा आंदोलक मनोज जरांगे पाटील म्हणाले. आता कोण फुटला आहे आणि कुठे गेला आहे हे काही कळत नाही. कट्टर मराठा सेवकांची फळी तयार करणार आहे. रेकॉर्डिंगमधून मी खूप शहाणा झालो आहे, मराठा समाजाने देखील शहाने व्हावं असे जरांगे म्हणाले. आंदोलन चार दिवस उशिरा करु परंतू, मराठा सेवकांची फळी तयार करणार असल्याचे जरांगे म्हणाले.

आरक्षण मागितलं तुम्ही प्रचंड स्वरूपाच्या अडचणी उभा केल्या

आम्ही इमानदारीने काम करायचं आणि आमच्या सोबत तुम्ही जीव घेणे डाव टाकायचे. आम्ही आरक्षण मागितलं तुम्ही प्रचंड स्वरूपाच्या अडचणी उभा केल्याचे मत मराठा आंदोलक मनोज जरांगे पाटील यांनी व्यक्त केले. पडद्यामागचं बाहेर काढलं आहे की हे कशी प्लॅनिंग करु शकतात. आपल्याला राज्यभरात मजबूत फळी उभा करावी लागणार आहे असे जरांगे पाटील म्हणाले.

या दुनियेत सरळ माणसाचं जगणं खूप अवघड झालंय

महायुतीचे नेते आमने-सामने आले आहेत. तो त्यांचा भाग आहे असे जरांगे पाटील म्हणाले. आम्ही काय तुमचं वाईट केलं होतं म्हणून तुम्ही आमच्या विरोधात एवढं षडयंत्र रचलं आहे. आज सुद्धा तुम्ही आमच्यावर आरोप करत आहात. आमच्या समाजाचा आंदोलन चिरडण्यासाठी तुम्ही का षडयंत्र उभा केलं आहे. पडद्याच्या पाठीमागं काय होत आहे, हे कोणाला माहित नव्हतं आपण राज्याला दाखवून दिलं आहे. या दुनियेत सरळ माणसाचं जगणं खूप अवघड झालं आहे असे जरांगे पाटील म्हणाले. गरिबांच्या पोरांचा आयुष्य उध्वस्त करण्यासाठी तुम्ही काम करत आहात. आता मराठा समाजाने आपल्या जवळचा कोण आहे हे ओळखलं पाहिजे. मराठा सेवकाची नवीन चांगली फळी मराठा समाजाची आता बांधावी लागणार आहे. त्यानंतर आंदोलनात उतरावं लागणार आहे. ते काम मी दोन-तीन दिवसात सुरू करणार आहे. आज कोण कुठे फुटला आहे कोण कोणासोबत आहे हे कळायला तयार नाही.

रामदास कदम विनाकारण का बोलतो?

मराठा सेवकाची मोठी फळी तयार करणार आहोत. रामदास कदम विनाकारण का बोलतो, हे शिंदे साहेबांसाठी महत्वाचं आहे असे जरांगे पाटील म्हणाले. रामदास कदम यांना कोण सांगत की बाथरुममध्ये काय खातो गावातून काढून दिले .हे सगळ पुढ आलं पाहिजे असेही ते म्हणाले. प्रसाद लाड यांना जी भूमिका घ्यायची ती त्यांनी घ्यावी. आज ती वेळ नाही. पडद्याच्या पाठीमागे कट शिजला जातो. हे मोडीत काढण्यासाठी आपल्याला काम करणे गरजेच आहे. मराठा समाजावरचा अन्याय रोखण्यासाठी आपल्याला सज्ज व्हावं लागणार आहे असे जरांगे पाटील म्हणाले. समाज संकटातून बाहेर काढायचा आहे म्हणून फळी तयार करणार असल्याचे ते म्हणाले.

Manoj Jarange Patil and Ramdas Kadam: माझ्या पत्रकारपरिषदेपूर्वीच ऑडिओ क्लीपविषयीची 'ती' गोष्ट रामदास कदमांना कशी समजली? मनोज जरांगेंचा सवाल

रोहित धामणस्कर — Fri, 23 Oct 2026 13:05:19 +0530

Manoj Jarange Patil and Ramdas Kadam: मनोज जरांगे यांनी ऑडिओ क्लीपचा बॉम्ब टाकल्यानंतर महाराष्ट्राच्या राजकारणात प्रचंड खळबळ उडाली आहे. यानंतर एकनाथ शिंदे यांच्या शिवसेनेने या ऑडिओ क्लीपच्या (Audio Clip) फॉरेन्सिक चौकशीची मागणी केली आहे. शिंदे सेनेचे ज्येष्ठ नेते रामदास कदम यांनी जरांगे (Manoj Jarange Patil) यांच्या ऑडिओ क्लीपच्या टायमिंगवर प्रश्नचिन्ह उपस्थित केले होते. याबाबत मनोज जरांगे पाटील यांनी 'एबीपी माझा'शी बोलताना रामदास कदम यांच्याविषयी नवा सवाल उपस्थित केला आहे. मी काल सकाळी 11 वाजता पत्रकार परिषद घेतली. मात्र, त्यापूर्वीच रामदास कदम (Ramdas Kadam) यांनी एका वृत्तवाहिनीला मी दाखवलेली ऑडिओ क्लीप कोणत्या तारखेची आहे, हे कसे सांगितले? त्यांना ही माहिती अगोदरच कशी मिळाली? माझं एकनाथ शिंदे (Eknath Shinde) साहेबांना सांगणं आहे की, जवळचे लोक धोकादायक असतात. माझ्यासोबतचे अनेक लोक फोडण्यात आले. त्यावरुन मी हे सांगत आहे, असे मनोज जरांगे पाटील यांनी म्हटले. (Maharashtra Politics)

यात एकनाथ शिंदे साहेबांच्या पोराचं नाव आलं. त्यांनी भाजपला विचारलं पाहिजे, माझ्या पोरांचं नाव कसं आलं? भाजपने पैसे दिले असतील तर एकनाथ शिंदेंना सांगितलं पाहिजे की, आम्ही तुम्हाला पैसे दिले आहेत. शिंदे आणि फडणवीस साहेबांनी या प्रकरणाच्या खोलात गेले पाहिजे. हे खूप मोठा कट आहे, षडयंत्र आहे. याचा शिंदे, फडणवीस, शरद पवार, राज ठाकरे अशा सगळ्याच पक्षांना धोका आहे, असा इशारा मनोज जरांगे पाटील यांनी दिला.

ही ऑडिओ क्लीप मला कोणी दिली, त्याचा सोर्स मी सांगणार नाही. त्यासाठी सरकारने जबाबदारी घ्यायला लागते, तर लोक समोर येतात. सरकारने आपल्या पक्षाच्या नेत्यांना वाचवण्याचे काम करु नये. ही गोष्ट बाहेर आली हा महत्त्वाचा विषय आहे. एआय तंत्रज्ञानाने क्लीप बनवायला त्यामधील लोक आमच्या ओळखीचे पाहिजेत, आम्हाला त्यांचे आवाज माहिती असायला हवेत. एआयने ऑडिओ क्लीप बनवायची असती तर एक-दोन जणांच्या आवाजाबाबत तसं करता येतील. पण या ऑडिओ क्लीपमध्ये इतकेजण आहेत. इतक्या लोकांचं एआय कसं होऊ शकतं? ही चर्चा ओरिजिनल आहे. तुम्ही अशाप्रकारे लोकांना उद्ध्वस्त करणार असेल तर ते भीषण आहे. मराठ्यांची पोरं फोडा, समन्वयक फोडा, काय आहे ही परिस्थिती, असा सवाल मनोज जरांगे पाटील यांनी उपस्थित केला.

Devendra Fadnavis: ऑडिओ क्लीप अडीच वर्षांनी बाहेर कशी आली? फडणवीसांच्या प्रश्नावर मनोज जरांगे म्हणाले...

मनोज जरांगे पाटील यांच्याकडे असेलील ऑडिओ क्लीप अडीच वर्षांनी बाहेर कशी आली? असा सवाल मुख्यमंत्री देवेंद्र फडणवीस यांनी उपस्थित केला होता. यावर मनोज जरांगे पाटील यांनी म्हटले की, ही क्लीप बाहेर आली, हे महत्त्वाचे आहे. फडणवीस आणि शिंदे साहेबांनी निष्पक्षपणे चौकशी करायला पाहिजे, त्यांची लोकं असली तरी जेलला गेली पाहिजेत. एआय सांगून हे प्रकरण दाबण्याचा प्रयत्न केला तर हे सगळं फडणवीसच करत आहेत, हे सिद्ध होईल. आम्ही विचारावं का दोन वर्षे झाली तरी संतोष देशमुख प्रकरणातील आरोपी का सापडत नाही? एखादी मोठी गोष्ट मिळवायला वेळ लागतो. उपोषण सुरु होती, मला नऊ दहा महिन्यांपूर्वी कळालं, एकाने सांगितलं की, तुम्हाला 500 कोटी शिंदे साहेबांनी दिले. मी विचारलं कोण म्हणालं तुलं, तो म्हणाला अशी चर्चा सुरु आहे. मग आम्ही शोधत गेलो, मराठ्याच्या पोरांनी छापा टाकला, तेव्हा ते सापडलं. हे खूप मोठा कट आहे, षडयंत्र आहे, असे मनोज जरांगे पाटील यांनी म्हटले.

आणखी वाचा

Manoj Jarange Audio Clip: मनोज जरांगे डुप्लिकेट मराठा, सुपारी घेऊन शिंदेंच्या विरोधात बोलतात, तोंडाला काळं फासणार..., जरांगेंचा एकेरी उल्लेख करत शिवसेना उपजिल्हाप्रमुखांचा इशारा

Manoj Jarange Audio Clip: मनोज जरांगे डुप्लिकेट मराठा, सुपारी घेऊन शिंदेंच्या विरोधात बोलतात, तोंडाला काळं फासणार..., जरांगेंचा एकेरी उल्लेख करत शिवसेना उपजिल्हाप्रमुखांचा इशारा

एबीपी माझा वेब टीम — Fri, 23 Oct 2026 12:11:38 +0530

जालना : मराठा आंदोलक मनोज जरांगे हे डुप्लिकेट मराठा आहेत, अशी टीका करत शिवसेनेचे जालना उपजिल्हाप्रमुख धनंजय पोहेकर यांनी जरांगे यांच्या तोंडाला काळं फासणार असल्याचा इशारा दिला आहे. मनोज जरांगे यांनी मोठा फटका फोडण्याची भाषा केली होती, मात्र त्यांनी फुसका फटाका टाकला, अशी टीका पोहेकर यांनी केली. एकनाथ शिंदे आणि श्रीकांत शिंदे यांना बदनाम करण्याची सुपारी जरांगे यांनी घेतली आहे, असा आरोपही त्यांनी केला. सर्व मराठा समाज एकनाथ शिंदे यांच्या पाठीशी असल्याचा दावाही धनंजय पोहेकर यांनी केला आहे.

शिंदे यांना तू बदनाम करायच्या सुपार्‍या घेतल्यास....

शिवसेनेचे जालना उपजिल्हाप्रमुख धनंजय पोहेकर यांनी म्हटलं की, मनोज जरांगे, काल पत्रकार परिषदेमध्ये म्हणाला, मोठा बॉम्ब फोडणार आहे. अरे मनोज जरांगे, तू बॉम्ब तर नाही फोडला, पण लवंगी फटाक्यात किंवा सारखा असा फुसका, लवंगी फटाक्यासारखं टाकून दिलं, पण त्याच्यात पुरावे दाखव मनोज जरांगे, पण तुझ्या तोंडाला काळं फसणार आहे शिवसैनिक जालना जिल्ह्याचा, एवढं लक्षात ठेव. तू वरूनही तितकाच काळा आहे, आणि आतून सुध्दा तितकाच काळा आहे. एकनाथ शिंदे यांना आणि श्रीकांत शिंदे यांना तू बदनाम करायच्या सुपार्‍या घेतल्यास आणि ती कोणी दिली, ती लवकरच आम्ही उघड आणणार आहे. पण एकनाथ शिंदे आणि श्रीकांत शिंदे याच्या पाठीशी मराठा समाज आहे, सर्व मराठा समाज एकनाथ शिंदे आणि श्रीकांत शिंदे यांच्या सोबत आहोत, तेही 96 कोळी तुझ्यासारखे डुप्लिकेट नाही, पाटील नाव लावू नको, तू पाटील नाहीस, तू पाटील नाव लावू नको, तू 96 कुळी नाहीस, एकनाथ शिंदे आणि श्रीकांत शिंदे हे 96 कुळी आहेत, असंही पोहेकर यांनी म्हटलं आहे.

अडीच वर्षानंतर हे संभाषण बाहेर येण्यामागील हेतू काय आहेत

मनोज जरांगेंनी काल पत्रकार परिषदेत ऐकवलेल्या ऑडिओ क्लीपवरती प्रतिक्रिया देताना मुख्यमंत्री देवेंद्र फडणवीसांनी म्हटलं की, काल अतिशय स्पष्टपणे सांगितलं आहे, जी काही क्लीप समोर आली आहे, संभाषण समोर आले आहे. त्याची पूर्णपणे फॉरेन्सिक तपासणी होईल, आश्वासन दिलं आहे. आम्हाला सगळ्यांनाच हा प्रश्न पडला आहे, अडीच वर्षानंतर हे संभाषण बाहेर येण्यामागील हेतू काय आहेत. कोणाला कशासाठी टार्गेट केलं जात आहे. निश्चितपणे याच्या चौकशीची मागणी मनोज जरांगे यांनी केली आहे, चौकशीची मागणी केली आहे, शिवसेनच्या शिष्टमंडळाने मागणी केली आहे. यातील सत्य बाहेर काढू असंही पुढे फडणवीसांनी म्हटलं आहे.

जरांगे पाटील सुपारीबाज, पवार साहेबांनी काय दिलं? गर्दी दाखवा, कंत्राट मिळवा हाच धंदा, अजय बारस्करांचा हल्लाबोल

अभिषेक मुठाळ — Wed, 21 Oct 2026 16:57:33 +0530

Ajay Baraskar on Manoj Jarange Patil : मनोज जरांगे पाटील ( Manoj Jarange Patil) हे सुपारीबाज आहेत. पहिले त्यांनी बारामतीची सुपारी घेतली होती. राजेश टोपे आणि पवार साहेबांनी काय दिलं? असा सवाल करत अजय बारस्कर (Ajay Baraskar ) यांनी जरांगेवर टीका केली. नंतर दुसऱ्याची नंतर तिसऱ्याची सुपारी असं सुरु आहे. मराठा समाज 100 टक्के आरक्षणात गेलाय असं जरांगे बोलले, उपोषण बंद, मोर्चे बंद केली. मराठा समाजाने आत्महत्या केल्या जरांगेमुळं, आरक्षण नाही असा फेक नॅरेटिव्ह जरांगेने केल्याचे बारस्कर म्हणाले. एसईबीसीच्या 10 टक्केचं काय करायचे ओबीसीमध्ये जर सगळे मराठे गेले तर असेही ते म्हणाले.

जरांगेला सगळे कंत्राट मॅनेज करुन दिले होते. 500 ते 900 कोटींचे कंत्राट तयार केले होते. एकाच माणसाला कंत्राट दिले जाईल असे कंत्राट तयार केलेत. पाटोद्याचे उपोषण सोडताना एका रुममध्ये बंद खोलीत विखे, पलांडे आणि जरांगे काय करत होते? असा सवाल बारस्कर यांनी केला. आंदोलनातून कंत्राटं चालतात, आम्ही हे चालू देणार नाही. सगळं डुप्लिकेट केलं, आणि कंत्राटं दिली आहेत असेही ते म्हणाले. विखे पाटील यांनी उद्ध्वस्त केलं असं जरांगे बोलले होते. आदल्या दिवशी शिव्या आणि दुसऱ्या दिवशी माफ करा, आधी बोलतो वाटोळं केलं आणि आता प्रेम करा बोलतो असे बारस्कर म्हणाले.

500 कोटी तुझ्या नावावर घेतले तर आधी का नाही बोलला?

500 कोटी तुझ्या नावावर घेतले तर आधी का नाही बोलला? असा सवाल बारस्कर यांनी केला. आधी का नाही उचकवलं तोंड, उत्तरं दे जमिनी कुठून आणल्या. भाजप नेत्यांनी दिलं बोलतो, जिरवण्यासाठी सगळं सुरु आहे. मी वकिलीचा विद्यार्थी आहे, प्रश्न असा असतो की समोरचा अडचणीत येणार. तुमची बायको तुम्हाला मारत होती, आता हाणते की नाही सांग. तसाच हा प्रश्न आहे, भाजपच्या नेत्याने शिंदेंना पैसे दिले, मग ते तुला दिले सगळं हास्यास्पद असल्याचे ते म्हणाले. मंत्र्याचा पुरावा दे, तुझी आणि नगरच्या मंत्र्यांची कुजबुज दाखव असेही ते म्हणाले.

नागात जसं विष असतं, तसंच याच्यात विष आहे

2029 ला पाडणार बोलतो. आरे पण आणणार कोणाला? असा सवाल बारस्करांनी केला. उद्या जरांगेंनी व्हीडिओ लावावे, बाकी काही लावू नये असेही ते म्हणाले. जरांगेची सवय आहे, नागात जसं विष असतं, तसंच याच्यात विष आहे. एकनाथ शिंदे यांचे कौतुक करत होता की नाही हे सांगावं. हे सगळं सुपारी प्रकरण आहे, यापुढे काही बोलू शकत नाही. काल दोन चांगल्या गोष्टी केल्या, एक रडला नाही आणि दुसरं शिव्या दिल्या नाहीत. कायद्याचे राज्य आहे, संविधानाचे राज्य आहे. जरांगे यांचा भंपकपणा आहे. मराठवाड्यातील पोरांना सांगावं, पुतण्याने जमीन घेतली ती कशी, सांगायला तोंड नाही त्यामुळे तो गप्प आहे असेही ते म्हणाले.

तुझ्या पुतण्याच्या नावावर इतकी जमीन कशी? कुठून आल पैसे?

जरांगे फक्त सनसनाटी आरोप करतात. याआधी देखील आरोप केलेत, शंभूराज देसाई आल्यावर 100 कोटी माझ्या नावावर कोणी खाल्ले असे बोलले होते. आता कुठे गेले ते 100 कोटी. मुख्यमंत्री आणि गृहमंत्री विष देऊन मारणार असे आरोप केले होते. फक्त सनसनाटी आरोप करत डायव्हर्जन करत आहे जरांगे असे बारस्कर म्हणाले. मी काही कानातली कुजबुज नाही सांगितली. जलसंपदा खात्याचे कंत्राट तुझ्या जवळ असलेला गलांड्या त्याला दिले याचे पुरावे मी दिले होते. मराठा समाजाला विकून मोठे होऊ नका. तुझ्या पुतण्याच्या नावावर इतकी जमीन कशी? सांगा उत्तर द्या कुठून आणले पैसे? करोडो रुपयांच्या जमिनी घेतल्या. उत्तरं द्या ना असेही बारस्कर म्हणाले.

जरांगेंचा धंदा गर्दी दाखवा, कंत्राट मिळवा असा आहे.

फॉर्म्युला द्या ना. दुष्काळात मराठवाडा होरपळत असताना करोडोच्या जमिनी कशा घेतल्या? 21 वर्षांचा पुतण्या जमिनी घेतो. तुमचे लेकरं बाळं काय करत आहेत? मराठ्यांच्या पोरांचे भांडवल करतो असेही जरांगे म्हणाले. दोन वर्षांपूर्वी बोलला होता मंत्र्यांच्या कॉल रेकॉर्डिंग आहेत. ही पत्रकार परिषद दीड वर्षांची आहे, काॅल रेकॉर्डिंग आहे का नाही काढली ब्लॅकमेल करत होता का? असा सवाल बारस्करांनी केला. ओ ब्लॅकमेलर तू समाजाला फसवलं आहे. जरांगेंची लाभार्थी टोळी आहे, धनंजय दुफाके बघा, खेटून आहे जरांगेला बघा. दुफाके याच्या बहिणीने करोडो रुपयांची जमीन 23 लाख रुपये एकर घेतली आहे. 5 हेक्टर जमीन, दुफाकेच्या नातेवाईकांच्या नावावर जाते. येतात कुठून पैसे? असा सवालही त्यांनी उपस्थित केला. जरांगेंचा धंदा गर्दी दाखवा, कंत्राट मिळवा असा आहे.

जरांगे गर्दी गोळा करायला तू अनेक आमदारांच्या पाया पडला

जरांगे गर्दी गोळा करायला तू अनेक आमदारांच्या पाया पडला. गर्दी गोळा केलेली ती तुझी इज्जत वाचवण्यासाठी नाही शेवट आलेला आहे. मोबाइल क्रमांकाने लोकांचे भले होणार आहे का? असा सवालही त्यांनी केला. किती लबाडी करणार आहेस जरांगे. जरांगे तुझी लढाई कशासाठी होती? ओबीसी आरक्षणाचे काय झालं? 100 टक्के आरक्षण मिळालं बोलतो, तू जन्माला यायच्या आधी काय चाललं होतं? असा सवाल बारस्करांनी केला. हेच, नोंदी असेल तो ओबीसी नसेल तो एसईबीसी. 350 गोरगरीबांना पैसे वाट ना, आरक्षणाची लढाई विकली तू, जमिनी घेतल्या, मराठा समाजाला विकला तू असेही ते म्हणाले. मनोज जरांगे चालबाज माणूस आहे, शेतकरी संघटनांच्या लोकांना सोबत घेणार आणि आंदोलन करणार बोलत आहेत. 350 लोकं मारली ना तू, आरक्षणाचा मुद्दा संपला ना. जे कमावले आहे ना ते जिरवण्यासाठी सगळं चाललं आहे असेही ते म्हणाले.

Manoj Jarange On Eknath Shinde : एकनाथ शिंदेंवर 500 कोटी घेतल्याचा आरोप, जरांगे पाटील पुरावा देणार

abp majha web team — Wed, 21 Oct 2026 14:56:56 +0530

Manoj Jarange On Eknath Shinde : एकनाथ शिंदेंवर 500 कोटी घेतल्याचा आरोप, जरांगे पाटील पुरावा देणार

काल शिवसेनेच्या दसरा मेळाव्यात शिंदे सेनेच्या सर्व प्रमुख नेत्यांनी मनोज जरांगे पाटील यांना लक्ष्य केले होते. यामध्ये रामदास कदम आघाडीवर होते. रामदास कदम यांनी मनोज जरांगे यांची औकात काढत पुन्हा एकनाथ शिंदेंविरोधात बोलू नये, असा सज्जड दम भरला होता. यावर बोलताना मनोज जरांगे यांनी रामदास कदम यांना उल्लेख 'थोरली बेगम' असा केला. मी तुमच्याकडे एका साध्या प्रश्नाचे उत्तर मागितले. मात्र, तुम्ही चिडताय, बावचळून गेला आहात. तुम्ही मला 500 कोटी रुपये दिले का, याबाबत हा किंवा नाही म्हणा. भाजप तुम्हाला संपवतंय की तुम्ही मला संपवताय , या शब्दाचा अर्थ तुम्हाला कळाला पाहिजे, थोरल्या बेगमला हे कळालं पाहिजे. थोरली बेगम बोलली ना काल, अशा शब्दांत मनोज जरांगे यांनी रामदास कदम यांची खिल्ली उडवली.

रामदास कदम म्हणतात माझ्या संपत्तीची चौकशी करा. त्यांनी पक्षासाठी खूप काही केले आहे, खस्ता खाल्ल्या आहेत, हे मी ऐकून आहे. तुम्ही उगाच चिडचिड करु नका. थोरल्या बेगमला शेवटी चोमडेपणा करावा लागला. पण तुम्ही चिडचिड करण्यापेक्षा मी काय बोललो हे समजून घ्या. मला औकात आहे का, मला स्वाभिमान आहे का नाही याबद्दल बोलण्यापेक्षा मराठ्यांच्या प्रश्नांबद्दल बोलावे. एकनाथ शिंदे यांच्याविषयी स्वाभिमान नसता तर मराठ्यांनी त्यांना एवढ्या उंचीवर नेले नसते. मी साधा प्रश्न विचारला आहे की, मला श्रीकांत शिंदे यांच्याकरवी 500 कोटी रुपये दिले का, फक्त त्याचं उत्तर द्या. मी वाट बघतोय शिंदे साहेब काय बोलतात. थोड्या दिवसांत कळेलच की आपण बोलण्याआधी विचार करायला हवा होता, असे मनोज जरांगे पाटील यांनी म्हटले.

Ramdas Kadam and Manoj Jarange: बाथरुममध्ये जाऊन खातो, कोण आहेस रे तू; रामदास कदम खोलात गेले, मनोज जरांगे म्हणाले, अरे थोरली बेगम...

रवी मुंडे, एबीपी माझा — Wed, 21 Oct 2026 12:35:40 +0530

Ramdas Kadam and Manoj Jarange: श्रीकांत शिंदे यांच्याकरवी मला 500 कोटी रुपये देण्यात आले, ही गोष्ट खरी आहे का, याबाबत एकनाथ शिंदे यांनी स्पष्टीकरण द्यावे. मी श्रीकांत शिंदे (Shrikant Shinde) यांच्याकडून 500 कोटी घेतले का, या प्रश्नाचे हो किंवा नाही इतकेच उत्तर द्या. माझा प्रश्न साधा आहे. तुम्ही 500 कोटी मला दिले का, शिंदे साहेबांनी याचे उत्तर द्यावे. त्यांनीच सांगितलं ना भाजपला, मी मनोज जरांगे (Manoj Jarange Patil) यांना 500 कोटी दिले. कारण भाजपच्या वरिष्ठ नेत्यांना तसे सांगण्याइतकी श्रीकांत शिंदे यांची उंची नाही. त्यामुळे ही गोष्ट एकनाथ शिंदे (Eknath Shinde) यांनीच भाजपला सांगितली असावी. ही गोष्ट खरी आहे किंवा नाही, एवढेच एकनाथ शिंदे यांनी सांगावे, असे मनोज जरांगे पाटील यांनी म्हटले. ते बुधवारी जालन्यात आयोजित करण्यात आलेल्या पत्रकार परिषदेत बोलत होते. (Maharashtra Politics)

Manoj Jarange Patil: भाजपच्या बड्या नेत्यांमध्ये कुजबूज, ते शुद्ध हिंदी आणि मराठी बोलतात: मनोज जरांगे पाटील

भाजपचे खूप मोठे नेते याबाबत बोलत आहेत. यामध्ये काही महिला आहेत, त्या खूप शुद्ध हिंदी बोलतात, बाकीचे महाराष्ट्रातील असावेत. मला काय माहिती हे मोठे लोक आपल्याला ओळखतात. ते इतकी शुद्ध भयानक मराठी बोलतात की, ते सगळा मराठी शब्दकोश व्याकरणासहित हाताळू शकतात. इतके ते शुद्ध बोलतात. आम्ही एकनाथ शिंदे यांना जाब का विचारु नये. आम्ही तुमच्यासाठी खस्ता खाल्ल्यात, तुम्हाला डोक्यावर घेतले होते. मग तुम्ही आमच्या प्रश्नांची उत्तरं का देऊ नयेत. एकनाथ शिंदे यांनी श्रीकांत शिंदे यांच्याकरवी मला 500 कोटी रुपये दिले का, हे सांगावे. का त्यांनी भाजपकडून पैसे घेतले आणि आम्हाला दिले नाहीत, हे स्पष्ट करावे, असे आव्हान मनोज जरांगे पाटील यांनी एकनाथ शिंदे यांना दिले.

आणखी वाचा

Ramdas Kadam and Manoj Jarange: उपोषणाला बसल्यावर बाथरुममध्ये जाऊन गुपचूप खातोस, तुझी औकात काय? रामदास कदमांची मनोज जरांगेंवर जहरी टीका

Ramdas Kadam and Manoj Jarange: उपोषणाला बसल्यावर बाथरुममध्ये जाऊन गुपचूप खातोस, तुझी औकात काय? रामदास कदमांची मनोज जरांगेंवर जहरी टीका

रोहित धामणस्कर — Wed, 21 Oct 2026 11:22:31 +0530

Ramdas Kadam and Manoj Jarange: गेल्या काही दिवसांमध्ये मराठा आरक्षणाच्या मुद्द्यावरुन एकनाथ शिंदे यांच्यावर विखारी टीका करणारे मराठा आंदोलक मनोज जरांगे पाटील (Manoj Jarange Patil) यांचा शिवसेनेच्या नेत्यांनी मंगळवारी मुंबईत पार पडलेल्या दसरा मेळाव्यात समाचार घेतला. शिंदे सेनेचे ज्येष्ठ नेते रामदास कदम (Ramdas Kadam) यांनी मनोज जरांगे यांना थेट अंगावर घेत त्यांच्यावर अगदी सडकून टीका केली. मनोज जरांगे पाटील तू सुपारी घेऊन एकनाथ शिंदे यांच्यावर टीका करतोस. तुझी औकात काय आहे, असा सवालच रामदास कदम यांनी उपस्थित केला. (Maharashtra Politics news)

मनोज जरांगे तू उपोषणाला बसल्यावर बाथरुममध्ये जाऊन गुपचूप खातोस, सगळ्यांना फसवतोस. शिंदे साहेब माझी विनंती आहे, लावा त्याची चौकशी. तू कोणाची बदनामी करतोयस, कोणाची सुपारी घेऊन बोलतोयस? तुझी औकात काय आहे? मराठा समाजाने तुला त्यांना न्याय देण्यासाठी पाठिंबा दिला. त्याचा तू गैरफायदा घेतो काय? ज्या गावात मनोज जरांगे यांचं उपोषण सुरु होतं, त्या गाववल्यांनी त्याला हाकलून दिले आहे, अशी घणाघाती टीका रामदास कदम यांनी केली.

एक गोष्ट मी आपणाला सांगतो, तुम्ही एकनाथ शिंदे साहेबांना उद्ध्वस्त करायला जाल तर तर हा मराठा समाज तुला उद्ध्वस्त केल्याशिवाय राहणार नाही, हे सांगायला इथे आलो आहे. अरे कोण आहेस तू कोण आहेस? हा मराठ्यांचा नेता झाल्यापासून याची संपत्ती कुठे आहे, कुणाकुणाच्या नावावर आहे, कुठल्या नातेवाईकांच्या नावावर आहे, लावा चौकशी याची. एकदा दूध का दूध, पाणी का पाणी होऊन जाऊ द्या, असे रामदास कदम यांनी म्हटले.

Shivsena Dasara Melava: एकनाथ शिंदे आमचं दैवत, त्यांच्याबद्दल काहीबाही बोललेलं खपवून घेणार नाही: रामदास कदम

एक मराठा समाजाचा माणूस महाराष्ट्र ढवळून काढतोय, मराठा समाजाला न्याय देतोय, दहा टक्के आरक्षण मराठ्यांना एकनाथ शिंदेंनी दिलं. बेईमान माणसा तू कोणावर बोलतोय, याद राख एकनाथ शिंदे साहेबांवर बोलशील, 500 कोटींचा आरोप करतोस, बाप दाखव नाही तर श्राद्ध घाल. तू कोणाला बदनाम करतोस, कोणाची सुपारी घेऊन? एकनाथ शिंदे आमचं दैवत आहे. शिवसैनिकांचं दैवत आहे, मराठा समाजाचं दैवत आहे. त्यांच्याबाबत बोलशील तर महाराष्ट्र खपवून घेणार नाही, मराठा समाज खपवून घेणार नाही. अरे जरांग्या तुला माहिती आहे का मराठा समाजाचा पहिला मेळावा संभाजीनगरला कुणी काढला होता, तेव्हा कुठे झोपला होतास, अशी टीका रामदास कदम यांनी केली.

पंतप्रधान, मुख्यमंत्री, एकनाथ शिंदेंना एकेरी बोलणार अरे तू आहेस कोण? जगाचा मालक आहेस? ही मराठा समाजाची संस्कृती आहे का? समाजानं तुला समाजाला न्याय देण्यासाठी पाठिंबा दिला, त्याचा गैरफायदा घेतो का तू, ज्या गावात उपोषण होतं, त्या गावानं त्याला हाकून दिला आहे. शिंदे, कदम, भोसले हे मराठा आहेत, लाचार नाहीत तुझ्यासारखे. याद राख एकनाथ शिंदे दोन दोन हातानं देणारे आहेत, घेणारे नाहीत. सुपारी घेऊन त्यांना बदनाम करायला निघालास का? यापुढे गाठ मराठा समाजाशी आहे, शिवसैनिकांशी गाठ आहे हे सांगायला इथं आलो आहे, असेही रामदास कदम यांनी म्हटले.

आणखी वाचा

एकनाथ शिंदे हेच मुख्यमंत्रीपदाचे दावेदार होते, पण काय झालं माहित नाही, दसरा मेळाव्यात रामदास कदमांचं मोठं वक्तव्य, उद्धव ठाकरेंसह जरांगे पाटलांचाही घेतला समाचार

मी पुरावे द्यायला तयार, काय ते एकनाथ शिंदेंनी उत्तर द्यावं; 500 कोटींच्या देवाण-घेवाणीवर जरांगे पाटलांचा पुनरुच्चार

रवी मुंडे, एबीपी माझा — Tue, 20 Oct 2026 17:57:34 +0530

मुंबई : माझ्याकडे पुरावे आहेत मी पुराव्या शिवाय बोलत नाही, असे म्हणत मनोज जरांगे पाटील (Manoj Jarange) यांनी दसरा मेळाव्यातून केलेल्या आरोपावर आपण ठाम असल्याचा पुनरुच्चार केला. मी कसली टीका टिपणी केली नाही, शिंदे साहेबांनी (Eknath Shinde) काय असेल ते सत्य सांगावं. भाजपकडून माझ्या नावाने त्यांनी पैसे घेतले आहेत का? घेतले असतील तर मला दिले आहेत का? त्यांनी हा किंवा नाही काय ते सांगावं नाहीतर मी पुरावा द्यायला तयार आहे, असे म्हणत जरांगे पाटील यांनी पत्रकारांशी बोलताना पुन्हा एकदा 500 कोटी रुपयांच्या देवाण-घेवाणीबद्दल स्पष्टीकरण मागितलं आहे.

मनोज जरांगे पाटील यांनी नारायणगडावरील दसरा मेळाव्यातून उपमुख्यमंत्री एकनाथ शिंदे यांचे नाव घेत 500 कोटी रुपयांची देवाण घेवाण झाल्याचा आरोप केला. एकनाथ शिंदेसाहेब तुम्ही दिल्लीत भाजपच्या लोकांना माझ्याबद्दल खोटं सांगितलं. कारण, मनोज जरांगे पाटलांना श्रीकांत शिंदे यांच्या माध्यमातून 500 कोटी पोहोचले आहेत, असं तुम्ही भाजपच्या नेत्यांना बोलले का? असा सवाल मनोज जरांगे यांनी मेळाव्यातून उपस्थित केला. तसेच, एकनाथ शिंदे यांनी आजच्या दसऱ्या मेळाव्यात किंवा उद्या संध्याकाळपर्यंत शिंदेंनी उत्तर द्यावं, असेही त्यांनी म्हटले. त्यानंतर, शिवसेना पक्षातील वरिष्ठ नेते यावर प्रतिक्रिया देत आहेत.

भाजप शिंदे साहेबांना संपवत आहेत की शिंदे साहेब मला संपवत आहेत हे क्लिअर होणे गरजेचे आहे. शिंदे साहेबांनी बोलावं, त्यांच्या पोराचं नाव मध्ये आहे, असे म्हणत जरांगे पाटील यांनी 500 कोटींच्या आरोपाचे आपण पुरावे द्यायला तयार आहे, असेही म्हटले. मला कच्च समजता का, राज्यात काही पण होऊ शकतं. माझ्याकडल्या पुरावांमध्ये सगळं आहे. आजच्या शिवसेनेच्या दसरा मेळाव्यात शिंदे साहेबांनी सांगावं, नसेल तर उद्या संध्याकाळपर्यंत सांगावं, असं आव्हानच जरांगे पाटील यांनी एकनाथ शिंदेंना दिलंय.

भाजपमध्ये तशी चर्चा आहे - पाटील

जरांगे पाटलाला श्रीकांत शिंदे यांनी 500 कोटी रुपये दिले अशी भाजपमध्ये चर्चा आहे, त्यामध्ये दिल्लीचे आणि महाराष्ट्राचे लोक आहेत जे म्हणत आहेत. त्यामुळे, माझं विचारणं काम आहे, शिंदे साहेब तुम्ही माझ्या नावाने भाजपकडून पैसे आणलेत का? मला उपोषणाच्या नव्या दिवशी हे कळलं. तेवढे पैसे दिले असते तर मी मराठ्यांची 40 हजार पोरं तरी कमीत कमी सुधारले असती, असे म्हणत जरांगे पाटील यांनी पुरावे देण्याची तयारी दर्शवली आहे.

काहींना शिवसेना भाजपमध्ये तेढ निर्माण करायचंय - कदम

दरम्यान, जरांगे पाटील यांच्या आरोपावर शिवसेना नेते रामदास कदम आणि सचिन अहिर यांनी प्रतिक्रिया दिली आहे. जरांगे पाटील यांनी हे मनात ठेवलं नाही याबाबत मी त्यांचे आभार मानतो, ते उघडपणे आणि स्पष्टपणे बोललेत. त्यामुळे अधिक स्पष्टता येईल, शिंदे साहेबांना देखील कळेल ही कोण माणसं आहेत. काही लोकांना शिवसेना भाजपमध्ये तेढ निर्माण करायचे आहे काय? असा सवाल रामदास कदम यांनी उपस्थित केला. तसेच, आज जे आंदोलन करायला युतीच्यासमोर उतरले आहेत, त्यांना आमच्या दोघांमध्ये भांडणं लावून द्यायची आहेत. पण तसं होणार नाही. त्यामुळं मनोज जरांगे यांनी कोणावर किती विश्वास ठेवायचा हा प्रश्न आहे, असंही रामदास कदम यांनी म्हटलं.

जरांगे पाटलांचा बोलवता धनी कोण?

यंदाचा दसरा मेळावा उत्साहात साजरा न करता शिवसेना पक्षाकडून साधेपणाने साजरा करुन शेतकऱ्यांना मदत करण्यात येत आहे. ⁠जरांगे पाटील हे मराठा समाजाचे नेतृत्व करत असताना अचानक आरोप का करू लागले आहेत? असा सवाल विधानपरिषद उपसभापति सचिन अहिर यांनी उपस्थित केला. तसेच, ⁠असे आरोप करून काय मिळणार आहे? एवढे दिवस मग का गप्प बसले होते, ⁠ही कटुता निर्माण करायची, लोकांचे लक्ष वेधण्यासाठी हे केलंय की यांचा बोलवता धनी कोण? हे पहावे लागेल, असेही सचिन अहिर यांनी म्हटले. एकनाथ ⁠शिंदे यांनी मुख्यमंत्री असताना मराठा समाजाला भरभरून दिलं आहे. ⁠मात्र, सनसनाटी निर्माण करण्यासाठी जरांगे पाटील यांना राजकीय बोल बोलणं योग्य नाही, त्यांचा आम्ही धिक्कार करतो, अशी प्रतिक्रिया सचिन अहिर यांनी जरांगे पाटील यांनी केलेल्या आरोपांवर दिली आहे.

हेही वाचा

शिंदेसाहेब तुम्ही मला 500 कोटी दिलेत का? मनोज जरांगेंचा सवाल; तुम्हाला कोणी संपवत नाही, रामदास कदम यांचं प्रत्युत्तर