मका काढण्याच्या मशीनमध्ये अडकून शेतकऱ्याचा दुर्दैवी मृत्यू, तीन मुलांचं पितृछत्र हरपलं, जळगावच्या जामनेर तालुक्यातील घटना

Jalgaon Accident News: भीषण अपघातात! जळगाव–भुसावळ महामार्गावर नशिराबादमध्ये दोन ट्रकची समोरासमोर धडक; केबिनमध्ये तासभर अडकलेल्या चालकाचा दुदैवी अंत ठार, दुसरा गंभीर

चंद्रशेखर नेवे, एबीपी माझा — Fri, 30 Oct 2026 11:06:48 +0530

Jalgaon Accident News: जळगाव–भुसावळ महामार्गावर (Jalgaon–Bhusawal highway Accident) नशिराबादजवळील मकरा फटाक्यांसमोर मध्यराञी दोन ट्रकची समोरा-समोर भीषण धडक (Accident News) झालीय. या भीषण अपघातात सोयाबीन वाहतूक करणाऱ्या ट्रकचा चालक रमेश यादव यांचा मृत्यू झाला, तर दुसऱ्या ट्रकचा चालक गंभीर जखमी झाला आहे. अपघातानंतर रमेश यादव हे ट्रकच्या केबिनमध्ये तब्बल एक तास अडकून पडले होते. त्यांना बाहेर काढण्यासाठी शर्थीचे प्रयत्न करण्यात आले, मात्र रुग्णालयात दाखल केल्यानंतर त्यांना मृत घोषित करण्यात आले. या घटनेमुळे परिसरात हळहळ व्यक्त होत आहे. घटनेची माहिती मिळताच पोलिसांचं पथक घटनास्थळी दाखल होऊन त्यांनी पुढील कारवाई सुरु केली आहे.

Jalgaon Accident News: ट्रक केबिनमध्ये चालकाला बाहेर काढण्यासाठी शर्तीचे प्रयत्न, पण...

मिळालेल्या माहितीनुसार, ट्रक क्रमांक MH 40 BG 6287 हा सोयाबीन घेऊन गुजरातहून नागपूरच्या दिशेने जात होता. रात्री अकरा वाजेच्या सुमारास नशिराबादजवळील मकरा फटाक्यांसमोर या ट्रकची समोरून येणाऱ्या दुसऱ्या ट्रकशी जोरदार धडक झाली. दुसरा ट्रक दीपनगर येथून राख भरून नाशिकच्या दिशेने जात असल्याची माहिती आहे. हा ट्रक मुक्तचर अली (रा. मध्य प्रदेश) चालवत असल्याचे सांगण्यात आले आहे. या धडकेत सोयाबीन वाहतूक करणाऱ्या ट्रकचा चालक रमेश यादव केबिनमध्ये अडकले. अपघाताची माहिती मिळताच घटनास्थळी नागरिकांनी धाव घेतली. ट्रकच्या केबिनमध्ये अडकलेल्या चालकाला बाहेर काढण्यासाठी बचावकार्य सुरू करण्यात आले. अखेर क्रेनच्या सहाय्याने ट्रक ओढून आणि हलवून तब्बल एक तासाच्या प्रयत्नांनंतर रमेश यादव यांना बाहेर काढण्यात यश आले. गंभीर जखमी अवस्थेत त्यांना जळगाव जिल्हा सामान्य रुग्णालयात उपचारासाठी दाखल करण्यात आले. मात्र, डॉक्टरांनी त्यांना मृत घोषित केलं.

Malegaon News : पिकअप वाहनाची दुचाकीला धडक, अपघातात पती पत्नी आणि 18 वर्षीय मुलीचा मृत्यू

मालेगाव तालुक्यातील मालेगाव- कुसुंबा रोडवर टिंगरी वणपट फाट्याजवळ पिकअपने दुचाकीला जोरदार धडक दिली. या अपघातात दुचाकीवरील पती-पत्नी आणि मुलीचा दुर्दैवी मृत्यू झाला. घटनेचे गांभीर्य लक्षात घेता मंत्री दादा भुसे यांनी रुग्णालयात धाव घेतली. यात धुळे चिंचगाव येथील राहणारे राजेद्र नाना माने, त्यांची पत्नी बालाबाई व मुलगी भठाबाई यांचा जागीच मृत्यू झाला. मयत तिघांचे मालेगाव सामान्य रुग्णालयात शवविच्छेद करण्यात आले. नांदगाव येथे कार्यक्रमासाठी गेलेले असतांना तिकडून परतत असताना हा अपघात घडला. एकाचवेळी कुटुंबातील पती - पत्नी आणि मुलीचा अपघातात मृत्यू झाल्याने सर्वत्र हळहळ व्यक्त केली जात आहे.

Navnath ban and Nilesh Rane: तुझी लायकी किती तू बोलतो किती! नवनाथ बन शिंदे साहेबांवर बोलताना लायकीत राहायचं: निलेश राणे

वीजेचा धक्का लागून शिवसेना विभागप्रमुखाचा मृत्यू; नातेवाईकांसह शिवसेना कार्यकर्त्यांची रुग्णालयात गर्दी

चंद्रशेखर नेवे, एबीपी माझा — Wed, 28 Oct 2026 14:59:10 +0530

जळगाव : शहरातील पिंप्राळा परिसरात घरात इलेक्ट्रिक फिटिंगचे काम सुरू असताना विजेचा जोरदार धक्का लागून खासगी वायरमन योगेश उर्फ भैय्या वाघ (Yogesh wagh) यांचा मृत्यू झाला. घटनेनंतर त्यांना जळगाव (Jalgaon) शासकीय वैद्यकीय महाविद्यालय व रुग्णालयात दाखल करण्यात आले. मात्र, डॉक्टरांनी त्यांना मृत घोषित केले. योगेश वाघ हे शिवसेना ठाकरे गटाचे पिंप्राळा भागाचे विभागप्रमुख असल्याने त्यांच्या मृत्यूची बातमी समजताच नातेवाईकांसह शिवसैनिकांनी रुग्णालयात गर्दी केली.

सकाळी नेहमीप्रमाणे कामावर गेलेल्या भैय्या वाघ यांच्या मृत्यूची बातमी दुपारी समजल्याने कुटुंबीयांसह स्थानिक शिवसेना कार्यकर्त्यांनाही मोठा धक्का बसला आहे. शिवसेना ठाकरे गटाचे माजी महानगर अध्यक्ष गजानन मालपुरे यांनीही या घटनेवर दु:ख व्यक्त केलं आहे. विशेष म्हणजे, कालच भुसावळ येथेही शेतकरी दाम्पत्याचा मृत्यू झाल्याची दुर्घटना घडली आहे. घरात एकीकडे मुलीच्या साखरपुड्याची तयारी सुरू असतानाच दुसरीकडे आई-वडिलांचा वीजेच्या धक्क्याने मृत्यू झाल्याची घटना घडली. त्यानंतर, आज शिवसेना विभागप्रमुख योगेश वाघ यांचाही वीजेच्या धक्क्याने मृत्यू झाल्यामुळे सर्वत्र हळहळ व्यक्त होत
आहे.

पाळधी बायपासवर अपघातांची मालिका, एकाचा मृत्यू

जळगाव शहरालगतच्या पाळधी-तरसोद बायपासवरील अपघातांची मालिका सुरूच असून, आणखी एका तरुणाचा अपघाती मृत्यू झाला. पाळधी रेल्वे पुलावर आयशर मालवाहू वाहनाने दुचाकीला जोरदार धडक दिल्याने योगेश गजमल राक्षे यांचा मृत्यू झाला. बायपास धसल्यानंतर या मार्गावरील अपघातांत मृत्यू झालेल्यांची संख्या 13 वर पोहोचली आहे. योगेश हे आव्हाणे येथील खताच्या गोदामात मजुरीचे काम करीत होते. दुचाकीने घरी जात असताना पाळधी रेल्वे पुलावर समोरून येणाऱ्या आयशरने त्यांच्या दुचाकीला धडक दिली. गंभीर जखमी झालेल्या योगेश यांना शासकीय वैद्यकीय महाविद्यालयाच्या रुग्णालयात दाखल करण्यात आले; मात्र डॉक्टरांनी त्यांना मृत घोषित केले. दरम्यान, 30 जुलै रोजी आसोदा पुलाचा भराव धसल्यानंतर बायपासवरील वाहतूक बंद करण्यात आली होती. त्यामुळे अवजड वाहतूक शहरातून वळवण्यात आली. जुलैपासून आतापर्यंत 25 अपघातांत 13 जणांचा मृत्यू झाला आहे. योगेश यांचे तीन महिन्यांपूर्वीच लग्न झाले होते. त्यांच्या मृत्यूने राक्षे कुटुंबावर दुःखाचा डोंगर कोसळला आहे. पोलिसांनी आयशर वाहनचालक धर्मेंद्र प्रवीण सिंग गोयल याला ताब्यात घेतले.

हेही वाचा

मी प्रस्थापित गिळलाय, मराठवाडा पदवीधर मतदारसंघाचा निकाल, रिलस्टार रविराज साबळेंची प्रतिक्रिया, किती मतं?

घरी लेकीच्या साखरपुड्याची लगबग, आनंदोत्सवावर काळाचा घाला; वीजेचा धक्का लागून आई-वडिलांचा मृत्यू

चंद्रशेखर नेवे, एबीपी माझा — Tue, 27 Oct 2026 15:41:00 +0530

जळगाव: जिल्ह्यातील भुसावळ (Bhusawal) तालुक्यात मन हेलावणारी घटना घडली असून ज्या घरात काही दिवसांनी लेकीच्या साखरपुड्याची लगबग सुरू होणार होती, ज्या आई-वडिलांच्या डोळ्यांत मुलीच्या सुखी संसाराची स्वप्ने होती, त्याच घरावर नियतीने घाला घातला. घरातील आनंदाचे रूपांतर क्षणात दुःखात झाले. लेकीच्या साखरपुड्याची (Marriage) लगीनघाई सुरु असताना, अवघे काही दिवस शिल्लक असताना शेतात (Farmers) काम करताना विजेचा धक्का लागून पती-पत्नीचा दुर्दैवी मृत्यू झाला. भुसावळ तालुक्यातील सुसरी गाव शिवारात घडलेल्या या हृदयद्रावक घटनेने संपूर्ण परिसर सुन्न झाला आहे. अशोक बाबूराव पाटील (वय 55) आणि सरीता अशोक पाटील (वय 43) दोन्ह अशी मृत दाम्पत्याची नावे आहेत.

मिळालेल्या माहिती नुसार, अशोक पाटील आणि सरीता पाटील हे मजुरांसह सुसरी गावच्या शिवारातील गट क्रमांक १२८/१ मधील स्वतःच्या शेतात कामासाठी गेले होते. शेतात कांद्याची लागवड करण्यात आली होती. निंदणी आणि खुरपणीचे काम सुरू असताना शेतातील विद्युत खांबावरील तार तुटून गवतात पडून होती. या तारेचा स्पर्श अशोक पाटील यांना झाल्याने त्यांना विजेचा जोरदार धक्का बसला. पतीला विजेचा धक्का बसल्याचे लक्षात येताच त्यांना वाचविण्यासाठी पत्नी सरीता पाटील याही त्यांच्याजवळ गेल्या असता यांनाही विजेचा जोरदार धक्का बसल्याची नोंद फिर्यादीत आहे. या दुर्घटनेत दोघांनाही जोराचा वीजेचा धक्का बसल्याने शेजारील शेतात काम करणाऱ्या मजुरांनी तात्काळ मदतीसाठी धाव घेतली. दोघांनाही तातडीने वरणगाव ग्रामीण रुग्णालयात दाखल करण्यात आले. मात्र, वैद्यकीय अधिकाऱ्यांनी तपासणी केल्यानंतर दोघांनाही मृत घोषित केले.

साखरपुड्याच्या आनंदावर दुःखाचे सावट

अशोक पाटील यांच्या मुलीचा साखरपुडा येत्या 1 नोव्हेंबर रोजी होणार होता. लेकीच्या आयुष्यातील या महत्त्वाच्या क्षणासाठी आई-वडिलांनी अनेक स्वप्ने रंगविली असतील. मात्र, नियतीच्या एका आघाताने ही स्वप्ने अपूर्णच राहिली. ज्या हातांनी लेकीच्या डोक्यावर आशीर्वादाचा हात ठेवायचा होता, ती लेक क्षणात पोरकी झाल्याचं दु:ख मन हेलावून टाकणारं आहे. मृत दाम्पत्याच्या पश्चात दोन मुली, एक मुलगा आणि आई असा परिवार आहे. कुटुंबाचा आधार हरपल्याने पाटील कुटुंबावर दुःखाचा डोंगर कोसळला आहे.

दरम्यान, याप्रकरणी वरणगाव पोलिसांत नोंद करण्यात आली असून सहाय्यक पोलीस निरीक्षक अमितकुमार बागुल यांच्या मार्गदर्शनाखाली पोलीस कर्मचारी सुखराम सावकारे तपास करीत आहेत. विद्युत तार नेमकी कशामुळे खाली पडली, याचा तपास सुरू आहे. या घटनेने सुसरी गावासह परिसरात शोककळा पसरली आहे.

हेही वाचा

पूर्णेकरांच्या मुलाला पोलिसांनी पकडताच ठाकरे गट- मनसेचे नेते धावून गेले, नौपाडा पोलीस ठाण्यात हायव्होल्टेड ड्रामा

अजितदादा हे दिलदार नेते होते, गुलाब तुला माइकची गरज नाही असं नेहमी म्हणायचे, त्यांच्या निधनाने महाराष्ट्राची सर्वात मोठी हानी, गुलाबराव पाटलांनी दिला आठवणींना उजाळा

चंद्रशेखर नेवे, एबीपी माझा — Sun, 25 Oct 2026 20:50:50 +0530

Gulabrao Patil : इतना टूटा हु कि छुने से बिखर जाऊंगा, तुम अगर और दुवा देंगे तो मर जाऊंगा. फुल रह जायेंगे गुलजार मे यादों की नजर, मै तो खुशबू हू फिजाहो मे बिखर जाऊंगा. अशी शेरोशायरी सादर करत मंत्री गुलाबराव पाटील (Gulabrao Patil ) यांची दिवंगत उपमुख्यमंत्री अजित पवार यांना आदरांजली वाहिली. अजित पवार कायम माझ्या आवाजावर बोलायचे, विधानसभेत ते गुलाब तुला माइकची गरज नाही असं सांगायचे. काळाने कसे न्यावे, फक्त दोन मिनिटात, एक संधी देखील अजितदादांना दिली नाही, असे गुलाबराव पाटील म्हणाले. अजित पवार यांचे निधन हे केवळ पवार कुटुंबाचे नव्हे तर महाराष्ट्रातील सर्वात मोठी हानी असल्याचे पाटील म्हणाले. पाडळसरे धरणाला अजित पवारांचे नाव द्यावे, अशी मागणी देखील त्यांनी केली. जळगाव जिल्हा बँकेच्या आवारात अजित पवार यांच्या पुतळ्याचे अनावरण झाले. त्यावेळी ते बोलत होते.

अजितदादा दिलदार नेते होते, गुलाबराव पाटील यांना सांगितला कॅबिनेटमधील किस्सा

एकदा कॅबिनेटमध्ये बारामतीच्या विकास कामासाठी 300 कोटी रुपये मंजुरी बाबतचा विषय आला, त्यावेळी मला 40-45 कोटी रुपये द्यायला तुम्ही विरोध करतात असं मी अजितदादा यांना म्हणालो. त्यावर तुलाही पैसे देतो असे त्यांनी सांगितले. बारामतीच्या कामात मी नडल्यावर मलाही पैसे मिळाले, अजितदादा दिलदार नेते होते असेही पाटील म्हणाले.

निधीच्या बाबतीत अजितदादा शिस्तबद्ध आणि काटकसरी होते

दिवंगत उपमुख्यमंत्री अजित पवार यांचे निधन ही केवळ पवार कुटुंबीयांची हानी नाही तर महाराष्ट्राची सर्वात मोठी आणि आहे, अशा शब्दात मंत्री गुलाबराव पाटील यांनी अजित पवारांच्या आठवणींना उजाळा दिला. जळगाव जिल्हा बँकेचे आवारात अजित पवार यांच्या पुतळ्याचे अनावरण झाले. त्यावेळी ते बोलत होते. यावेळी मंत्री गुलाबराव पाटील यांनी अजित पवार यांच्यासोबत शेरोशायरी करत अनेक किस्से सांगत त्यांच्या आठवणींना उजाळा दिला. अजितदादा माझ्या आवाजावर कायम बोलायचे, तुला माइकची गरज नाही, असे ते विधानसभेत अनेकदा सांगायचे. तसेच निधीच्या बाबतीत अजितदादा किती शिस्तबद्ध, काटकसरी होते महाराष्ट्राच्या भल्यासाठी त्यांचे निर्णयासाठी याबाबतचा किस्सा देखील गुलाबराव पाटील यांनी सांगितला. नियतीने अजितदादा यांना एक संधी देखील दिली नाही, केवळ दोन मिनिटात मृत्यू यावा, तो देखील इतका दुर्दैवी अशा शब्दात त्यांनी दुःख व्यक्त केले.

गणेश नाईक म्हणाले राज्यात मोठी उलथापालथ होईल, गुलाबराव पाटील म्हणाले, उलथापालथ व्हायला भूकंप आहे काय, मी भाकिताला मानत नाही

चंद्रशेखर नेवे, एबीपी माझा — Sun, 25 Oct 2026 17:55:47 +0530

Gulabrao Patil : मनोज जरांगे पाटील यांनी व्हायरल केलेल्या ऑडिओ क्लिपनंतर विविध प्रतिक्रिया येत आहेत. राज्यात मोठी राजकीय उलथापालथ होईल, असे वक्तव्य भाजपचे नेते आणि मंत्री गणेश नाईक यांनी केले होते. यावर मंत्री गुलाबराव पाटील यांनी प्रतिक्रिया दिली आहे. उलथापालथ व्हायला काही तो भूकंप थोडीच आहे. जे व्हायचे असते ते ठरलेले असते आणि जे होईल ते आपण पाहूच असेही गुलबराव पाटील म्हणाले. कोणाच्या भविष्य सांगण्यावर किंवा भाकितावर काही होईल हे मानणारा मी माणूस नाही. जेव्हा सगळेजण मिळून सामूहिक निर्णय घेतात, तेव्हाच उलथापालथ होते.

2024 च्या निवडणुकीत मविआला सत्तेपासून दूर ठेवण्याचा कट रचला, नाना पटोलेंची टीका, गुलाबराव पाटील म्हणाले...

2024 च्या निवडणुकीत संध्याकाळी पाच वाजल्यानंतर मतदान वाढवून महाविकास आघाडीला सत्तेपासून दूर ठेवण्याचा कट रचला गेल्याचा आरोप काँग्रेसचे नेते नाना पटोले यांनी केला आहे. त्यांच्या या आरोपाला मंत्री गुलबाराव पाटील यांनी प्रत्युत्तर दिलं आहे. नानाभाऊंना हे आता तीन वर्षांनंतरच कसे काय सुचलं? असा सवाल गुलबराल पाटील यांनी केला. मला वाटते त्यांनी हे त्यावेळेसच बोलायला हवं होतं. आता केवळ नवीन मुद्दे तयार करण्यासाठी ही चाललेली धडपड असल्याची टीका पाटील यांनी केली.

दोन्ही राष्ट्रवादी एकत्र येण्याच्या चर्चेवर काय म्हणाले गुलाबराव पाटील?

मंत्री गुलाबराव पाटील यांना दोन्ही राष्ट्रवादी एकत्र आणि राष्ट्रवादीला अर्थखाते मिळणार असल्याच्या संदर्बात देखील वक्तव्य केले. तो माझा निर्णय नाही. सुनेत्राताई पवार आणि शरद पवार साहेब यांचा हा अंतर्गत विषय आहे. त्यांच्या पक्षाने काय निर्णय घ्यावा यावर मी बोलणे उचित ठरणार नाही. छगन भुजबळ काय म्हणाले किंवा अर्थखात्याबाबत काय चर्चा झाली, याबद्दल मला माहिती नाही. शेवटी तो त्यांचा निर्णय आहे असे मत गुलाबराव पाटील यांनी व्यक्त केले.

जळगाव जिल्हा बँक निवडणूक, बैठकीमध्ये जागेचा आणि वाटपाचा योग्य निर्णय घेतला जाईल

शिवसेनेचे माजी संपर्कप्रमुख निलेश पाटील यांनी राष्ट्रवादीत प्रवेश केला आहे, यावर देखील मंत्री गुलाबराव पाटील यांनी प्रतिक्रिया दिली आहे. चांगले आहे, ते शेवटी आमच्या मित्रपक्षातच गेले आहेत. त्यामुळे त्यांना शेवटी आमचाच प्रचार करायचा आहे असे गुलाबराव पाटील म्हणाले. जळगाव जिल्हा बँक निवडणूक महायुतीचा जागावाटपाचा फॉर्म्युला कसा असणार आहे? यावर बोलताना गुलाबराव पाटील म्हणाले की, महायुतीचे सर्व नेते एकत्र बसणार आहोत आणि त्या बैठकीमध्ये जागेचा आणि वाटपाचा योग्य निर्णय घेतला जाईल असे पाटील म्हणाले.

कर्जत-भीमाशंकर पट्ट्यातील टोरेंट प्रकल्पाला ग्रामस्थांचा विरोध, गुलाबराव पाटील म्हणाले, सरकार सुवर्णमध्य काढण्याचा प्रयत्न करेल

कर्जत-भीमाशंकर पट्ट्यातील टोरेंट प्रकल्पाला ग्रामस्थांचा विरोध आहे. याबाबत राज ठाकरेंची कर्जतमध्ये होणार सभा होणार आहे. यावर बोलताना गुलाबराव पाटील म्हणाले की, झाडे वाचली पाहिजेत आणि त्याचसोबत विकास प्रकल्पही झाले पाहिजेत. या दोघांमध्ये सुवर्णमध्य काढण्याचा प्रयत्न सरकार निश्चितपणे करेल असे पाटील म्हणाले.

गिरीश महाजन हे कुंभमेळ्याची दलाली खाण्यात मग्न, त्यांना जनतेचं काही देणघेणं नाही, अंबादास दानवेंचा थेट हल्लाबोल

चंद्रशेखर नेवे, एबीपी माझा — Sat, 24 Oct 2026 23:52:25 +0530

Ambadas Danve on Girish Mahajan : मंत्री गिरीश महाजन (Girish Mahajan) हे कुंभमेळ्याची दलाली खाण्यात मग्न आहेत, अशी जहरी टीका शिवसेना ठाकरे गटाचे नेते अंबादास दानवे (Ambadas Danve) यांनी केली. ते जळगावमध्ये बोलत होते. महाजनांचे नातेवाईक बोगस ऑर्डरमध्ये पकडले आहेत असंही ते म्हणाले. महाजन सत्तेचे फळ चाखण्यामध्ये व्यस्त आहेत असंही ते म्हणाले. दरम्यान, आता अंबादास दानवे यांच्या वक्तव्यानंतर भाजपचे नेते नेमकी काय प्रतिक्रिया देणार हे पाहणं देखील महत्वाटं ठरणार आहे.

जनतेच्या सुखदुःखाचे यांना काही देणेघेणे नाही

शिवसेना ठाकरे गटाचे नेते अंबादास दानवे यांनी मंत्री गिरीश महाजन यांच्यावर जोरदार टीका केली. जनतेच्या सुखदुःखाचे यांना काही देणेघेणे नाही, मुंबई या ठिकाणी जास्त असतात जिल्ह्यात काहीच नाहीत अशी टीका दानवे यांनी केली. मंत्री गिरीश महाजन हे कुंभमेळ्याची दलाली खाण्यात मग्न आहेत, असा टोला देखील दानवेंनी महाजनांना लगावला. दरम्यान, अंबादान दानवे यांच्या यांच्या या वक्तव्यानंतर राजकीय वातावरण तापण्याची शक्यता आहे. यावर भाजपचे नेते आता काय प्रतिक्रिया देणार हे पाहणं देखील महत्वाचं ठरणार आहे.

500 कोटी हे भाजपच्या मीडियाचा इन्चार्ज आहे

मराठा आंदोलक मनोज जरांगे पाटील यांनी दाखवलेल्या 500 कोटी संदर्बातील ऑडिओ क्लिपबाबत देखील अंबादास दानवेंनी प्रतिक्रिया दिली आहे. 500 कोटी हे भाजपच्या मीडियाचा इन्चार्ज आहे, त्या महिलांना माहिती आहे, पाचशे कोटी रुपये कोणी दिले आणि कसे दिले? असे दानवे म्हणाले. त्यामुळे तिच्यावर गुन्हा दाखल करायला पाहिजे. तिची चौकशी करून तिला जेलमध्ये टाकायला पाहिजे. असेही दानवे म्हणाले. तुमचं माझं जर असा विषय असता तर पोलिसांनी पकडून नेलं असतं या राज्यातली पोलीस काय झोपलेली आहे का? असा सवाल दानवेंनी केला.

हे लोक सत्तेची फळे चाखण्यात गुंतलेले

हे लोक सत्तेची फळे चाखण्यात गुंतलेले आहेत. हे मोठे भांडवलदार आणि सरंमजार झाले आहेत असी टीका दानवे यांनी महाजन यांच्यावर केली. यांना सर्वसामान्य माणसांशी दणंघेणं नाही. हे सगळे मुंबई आणि पुण्यात असताता असे दानवे म्हणाले. जनतेच्या सुख दुखात हे कधीच नसतात अशी टीका देखील दानवे यांनी महाजन यांच्यावर केली. 500 कोटी आणले होते कोठून आणिदिले कोणाला? याचा शोध घेणं गरजेचं असल्याचे दानवे म्हणाले.

VB-G-RAM-G: राज्यातील दुष्काळ निवारणाच्या पार्श्वभूमीवर हालचालींना वेग; 'व्हीबी जी राम-जी योजनेतील राज्यातली पहिली कार्यशाळा जळगावात, काँग्रेसचा मात्र सरकारवर गंभीर आरोप

चंद्रशेखर नेवे, एबीपी माझा — Sat, 24 Oct 2026 07:12:17 +0530

VB-G-RAM-G Scheme in Maharashtra : राज्यातील दुष्काळ निवारणाच्या पार्श्वभूमीवर राज्य सरकारने व्ही.बी.जी. रामजी रोजगार हमी योजना (VB-G-RAM-G Scheme) राबविण्याचा निर्णय घेतला आहे. या योजनेतर्गत 375 प्रकारची कामे करून शेतकऱ्यांना आपला रोजगार मिळविता येणार असल्याने ही योजना गेमचेंजर मानली जात आहे. योजना राबविण्या संदर्भा योजनेतील सर्वोच्च अधिकाऱ्यांनी मार्गदर्शन केले आहे. दुष्काळाच्या निवारणाच्या पार्श्वभूमीवर व्ही.बी.जी रामजी योजनेची राज्यातली पहिली कार्यशाळा पारोळ्यात (Jalgaon News) पार पडली. दुष्काळ निवारणाच्या कामासंदर्भात एकूण 375 कामांचा या योजनेत सहभाग आहे. त्यामुळे ही योजना दुष्काळात गेम चेंजर ठरण्याची शक्यता आहे. या पार्श्वभूमीवर या योजनेची अंमलबजावणी कशाप्रकारे करावी, त्याचे फायदे कसे मिळवणार, या संदर्भात एरंडोलच्या पारोळा तालुक्यासाठी पारोळा येथे कार्यशाळा पार पडली. दुसरीकडे याच योजनेच्या कार्यप्रणालीवर बोट ठेवत काँग्रेसने व्हीबीजी रामजी कायद्यावर टीका केली आहे.

VB-G-RAM-G Scheme : राज्यातील सर्वोच्च अधिकाऱ्यांची कार्यशाळेला उपस्थिती

दरम्यान, या योजनेचे राज्यातील सर्वोच्च अधिकारी या कार्यशाळेला उपस्थित होते. योजनेचे मिशन महासंचालक अतुल कोदे, रोजगार हमी योजनेचे मंत्रालयीन सहसचिव कैलास सोळुंके, कार्यासन अधिकारी भरतसिंग निकुंभ, रोजगार हमी योजनेचे उपसंचालक विजयकुमार कलवले यांनी या कार्यशाळेत मार्गदर्शन केले. या योजनेच्या माध्यमातून दुष्काळ निवारणात एरंडोल पारोळा विधानसभा मतदारसंघ राज्यात रोल मॉडेल ठरेल, असा विश्वास आमदार अमोल पाटील यांनी व्यक्त केला.

Congress Jairam Ramesh: 'वोट चोरी सरकारने' 'ग्रामीण मजूर चोरी'मध्येही प्राविण्य मिळवले

केंद्र सरकारने 1 जुलै 2026 पासून मनरेगा रद्द करून “जी ग्रामजी” कायदा लागू केला. रोजगार हमीचे दिवस 100 वरून 125 केल्याचा गाजावाजा झाला. अशातच बीडमधील 5 ठिकाणी कामगार न आढळल्याच्या आरोपानंतर काँग्रेसने व्हीबीजी रामजी कायद्यावर टीका केली. काँग्रेसने म्हटले आहे की, मोदी सरकारने मनरेगाच्या जागी आणलेला हा कायदा म्हणजे ग्रामीण भारताचे संरक्षण करणाऱ्या सामाजिक सुरक्षा जाळ्यावर केलेला 'सर्जिकल स्ट्राइक' आहे. तसेच 'वोट चोरी सरकारने' 'ग्रामीण मजूर चोरी'मध्येही प्राविण्य मिळवले आहे, असा आरोपही काँग्रेसने केला. काँग्रेसचे जयराम रमेश यांनी एका मीडिया रिपोर्टचा हवाला दिला, ज्यात असा दावा करण्यात आला आहे की, दुष्काळग्रस्त महाराष्ट्रात कागदोपत्री व्हीबीजी रामजी योजनेअंतर्गत हजारो लोक काम करत असताना, बीडमधील पाच ठिकाणी प्रत्यक्षात एकही कामगार आढळला नाही.

Jairam Ramesh: ....सर्जिकल स्ट्राईकपेक्षा कमी नाही.

X वरील आपल्या पोस्टमध्ये काँग्रेसचे जेष्ठ नेते जयराम रमेश म्हणाले, 'बीड आणि महाराष्ट्रातील इतर जिल्हे गेल्या दशकातील सर्वात भीषण दुष्काळाचा सामना करत आहेत. अशा अत्यंत संकटाच्या काळात मनरेगा (MGNREGA) हा आधाराची हमी होता. परंतु त्याच्या जागी व्हीबी-जी राम जी (VB-G RAM G) योजना आणणे, हे ग्रामीण भारताचे रक्षण करणाऱ्या सामाजिक सुरक्षा जाळ्यावरील सर्जिकल स्ट्राईकपेक्षा कमी नाही. याउलट, स्थानिक राजकारणी त्यांचे वेतन खिशात घालत आहेत; यात शंका नाही की ते सत्ताधारी पक्षाचेच आहेत. उत्तर प्रदेश आणि भाजपशासित इतर राज्यांमधील अशा बनावट उपस्थिती आणि क्लोन ॲप घोटाळ्यांचे पुरावे देखील माध्यमांमध्ये उघड झाले आहेत," असे ते म्हणाले.

इतर महत्वाच्या बातम्या

रेकॉर्डिंगमधून खूप शहाणा झालो! आता आंदोलन चार दिवस उशिरा, पण कट्टर मराठा सेवकांची फळी तयार करणार, जरांगे पाटलांचा मोठा निर्णय

देशात गडबड करणारा जन्माला यायचाय, कोणी गडबड केली तर आम्ही पाकिस्तानात जाऊन ठोकतो, गुलाबराव पाटलांचा राज ठाकरेंना टोला

चंद्रशेखर नेवे, एबीपी माझा — Thu, 22 Oct 2026 23:04:15 +0530

Gulabrao Patil on Raj Thackeray : देशात पुढील काही महिन्यांत मोठी गडबड होईल, देशाला पंतप्रधानच उरणार नाहीत, असं भाकीत मनसे अध्यक्ष राज ठाकरे यांनी केलं आहे. राज ठाकरेंच्या या वक्तव्यावर मंत्री गुलाबराव पाटील यांनी थेट आव्हान देत जोरदार पलटवार केलाय. देशात गडबड करणारा अजून कोणता माईचा लाल जन्माला यायचा आहे. हे नरेंद्र मोदींचं सरकार आहे. कोणी देशात गडबड केली तर आम्ही सरळ पाकिस्तानात जाऊन ठोकतो, अशा शब्दांत गुलाबराव पाटलांनी राज ठाकरेंना प्रत्युत्तर दिलं. त्यामुळे राज ठाकरेंच्या विधानावरुन आता राजकीय वाक् युद्धाला सुरुवात झाली आहे.

नेमकं काय म्हणाले होते राज ठाकरे?

देशातील निवडणुका पारदर्शक झाल्या पाहिजेत. पाकिस्तान, बांग्लादेश, श्रीलंका नेपाळमध्ये बॅलेट पेपरवर निवडणुका होतात. अख्ख्या जगाने इव्हीएम नाकारलं आहे, मग भारतात इव्हीएस का? फ्रान्समध्ये एका व्यक्तीच्या सांगण्यावरून बॅलेट पेपरवर निवडणूक घेण्यात आली. पुढच्या 4 ते 5 महिन्यात देशात काहीतरी मोठी गडबड होणार हे निश्चित आहे. देश रस्त्यावर आला तरी मला आश्चर्य वाटणार नाही असे ठाकरे म्हणाले.

संजय राऊत म्हणजे वापरलेली कॅसेट

संजय राऊत म्हणजे वापरलेली कॅसेट आहे, असं म्हणत गुलाबराव पाटलांनी ठाकरे गटावर पलटवार केला. दसरा मेळाव्यातील भाषणावरून संजय राऊतांच्या टीकेला मंत्री गुलाबराव पाटलांनी प्रत्युत्तर दिले. प्रत्येकाला आपला नेता मुख्यमंत्री व्हावा, असं वाटतं; मग माझी भूमिका मांडण्यात चूक काय? असेही गुलाबराव पाटील म्हणाले. आमदार व्हावं, मंत्री व्हावं, अशी कार्यकर्त्यांची इच्छा होती आणि मी झालो असेही गुलाबराव पाटील म्हणाले.

पुढचा काळ पाण्यासाठी अत्यंत महत्त्वाचा

आम्ही जरी या बालाजी उत्सवात असलो, तरी इथले स्थानिक पदाधिकारी, नगराध्यक्ष आणि खासदार स्मिताताई वाघ या सर्वांनीच महिलांना पाणी बचतीचे आवाहन केले आहे. कारण पुढचा काळ पाण्यासाठी अत्यंत महत्त्वाचा आहे. नळांना तोट्या लावणे आणि काटकसरीने जीवन जगणे आवश्यक आहे. शासन दुष्काळ जाहीर केल्यानंतर जी मदत करायची ती करेलच, पण जे आपल्या हातात आहे. पाणी वाचवणे व नियोजन करणे ते आपण केले पाहिजे. केवळ सरकार किती देईल यापेक्षा आपले नियोजन असणे गरजेचे आहे.

दुष्काळावर मात करण्यासाठी आपल्याला पर्यायी मार्गांचा अवलंब करावा लागणार

सरकार आणि जनता दोघांनी मिळून नियोजन केले, तर आपण या दुष्काळाला सामोरे जाऊ शकू. दुष्काळाला संकट न समजता संधी समजून नाला खोलीकरण, डीपनिंग, सिमेंट प्लग बांधणे अशी कामे करता येतील. महाराष्ट्रात 'जलतारा' उपक्रम सुरू आहे; जळगाव जिल्ह्यात आम्ही 25 हजार जलतारेची कामे हाती घेत आहोत, ज्यामुळे भूजल पातळी वाढेल. 1972 च्या दुष्काळात 'रोजगार हमी योजने'चा जन्म झाला होता, तसेच आताही दुष्काळावर मात करण्यासाठी आपल्याला पर्यायी मार्गांचा अवलंब करावा लागेल असेही पाटील म्हणाले.

एकनाथ शिंदेंना गोत्यात आणण्याचा डाव, जशास तसं उत्तर देऊ, मुख्यमंत्र्यांकडे SIT चौकशीची मागणी, गुलाबराव पाटील आक्रमक

चंद्रशेखर नेवे, एबीपी माझा — Thu, 22 Oct 2026 19:06:49 +0530

Gulabrao Patil : मराठा आंदोलक मनोज जरांगे पाटील (Manoj Jarange Patil Audio Clip) यांनी जारी केलेल्या ऑडिओ क्लिपवरुन एकच खळबळ उडाली आहे. भाजपकडून 500 कोटी रुपये घेऊन खासदार श्रीकांत शिंदेंच्या (Shrikant Shinde) हस्ते मनोज जरांगेंना पाठवल्याचा उल्लेख या ऑडिओ क्लिपमध्ये आहे. या प्रकरणावर मंत्री गुलाबराव पाटील यांनी प्रतिक्रिया दिली आहे. मनोज जरांगे पाटील यांनी सादर केलेल्या क्लिपची फॉरेन्सिक लॅबमार्फत आणि एसआयटी (SIT) द्वारे चौकशी करावी, अशी मागणी पाटील यांनी मुख्यमंत्री देवेंद्र फडणवीस यांच्याकडे केली आहे.

एकनाथ शिंदे आणि शिवसेनेला गोत्यात आणण्याचा डाव

श्रीकांत शिंदें यांचे नाव घेऊन एकनाथ शिंदे आणि शिवसेनेला गोत्यात आणण्याचा डाव असल्याचे गुलाबराव पाटील म्हणाले. याबाबत सखोल चौकशी करुन 'दूध का दूध आणि पाणी का पाणी' होऊ द्या असेही पाटील म्हणाले. यामागे शिवसेना आणि भाजपामध्ये वाद लावण्याचा प्रयत्न आहे का, याचीही मुख्यमंत्र्यांनी चौकशी करावी, असे गुलाबराव पाटील म्हणाले.

आमच्या नेत्याला बदनाम करण्याचा प्रयत्न, मुख्यमंत्र्यांनी सखोल चौकशी करावी

ज्या एकनाथ शिंदेंनी मराठा समाजाला 10 टक्के आरक्षण दिले आणि कोर्टात टिकत नसलेले आरक्षण चांगले वकील देऊन टिकवले, त्यांच्यावर व त्यांच्या मुलावरच बोलले जात आहे हे दुर्दैवी असल्याचे पाटील म्हणाले. 500 कोटी शिंदेंनी दिले नाहीत आणि 500 कोटी जरांगेंनी घेतले नाहीत आता हे तर स्पष्ट झाले आहे. त्यामुळे या प्रकरणाची चौकशी होऊ द्या असंही ते म्हणाले. या प्रकरणात जे समोर यायचे ते येईल. पण आमच्या नेत्याला बदनाम करण्याचा प्रयत्न होत असल्याने मुख्यमंत्र्यांनी याची सखोल चौकशी करावी असे पाटील म्हणाले.

आम्हीही जशास तसे उत्तर देऊ

कोणी कोणावरही काहीही आरोप करेल हे चालणार नाही. आम्हीही जशास तसे उत्तर देऊ असा इशारा गुलाबराव पाटील यांनी दिला. श्रीकांत शिंदेंचा काय संबंध आहे? शिंदे साहेबांना बदनाम करण्याचा प्रयत्न आहे का? असा सवाल देखील पाटील यांनी केला. ऑडिओ क्लिप च्या आवाजाची तपासणी करावी, कोणाचा आवाज आहे ते शोधावे आणि दोषीवर कारवाई करावी असेही ते म्हणाले. आम्ही मुख्यमंत्री देवेंद्र फडणवीस यांची भेट घेऊन या प्रकरणाच्या चौकशीची मागणी करणार आहोत असे पाटील म्हणाले.

शिवसेना आणि भाजपमध्ये वाद निर्माण करण्याचा प्रयत्न आहे का?

श्रीकांत शिंदेंचं नाव घेऊन एकनाथ शिंदे आणि शिवसेनेला गोत्यात आणण्याचा डाव आहे का? असा सवाल करत मंत्री गुलाबराव पाटील यांनी ऑडिओ क्लिप प्रकरणाच्या चौकशीची मागणी केली आहे. मनोज जरांगे पाटील यांनी सादर केलेल्या ऑडिओ क्लिपची फॉरेन्सिक लॅबमार्फत तपासणी करावी, तसेच एसआयटी स्थापन करून मुख्यमंत्र्यांनी या प्रकरणाच्या मुळाशी जावं, अशी मागणी गुलाबराव पाटील यांनी केली आहे. या प्रकरणातून शिवसेना आणि भाजपमध्ये वाद निर्माण करण्याचा प्रयत्न आहे का, याचाही तपास व्हावा, असं त्यांनी म्हटलंय. 500 कोटी शिंदेंनी दिले नाहीत आणि जरांगेंनी घेतले नाहीत, हे स्पष्ट झालंय, मग आता या ऑडिओ क्लिपमागचं सत्य समोर येऊ द्या, असं म्हणत गुलाबराव पाटील यांनी विरोधकांना इशाराही दिला आहे. मुख्यमंत्री आणि उपमुख्यमंत्री देवेंद्र फडणवीस यांची भेट घेऊन या प्रकरणाच्या सखोल चौकशीची मागणी करणार असल्याचंही त्यांनी स्पष्ट केलंय.

मनोज जरांगेंच्या ऑडिओ क्लिपमध्ये नेमकं काय?

मनोज जरांगेंनी ऐकवलेल्या ऑडिओ क्लिपमध्ये महिलांचं संभाषण दिसून येतं, त्यात एक महिला सांगते, जरांगे पाटील यांना ऑलरेडी 500 कोटी रुपये पोहोचले आहेत. श्रीकांत शिंदेमार्फत हे पैसे दिले आहेत. आता जरांगे पाटील विधानसभेत आमच्या फायद्याचे राहतील की नाही राहणार याबाबतचं माझं मत वेगळं आहे. कॅलक्यूलेशन वेगळं आहे. बाकी तुम्ही जो विचार करत आहात, त्याचबरोबर जरांगे पर्सनल फडणवीस यांना टार्गेट करत असल्याचा उल्लेख या क्लिपमध्ये आहे.

मका काढण्याच्या मशीनमध्ये अडकून शेतकऱ्याचा दुर्दैवी मृत्यू, तीन मुलांचं पितृछत्र हरपलं, जळगावच्या जामनेर तालुक्यातील घटना

चंद्रशेखर नेवे, एबीपी माझा, जळगाव — Thu, 22 Oct 2026 16:41:25 +0530

Jalgaon : जळगाव (Jalgaon) जिल्ह्यात धक्कादायक घटना घडली आहे. जामनेर तालुक्यात मका काढण्याच्या मशीनमध्ये अडकून 37 वर्षीय शेतकऱ्याचा दुर्दैवी मृत्यू (Farmers death) झाला आहे. योगेश भावालाल पाटील असं मृत शेतकऱ्याचं नाव आहे. जामनेर तालुक्यातील भागदरा शिवारात ही घटना घडली आहे. शेतकऱ्याचा मृत्यू झाल्यानं तीन मुलांचे पितृछत्र हरपले आहे. दरम्यान, या घटनेमुळं परिसरात हळहळ व्यक्त केली जात आहे.

Jalgaon : या घटनेमुळं परिसरात हळहळ व्यक्त केली जात आहे

शेतकरी दिनेश महाजन यांच्या शेतात मका काढण्याचं काम सुरू असताना हा अपघात झाला. योगेश पाटील हे शेतीकामासोबतच मका काढण्याचं मशीन चालवून कुटुंबाचा उदरनिर्वाह करत होते. त्यांच्या निधनामुळे तीन मुलांच्या डोक्यावरील वडिलांचं छत्र हरपलं आहे. या घटनेमुळं परिसरात हळहळ व्यक्त केली जात आहे. या प्रकरणी जामनेर पोलिसांत आकस्मात मृत्यूची नोंद करण्यात आली आहे. दरम्यान, शेतकऱ्यांनी शेतीची कामे करताना काळजी घेणं गरजेचं आहे. विशेषत: मशीनच्या कामासंदर्भात जास्त काजी घेणं गरजेचे आहे. थोडे जरी दुर्लक्ष झाले तरी त धोक्याचे ठरु शकते. त्यामुळं शेतीचं कोणतंही काम करताना सावधगिरी बाळगणं गरजेचं आहे.

पोहण्याचा मोह चिमुरड्यांच्या जीवावर बेतला, दोन अल्पवयीन मुलांचा मृत्यू

ठाणे जिल्ह्यात देखील एक धक्कादायक घटना घडली आहे. दोन अल्पवयीनं मुलांचा दुर्दैवी अंत झाल्याची गटना घडली आहे. पोहण्याचा मोह दोन चिमुरड्यांच्या जीवावर बेतला असल्याची अत्यंत मन हेलावून टाकणारी दुर्घटना बुधवारी सकाळी कोपरी परिसरात घडली. तलावात उतरलेल्या दोन अल्पवयीन मुलांना खोलीचा अंदाज न आल्याने पाण्यात बुडून प्राण गमवावे लागले. गणेश गुप्ता (वय 9) आणि गोलू मन्सुरी (वय 10, दोघेही रा. कोपरी गाव) अशी या दुर्दैवी बालकांची नावे आहेत. या घटनेमुळे कोपरी परिसरात मोठी शोककळा पसरली आहे. बुधवारी सकाळी गणेश आणि गोलू हे दोघे कोपरी येथील तलावाच्या परिसरात गेले होते. दरम्यान, दोघांनाही पोहता येत नसतानाही ते तलावाच्या पाण्यात उतरले. पाण्याचा अंदाज न आल्याने ते पाण्यात बुडू लागले. मुले बुडत असल्याचे लक्षात आल्यानंतर एका स्थानिक नागरिकाने त्यांना वाचवण्यासाठी तातडीने पाण्यात धाव घेतली आणि शर्थीचे प्रयत्न केले. मात्र, तोपर्यंत पाण्याचा प्रवाह आणि खोलीमुळे दोन्ही मुले पाण्यात पूर्णपणे बुडाली होती. अग्निशमन दलाने दोन्ही मुलांचे मृतदेह बाहेर काढले आहेत.