YouTuber Jasbir Singh : पाकिस्तानी 'चाखरी' करणाऱ्या गद्दारांची यादी संपता संपेना; आता 'हेरगिरी'आरोपाखाली आणखी एका युट्यूबरला अटक; गद्दार ज्योती मल्होत्राशी संबंध, 11 लाखांहून अधिक सबस्क्राइबर्स
YouTuber Jasbir Singh : हरियाणातील ज्योती मल्होत्रा नंतर अटक करण्यात आलेला जसबीर सिंग हा दुसरा डिजिटल कंटेंट क्रिएटर आहे. तो सातत्याने ज्योतीच्या संपर्कात होता.
YouTuber Jasbir Singh : हेरगिरीच्या आरोपाखाली ज्योती मल्होत्राच्या मुसक्या आवळल्यानंतर आता पंजाब पोलिसांनी आणखी एका युट्यूबर जसबीर सिंगला अटक केली आहे. जसबीर सिंग जान महल चॅनेल चालवत असून 11 लाखांहून अधिक सबस्क्राइबर्स आहेत. रूपनगर जिल्ह्यातील महलान गावातील रहिवासी असलेल्या जसबीरला मोहाली येथील स्टेट स्पेशल ऑपरेशन्स सेल (SSOC) ने कारवाई करण्यायोग्य गुप्त माहितीच्या आधारे ताब्यात घेतले. त्याच्यावरही हेरगिरीचा आरोप आहे. हरियाणातील ज्योती मल्होत्रा नंतर अटक करण्यात आलेला जसबीर सिंग हा दुसरा डिजिटल कंटेंट क्रिएटर आहे. तो सातत्याने ज्योतीच्या संपर्कात होता.
आतापर्यंत हेरगिरी केल्याच्या आरोपाखाली सात जणांना अटक
आतापर्यंत पंजाब पोलिसांनी पाकिस्तानसाठी हेरगिरी केल्याच्या आरोपाखाली सात जणांना अटक केली आहे. फलकशेर मसीह आणि सूरज मसीह यांना अमृतसरमधील अजनाला येथून अटक करण्यात आली होती आणि मालेरकोटला येथील रहिवासी असलेल्या 31 वर्षीय महिला गुजाला आणि यामीन मोहम्मद यांनाही गेल्या महिन्यात ताब्यात घेण्यात आले होते. आयएसआयला संवेदनशील लष्करी माहिती शेअर केल्याबद्दल आणखी दोन जणांना सुखप्रीत सिंग आणि करणबीर सिंग - यांना नंतर गुरदासपूर येथून पोलिसांनी अटक केली. पंजाब पोलिसांनी दिलेल्या माहितीनुसार जसबीर सिंगचे पाकिस्तानी गुप्तचर अधिकारी शाकीर उर्फ जुट रंधावाशी जवळचे संबंध होते, जो भारतीय वंशाचा व्यक्ती इंटर-सर्व्हिसेस इंटेलिजेंस (ISI) साठी काम करत असल्याचा संशय आहे. त्याने पाकिस्तानी नागरिक आणि दिल्लीतील पाकिस्तान उच्चायोगातील माजी अधिकारी एहसान-उर-रहीम उर्फ दानिशशी सुद्धा संबंध होते. दानिशला हेरगिरीच्या आरोपाखाली यापूर्वी हद्दपार करण्यात आलं आहे.
जसबीर तीन वेळा पाकिस्तानला गेला
अधिकाऱ्यांनी सांगितले की जसबीर दानिशच्या निमंत्रणावरून दिल्लीतील पाकिस्तानी दूतावासात पाकिस्तान राष्ट्रीय दिनाच्या समारंभात सहभागी झाला होता, जिथे त्याने पाकिस्तानी लष्करी कर्मचारी आणि व्हीलॉगर्सशी संवाद साधला. तो 2020, 2021 आणि 2024 मध्ये तीन वेळा पाकिस्तानला गेला आहे. अधिकाऱ्यांनी सांगितले की, त्याच्या इलेक्ट्रॉनिक उपकरणांच्या फॉरेन्सिक विश्लेषणातून पाकिस्तानमधील अनेक संपर्क क्रमांक उघड झाले आहेत. ज्यांची आता चौकशी सुरू आहे. ज्योती मल्होत्राच्या अटकेनंतर, जसबीरने आयएसआयशी संबंधित असलेल्या हेरांशी झालेल्या संपर्काचे सर्व ट्रेस हटवण्याचा प्रयत्न केल्याचा आरोप आहे. पोलिसांचे म्हणणे आहे की ते हेरगिरी-दहशतवादी नेटवर्कची संपूर्ण व्याप्ती उघड करण्यासाठी आणि त्यात सहभागी असलेल्या सर्व व्यक्तींची ओळख पटविण्यासाठी काम करत आहेत.
सर्व सहयोगींची ओळख पटविण्यासाठी तपास सुरू
"जान महल" नावाचे YouTube चॅनेल चालवणारा जसबीर सिंग, दहशतवादी-समर्थित हेरगिरी नेटवर्कचा भाग असलेल्या पीआयओ शाकीर उर्फ जुट रंधावाशी संबंधित असल्याचे आढळले आहे. त्याने हरियाणाच्या ज्योती मल्होत्रा आणि पाकिस्तानी नागरिक आणि पाकिस्तानी उच्चायोगातून हद्दपार झालेले एहसान-उर-रहीम उर्फ दानिशशी जवळचे संपर्क ठेवले होते, असे पंजाब पोलिसांनी X वरील एका पोस्टमध्ये म्हटले आहे. हेरगिरी-दहशतवादी नेटवर्क उध्वस्त करण्यासाठी आणि सर्व सहयोगींची ओळख पटविण्यासाठी तपास सुरू आहे, असेही म्हटले आहे.
इतर महत्वाच्या बातम्या
महत्त्वाच्या बातम्या
