DMK Big Decision : इंडिया आघाडीला धक्का, द्रमुकचा लोकसभेत काँग्रेससोबत बसायला नकार, द्रमुकच्या वतीने लोकसभा अध्यक्षांना पत्र
DMK : पाच राज्यांच्या विधानसभा निवडणुकीनंतर देशभरात मोठ्या घडामोडी सुरु आहेत. काँग्रेसनं तामिळनाडूत द्रमुकची साथ सोडताच द्रमुकनं देखील मोठा निर्णय घेतला आहे.
नवी दिल्ली : इंडिया आघाडीतील महत्त्वाचा घटकपक्ष असलेल्या द्रमुकनं मोठा निर्णय घेतला आहे. द्रमुकच्या नेत्या कनिमोळी यांनी लोकसभा अध्यक्ष ओम बिर्ला यांना पत्र लिहून मोठी मागणी केली आहे.द्रमुकच्या या निर्णयानं इंडिया आघाडीला धक्का बसल्याचं पाहायला मिळतंय. तामिळनाडू विधानसभा निवडणुकीत द्रमुक आणि काँग्रेसनं एकत्र निवडणूक लढवली होती. मात्र, विधानसभा निवडणुकीत द्रमुकला पराभवाचा सामना करावा लागला, यानंतर काँग्रेसनं थलपती विजय यांच्या टीव्हीके पक्षाला पाठिंबा देण्याचा निर्णय घेतला. या निर्णयामुळं द्रमुक नाराज झाल्याचं पाहायला मिळतंय.
कनिमोळी यांनी लोकसभा अध्यक्ष ओम बिर्ला यांना लिहिलेल्या पत्रात म्हटलंय की द्रमुक खासदारांच्या लोकसभेतील बैठक व्यवस्थेत बदल करण्यात यावेत. सध्याच्या राजकीय घडामोडींमुळं भारतीय राष्ट्रीय काँग्रेस सोबतची आघाडी संपली आहे. त्यामुळं लोकसभेत सध्याची बैठक व्यवस्था आहे, त्यानुसार काँग्रेस सोबत बसणं योग्य होणार नाही. द्रमुकच्या लोकसभेतील खासदारांची बैठक व्यवस्था वेगळी करण्यात यावी, असं कनिमोळी यांनी म्हटलं आहे.
तामिळनाडूत द्रमुकचा पराभव
तामिळनाडूच्या विधानसभा निवडणुकीत द्रमुकचा मोठा पराभव झाला. एमके स्टॅलिन यांच्या नेतृत्त्वात काँग्रेस आणि द्रमुकनं आघाडी करत निवडणूक लढवली होती. या निवडणुकीत एमके स्टॅलिन यांचा कोलाथूर विधानसभा मतदारसंघातून पराभव झाला. 234 जागांपैकी द्रमुकला 59 जागांवर विजय मिळाला. तर, थलपती विजय यांच्या TVK पक्षाला 108 जागांवर विजय मिळाला. अण्णाद्रमुक पक्षाला 47 जागांवर विजय मिळाला. यामुळं तामिळनाडूच्या विधानसभेचा निकाल त्रिशंकू बनला आहे. काँग्रेसनं 5, पीएमके 4, माकप 2, भाकप 2,इंडियन यूनियन मुस्लीम लीगनं 2, भाजपनं 1 आणि डीएमडीके आणि अम्मा मुक्कल मुनेत्र कळघम पक्षानं एका जागेवर विजय मिळवला आहे.
तामिळनाडूतील टीव्हीके पक्षाला आणखी दोन आमदारांचा पाठिंबा मिळालेला आहे. माकपचे तामिळनाडू विधानसभेत 2 आमदार विजयी झाले आहेत. या दोन आमदारांनी विजय यांच्या टीव्हीके पक्षाला पाठिंबा दिला आहे. यामुळं टीव्हीकेला आतापर्यंत 114 आमदारांचं पाठबळ मिळालेलं आहे. टीव्हीके पक्षानं तामिळनाडूत 108 जागांवर विजय मिळवलेला आहे. यामध्ये विजय दोन जागांवर विजयी झाले आहेत, त्यामुळं टीव्हीकेचं संख्याबळ 107 वर येतं. याशिवाय काँग्रेसच्या 5 आमदारांनी पाठिंबा दिल्यानं संख्याबळ 112 वर पोहोचतं, माकपच्या दोन आमदारांनी पाठिंबा दिल्यानं त्यांचं टीव्हीकेला पाठिंबा असणाऱ्या आमदारांची संख्या 114 झाली आहे. याशिवाय टीव्हीकेला भाकपच्या 2 आमदारांचा पाठिंबा मिळण्याची शक्यता आहे. तो पाठिंबा मिळाल्यास संख्याबळ 116 वर जाईल यानंतर विजय यांना आणखी दोन आमदारांची गरज लागेल.
Before You Go
Tandulwadi Accident Savior : तांदूळवाडीतील अपघात कसा घडला? 'देवदूत' इरफानने पाच जणांचा जीव वाचवला!
महत्त्वाच्या बातम्या
