केंद्र सरकारने दोनशे रुपयांची नोट बाजारात आणण्याची अधिसूचना नुकतीच जारी केली होती. 200 रुपयांच्या सुमारे 50 कोटी नोटा बाजारात आणण्यात येणार आहेत.
दरम्यान दोनशेच्या नोटेवर गव्हर्नर उर्जित पटेल यांची सही आहे. या नोटांची मोठ्या प्रमाणात छपाई सुरु आहे. बाजारात आल्यानंतर या नोटेचा तुटवडा जाणवू नये म्हणून खबरदारी घेण्यात येत आहे.
100 आणि 500 रुपयांमधील एखादी नोट चलनात आणण्याची ही देशातील पहिलीच वेळ आहे. 100 रुपयानंतर थेट 500 आणि त्यानंतर थेट दोन हजाराची नोट, यामुळे या चलनात मोठी तफावत जाणवत असे. त्यामुळे दोनशे रुपयांची नोट आणली जात असल्याचं सांगण्यात येत आहे.
200 रुपयांच्या नव्या नोट आरबीआयच्या निवडक कार्यालयांमध्ये आणि काही बँकांमध्येच उपलब्ध असतील. सध्या या नोटा एटीएममध्ये मिळणार नाही, कारण नव्या नोटांसाठी एटीएम रिकॅलिबरेशन करण्याची आवश्यकता आहे.
नऊ महिन्यात चलनात येणारी ही दुसरी नवी नोट असेल. यापूर्वी नोटाबंदीनंतर 8 नोव्हेंबर 2016 रोजी दोन हजाराची नोट आणण्याची घोषणा सरकारने केली होती. त्यानंतर आज दोनशे रुपयांची नोट बाजारात येणार असल्याचं जाहीर करण्यात आलं.
200 च्या नोटेची वैशिष्ट्ये
- नोटेच्या मध्यभागी महात्मा गांधींचा फोटो
- नोटेवर स्वच्छ भारतचा लोगो
- नोटेचा आकार 66 mm × 146 mm
- अंधाना नोट ओळखता येणार
- नोटेवर हिरव्या रंगात ‘RBI’, ‘भारत’,‘India’ and ‘200’
50 रुपयांचीही नवी नोट
काहीच दिवसांपूर्वी आरबीआयने 50 रुपयांची नवी नोट चलनात आणण्याची घोषणा केली होती. पन्नास रुपयांची ही नवी नोट फ्लोरसंट निळ्या रंगाची असेल. सध्या चलनात असलेल्या पन्नासच्या नोटा यापुढेही चलनात राहतील.
संबंधित बातम्या
दोनशे रुपयांची नोट उद्या चलनात येणार
दोनशे रुपयांची नोट लवकरच चलनात, केंद्राची अधिसूचना
50 रुपयांची नवी नोट लवकरच चलनात, आरबीआयची घोषणा