NS Raja Subramani: निवृत्त लेफ्टनंट जनरल एन. एस. राजा सुब्रमणी हे देशाचे पुढील संरक्षण प्रमुख (CDS) असतील. केंद्र सरकारने आज (9 मार्च) ही घोषणा केली. सुब्रमणी यांच्याकडे संरक्षण व्यवहार विभागाच्या सचिवपदाची जबाबदारीही असेल. सरकारने व्हाईस ॲडमिरल कृष्ण स्वामिनाथन यांची पुढील नौदल प्रमुख म्हणून नियुक्ती केली आहे. दोघेही 31 मे रोजी पदभार स्वीकारतील. सध्याचे संरक्षण प्रमुख अनिल चौहान यांचा कार्यकाळ 30 मे रोजी संपेल. एन. एस. राजा सुब्रमणी हे देशाचे तिसरे संरक्षण प्रमुख असतील.
गढवाल रायफल्समधून सैन्यात
एन. एस. राजा सुब्रमणी हे डिसेंबर १९८५ मध्ये गढवाल रायफल्समधून सैन्यात अधिकारी म्हणून दाखल झाले. त्यांनी राष्ट्रीय संरक्षण अकादमी (NDA) मधून लष्करी प्रशिक्षण घेतले. त्यानंतर त्यांनी यूकेमधील ब्रॅकनेल येथील जॉइंट सर्व्हिसेस कमांड अँड स्टाफ कॉलेजमध्ये शिक्षण घेतले. भारतात परतल्यानंतर, त्यांच्याकडे एका माउंटेन ब्रिगेडमध्ये ब्रिगेड मेजर पदाची जबाबदारी देण्यात आली. नंतर त्यांनी दिल्लीतील राष्ट्रीय संरक्षण महाविद्यालयात शिक्षण घेतले. त्यांनी लंडनच्या किंग्ज कॉलेजमधून मास्टर ऑफ आर्ट्स आणि मद्रास विद्यापीठातून संरक्षण अभ्यासात एमफिल पदवी देखील मिळवली आहे.
लष्करातील सेवा
सुब्रमणी सध्या राष्ट्रीय सुरक्षा परिषद सचिवालयात लष्करी सल्लागार म्हणून कार्यरत आहेत, हे पद त्यांनी सप्टेंबर 2025 पासून भूषवले आहे. यापूर्वी, त्यांनी जुलै 2024 ते जुलै 2025 पर्यंत उप-लष्करप्रमुख म्हणून काम पाहिले. त्यांच्या 35 वर्षांहून अधिक काळाच्या लष्करी कारकिर्दीत, त्यांनी अनेक महत्त्वाची कार्यचालन आणि सामरिक पदे भूषवली आहेत. सुब्रमणी यांना परम विशिष्ट सेवा पदक, अति विशिष्ट सेवा पदक, सेना पदक आणि विशिष्ट सेवा पदकाने सन्मानित करण्यात आले आहे. त्यांनी जम्मू आणि काश्मीरमधील सांबा येथे 168 व्या पायदळ ब्रिगेडचे नेतृत्व केले. त्यांनी वेलिंग्टनमधील डिफेन्स सर्व्हिसेस स्टाफ कॉलेजमध्ये मुख्य प्रशिक्षक म्हणून काम पाहिले.
स्वामीनाथन 1987 मध्ये नौदलात
व्हाइस ॲडमिरल कृष्णा स्वामीनाथन 1 जुलै १९८७ रोजी भारतीय नौदलात कमिशन झाले. ते दळणवळण आणि इलेक्ट्रॉनिक युद्धतंत्रात तज्ञ आहेत. त्यांनी एनडीए, यूकेमधील जॉइंट सर्व्हिसेस कमांड अँड स्टाफ कॉलेज, कॉलेज ऑफ नेव्हल वॉरफेअर आणि अमेरिकेतील यूएस नेव्हल वॉर कॉलेज येथे शिक्षण घेतले आहे.
लष्करातील सेवा
आपल्या नौदल कारकिर्दीत, कृष्णा स्वामीनाथन यांनी आयएनएस विद्युत, आयएनएस विनाश, आयएनएस कुलिश आणि आयएनएस म्हैसूर यांसारख्या युद्धनौकांचे नेतृत्व केले. त्यांनी आयएनएस विक्रमादित्य या विमानवाहू जहाजाचे कमांडिंग ऑफिसर म्हणूनही काम पाहिले. कृष्णा स्वामीनाथन यांना परम विशिष्ट सेवा पदक (पीव्हीएसएम), अति विशिष्ट सेवा पदक (एव्हीएसएम) आणि विशिष्ट सेवा पदक (व्हीएसएम) या पुरस्कारांनी सन्मानित करण्यात आले आहे.
इतर महत्वाच्या बातम्या