Pahalgam Terror Attack : पहलगाममधील दहशतवादी हल्ल्यानंतर (Pahalgam Terror Attack) जम्मू आणि काश्मीरमधील ट्रेकिंग मोहिमांना पुढील आदेशापर्यंत स्थगित करण्यात आले आहेत. स्थानिक अधिकाऱ्यांनी पहलगामच्या वरच्या भागात, चंदनवारी, अरु, बेताब व्हॅली आणि बैसरन व्हॅलीसह पर्यटक आणि ट्रेकर्स मोहीम आधीच थांबवली आहे. पहलगामच्या सर्व वरच्या भागात कोणत्याही प्रकारच्या पर्यटन मोहिमा, ट्रेकिंगवर सध्या पूर्णपणे बंदी घालण्यात आली आहे, असे अधिकाऱ्यांनी स्पष्ट केले आहे.
अखेर पर्यटनावर हातोडा पडला
दरवर्षी हजारो लोक जम्मू आणि काश्मीरमध्ये ट्रेकिंगसाठी येतात. यामुळे या भागात पर्यटकांची मोठी वर्दळ होती. उन्हाळ्याच्या काळात गर्दी वाढते, कारण त्यावेळी बर्फ वितळतो आणि ट्रेकिंगचे मार्ग खुले होतात. आता अचानक आलेली ही बंदी केवळ ट्रेकिंग प्रेमींसाठी धक्का नाही तर स्थानिक पर्यटन उद्योगासाठी आव्हानात्मक परिस्थिती निर्माण करत आहे. स्थानिक मार्गदर्शक, पोर्टर, होमस्टे मालक आणि दुकानदार जे प्रामुख्याने ट्रेकिंग हंगामावर अवलंबून असतात त्यांनाही या निर्णयाचा आर्थिक फटका बसू शकतो.
परिस्थिती पूर्णपणे सामान्य होईपर्यंत ट्रेकिंगवर बंदी
22 एप्रिल रोजी पहलगाम येथे झालेल्या दहशतवादी हल्ल्यानंतर जम्मू-काश्मीर पोलिस, सीआरपीएफ आणि लष्कराने संयुक्तपणे सुरक्षा व्यवस्था कडक केली आहे. उंचावरील भागात अतिरिक्त गस्त वाढविण्यात आली आहे आणि ड्रोनद्वारे देखरेख केली जात आहे. स्थानिक प्रशासनाचे म्हणणे आहे की परिस्थिती पूर्णपणे सामान्य होईपर्यंत ट्रेकिंगवर बंदी राहील. पर्यटकांना फक्त अधिकृत आणि सुरक्षित क्षेत्रांना भेट देण्याचा आणि स्थानिक अधिकाऱ्यांच्या मार्गदर्शक तत्त्वांचे काटेकोरपणे पालन करण्याचा सल्ला देण्यात आला आहे.
ट्रेकिंग परवाने सुद्धा रद्द करण्यात आले
ट्रेकिंग परवाने सध्यासाठी निलंबित करण्यात आले आहेत आणि आधीच जारी केलेले परवाने देखील रद्द करण्यात आले आहेत. दहशतवादी हल्ल्यात 26 जणांचा मृत्यू झाला होता, त्यापैकी दोन परदेशी नागरिक होते. या हल्ल्यानंतर सुरक्षा एजन्सी सतर्क आहे. त्यांनी दहशतवाद्यांचा शोध सुरू केला आहे. या संदर्भात तीन दहशतवाद्यांची ओळख पटवण्यात आली आहे आणि त्यांचे रेखाचित्र देखील जारी करण्यात आले आहेत.
इतर महत्वाच्या बातम्या