पणजी : गोव्याचे मुख्यमंत्री मनोहर पर्रिकर यांच्या निधनानंतर गोव्यातील राजकीय घडामोडींना वेग आला आहे. गोवा काँग्रेसने राज्यपाल मृदुला सिन्हा यांना दुसऱ्यांदा पत्र लिहून सत्तास्थापनेचा दावा केला आहे.
काँग्रेसच्या सत्तास्थापनेच्या दाव्यानंतर भाजपचे नेते आणि केंद्रीय मंत्री नितीन गडकरी गोव्यामध्ये मध्यरात्री दाखल झाले आहेत. भाजप आणि मित्रपक्षांशी चर्चा करुन मनोहर पर्रिकर यांच्यानंतर गोव्याचं नेतृत्व कोणाकडे सोपवायचं यासाठीच्या सर्व पर्यायांची चाचपणी नितीन गडकरी करत आहेत.
नितीन गडकरी यांनी काल रात्री गोवा फॉरवर्ड पार्टीच्या विजय सरदेसाई आणि एमजीपीच्या सुधीन ढवळीकर यांच्या आमदारांसोबत जवळपास दोन तास चर्चा केली. आज दिवसभरातील चर्चांनंतर अखेरचा निर्णय घेतला जाणार आहे.
गोवा विधानसभा अध्यक्ष प्रमोद सावंत यांच नाव मुख्यमंत्रीपदासाठी सध्या आघाडीवर आहे. सर्व मित्रपक्षही सावंत यांना पाठिंबा देऊ शकतात. श्रीपाद नाईक यांचंही नाव चर्चेत होतं, मात्र भाजपच्या मित्रपक्षांचा नाईक यांना विरोध आहे.
गोवा फॉरवर्ड पार्टीचे नेते विजय सरदेसाई यांनीही आमच्यासाठी सर्व पर्याय खुले असल्याचं म्हटलं आहे. आम्ही मनोहर पर्रिकर यांना समर्थन दिलं होतं, भाजपला नाही. मनोहर पर्रिकरांच्या निधनानंतर भाजप आता काय निर्णय घेणार हे पाहणं महत्त्वाचं आहे. त्यानंतरच आम्ही आमचा निर्णय जाहीर करु, असं देखील सरदेसाई यांनी म्हटलं. मात्र राज्यात आम्हाला निवडणुका नको आहेत, आम्हाला स्थिर सरकार अपेक्षित आहे, हे देखील विजय सरदेसाई यांनी स्पष्ट केलं.
गोव्याचे मुख्यमंत्री मनोहर पर्रिकर यांचं रविवारी रात्री कर्करोगाच्या दीर्घ आजाराने निधन झाले. वयाच्या 63 व्या वर्षी अखेरचा श्वास घेतला. आज सोमवार, 18 मार्च रोजी त्यांच्या पार्थिवावर अंत्यसंस्कार केले जाणार आहेत.
- सकाळी 9.30 ते 10.30 - मनोहर पर्रिकर यांचे पार्थिव अंत्यदर्शनासाठी पणजी येथील भाजप कार्यालयात ठेवण्यात येईल.
- सकाळी 10.30 वाजता पर्रिकर यांचे पार्थिव अंत्यदर्शनासाठी कला अकादमी येथे हलविले जाईल.
- 11 ते 4 वाजेपर्यंत : सामान्य लोकासांठी अंत्यदर्शनासाठी पार्थिव ठेवण्यात येईल.
- दुपारी 4 वाजता अंत्यसंस्कारासाठी मीरामार येथे पर्रिकर यांचे पार्थिव हलविले जाईल.
- 4.30 वाजता : अंतिम विधी सुरु होईल.
- सायंकाळी 5 वाजता पर्रिकर यांच्या पार्थिवावर अंतिम संस्कार केले जातील.
संबंधित बातम्या
लढवय्या नेता हरपला, गोव्याचे मुख्यमंत्री मनोहर पर्रिकर यांचे निधन
गोव्याचे दिवंगत मुख्यमंत्री मनोहर पर्रिकर यांचा अल्प परिचय
'सर्जिकल स्ट्राईक' ते 'वन रॅन्क वन पेन्शन योजना', संरक्षण मंत्री असताना मनोहर पर्रिकरांनी घेतलेले मोठे निर्णय
गोव्याचे मुख्यमंत्री मनोहर पर्रिकर यांच्या निधनाने शोककळा, लढवय्या नेत्याला मान्यवरांकडून श्रद्धांजली