नवी दिल्ली : मोदींच्या मंत्रिमंडळ विस्तारात 15 कॅबिनेट आणि 28 राज्यमंत्र्यांसह एकूण 43 मंत्र्यांनी बुधवारी सायंकाळी पद व गोपनीयतेची शपथ घेतली. सर्वात महत्वाची बाब म्हणजे ज्या मंत्र्यांनी शपथ घेतली आहे त्यापैकी 7 महिला मंत्री आहेत. भाजपचे मित्रपक्ष अपणा दल (एस) प्रमुख आणि मिर्जापूरच्या खासदार अनुप्रिया पटेल यांना मंत्रिमंडळात स्थान देण्यात आले आहे. मंत्री झाल्याची बातमी समजताच अनुप्रिया पटेल यांच्या कार्यालयात उत्सव साजरा झाला. पुढच्या वर्षी होणाऱ्या यूपी निवडणुकीपूर्वी हे भाजपचे महत्त्वाचे पाऊल मानले जात आहे.
यासह कर्नाटकच्या उडुपी येथील भाजप खासदार शोभा करंदलाजे यांनीही मंत्रीपदाची शपथ घेतली आहे. नवी दिल्लीतील भाजप खासदार मीनाक्षी लेखी यांनाही पहिल्यांदा मोदींच्या मंत्रिमंडळात स्थान देण्यात आले आहे. त्या सुप्रीम कोर्टाच्या वकीलही आहेत.
झारखंडच्या कोडरमा येथून भारतीय जनता पक्षाचे खासदार अन्नपूर्णा देवी यांनाही मंत्रीपदाची शपथ दिली गेली आहे. यासह मोदी मंत्रिमंडळात त्रिपुरा पश्चिमच्या खासदार प्रतिमा भौमका यांनाही स्थान मिळाले आहे. याशिवाय महाराष्ट्रातील दिंडोरीच्या खासदार भारती प्रवीण पवार यांनाही मंत्रीपद देण्यात आले आहे. यासह गुजरातच्या सुरत येथील भारतीय जनता पक्षाच्या खासदार दर्शना विक्रम जरदोश यांनाही मंत्री करण्यात आले आहे.
उल्लेखनीय म्हणजे 43 शपथ घेतलेल्या मंत्र्यांपैकी पंकज चौधरी, अनुप्रिया पटेल (अपना दल), सत्यपाल सिंह बघेल, राजीव चंद्रशेखर, शोभा करंडालजे, भानू प्रतापसिंह वर्मा, दर्शन विक्रम, मीनाक्षी लेखी, अनुपपूर्णा देवी, ए नारायणसामी, कौशल किशोर , अजय भट्ट, बीएल वर्मा, अजय कुमार, देवसिंह चौहान, भगवंत खुबा, कपिल पाटील, प्रतिमा भौमिक, सुभाष सरकार, भागवत कराड, राज कुमार रंजन सिंग, भारती प्रवीण पवार, विशेश्वर टुडू, शांतुन ठाकूर, मुंजापारा महेंद्र भाई, जॉन बराला, एल मुर्गुन, निशित प्रमाणिक यांचाही समावेश आहे.