(Source: Poll of Polls)
International Tea Day : निमित्त काहीही असो, एक कप चहा तर हवाच; आंतरराष्ट्रीय चहा दिन का साजरा करतात?
International Tea Day 2025 : भारत हा जगातील दुसऱ्या क्रमांकाचा चहा उत्पादक देश आहे. बहुतांश भारतीयांच्या दिवसाची सुरुवात ही एक कप चहाने होते.
मुंबई : कुणाचे डोके दुखत असो वा कुणाला कामाचा ताण आला असेल, कुणाला एकाकी वाटत असेल किंवा कुणी मित्रांच्या घोळक्यात असेल... यावेळी सर्वांच्या ओठावर एकच वाक्य येतं आणि ते म्हणजे 'एक कप चहा होऊन जाऊ दे'. सध्या सर्वत्र पाऊस पडत असल्याने बाहेरच्या हवेत चांगलाच गारवा आला आहे. अशा वेळीही प्रत्येकाच्या घरी चहाचा बेत नक्की होत असतो. भारतीयांसाठी चहा फक्त एक पेय नाही तर तो त्यांच्या जगण्याचा एक अविभाज्य भाग आहे. जगभरातही हीच परिस्थिती आहे. त्याचमुळे 21 मे रोजी आंतरराष्ट्रीय चहा दिन (International Tea Day) साजरा केला जातो.
आपल्या जीवनातील चहाचे महत्व तसेच चहाच्या मळ्यात काम करणाऱ्या कामगारांच्या समस्येकडे लक्ष वेधण्यासाठी आंतरराष्ट्रीय स्तरावर चहा दिन साजरा केला जातो. तसेच चहाच्या आंतरराष्ट्रीय व्यापाराला प्रोत्साहन देण्यासाठीही हा दिवस साजरा केला जातो.
'चाय भी इश्क़ जैसी है, जिसकी आदत पड गयी तो वो कभी छुटती ही नहीं' असं गंमतीनं म्हटलं जातं. आपल्याकडे चहाप्रेमी काही कमी नाहीत. निमित्त काहीही असो, चहा हा हवाच अशीच परिस्थिती आहे. भारतीयांच्या दिवसाची सुरुवात कडक चहाने सुरू होते. कामावर असतानाही ब्रेक हे निमित्त मात्र असते, तिथेही चहाचा आस्वाद घेतला जातो. रात्री उशीरा जागायचे असेल तर चहा हाच आधार असतो.
International Tea Day History : आंतरराष्ट्रीय चहा दिवसाचा इतिहास
चहाचा शोध चीनमध्ये लागला. चीन आणि भारत हे जगातील सर्वात मोठे चहा उत्पादक देश आहेत. चहा उत्पादनामध्ये आणि त्याच्या सेवनामध्ये भारताचा चीननंतर दुसरा क्रमांक लागतो. एका आकडेवारीनुसार, भारतात दरवर्षी 8,37,000 टन चहा सेवन केला जातो. भारतानेने 2015 साली संयुक्त राष्ट्र संघटनेच्या फूड अॅन्ड अॅग्रीकल्चर ऑर्गनायझेशनला आंतरराष्ट्रीय चहा दिवसाची व्याप्ती वाढवायचा प्रस्ताव दिला. भारताचा हा प्रस्ताव 2019 साली स्वीकारण्यात आला आणि 2020 साली पहिल्यांदा संयुक्त राष्ट्र संघटनेने 21 मे हा जागतिक चहा दिवस साजरा केला.
Theme of International Tea Day 2025 : यंदाच्या चहा दिनाची थीम
दरवषी चहा दिन साजरा करताना त्याची एक थीम तयार केली जाते. त्या आधारे पुढील वर्षभर काम केलं जातं. यंदाच्या चहा दिनाची थीम ही 'टी फॉर बेटर लाईव्ह्स' (Tea for Better Lives) अशी आहे.
History Of Tea In India : भारतात चहाची सुरुवात कशी झाली?
म्यानमार आणि आसामच्या पर्वतीय भागात 1824 सालच्या दरम्यान चहाची पानं सापडली. त्यानंतर इंग्रजांनी 1836 सालापासून चहाचे उत्पादन सुरु केलं. सुरुवातीला यासाठी चीनमधून चहाचे बी मागवले जायचे. त्यानंतर आसामच्या भागातील चहाच्या बियांचा वापर सुरु झाला. भारतातील चहाचे उत्पादन हे ब्रिटनमधील चहाची मागणी पूर्ण करण्यासाठी केलं जायचं. आज चहा भारतातील सर्वात स्वस्त आणि लोकप्रिय पेय आहे. आसामचा चहा सर्व जगभर प्रसिद्ध आहे.
Benefits Of Tea : चहा पिण्याचे फायदे काय?
चहामध्ये प्रोटिन, पॉलीसॅकेराइड, पॉलिफेनॉल, मिनरल्स आणि अमिनो, कार्बनिक अॅसिड, लिग्निन आणि मिथाइलक्सैन्थिन (कॅफिन, थिओफिलाइन आणि थियोब्रोमाइन) हे घटक असतात. हे शरीराला फायदेशीर असतात. चहामध्ये फायटोकेमिकल्स असतात जे आपल्या शरीरात शक्तिशाली अॅन्टीऑक्सिडन्ट्स म्हणून कार्य करतात.
महत्त्वाच्या बातम्या
