बाबा राम रहीमला व्हीआयपी ट्रीटमेंट, एसी खोलीत रात्र घालवली

बाबा राम रहीमला रोहतकमध्ये ज्या ठिकाणी ठेवलं आहे, ती एक एसी रुम आहे. या खोलीत एसीसोबतच पाण्याचा प्यूरिफायर आणि एक सहाय्यकही देण्यात आल्याचं समजतंय.

रोहतक : बलात्कार प्रकरणी दोषी ठरलेल्या बाबा राम रहीमची रोहतक जेलमध्ये रवानगी करण्यात आली आहे, मात्र त्याला व्हीआयपी ट्रीटमेंट देण्यात येत असल्य़ाची धक्कादायक माहिती समोर येत आहे. डेरा सच्चा सौदाचा प्रमुख बाबा गुरमीत राम रहीमला बलात्कार प्रकरणात दोषी ठरवण्यात आलं. 15 वर्षांपूर्वीच्या बलात्कार प्रकरणात पंचकुला सीबीआय कोर्टाचे न्यायाधीश जगदीप सिंह यांनी काल हा निकाल दिला.

बाबा राम रहीमला रोहतकमध्ये ज्या ठिकाणी ठेवलं आहे, ती एक एसी रुम आहे. या खोलीत एसीसोबतच पाण्याचा प्यूरिफायर आणि एक सहाय्यकही देण्यात आल्याचं समजतंय. बलात्काराचा आरोप सिद्ध झाल्यावर एका दोषीला अशाप्रकारे व्हीव्हीआयपी ट्रीटमेंट दिली जात असल्यानं सरकारच्या भूमिकेवर प्रश्नचिन्ह निर्माण झालं आहे.

बाबा राम रहीम केवळ एसी रुममध्येच राहणार नाही, तर त्याला त्याचे स्वत:चे कपडे वापरण्याची मुभा देण्यात आली आहे. जेलमध्ये ठराविक प्रकारचे कपडेच वापरावे लागतात. सोबतच बाबाला 24 तास सोबत राहणारा सहाय्यकही जेल प्रशासनानं दिला आहे.

बाबा राम रहीमवर कोणते गुन्हे?

बाबा गुरमीत राम रहीमवर आयपीसीच्या कलम 376 बलात्कार आणि 506 अंतर्गत जीवे मारण्याची धमकी देण्याचा आरोप सिद्ध झाले आहेत. कोर्टानं राम रहीमला दोषी ठरवल्यानंतर त्याची रवानगी रोहतकच्या सुनारिया जेलमध्ये करण्यात आली. या जेलमध्ये बाबाला सामान्य बरॅकऐवजी आलिशान एसी रुममध्ये ठेवण्यात आल्याचं सागितलं जात आहे.

काय आहे संपूर्ण प्रकरण?

एप्रिल 2002 : 2002 मध्ये साध्वींचं लैंगिक शोषण केल्याचा आरोप बाबा गुरमीत राम रहीमवर आहेत. साध्वीने एप्रिल 2002 मध्ये तत्कालिन मीडिया, पंजाब-हरियाणा हायकोर्टाचे सरन्यायाधीश, पंतप्रधान अटल बिहारी वाजपेयी यांना पत्र लिहून राम रहीमवर लैंगिक शोषणाचा आरोप केला होता. यानंतर हायकोर्टाने 24 सप्टेंबर 2002 रोजी प्रकरणाचा तपास सीबीआयकडे सोपवला होता.

मे 2002 : तक्रारीच्या पत्राची पडताळणी केल्यानंतर तपासाची जबाबदारी सिरसा सत्र न्यायालयाच्या न्यायाधीशांवर सोपवली होती.

डिसेंबर 2002 : तक्रार योग्य असल्याचं सिद्ध झाल्यानंतर राम रहीमविरोधात कलम 376, 506 आणि 509 अंतर्गत गुन्हा दाखल करण्यात आला होता.

डिसेंबर 2003 : ह्या प्रकरणाचा तपास सीबीआयकडे सोपवण्यात आला. तपास अधिकारी सतीश डागर यांनी चौकशी सुरु केली आणि 2005-2006 मध्ये लैंगिक शोषण झालेल्या साध्वीला शोधून काढलं.

जुलै 2007 : सीबीआयने प्रकरणाचा पूर्ण तपास करुन अंबाला सीबीआय कोर्टात आरोपपत्र दाखल केलं. अंबालावरुन हे प्रकरण पंचकुला सीबीआय कोर्टात ट्रान्सफर केलं. आरोपपत्रानुसार डेरामध्ये 1999 आणि 2001 मध्ये आणखी साध्वींचंही लैंगिक शोष झालं होतं. पण त्यांचा पत्ता लागला नाही.

ऑगस्ट 2008 : प्रकरणाचा खटला सुरु झाला आणि डेरा प्रमुख राम रहीमविरोधात आरोप निश्चित करण्यात आले.

2011 ते 2016 : प्रकरणाचा खटला चालला. डेरा प्रमुख राम रहीमकडून वकील सातत्याने बाजू लढवत राहिले.

जुलै 2016 :  खटल्याच्या सुनावणीदरम्यान 52 साक्षीदारांचा जबाब नोंदवला. यामध्ये 15 सरकारकडून आणि 37 बचाव पक्षाचे होते.

जून 2017 : कोर्टाने डेरा प्रमुख बाबा राम रहीमच्या परदेश प्रवासावर बंदी घातली.

25 जुलै 2017 :  सीबीआय कोर्टाने या प्रकरणात दररोज सुनावणी करण्याचे निर्देश दिले, जेणेकडून लवकरच निकाल लावता येईल.

17 ऑगस्ट 2017 : दोन्ही बाजूंचा युक्तीवाद संपला आणि निकालासाठी 25 ऑगस्टची तारीख निश्चित करण्यात आली.