Maharashtra Drought: डोळ्यांसमोर पिकं वाळली, जनावरांसाठी चारा-पाणी नाही; बळीराजावर 'कृषीधन' विक्रीची वेळ, दुष्काळाचं भीषण वास्तव

Hingoli Crime News: घरफोडीतील आरोपीला पकडण्यासाठी गेलेल्या पोलिसांवर काठ्या, लोखंडी रॉडने हल्ला; डोळ्यांत मिरचीपूडही टाकली; हिंगोलीमधील धक्कादायक घटना

निशांत भद्रेश्वर, एबीपी माझा — Thu, 29 Oct 2026 13:33:42 +0530

Hingoli Crime News: हिंगोलीमधील एक धक्कादायक घटना समोर आली आहे. लातूर पोलिसांवर हिंगोलीत जीवघेणा हल्ला (Hingoli News) करण्यात आला. घरफोडीतील आरोपीला पकडण्यासाठी गेलेल्या पोलीस पथकावर काठ्या, लोखंडी रॉडने हल्ला करण्यात आला. तसेच पोलिसांच्या डोळ्यांत मिरचीपूड टाकली, वाहनावर दगडफेक करत आरोपी फरार झाल्याचीही माहिती समोर आली आहे.

लातूर जिल्ह्यातील अनेक घरफोड्यांमध्ये हवा असलेल्या आरोपीला पकडण्यासाठी गेलेल्या स्थानिक गुन्हे शाखेच्या पथकावर हिंगोली जिल्ह्यातील पळशी येथे जीवघेणा हल्ला करण्यात आला. मध्यरात्री आरोपीच्या घरासमोर जमलेल्या जमावाने पोलिसांवर काठ्या आणि लोखंडी रॉडने हल्ला करत त्यांच्या डोळ्यांत मिरचीपूड टाकली. या हल्ल्यात आठ पोलीस जखमी झाले असून, सहाय्यक पोलीस निरीक्षक पांडुरंग माने यांच्या डोक्याला गंभीर दुखापत झाली आहे. (Attack On Police In Hingoli)

नेमकी घटना काय?, काय घडलं? (Hingoli Crime News)

लातूर जिल्ह्यातील घरफोडीच्या गुन्ह्यांमध्ये हवा असलेला राजू मोहन शिंदे हा पळशी येथे असल्याची माहिती स्थानिक गुन्हे शाखेला मिळाली होती. त्यानुसार दोन वाहनांतून दहा पोलीस कर्मचारी आरोपीला पकडण्यासाठी रवाना झाले होते. हिंगोली पोलिसांचे दोन कर्मचारीही त्यांच्यासोबत होते. 29 ऑक्टोबर रोजी मध्यरात्री 12 वाजून 20 मिनिटांच्या सुमारास पोलीस आरोपीच्या घराजवळ पोहोचले. यावेळी अचानक जमावाने पोलिसांवर हल्ला चढवला. सहाय्यक पोलीस निरीक्षक पांडुरंग माने यांच्या डोक्यात लोखंडी रॉडने मारहाण करण्यात आली. तर फिर्यादी पोलीस उपनिरीक्षक अमर सुरेश केंद्रे यांच्याही डोक्यात काठीने मारून त्यांना जखमी करण्यात आले. इतर पोलिसांनाही मारहाण करत त्यांच्या डोळ्यांत मिरचीपूड टाकण्यात आली. जमावाने शासकीय वाहनावर दगडफेक करून काचा फोडल्या. यामध्ये अंदाजे दहा हजार रुपयांचे नुकसान झाले आहे. घटनेची माहिती मिळताच हिंगोली पोलिसांकडून अतिरिक्त मदत पाठवण्यात आली. मात्र, या गोंधळात आरोपी फरार झाला.

चौघांसह इतरांवर गुन्हा दाखल- (Hingoli News)

सदर प्रकरणी पोलीस उपनिरीक्षक अमर केंद्रे यांच्या फिर्यादीवरून हट्टा पोलीस ठाण्यात गुन्हा क्रमांक 365/2026 दाखल करण्यात आला आहे. विकी मोहन शिंदे, सुदर्शन मोहन शिंदे, सचिन मोहन शिंदे, राजू मोहन शिंदे यांच्यासह इतर तीन ते चार महिला व पुरुषांविरोधात भारतीय न्याय संहितेच्या कलम १०९, १३२, ११८(१), १२५, ११५(२), ३५२, ३५१(२), ३२४(४), १८९(२), १९१(३) आणि १९० अन्वये गुन्हा नोंदवण्यात आला आहे. आरोपीला अटक करण्यासाठी गेलेल्या पोलिसांवरच जीवघेणा हल्ला झाल्याने खळबळ उडाली असून, या प्रकरणाचा पुढील तपास हट्टा पोलीस करत आहेत.

राज्यासह देश-विदेशातील महत्वाच्या घडामोडी, VIDEO:

Hingoli Crime News: माहेरी आल्याने वाद; लाकडी ठोकळ्यानं बायकोला मारलं, सासूलाही मारहाण, घटनेनंतर जावयानं गळ्याला लावला दोर

माधव दिपके — Thu, 15 Oct 2026 11:03:40 +0530

हिंगोली : हिंगोली जिल्ह्यातून एक धक्कादायक घटना समोर आली आहे. पत्नी माहेरी राहत असल्याच्या कारणावरून झालेल्या वादातून पतीने पत्नीची हत्या केली, तर भांडण सोडवण्यासाठी आलेल्या सासूवरही जीवघेणा (Hingoli Crime News) हल्ला केला. या रक्तरंजित घटनेनंतर आरोपी जावयानेही गळफास घेऊन जीवन संपवलं आहे. हिंगोलीच्या खरवड गावात घडलेल्या या घटनेमुळे परिसरात मोठी खळबळ उडाली आहे.(Hingoli Crime News)

विशाल डोंगरे असं आरोपी पतीचं नाव असून, काही दिवसांपूर्वीच त्याच दिपालीसोबत लग्न झालं होतं. मात्र, मागील काही दिवसांपासून दिपाली पतीसोबत न राहता माहेरी आईकडे राहत होती. तिला सासरी घेऊन (Hingoli Crime News) जाण्यासाठी विशाल खरवड गावात सासरवाडीत पोहोचला होता. यावेळी तू सासरी का येत नाहीस, माहेरी का राहतेस, या कारणावरून दोघांमध्ये वाद झाला. या वादातून विशालने बाजेच्या लाकडी ठोकळ्याने दिपालीच्या डोक्यात (Hingoli Crime News) वार केले. या हल्ल्यात दिपालीचा जागीच मृत्यू (Hingoli Crime News) झाला. तर भांडण सोडवण्यासाठी आलेल्या सासू कमलबाई यांनाही विशालने गंभीर मारहाण केली. या घटनेनंतर विशालने जवळच असलेल्या झाडाला गळफास घेऊन आत्महत्या केली. जखमी कमलबाई यांच्यावर उपचार सुरू आहेत. कळमनुरी पोलीस या संपूर्ण प्रकरणाचा अधिक तपास करत आहेत.(Hingoli Crime News)

हिंगोली जिल्ह्यातील कळमनुरी तालुक्यातील खरवड शिवारात ही संतापजनक घटना घडली आहे. पतीने पत्नीच्या माहेरी जाऊन तिला बेदम मारहाण करत तिचा खून केल्याची धक्कादायक घटना घडली आहे. या हल्ल्यात सासूही गंभीर जखमी झाली असून, या कृत्यानंतर पतीनेही काही अंतरावर जाऊन गळफास घेऊन आपली जीवनयात्रा संपवली आहे. या प्रकरणी गुरुवारी कळमनुरी पोलीस ठाण्यात गुन्हा दाखल करण्यात आला असून, वरिष्ठ पोलीस अधिकाऱ्यांनी घटनास्थळी भेट देऊन पाहणी केली आहे.(Hingoli Crime News)

Hingoli Crime News: नेमकी घटना काय?

कळमनुरी तालुक्यातील खरवड येथील दीपाली पाईकराव हिचा विवाह काही दिवसांपूर्वीच विशाल डोंगरे याच्यासोबत झाला होता. विवाहानंतर काही दिवस सर्व काही सुरळीत चालल्यानंतर विशालने दीपालीला त्रास देण्यास सुरुवात केली होती. या त्रासामुळे त्रस्त झालेली दीपाली मागील काही दिवसांपासून आपल्या माहेरी खरवड येथे राहण्यासाठी आली होती.दरम्यान, बुधवारी सायंकाळच्या सुमारास विशाल हा आपल्या सासुरवाडीला म्हणजेच खरवड येथे पोहोचला. त्यावेळी घरी त्याची पत्नी दीपाली आणि सासू कमलबाई या दोघीच होत्या. यावेळी विशाल आणि दीपाली यांच्यात वाद सुरू झाला. शाब्दिक चकमकीनंतर, तू माझ्यासोबत येण्याऐवजी माहेरी का आलीस, या कारणावरून संतापलेल्या विशालने बाजेच्या लाकडी ठोकळ्याने दीपालीला बेदम मारहाण करण्यास सुरुवात केली. या भीषण मारहाणीत दीपालीचा जागीच मृत्यू झाला.

तसेच, हे भांडण सोडवण्यासाठी आलेल्या सासू कमलबाई यांच्यावरही विशालने प्राणघातक हल्ला केला, ज्यामध्ये त्या गंभीर जखमी झाल्या आहेत. पत्नीची हत्या आणि सासूला जखमी केल्यानंतर, विशालने घटनास्थळापासून काही अंतरावर जाऊन स्वतः गळफास लावून आत्महत्या केल्याचे समोर आले आहे. याप्रकरणी पोलीस अधिक तपास करत आहेत.

मुख्यमंत्र्यांकडून 5 हजारांची अग्रीम मदत; हिंगोलीत शेतकऱ्यांचा संताप, तहसीलसमोर उधळल्या 5 हजार रुपयांच्या नोटा

माधव दिपके — Wed, 14 Oct 2026 16:58:40 +0530

हिंगोली : राज्यात दुष्काळाची भीषण (drought) परिस्थिती असून 300 हून अधिक तालुक्यात सरकारने दुष्काळ जाहीर केला आहे. सरकारने दुष्काळाच्या पार्श्वभूमीवर दिवाळीपूर्वी शेतकऱ्यांना पाच हजार रुपयांची अग्रीम मदत थेट बँक खात्यात जमा होणार असल्याचं जाहीर केलं आहे. मात्र, सरकारच्या या मदतीवरून हिंगोलीतील शेतकरी (Farmers) संघटनांसह विरोधकांनी जोरदार हल्लाबोल केला आहे. तसेच, राज्यातील अनेक भागात शेतकऱ्यांनी संताप व्यक्त केला. विशेष म्हणजे, हिंगोली (Hingoli) जिल्ह्यात शेतकऱ्यांनी तहसील कार्यालयासमोर चक्क 5000 रुपयांच्या नोटांची उधळण केल्याचंही पाहायला मिळालं.

हिंगोलीच्या गोरेगाव अप्पर तहसील कार्यालयासमोर शेतकऱ्यांनी पाच हजार रुपयांची उधळण करत सरकारची मदत उधळून लावली आहे. जिल्ह्यात कोरड्या दुष्काळाचे भीषण सावट असताना शेतकऱ्यांना तुटपुंजी मदत दिल्याने शेतकरी संतप्त झाले असून सरकारविरोधात जोरदार घोषणाबाजी केली जात आहे. दुसरीकडे आमदार रोहित पवार यांनीही 5 हजारांची मदत म्हणजे सरकारने शेतकऱ्यांची बोळवण केल्याचं म्हटलंय. दरम्यान, सरकारने शेतकऱ्यांना हेक्टरी एक लाख रुपये मदत करावी अशी मागणी माजी मंत्री हर्षवर्धन पाटील केली आहे. आम्ही या दुष्काळी परिस्थितीत सरकारसोबत आहोत आम्हाला कोणतेही राजकारण करायचं नाही म्हणून आम्ही सरकारला उपाय योजना देखील सुचवत आहोत. सरकारनं कर्ज काढावं आणि थेट शेतकऱ्यांना मदत करावी.

नेत्यांच्या चहापानाचा खर्च अधिक - रोहित पवार

दुष्काळाच्या आगीत शेतकरी होरपळून निघत असल्याने शेतकऱ्यांना हेक्टरी किमान 1 लाख रुपये, तर शेतमजुरांना 25,000 रुपये मदत देण्याची आमची मागणी आहे. पण सरकारने अग्रीम रक्कम म्हणून केवळ 5,000 रुपयांवर शेतकऱ्यांची बोळवण केली. नेत्यांच्या आणि मंत्र्यांच्या एका चहापानाचा खर्चही यापेक्षा कितीतरी मोठा आहे, असे म्हणत रोहित पवार यांनी शासनाच्या मदतीवरुन नाराजी व्यक्त केली आहे. आज शेतीचा मशागत खर्चच हेक्टरी 30 ते 50 हजार रुपयांवर गेलाय आणि अशा परिस्थितीत जाहिरातींवर कोट्यवधींची उधळपट्टी करणारं हे सरकार 5 हजार रुपयांचं चॉकलेट शेतकऱ्यांच्या हातावर टेकवत असेल, तर अन्नदात्याची अशी चेष्टा करताना सरकारला लाज कशी वाटत नाही?. हा बळीराजाचा केवळ अपमानच नाही, तर त्याच्या परिस्थितीची क्रूर थट्टा आहे! सरकारने शेतकऱ्यांना मदत म्हणून हेक्टरी 1 लाख रुपयांपैकी अग्रीम रक्कम म्हणून 30 ते 35 हजार रुपये आणि शेतमजुरांना प्रतिकुटुंब 25 हजार रुपयांपैकी अग्रीम रक्कम म्हणून 10 हजार रुपये द्यावेत. अन्यथा, लोक नेत्यांना आणि मंत्र्यांना दिवाळी साजरी करू देणार नाहीत आणि गावातही फिरू देणार नाहीत, असेही रोहित पवारांन म्हटले.

हेही वाचा

अंगणवाडी सेविका, मदतनीसांना दिवाळीची भाऊबीज; सरकारकडून 2000 रुपयांची घोषणा, 42 कोटींच्या निधींची तरतूद

पत्रकार -विद्यार्थी ताब्यात, दिल्लीला युद्धभूमी बनवलं; ज्ञानेश कुमारांकडे पंतप्रधान मोदींचं असं कुठलं सिक्रेट? अभिजीत दिपकेंचा सवाल

माधव दिपके — Tue, 13 Oct 2026 13:37:18 +0530

Abhijeet Dipke: निवडणूक प्रक्रियेतील घोळ आणि एसआयआरच्या मुद्द्यावरून मुख्य निवडणूक आयुक्त ज्ञानेश कुमार (Dyanesh Kumar) यांना पदावरून हटवा या मागणीसाठी कॉकरोच जनता पार्टीचे (CJP) आंदोलन पांगवण्याचा पुन्हा एकदा प्रयत्न झाला. दिल्लीमध्ये सुरू असलेल्या आंदोलनादरम्यान पोलिसांकडून पत्रकार वकील आणि विरोधी पक्षांच्या खासदारांना ताब्यात घेतलं जात आहे. अजिंक्य, सौरव दास आणि अशुतोष रांका यांना पोलिसांनी वेगवेगळ्या ठिकाणी ठेवलं असून त्यांच्यासोबत अन्य 11 जणांना ही वेगवेगळ्या ठिकाणी ठेवण्यात आलं आहे. पोलीस वकिलांनाही भेटू देत नसल्याची माहिती अभिजीत दिपके (Abhijeet Dipke) यांनी दिली. आजीच्या निधनानंतर ते सध्या त्यांच्या मूळ गावी हिंगोलीत आहेत. कॉकरोच जनता पार्टीच्या लीगल रत्ना सिंग यांच्याशी फोनवर संवाद साधत त्यांनी दिल्लीतील परिस्थितीचा आढावा घेतला. देशाच्या राजधानीला तुम्ही जेल बनवलं. युद्धभूमी बनवलं. एका ज्ञानेश कुमारला वाचवण्यासाठी.. असं काय सिक्रेट आहे ज्ञानेश कुमारांजवळ?' असा सवालही अभिजीत दिपके यांनी केला.

नेमकं काय म्हणाले अभिजीत दिपके ? (Abhijeet Dipke)

'कॉकरोच जनता पार्टीची कायदा तज्ञ रत्ना सिंगशी आता बोललो. आशुतोष रांका, अजिंक्य आणि सौरव दास यांना पोलिसांनी वेगवेगळ्या ठेवलं आहे. त्यांच्यासोबत जे 11 कार्यकर्ते होते त्यांना वेगळीकडे नेण्यात आलं आहे. जेव्हा आमचे वकील तिथे पोहोचले, त्यावेळी पोलीस आमच्या वकिलांना आतही शिरू देत नाहीत. आमचे इतर कार्यकर्ते जेव्हा पोलीस ठाण्यात जाऊन त्यांना विचारत होते की तुम्ही ताब्यात का घेतलं आहे? किती वेळ आत ठेवणार? त्यांना धमकावले जात आहे, की तुम्हालाही ताब्यात घेऊ. देशात पूर्णपणे हुकूमशाही सुरू आहे. यात कुठलाही नियम कायदा दिसत नाही. तुम्ही वकिलांना तरी भेटू देऊ शकता. वकिलांना का भेटू दिलं जात नाही? तुम्ही लोकांना बेकायदेशीर ताब्यात घेत आहात, आणि त्यानंतर वकिलांची भेटही घेऊ देत नाही. तुम्हाला नेमकं कशाचं भय आहे?' सुप्रीम कोर्टाने सांगितल्यानंतरही त्यांच्या आदेशाचं उल्लंघन होत असल्याचा आरोप अभिजीत दिपके यांनी केला.आज पत्रकारांना ताब्यात घेतलं जात आहे, वकिलांना अडवलं जात आहे आणि विरोधी पक्षांच्या खासदारांनाही ताब्यात घेत असल्याचं ते म्हणाले.

'ज्ञानेश कुमार यांच्या राजीनाम्यापर्यंत आंदोलन सुरूच राहणार'

अभिजीत दिपके यांनी ज्ञानेश कुमार यांच्या राजीनाम्याची मागणी करत आंदोलन सुरू ठेवण्याचा निर्धार केलाय. ते म्हणाले 'एकदा नाही शंभर वेळा तुरुंगात टाका आम्ही पुन्हा रस्त्यावर येऊ, मात्र ज्ञानेश कुमार यांचा राजीनामा होत नाही तोपर्यंत आंदोलन सुरूच राहणार' असं ते म्हणाले. अभिजीत इतके पुढे म्हणाले 'ज्ञानेश कुमार पंतप्रधान नरेंद्र मोदींसाठी इतके महत्त्वाचे का आहेत हेच मला समजत नाही. ज्ञानेश कुमार कडे असं काय सिक्रेट आहे की, तुम्ही पूर्ण दिल्ली ठप्प केली. विरोधी पक्षांना ताब्यात घेतलं. विद्यार्थ्यांना अटक केली. पत्रकारांना अटका केल्या. देशाच्या राजधानीला तुम्ही जेल बनवलं. युद्धभूमी बनवलं. एका ज्ञानेश कुमारला वाचवण्यासाठी.. असं काय सिक्रेट आहे ज्ञानेश कुमारांजवळ?' असा सवालही अभिजीत दिपके यांनी केला.

Abhijeet Dipke: आजीला शेवटचं पाहता आलं नाही, चितेपाशी जाताच अभिजीत दिपके ढसाढसा रडायला लागले

माधव दिपके — Mon, 12 Oct 2026 08:58:31 +0530

Abhijeet Dipke: आजीला शेवटचं पाहता आलं नाही, चितेपाशी जाताच अभिजीत दिपके ढसाढसा रडायला लागले

Abhijeet Dipke: तिकडे दिल्ली पोलिसांनी अभिजीत दिपकेंना पकडलं, इकडे आजीने अखेरचा श्वास घेतला

डॉ. कृष्णा केंडे — Sat, 10 Oct 2026 12:59:02 +0530

Abhijeet Dipke: केंद्रीय निवडणूक आयोगाचे मुख्य आयुक्त ज्ञानेश कुमार यांच्याविरोधात आंदोलनासाठी दिल्लीत गेलेले कॉकरोच जनता पार्टीचे संस्थापक अभिजीत दिपके (Abhijeet Dipke) यांच्या आजीचे निधन झाल्याची माहिती समोर आली आहे. अभिजीत दिपके शनिवारी सकाळी आंदोलनासाठी दिल्लीत गेले होते. मात्र, दिल्ली पोलिसांनी त्यांचे विमान धावपट्टीवर उतरताच त्यांना ताब्यात घेतले आणि त्यानंतर त्यांना अज्ञातस्थळी नेण्यात आले. यानंतर अभिजीत दिपके यांच्या आई-वडिलांना केंद्र सरकार आणि दिल्ली पोलिसांच्या कृतीविरोधात आगपाखड केली होती. त्यांनी काहीवेळापूर्वीच प्रसारमाध्यमांशी संवाद साधताना आपल्या मुलाची पाठराखण केली होती. मात्र, यानंतर काहीवेळातच अभिजीत दिपके यांच्या वडिलांच्या आईचे निधन झाल्याचे वृत्त समोर आले आहे. हिंगोलीतील संतूक पिंपरी या मूळगावी अभिजीत दिपके यांच्या आजीचे प्रदीर्घ आजाराने निधन झाले. त्यामुळे आता अभिजीत दिपके यांना दिल्लीतील आंदोलन सोडून महाराष्ट्रात परत यावे लागण्याची शक्यता आहे. मुख्य निवडणूक आयुक्त ज्ञानेश कुमार यांच्याविरोधात सीजेपीने पुकारलेले आंदोलन आता निर्णायक टप्प्यावर आहे. सावित्रीबाई शंकर दिपके असे त्यांचे नाव होते. त्या 85 वर्षांच्या होत्या. अभिजीत दिपके निर्णायक लढ्यासाठी दिल्लीत असताना अभिजीत यांच्या आजीचं निधन झाल्याने कुटुंबीयांवर दुःखाचा डोंगर कोसळला आहे. (Delhi Protest news)

गेल्या काही महिन्यांपासून अभिजीत दिपके यांची आजी आजारी होती. त्यांच्यावर रुग्णालयात उपचार सुरु होते. आज सकाळी त्यांची प्राणज्योत मालवल्याची माहिती समोर आली आहे. थोड्याचवेळात अभिजीत दिपके यांच्या आई-वडिलांसह इतर कुटुंबीय त्यांच्या अंत्यसंस्कारासाठी हिंगोलीतील संतूक पिंपरीच्या दिशेने रवाना होणार आहेत. मात्र, आता अभिजीत दिपके काय करतात, हे बघावे लागेल. त्यांना महाराष्ट्रात परत यायचे झाल्यास दिल्ली पोलीस त्यांना सोडणार का, हे बघावे लागेल.

Abhijeet Dipke Family : संसदेत डाकू बसलेत, गुंडांना लोकशाही नकोय, अभिजीत दिपकेंचे आई-वडील संतापले

अभिजीत दिपके यांना दिल्लीत पोलिसांनी ताब्यात घेतल्यानंतर त्यांच्या आई-वडिलांना नाराजी व्यक्त केली. वडील भगवान दिपके म्हणाले की, इतके पोलीस दिल्लीमध्ये आणलेत कशा मला हेच कळत नाही की, विद्यार्थ्यांच साधं प्रदर्शन आहे. इथे काय चंबलच्या खोऱ्यामध्ये डाकू जमा झालेत का? डाकू जमा झालेत का दिल्लीमध्ये? डाकू तर पूर्ण संसदेमध्ये बसलेले आहेत. एवढं विद्यार्थ्यांच्या प्रोटेस्टसाठी एवढं हे काय करतात? पोलीस फोर्स का लावायची गरज आहे?, असा सवाल दिपके यांच्या वडिलांनी उपस्थित केला. तर दिपकेंच्या आईनेही केंद्र सरकारवर टीका केली. मी बातमी पाहिली पोलिसांनी तिघांना विमानातूनच ताब्यात घेतलं, सरकारने ते चुकीचं केलं ना, विमानातून ताब्यात घेतलं, एवढं काय या पोरांनी त्यांच वाईट केलं होतं, त्यांना विमानातून ताब्यात घ्यायला, तुम्ही बलात्काराच्या घरी का नाही जात, मग त्यांच्या घरी जाऊन तुम्ही अटक करता का? करत नाही ना, मग याच यांना काय एवढं वाईट केलं होत या पोरांनी त्यांना प्लेनमध्ये जाऊन अटक करायचं काहीच गरज नव्हती, असे दिपकेंच्या आईने म्हटले.

आणखी वाचा

Abhijeet Dipke deatin Delhi Police: अभिजीत दिपकेंचं विमान दिल्लीत लँड होताच हायव्होल्टेज ड्रामा! महिला पोलीस अधिकाऱ्यांना पुढे केलं, विमानात गेल्या अन् अभिजीत दिपकेंना म्हणाल्या...

पेट्रोल पंपाचा ताबा घेण्यासाठी गेलेल्या अधिकाऱ्याला मालकाने अन् पोराने जागीच संपवलं, हिंगोलीत हादरलं, केंद्रीय पेट्रोलियम मंत्र्यांचे ट्विट

माधव दिपके — Wed, 7 Oct 2026 15:25:42 +0530

Hingoli Crime: पेट्रोल पंपाचा ताबा घेण्यासाठी गेलेल्या इंडियन ऑइलच्या अधिकाऱ्यावर धारदार शस्त्राने हल्ला करण्यात आला आणि या हल्ल्यात त्यांचा जागीच मृत्यू झाल्याची धक्कादायक घटना हिंगोलीत घडली आहे. चोंढी येथील पेट्रोल पंपावर हा प्रकार घडला. ताबा घेण्यावरून झालेला वाद इतका विकोपाला गेला की, पंप मालक आणि त्याच्या मुलाने कंपनीचे व्यवस्थापक महेश शेळके यांच्यावर हल्ला केल्याची माहिती आहे. हल्ल्यानंतर अधिकार्याचा मृतदेह रक्ताच्या थारोळ्यात पडला होता. या घटनेने परिसरात एकच खळबळ उडाली आहे. (Hingoli Crime)

नेमके घडले काय?

इंडियन ऑइल कंपनीचे व्यवस्थापक महेश शेळके हे चोंढी येथील पेट्रोल पंपाचा ताबा घेण्यासाठी त्यांच्या पथकासह गेले होते. यावेळी पेट्रोल पंपाचा ताबा घेण्यावरून कंपनीच्या पथकाची पंप मालकाशी बाचाबाची झाली. वाद वाढल्यानंतर पंप मालक आणि त्याच्या मुलाने महेश शेळके यांच्यावर हल्ला केल्याचं सांगितलं जातंय. धारदार शस्त्राने शेळके यांच्यावर वार करण्यात आले. हा हल्ला पेट्रोल पंपाच्या बाहेर झाल्याची माहिती आहे. गंभीर जखमी झालेल्या शेळके यांचा घटनास्थळीच मृत्यू झाला.

या प्रकरणी कुरुंदा पोलीस ठाण्यात पाच आरोपींविरोधात गुन्हा दाखल करण्यात आला आहे. घटनेनंतर पोलिसांनी तपास सुरू केला आहे. हल्ल्याचं नेमकं कारण आणि घटनेमागील इतर बाबींचा तपास केला जात आहे.दरम्यान, या घटनेची केंद्रीय पेट्रोलियम मंत्री हरदीप सिंह पुरी यांनी गंभीर दखल घेतली आहे. त्यांनी सोशल मीडियावर पोस्ट करत महेश शेळके यांच्या हत्येचा निषेध केला.

Deeply saddened and shocked by the tragic incident in which Shri Mahesh Shelke, Manager (Retail Sales), IndianOil, lost his life in Maharashtra while discharging his official duties. He was a part of a team carrying out the takeover of an IndianOil retail outlet in Hingoli district when he was brutally attacked with a sharp weapon. I strongly condemn this heinous and unacceptable act of violence. I offer my heartfelt condolences to the bereaved family in their hour of unimaginable grief and shock. @PetroleumMin and @IndianOilcl firmly stand with them and will extend all possible support. The issue has been taken up with the senior-most officials of the Maharashtra Government and Police to ensure swift and strict action against those responsible, in accordance with law. The safety, dignity and security of our energy-sector personnel, who work tirelessly to serve the nation, remain paramount. May the departed soul rest in peace. Om Shanti. 🙏
— Hardeep Singh Puri (@HardeepSPuri) October 7, 2026

हल्लेखोरांवर कठोर कारवाई करण्याची मागणी केली आहे.पेट्रोल पंपाचा ताबा घेण्याच्या वादातून थेट कंपनीच्या अधिकाऱ्याची हत्या झाल्याने या घटनेने हिंगोलीत खळबळ उडाली आहे.

Hingoli: हिंगोलीत अग्नितांडव! आगीत होरपळून दोन मृत्यू होताच प्रशासनाला जाग; धडक कारवाईत सुमारे 2 क्विंटल फटाके जप्त

माधव दिपके — Tue, 6 Oct 2026 15:50:09 +0530

Hingoli: हिंगोली शहरातील मारवाडी गल्लीमध्ये राहत्या घरात अवैधरित्या साठवलेल्या फटाक्यांना आग लागून (5 ऑक्टोबर) मोठी दुर्घटना घडल्यानंतर अखेर प्रशासन ॲक्शन मोडमध्ये आलं आहे. या दुर्घटनेत तीन घरं जळून खाक झाली, दोन जणांचा होरपळून मृत्यू झाला, तर दहा ते बारा जण गंभीर जखमी झाले. या घटनेनंतर हिंगोली शहरातील अवैध फटाका साठ्यांविरोधात महसूल, नगरपालिका आणि पोलीस प्रशासनाने संयुक्तपणे धडक कारवाई सुरू केली आहे. (Hingoli Fire)

आज हिंगोली शहरातील विविध ठिकाणी संशयित व्यापाऱ्यांच्या घरांवर आणि अवैध फटाका साठ्यांवर छापे टाकण्यात आले. या कारवाईदरम्यान आतापर्यंत ट्रॅक्टरची एक ट्रॉली भरून फटाके जप्त करण्यात आले आहेत. जवळपास 2 क्विंटल वजनाचा फटाक्यांचा साठा जप्त केल्याची माहिती हिंगोली नगरपालिकेच्या मुख्याधिकारी प्रांजली मुंडे यांनी दिली.

अग्नितांडवाचा थरकाप उडवणारा व्हिडिओ

दरम्यान, हिंगोली शहरात झालेल्या अग्नितांडवाचा आणखी एक व्हिडिओ समोर आला आहे. फटाक्यांच्या गोदामाला आग लागल्यानंतर परिसरात आगीचे प्रचंड लोळ उठताना या व्हिडिओमध्ये दिसत आहेत. आग वाढत असताना जीव वाचवण्यासाठी नागरिकांची अक्षरशः धावपळ सुरू होती. काही क्षणांतच आगीने रौद्ररूप धारण केल्याने परिसरातील नागरिकांमध्ये भीतीचं वातावरण निर्माण झालं होतं. या दुर्घटनेदरम्यान अग्निशमन दलाची गाडी फटाक्यांच्या गोदामासमोर उभी होती. या गाडीमुळे समोरील घरातील तीन जणांचे जीव वाचल्याची माहिती समोर आली आहे. या घटनेची तीव्रता समोर आलेल्या व्हिडिओतून स्पष्टपणे दिसून येत आहे.

घरांमध्ये अवैध फटाका साठा; प्रशासनाची तपासणी सुरू

मारवाडी गल्लीतील दुर्घटनेनंतर हिंगोली शहरातील अवैध फटाका साठ्यांची तपासणी प्रशासनाकडून सुरू करण्यात आली आहे. महसूल, नगरपालिका आणि पोलीस प्रशासनाच्या संयुक्त पथकाकडून विविध ठिकाणी छापे टाकण्यात येत आहेत.ज्या ठिकाणी कोणतीही कागदपत्रं, एनओसी किंवा परवाना नसताना फटाक्यांचा साठा करण्यात आला आहे, अशा साठ्यांवर जप्तीची कारवाई करण्याचे आदेश जिल्हाधिकाऱ्यांनी दिल्याची माहिती मुख्याधिकारी प्रांजली मुंडे यांनी दिली. त्यानुसार सकाळपासून हिंगोली शहरात कारवाई सुरू असून ट्रॅक्टर भरून फटाके जप्त करण्यात आले आहेत. आतापर्यंत सुमारे 2 क्विंटल वजनाचा फटाक्यांचा साठा जप्त करण्यात आला आहे.

'दोन नागरिकांच्या जीवावर बेतलं'

हिंगोली नगरपालिकेच्या मुख्याधिकारी प्रांजली मुंडे यांनी प्रशासनाच्या कारवाईबाबत माहिती देताना सांगितलं की, ज्यांच्याकडे कोणतीही कागदपत्रं, एनओसी किंवा परवाना नाही आणि रहिवासी भागात अवैधरित्या फटाक्यांचा साठा करून ठेवला आहे, अशा साठ्यांवर जप्तीचे आदेश जिल्हाधिकाऱ्यांनी दिले आहेत. दिवाळीच्या पार्श्वभूमीवर शहरात फटाक्यांचा स्फोट होऊन मोठी दुर्घटना घडल्याने प्रशासनाने ही कारवाई सुरू केली आहे. प्रत्येक सणाच्या आधी आग प्रतिबंधक उपाययोजना आणि एनओसीसंदर्भात संबंधित संस्थांना सूचना देणारी पत्रकं माध्यमांमध्ये प्रसिद्ध केली जातात. नागरिकांना फायर ऑडिट करण्याचं आवाहनही केलं जातं. मात्र त्याला नागरिकांकडून अपेक्षित प्रतिसाद मिळत नसल्याचं त्या म्हणाल्या.रहिवासी भागात एवढ्या मोठ्या प्रमाणात फटाक्यांचा साठा करण्यात आला आणि त्यात दोन नागरिकांच्या जीवावर बेतलं. त्यामुळे आता प्रशासनाकडून अशा अवैध साठ्यांवर कारवाई केली जात असल्याचं त्यांनी स्पष्ट केलं.

जप्त फटाक्यांची विल्हेवाट लावणार

दरम्यान, आतापर्यंत ज्या ठिकाणांहून फटाक्यांचा अवैध साठा जप्त करण्यात आला आहे, त्या संबंधितांवर गुन्हे दाखल करण्याचे निर्देश जिल्हाधिकाऱ्यांनी दिल्याची माहितीही समोर आली आहे. जप्त करण्यात आलेल्या फटाक्यांची विल्हेवाट लावण्यात येणार आहे. हिंगोली शहरातील मारवाडी गल्लीमध्ये 5 ऑक्टोबरच्या सायंकाळी घरात ठेवलेल्या फटाक्यांना आग लागून दोन जणांचा होरपळून मृत्यू झाला होता. दहा ते बारा जण गंभीर जखमी झाल्यानंतर आता प्रशासनाने रहिवासी भागातील फटाका साठ्यांविरोधात कारवाई सुरू केली आहे. ही कारवाई आज दिवसभर सुरू राहणार असल्याची माहिती प्रशासनाकडून देण्यात आली आहे.

हिंगोलीत फटाक्याच्या गोदामाला भीषण आग; दोघांचा होरपळून मृत्यू, 10 ते 12 जखमी, परिसरात खळबळ

माधव दिपके — Mon, 5 Oct 2026 21:36:36 +0530

हिंगोली : शहरातील मारवाडी गल्लीत फटाक्याच्या गोदामाला भीषण आग (Fire) लागल्याची घटना घडली. फटाक्याचे गोदाम असल्याने दारुगोळ्याचा स्फोट होऊन आगीने काही क्षणातच रौद्ररूप धारण केलं. या आगीत दोन जणांचा होरपळून मृत्यू झाल्याची प्राथमिक माहिती आहे, तसेच 10 ते 12 जण जखमी झाले आहेत. आगीबाबत माहिती मिळताच, आग विझवण्यासाठी अग्निशमन दलाच्या गाड्या घटनास्थळी दाखल झाल्या असून आग आटोक्यात आणण्याचे प्रयत्न सुरू होते. मात्र, आग विझवण्यासाठी गेलेल्या अग्निशमन (Fire brigade) दलाच्या गाडीलाच आग लागल्याचंही पाहायला मिळालं.

शहरातील मारवाडी गल्ली म्हणजेच रहिवासी भागात इतक्या मोठ्या प्रमाणात फटाके ठेवल्याने परिसरात मोठी खळबळ उडाली असून, आगीमुळे नागरिकांमध्ये भीतीचं वातावरण निर्माण झालं आहे. या आगीमुळे मोठ्या प्रमाणात फटाके फुटत आहेत, त्यामुळे आग विझवण्यासाठी अडथळा निर्माण होत आहे. आग नेमकी कशामुळे लागली? या आगीत किती नुकसान झालं? याची माहिती अद्याप समोर आलेली नाही. दरम्यान, घटनास्थळी अग्निशमन दलाकडून आग आटोक्यात आणण्याचे प्रयत्न युद्धपातळीवर सुरू आहेत. मात्र, या आगीच्या घटनेत 2 जणांचा होरपळून मृत्यू झाला आहेत तर 10-12 जण जखमी झाले आहेत जखमींना हिंगोलीच्या शासकीय वैद्यकीय महाविद्यालयात उपचारासाठी दाखल करण्यात आले आहे. तर, मृत्यू झालेल्यांचे मृतदेह देखील रुग्णालयात आणण्यात आले आहेत. या घटनेनं परिसरात खळबळ उडाली असून प्रशासन खडबडून जागे झाल्याचं पाहायला मिळत आहे.

तीन घरांना लागली आग

दरम्यान, या दुर्घटनेत हिंगोली शहरातील 3 घरात आग लागली असून आगीत दोन जणांचा होरपळून मृत्यू झाला आहे, तर 10-12 जण गंभीर जखमी असल्याची माहिती आहे. घरात फटाके असल्याने फटाक्यांना आधी आग लागली, त्यानंतर घरात आग भडकत केली. फटाक्यामुळे आग विझवायला अडथळा झाला होता, काहीच क्षणात आगीने रौद्ररूप धारण केले. फटाक्यांना नेमकं आग कशामुळे लागली हे अद्याप अस्पष्ट आहे. मात्र, घटनेनंतर अग्निशामक दलाच्या वतीने आग विझवण्याचे युद्ध पातळीवर प्रयत्न सुरु होते.

हेही वाचा

Video: मी तुमच्या रागात सामिल व्हायला आलोय; राज ठाकरेंचा पुण्यातील MPSC आंदोलनात सहभाग, सांगितली 'मन की बात'

Maharashtra Drought: डोळ्यांसमोर पिकं वाळली, जनावरांसाठी चारा-पाणी नाही; बळीराजावर 'कृषीधन' विक्रीची वेळ, दुष्काळाचं भीषण वास्तव

जयदीप मेढे — Mon, 5 Oct 2026 07:53:46 +0530

Maharashtra Drought: राज्यभरात यंदा पावसाने दडी मारल्याने दुष्काळाचे (Drought) सावट दिवसेंदिवस अधिक गडद होत चालले आहे. पावसाअभावी शेतातील उभी पिके डोळ्यांदेखत वाळून गेली आहेतच; पण आता सर्वात मोठा प्रश्न उभा राहिला आहे तो म्हणजे गोठ्यातील जनावरांना जगवायचं कसं? चारा आणि पाण्याच्या भीषण टंचाईमुळे शेतकऱ्यांवर पोटच्या लेकरासारखं जतन केलेलं 'कृषीधन' कवडीमोल दराने विकण्याची वेळ आली आहे. एकीकडे जनावरांची विक्री, दुसरीकडे दराअभावी उभ्या पिकांवर फिरवले जाणारे रोटावेटर आणि तिसरीकडे प्रशासकीय पंचनाम्यांची संथ गती, अशा संकटात महाराष्ट्राचा बळीराजा पूर्णपणे हवालदिल झाला आहे.

Hingoli News: हिंगोलीत भीषण वास्तव, चारा-पाण्याअभावी कृषीधन बाजारात!

मराठवाड्यात (Marathwada) यंदा पावसाने पूर्णपणे पाठ फिरवल्याने चारा आणि पाण्याची तीव्र टंचाई निर्माण झाली आहे. हिंगोली (Hingoli) जिल्ह्यातील प्रसिद्ध जवळा बाजारच्या आठवडी बाजारात दुष्काळाच्या या भीषण वास्तवतेचे मन हेलावून टाकणारे चित्र पाहायला मिळाले. शेतात चारा आणि गोठ्यात पाणी उरले नसल्याने शेतकऱ्यांनी आपल्या गाई, म्हशी आणि बैलजोड्या विक्रीसाठी बाजारात आणल्या आहेत.

मात्र, संकट इथेच थांबत नाही. जनावरे विकण्यासाठी बाजारात आणली तरी खरेदीदारांची संख्या नगण्य आहे. व्यापारी व खरेदीदार जनावरांना अपेक्षेपेक्षा अत्यंत कमी दर देत आहेत. त्यामुळे 'जनावरं बाजारात विकावीत तर योग्य भाव मिळत नाही आणि घरी ठेवावीत तर चारा-पाणी नाही', अशा भीषण दुहेरी कोंडीत शेतकरी अडकला आहे. जनावरं विकण्याची वेळ येण्यापूर्वी प्रशासनाने तातडीने चारा छावण्या आणि पाण्याच्या टाक्या सुरू कराव्यात, अशी आर्त हाक शेतकरी मारत आहेत.

Jalgaon News: जळगावात 5 एकर केळीच्या बागेवर फिरवला रोटावेटर

दुष्काळी परिस्थितीशी सामना करत उत्तर महाराष्ट्रातही शेतकऱ्यांचे प्रचंड हाल होत आहेत. जळगाव (Jalgaon) जिल्ह्यातील मुक्ताईनगर तालुक्यातील विष्णू समाधान इंगळे या शेतकऱ्याची कहाणी काळजाचा ठोका चुकवणारी आहे. भीषण दुष्काळात अतिशय कष्टाने आणि पाण्याचा थेंब अन् थेंब वाचवून त्यांनी 5 एकरांवर केळीची बाग उभी केली होती.

मात्र, बाजारात केळीचे दर प्रचंड कोसळल्याने लागवडीचा आणि उत्पादनाचा खर्च निघणेही अशक्य झाले. अखेर उघड्या डोळ्यांनी होणारे नुकसान न पाहवल्याने आणि नैराश्यातून विष्णू इंगळे यांनी आपल्या 5 एकरातील उभ्या केळीच्या बागेवर रोटावेटर फिरवून बाग नष्ट करून टाकली. "शासनाने आणि पीक विमा कंपनीने तातडीने आर्थिक मदत करावी, अन्यथा जगणे कठीण होईल," अशी मागणी त्यांनी केली आहे.

Nashik News: नाशिकमध्ये पंचनाम्यांची प्रक्रिया वेगात; आठ दिवसांत अहवाल सादर होणार

दरम्यान, दुष्काळाच्या या तीव्र झळांच्या पार्श्वभूमीवर नाशिक (Nashik) जिल्हा कृषी विभागाने बाधित शेतकऱ्यांना दिलासा देण्यासाठी हालचाली सुरू केल्या आहेत. नाशिक जिल्ह्यातील दुष्काळग्रस्त तालुक्यांमध्ये पिकांच्या नुकसानीचे पंचनामे करण्याची प्रक्रिया वेगाने सुरू करण्यात आली आहे.

नाशिक जिल्ह्याचे कृषी अधीक्षक रवींद्र माने यांनी दिलेल्या माहितीनुसार, "कोणताही बाधित शेतकरी शासनाच्या दुष्काळी मदतीपासून वंचित राहणार नाही याची पूर्ण खबरदारी घेतली जात आहे. पुढील आठ दिवसांत संपूर्ण नुकसानीचा सविस्तर अहवाल तयार करून तो राज्य शासनाकडे पाठवला जाईल, जेणेकरून नुकसान भरपाईची रक्कम थेट शेतकऱ्यांच्या बँक खात्यावर जमा करता येईल."

Maharashtra Drought: प्रशासनाने तातडीने पावले उचलण्याची गरज

एकीकडे जनावरांचा चारा-पाण्याचा प्रश्न, दुसरीकडे शेतमालाला न मिळणारा भाव आणि सरकारी मदतीची प्रतीक्षा; या चक्रव्यूहात आज महाराष्ट्राचा शेतकरी भरडला जात आहे. शासनाने केवळ कागदी पंचनाम्यांवर न थांबता तातडीने चारा छावण्या, पिण्याच्या पाण्याचे टँकर आणि थेट आर्थिक मदत जाहीर करावी, अशी मागणी आता जोर धरू लागली आहे.

राज्य आणि देश-विदेशातील महत्त्वाच्या बातम्या; पाहा व्हिडीओ

आणखी वाचा

धक्कादायक! मेंढ्यांना पाणी पाजण्यासाठी गेले, जीव गमावून बसले, नाशिकच्या कजवा़डे धरणात बुडून तिघांचा मृत्यू